1 कुरिन्थी 14
14
1जामाकु लोः दुलारेपे आउर पबितर आतमा रेनअः एम लआ वरदान न-नाम लःअय फिकिरेपे, आउर खास केते आगमजानी लःअय मुरुक फिकिरेपे। 2जे होड़ एटाअ भाखा रे बातेआय, हुनी मनवा तरअः कोवान बकिर परमेसर लोः बातेआय, निआँ लःअय ची हुनी आला बात के ओके होः काकु समझाआ, एता लःअय ची हुनी उकु ओना बात पबितर आतमा रेनअः मदाईत तरअः आतमा रेनअः बात कंहड़ीयाय। 3हुनी जे आगमजानी याय, हुनी होड़कु के बेता कुआय, बिसवास रे बढ़ोतरी, डिड़ आउर संतवाना एमेआय। 4जे एटाअ-एटाअ भाखा रे कंहड़ीयाय दो, अपन केटेगोआय, जे आगमजानी याय, हुनी कलीसिया रिनकु आला बिसवास के बड़हायाय। 5ईङ चहाअ तानिङ ची आपे एटाअ-एटाअ भाखा कंहड़ीपे, बकिर नोःआँ तरअः जादे ईङ चहाईंग ची आपे आगमजानी सकायपे। जदि जाहें एटाअ भाखा कंहड़ीयाय दो कलीसिया रअः बढ़ोतरी लःअय, होना एटाअ भाखा रेनअः माने ससमझाव वाला हुयाअः चाही। कोवान दो एटाअ भाखा क-कंहड़ी रअः बराकाईत तरअः परमेसर पखा तरअः क-कंहड़ी रअः बराकाईत होना तरअः बाईढ़ केते एदनाआ। 6हिना लःअय ए बोकोकु, जदि ईङ आपे दुबाःड़े हीःग केते एटाअ भाखा रे बातेईंग दो, आपे लःअय एतान फयदा, जदि ईङ परमेसर पखा तरअः खास संदेस, बुधी, परमेसर पखा तरअः जहान बात, चाहे सिख आपे के एमेईंग दो तब आपे के फयदा हुयाव कोआ। 7होड़कु बाँसरी चाहे सारंगी बजायाकु, होना जिनीस हेके, जदि होना रेनअः साड़ी, ताल-तुल रे का बजाअ ताना दो, ओके होः इरकु पाड़ी दड़ीआ ची एतान बजाअ ताना। 8लड़ाई रे ब-बजाव वाला तुरही रेनअः सबद सफा-सफा आलु साड़ीयोः दो, फिन लड़ाईयोअ लःअय ओके तेयार कोआय? 9हिना लकान आपे होः एटाअ भाखा रे बातेआपे दो, सफा-सफा कापे बातेआ दो, आपे एतान कंहड़ीः दापे सेके इरकु बुझाआ। जदि नोकानेआपे दो आपे आला बड़-बड़ाअ तरअः ओके होः इरकु समझाआ। 10दुनिया रे काईको भाखा एता लःअय आलु ताहिन, बकिर होना मेसे जहान होः बेगर माने रेनअः कनोआँ। 11हिना लःअय जब तक होना भाखा रेनअः माने आलुईंग पाड़ी तब तक, क-कंहड़ी वाला लःअय ईङ परदेसिया ठहराव कोईंग, आउर क-कंहड़ी वाला ईङ लःअय परदेसिया ठहराव कोआय। 12आपे रे होः निआँ बात एदनाआ। एता लःअय ची आपे पबितर आतमा रेनअः एम लआ बराकाईत के नानम लःअय जुरजुटेआपे। थोड़ेक पबितर आतमा एम लआ वरदान कलीसिया रेनअः बढ़ोतरी लःअय मदाईत एमेआय। नोकान पबितर आतमा एम लआ वरदान न-नाम लःअय जुरजुटेआपे जे मंडली रेनअः बढ़ोतरी याय। 13हिना लःअय एटाअ भाखा क-कंहड़ी वाला परमेसर तरअः नोःआँ बिनतीये, ची नोःआँ ससमझाव लःअय पबितर आतमा एम लआ वरदान भेटाव सकाअ। 