Kesikpɛkpɛ 17
17
Bɔnyɛnyɛ Tibhuibhui Olugbù Nyanyã
1Gɛ Abram aŋã agɔ afɛtezhyita nɛ̀ tezhyitaa, Apaleteɛ ebu yɛishu akasii pɛ etseɖe yɛasɛ, "Mɛinu Owusoso Akaa Ohumi nyɔ̃ɔ elete; gã nɛ mɛamɛ tɛ kɛpɔ bubu tɛzã wɔ ishu. 2Ɛba tɔɖɔ ahɔɛ nɛ olugbù nyanyã gɛ ɔkpasɛ mɛ nɛ wɔɛshi nabha, kɛlɛ ɛbakɔ wɔ tɛkakalà mɛ ekpe tɔɖɔ."
3Abram akpɛ bamɛ niesi, kɛlɛ Owusoso Akaa etseɖe yɛasɛ, 4"Mɛ xɔnɔ, mɛ olugbù nyanyã nɛ wɔ naalɛ: Obodzì akaa akɔ amadi gelee. 5Bezeke ekulu wɔ asɛ Abram; wɔɛnyeɛ badzì Abraham, ɔmɔsɛ ɛbhɛtɛ wɔ akaa akɔ amadi gelee. 6Ɛbakɔ sɛ oyù eyuyu; ɛbabu amadi odenɔ wɔ mɛ, kɛlɛ beekusi ebede ekoeyi nɛ wɔ mɛ. 7Ɛba bhɛtɛ mɛ olugbù nyanyã gɛoti bobele oɖi nɛ mɛ, wɔ nɛ̀ wɔ kihui nɔ nɛ wɔɛdeɛ akɔ bɔmɔɔ babaa, sɛ tɛ mɛidzì wɔ Owusoso Akaa nɛ̀ wɔɛhui nɔ gɛ babà nɛ wɔɛdeɛ balɛ Owusoso Akaa. 8Kana kesiakpa petee, gɛ kalɛ abha wɔonù efù otsiɛ nɔ, ɛbalɔkɔ kalɛ kɔwɔ nɛ̀ wɔ kihui nɔ gɛababà nɛ wɔɛdeɛ tihɔɔ, kɛlɛ ɛbadzì balɛ Owusoso Akaa."
9Kɛlɛ mɛ Owusoso Akaa etseɖe Abraham asɛ, "Wɔ xɔnɔ̃, kɛlɛ ɔsɛ tɛ ɔnyanã mɛ olugbù nyanyã mɛ ovunũ, wɔ nɛ̀ wɔɛhui nɔ gɛ ababà nɛ wɔɛdeɛ akɔ bɔmɔɔ gɛ babaa. 10Mɛ olugbù nyanyã nɛ wɔ nɛ̀ wɔɛhui nɔ gɛ babaa naalɛ, olugbù nyanyã gɛ kɛlɛ ɔsɛ nɔbhɛtɛ; Bebhui bɔnyɛnyɛ akɔ anɔnyɛ kanyiaka nɛ wɔnɔ ɛshi. 11Kɛlɛ ɔsɛ nɔgã bɔnyɛnyɛ bhuibhui mɛ, kɛlɛ badzi olugbù nyanyã kɛwɔ̃ɔ nɛ mɛ nɛ̀ wɔɛshi. 12Nɛ bɔmɔɔ̃ gɛbaba, bebhui bɔnyɛnyɛ akɔ anyɛ kanyiaka gɛ aŋã ewui taasɛ nɛ wɔnɔɛshi, bagɛ bamɔ́ nɛ wɔ bɔpãmɛ, pɛnɔsɛ pɛ bedzii nɛ̀ ehoeyi odenɔ efù ɔkɔ-bagɛ etinu wɔ eyimɔmɔ alɛ. 13Onupɛ wɔpamɛ bamɔ́ alɛ pɛnɔsɛ balɔkɔ wɔ ehoeyi edzi alɛ tsyɛelo, kɛlɛ ɔsɛ bebhui bɔnyɛnyɛ akɔ balɛ. Kɛlɛ ɔsɛ mɛ olugbù nyanyã nɛ wɔ ishupiɛ dzi olugbù nyanyã tihɔɔ. 14Anyɛ nɔnɔ gɛ begi bhui bɔnyɛnyɛ akɔɛ, pɛ begibhui bɔnyɛnyɛ akɔɛ nɛ ishudzya mɛ, bebèbu yɛɔtɔ nɛ yɛeshopo alɛ nɛishi; eboele mɛ olugbù nyanyã."
