1 कुरिन्थी 3
3
परमेसर आलकु धाँगड़
1ए बोकोकु, जे लकान पबितर आतमा नाम लिनकु लोः बा-बतियाव ताहिना, होकान काईंग बतियाव दाड़ी लआ। ईङ के आपे लोः नोकान बा-बतियाव पड़ाव नेना, जे लकान दुनिया रिनकु होड़ बिचारेआकु, आपे जे लकान ख्रीस्त रअः सिखाः रे बालेक चेंगाकु लकानापे, हिना लःअय ईङ आपे लोः हिना लकान बतियाव लाईङ। 2#इब्रा 5:12,13बलेक चेंगा जे नहाअः तोवा नुअ दाकु, हुंकू के घोटो एमोः बेस कनोआँ, हिना लकान ईङ आपे के कठोर सिकछा काईंग एम लआ। एता लःअय ची आपे होना लःअय तेयार कापे ताही नेना, हाँ नहाअः होः तेयार कानीपेआ। 3एता लःअय ची नहाअः जगुत होः आपे दुनिया रेनअः इकछा रे एदान पेआ, जदि आपे रे हिसंगा आउर झगड़ा हुयाआ, दो एतान दुनिया रेनअः इकछा रे कनेपेआ? एतान हुंकू लकान चलाआपे, जे परमेसर आलकु नलागे। 4#1 कुरि 1:12जब आपे मेसे मिहोंड़ कंहड़ीआय ची,
“ईङ पौलुस आली होड़ हेके” आउर एटाअ कंहड़ीआय,
“ईङ अपुल्लोस आली होड़ हेके” दो सचे गी परमेसर के मनाअ वाला नलागे?
5अच्छा दो पौलुस ओके हेके? आउर अपुल्लोस ओके हेके? आलिंग दो सिरीफ परभु आलकिन धाँगड़ हेके। आलिंग दोवासते आपे ख्रीस्त रे बिसवास लआपे, आलिंग हिना काम कामी तदालिङ, जे परभु आलिंग के सोंपाव थिलाआय। 6#प्रे.कामी 18:4–11; प्रे.कामी 18:24–28ईङ बिहिन के बिःड लाईङ, अपुल्लोस होना के पटाव लःअय, बकिर परमेसर होना के हरा लःअय। 7नोःआँ लकान ना दो जे बि-बिडी आला गी माने एदनाअ, आउर ना गी प-पटावी आला, बकिर ह-हराई परमेसर आला गी माने एदनाआ। 8बिबि:डी आउर पापटावी वाला आला मियांड गी विचार एदनाआ, परमेसर हुंकिन बनाहोड़ के अपन-अपन कामी रअः मोताबिक बानी एमा किकिनाय। 9एता लःअय ची आलांग बनाहोड़ परमेसर लागीन साँघे ककामी वाला हेके।
आउर आपे परमेसर आलकु बखड़ी आउर बंगला हेके। 10परमेसर आला होना दया तरअः, जे ईङ के एम लअः एदनाआ, ईङ बेस राजमिसतिरी लकान नेव ला लाईङ आउर एटाअ होना तेंग रे रदा राकाःब दाकु। जमा-झन के हुसियारी से का-कामी चाही। 11होना के बाई केते, जाहें एटाअ नेव एरे ला दड़ीआ, आउर होना नेंव ईसु ख्रीस्त हेके। 12जदि जाहें होड़ नोःआँ नेंव तरअः नेव रे ब-बनाव लःअय, काईको बरन रअः जिनीस के आगुयाकु, नोःआँ रे सोना, चाँदी, हीरा लकान बेस जिनीस एदनाआ, आउर काठ चाहे बीर चाहे भुसा रे बनायकु, जे लकान जिनीस जे बेस कनोआँ, हिना लकाना। 13जब परभु जामे झन आला नेनेयाय हिजोआय, दो जामे मनवा आला काम दिसतार कोआ, ची जामे एता लकान कामी तदाकु। आउर होना सेंगेल तरअः जामे झन आला काम के परखाव केआय। 14जदि होना नेंव रे कामी लअः टिकाव ताहिनोअ रेदो, हुनी के बानी भेटाव कोआ। 15जदि जाहें होड़ आला काम लो जुनोः रेदो इनाम एरे भेटाआ, हुनी दो अपने बंचाव कोआय। बकिर सेंगेल तरअः बंचाव उडुंग उनी होड़ लेकाना।
16 #
1 कुरि 6:19; 2 कुरि 6:16 एतान आपे कापे पाड़ीआ ची आपे मियांड ओड़ाअ लकानापे, जेकर रे परमेसर डेरायाय, आउर परमेसर आला आतमा आपे रे ताहिनोआ? 17जदि जाहें परमेसर आला बड़े बिनती ओड़ाअ के नासेआय, दो परमेसर हुनी के नास कियाय, एता लःअय ची परमेसर आला ओड़ाअ पबितारा, आउर होना ओड़ाअ आपे गी हेके।
18अपने आप धोखा रे आलपे ताहिकोअ, जदि आपे मेसे जाहें अपन के नोःआँ दुनिया रे बुधीमन समझाआय दो, हुनी मुर्ख बनाव जुनोआय, जेकर से ची हुनी परमेसर आला नजाईर रे बुधीमन पाड़ी जुनोय। 19#अयु 5:13एता लःअय ची परमेसर आला नजाईर रे नोःआँ दुनिया रेनअः बुधी मुरुखता हेके, परमेसर आला बचन रे नोःआँ लिखा लअः एदनाआ, “परमेसर बुधीमनकु के, हुंकू आला चतुर रेगी फंसाव कुआय।” 20#सिरिंग 94:11आउर नोकान होः लिखा लअः एदनाआ ची, “बुधीमनकु आला विचार जामा बेकार हेके।” होना के परभु पड़ीआय। 21हिना लःअय आपे जाहें मनवा रे आलपे घमन्ड के। परमेसर जामा कुछ आपे लःअय एम तदाय। 22चाहे पौलुस के, चाहे अपुल्लोस के, चाहे कैफा चाहे नोःआँ दुनिया, चाहे जिनगी चाहे मराईन चाहे नहाअः रेनअः बेरा चाहे हिजोअ वाला बेरा, नोःआँ जामा आपे आला हेके। 23आउर आपे ख्रीस्त आलकु हेके, ख्रीस्त परमेसर आली हेके।
Currently Selected:
1 कुरिन्थी 3: ASR
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0