14जब ईङ एटाअ भाखा रे बिनती यींग, दो ईङ आला आतमा दो बिनती हताड़ेआय, बकिर ईङ आला मन काय कमिया। 15दो ए-एतान चाही? ईङ अपन आतमा तरअः बिनती केईंग, बकिर गाती-गाती अपन मन तरअः होः बिनती यींग, ची ईङ समझाईंग। अपन आतमा तरअः दो हुनी आला सिरिंगेईंग बकिर अपन मन तरअः होः हुनी आला सिरिंगेईंग ची ईङ समझाईंग। 16जदि आपे आतमा रे पेरेःग केते परमेसर आला स्तुति एटाअ भाखा रेअ दापे दो एटाअ होड़ एतान होः इरकु बुझाआ। हिना लःअय “आमीन” एरकु कंहड़ी दड़ीआ। 17आम भले गी बढ़ियाँः केन धन्यवाद एम दाम, बकिर एटाअ होड़ के केकेटेःग एरोम दड़ीआ।
18ईङ परमेसर के धन्यवाद एमाईंग ची ईङ आपे जामाकु तरअः जादे एटाअ-एटाअ भाखा रे कंहड़ी दाड़ीईंग। 19बकिर कलीसिया रे एटाअ भाखा तरअः हजारों हजार ब-बात काईंग नामा, ईङ नोःआँ तरअः जादे चहाईंग ची ईङ अपन बुधी तरअः मि-बार बात कंहड़ीयीङ, जेकर से ची होड़कु के सिखाव दाड़ी किकुईंग।
20ए बोकोकु बालेक चेंगाकु बु-बुराई काकु पाड़ीआ, हिना लकान गी आपे होः बालेक चेंगाकु लकान पाड़ीयोअपे। बकिर सोंच विचार रे बालेककु लकान आलपे पाड़ीयोअ, सेंयाड़ होड़कु लकान सोंचायपे। 21#जसा 28:11,12जे लकान ची परमेसर आला कनहुन रे लिखा लअः एदनाआ परभु कंहड़ीयाय
“जे एटाअ भाखा दोवासते
परदेसिया होड़कु दोवासते
ईङ नुकू होड़ लोः बातेईङ
सेरे होः हुंकू ईङ आला बात इरकु आयुमेआ।”
22हिना लःअय एटाअ भाखा अबिसवासीकु लःअय परमेसर आला सकती रेनअः चिनहा हेके, बकिर बिसवासीकु लःअय कोवान। जे परमेसर पखा तरअः कंहड़ीयाय, होना तरअः ख्रीस्त रे विसवासेआकु हुंकू मजगुतोआकु। नोःआँ ख्रीस्त रे काकु विसवासेआ लःअय फयदा कनोआँ। 23जब जामा कलीसिया जवार जुनोआकु हिमीन रे जदि जामेकु एटाअ-एटाअ कंहड़ी याकु हिमने रे बेगार पाड़ी होड़, चाहे ख्रीस्त रे काकु बिसवासेआ होड़, भीतरी हीःग जुनोआकु दो हुंकू एतान आपे के बयाव उनकु इरकु कंहड़ीआ? 24बकिर जदि जामे आगमजानीः दाकु आउर जाहें ख्रीस्त रे काकु बिसवासेआ होड़, चाहे बेगार पाड़ी होड़ भीतरी हीःग जुनोः कु, आउर पाड़ी केआय ची ईङ पापी हेके तब हुनी खुदे परखाव कोआय। 25आउर हुनी आला मन रे उकु ओना बात दिसतार कोआ, हिमीन रे हुनी ईकड़ुम केते नोःआँ कंहड़ीयाअते “सचे गी आपे ताला रे परमेसर इदानियाँ” मेन केते, परमेसर आला आराधना केआय।
परमेसर आला बड़ाई रअः बारे रे पौलुस कंहड़ीआय