15Owusoso Akaa ewuli etseɖe Abraham asɛ, "Wɔedzinì Sarai xɔnɔ, ɔzɔkɔ okulu yɛɔsɛ Sarai, yɛinyeɛ badzi Sara. 16Ɛbà yulà tɔɖɔ kɔɛ kɛlɛ ɛbakɔ wɔ eyianyɛ ɔganà yɛabha gɛ kɛtɛ batsyina. Ɛbà yula akɔɛ sɛ tɛ ebedzì elĩ akɔ amadiɛ; banɔ balɛ bekusi ebede koeyi nɛ yɛ mɛ."
17Abraham atsɛ bamɛ akpɛ kesi; amɔɛmɔɛ kɛlɛ aɖɔ etseɖe yɛishu asɛ, "Bazabà mɔ eyianyɛ akɔ anɔnyɛ gɛ atɛŋã agɔ kɛkpã zɛzɛ dza? Sara azabamɔ̃ eyi gɛ atɛŋã agɔ afɛtezhyita dza?" 18Kɛlɛ Abraham etseɖe Owusoso Akaa asɛ, "Onupɛ Ishmael abazã wɔ tiyuyulà esi xɔnɔ!"
19Kɛlɛ mɛ Owusoso Akaa aɖɔ asɛ, "Ee, pɔ wɔedzini Sara abamɔ eyianyɛ akɔwɔ, tɛ okulu yɛɔsɛ Isak. Ɛba bhɛtɛ mɛ olugbù nyanyã nɛ yɛ gɛ ebedzì olugbù nyanyã tihɔɔ akɔ yɛ kihui nɔ gɛababà nɛ yɛedeɛ. 20Kɛlɛ Ishmael xɔnɔ, ilũ wuɛbuiɛ, ɛbà yulà kɔɛ gɛ kɛtaba tsyina; ɛbakɔ yɛeyu eyuyu gɛ ɛbakɔ yɛ tɛkakala mɛ kpe tɔɖɔ. Ebedzi akaa akɔ bekusi lɔfɔ nɛ̀ taabha, kɛlɛ ɛbà kɔ yɛebedzì kɛmadi hohoe. 21Pɔ mɛ olugbù nyanyã, ɛbabhɛtɛ nɛ̀ Isak, gɛ Sara abamɔ akɔ wɔ kɛgɔana kibe ɛlɛ mɛ." 22Gɛ aɖɔ kaɖɔ ebekeɛ nɛ̀ Abraham, Owusoso Akaa ashɛ ewu kabha nɛ yɛɔbhà.
23Kiwui ɛlɛ nabha tsiɔ̃ Abraham alɔkɔ yɛeyianyɛ Ishmael nɛ̀ bagɛ bamɔ́ nɛ yɛɔpãmɛ petee, pɛnɔsɛ banɔ gɛ bedzì balɛ nɛ̀ ehoeyiɛ, anɔnyɛ kanyiaka nɛ yɛ bɔpãmɛ kɛlɛ ebhui bɔnyɛnyɛ akɔalɛ, asɛ gɛ Owusoso Akaa etseɖe yɛ. 24Abraham atɛŋã agɔ afɛtezhyita nɛ̀ tezhyita gɛ ebhui bɔnyɛnyɛ, 25kɛlɛ yɛeyianyɛ Ishmael atɛŋã agɔ lɔfɔ nɛ̀ taata, 26bebhui bɔnyɛnyɛ akɔ Abraham nɛ̀ yɛeyianyɛ Ishmael nɛ kiwui tinikpo ɛlɛ nabha. 27Kɛlɛ anyɛ kanyiaka nɛ Abraham bɔpãmɛ, nɛ̀ bagɛ bamɔ́ pɛnɔsɛ bedzì edenɔ efù ɔkɔ, bebhui bɔnyɛnyɛ akɔalɛ aplɛnii.
Currently Selected:
Kesikpɛkpɛ 17: NYB
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Languages, Literacy and Bible Translation GILLBT