26ए बोकोकु ए-एतान चाही? जब आपे कलीसिया रे जवारोआपे दो थोड़ेक सिरिंगेआकु, थोड़ेक सिखाव कुआकु, चाहे परमेसर तरअः दिसतार उना बचन के होड़कु के उदूः कुआकु। आउर एटाअ-एटाअ भाखा रे क-कंहड़ी आउर एटाअ-एटाअ भाखा रअः माने के उदूः कुआकु। बकिर ईङ आपे के उदूःपेईंग ची नोःआँ जामा बात ख्रीस्त रे बिसवासीकु के बढ़ोतरी लःअय हुयाआ चाही। 27जदि जाहें के एटाअ भाखा क-कंहड़ी एदनाआ दो जादे से जादे बनहोंड़ चाहे पे-होड़ के गी मि-मिहोंड़ पाला-पाली क-कंहड़ी चाही। आउर मिहोंड़ होड़ नोःआँ एटाअ भाखा रअः माने के उउदूः चाही। 28जदि होनाःड़े बा-बखनाव वाला कनिकुआ दो एटाअ भाखा क-कंहड़ीकु के कलीसिया रे सिड़िग्या ताहिनोअ चाही। फिन हुनी के अपन तरअः आउर परमेसर तरअः गी बा-बतियाव चाही। 29आगमजानी रेनअः भेस रे, जेके क-कंहड़ी लःअय बराकाईत भेटाव ताना नोकान कु बनहोंड़ चाहे पे-होड़ के गी क-कंहड़ी चाही बाकी होड़ के, जे हुनी बचन कंहड़ी तदाय सेके ज-जचाँव चाही। 30जब मिहोंड़ होड़ परमेसर आला बात के उदूः गेआय, आउर हिमीन बेरा एटाअ होड़ के परमेसर तरअः मियांड संदेस भेटाव ताना, आउर हुनी उउदूः नामाय, दो पहिल तरअः गी कंहड़ीः दाय के सिड़िग्या ताहिनो चाही। 31आपे जामा परमेसर जे कंहड़ीयाय होना के आगमजानी सकायापे, बकिर आपे मि-मिहोंड़ केते कंहड़ी पे। जेकर से ची कलीसिया के जामाकु लःअय सिखाअः कु के ढाढ़स भेटाआ। 32आगमजानीकु अपन आतमा के खुद रेनअः काबु रे दोहो दड़ीआकु, दो अपन मरजी मोताबिक बात दाड़ीआकु चाहे कंहड़ी चबा दाड़ीआकु। 33एता लःअय ची परमेसर गड़बड़ी रिनी कोवान, बकिर सानती रिनी परमेसर हेके। जे लकान ची पबितर होड़कु आला कलीसिया रे एदनाआ।
34पबितर होड़कु आला जामा कलीसिया लकान, आपे आला कलीसिया रे आउराईतकु के मंडली रे सिड़िग्या ताहिनो चाही, एता लःअय ची हुंकू के बाबत लःअय हुकूम कनोआँ। जे लकान मुसा आला कनहुन रे लिखा उना एदनाआ। आउराईतकु कबजा रे ताहिनो कु। 35जदि हुंकू जहान पापाड़ी नामाकु दो हुंकू के ओड़ाअ रे अपन-अपन हेरेल तरअः कु-कुली चाही। मियांड आउराईत लःअय सभा रे क-कंहड़ी लाज रअः बात हेके। 36ए कुरिन्थी रिनकु होड़कु, एतान परमेसर आला वचन आपे तरअः उडुंग ताना? चाहे आपे दुबाःड़े भाईर सोदोर ताना एतान? 37जदि जाहें होड़ अपन के आगमजानी चाहे आतमिक होड़ समझाआय, दो हुनी नोःआँ पाड़ीये ची जे बात ईङ आपे लःअय लिखाः दिंग होना परभु आला हुकूम हेके। 38बकिर जदि जाहें नोःआँ परभु आला हुकूम के काय मनाआ, दो हुनी के होः एरे चिनहाईया।
39हिना लःअय ए बोकोकु, आगमजानी लःअय जादे चिहुटेपे, बकिर एटाअ भाखा क-कंहड़ी रे आलपे बधराव कु। 40बकिर नोःआँ जामा बात सही ढंग से आउर मि-ओर क-कामी चाही।
Currently Selected:
1 कुरिन्थी 14: ASR
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0