प्रेरित.कामी 25
25
पौलुस, कैसर दुबाःड़े
1होना पहटा सोदोर केते पे रोज तयोम, फेस्तुस कैसरिया तरअः जिरोसलेम सेन नेनाय। 2-3हिमीन रे महापुरोहित आउर जाहुदी नेताकु, पौलुस तेङ रे दोस ला-लगाव लःअय फेस्तुस दुबाःड़े हीःग नेनाकु। हुंकू फेस्तुस तरअः, पौलुस के जिरोसलेम ईइदी लःअय दया लःअय गोहराव नेनाकु। एता लःअय ची पौलुस के हुंकू होरा रेगी गोगोएःग लःअय कुमायटी थिलाअकु। 4बकिर फेस्तुस कंहड़ी रूवाड़ोः लिकुआय, “पौलुस कैसरिया रेनअः जेहेल ओड़ाअ रे जेहेलाय। आउर ईङ जल्दी गी कैसरिया सेनिङ। 5हिना लःअय आपे आलकु नामी होड़कु ईङ लोः दु, जदि हुनी होड़ जहान कसुर तदाय दो हुंकू, हुनी तेङ रे दोस लगायकु।”
6फेस्तुस नेकान आठ-दस रोज हुंकू तलारे ताही केते कैसरिया सेन नेनाय, तेकर दोसरा हिला नेयाय रअः गद्दी रे दुड़ूः केते, हुनी पौलुस के रा-राअः कुलगोःड लिकुआय। 7जब पौलुस हीःग नेनाय दो जिरोसलेम तरअः हीःग उनकु जाहुदीकु, ढेर जकड़ाल दोस लगाव यअते हुनी आला चौगिरदा तिंगुअ नाकु, बकिर होना रेनअः साबुत एमोअ काकु दाड़ी लआ। 8बकिर पौलुस अपन के बनचाव-यअते, “ईङ ना दो जाहुदीकु आला कनहुन रेनअः बिरोध रे, ना बड़े बिनती ओड़ाअ रआ बिरोध रे, आउर रोमी महाराजा कैसर रेनअः बिरोध रे जहानअ कसुर तदिङ,” मेन केते बेता लिकुआय।
9बकिर फेस्तुस जाहुदीकु के खुखुस लःअय, “एतान आम जिरोसलेम सेनोः लःअय तेयार एदान मेआ, जेकर से ची होनाःड़े ईङ मड़ांग रे नोःआँ बात रेनअः बारे रे आम आला फैसला यींग?” मेन केते पौलुस के कुली लियाय। 10पौलुस कंहड़ी लःअय “ईङ कैसर आला नेयाय रअः गद्दी रे तिंगु तानिङ, ईङ आला फैसला निआँड़े हुयाअः चाही, ईङ जाहुदी लोः एतान होः काईङ कसुर तादा नोःआँ के आम बढ़ियाँ से पाड़ीआम। 11जदि ईङ कसुरदार हेके तेकर गोएःग चिनोअ लकान जहान कसुर तदिङ दो ईङ गोजोः लःअय काईङ बोर ताना, बकिर जे बात रेनअः नुकू ईङ रे नालिसेआकु, जदि होना मेसे रे मियांड-मिन बात सचा का ठहराव ना दो ओके होः ईङ के हुनी तीः रे सोसोंपाव ईरकु दड़ीआ। रोमी महाराजा कैसर दुबाःड़े ईङ गोहराअ तनिङ।”
12तब फेस्तुस अपन मंत्री कु लोः बात-बिचार केते, “आम कैसर बड़े पंचाईत सेनोः लःअय गोहराव तदाम हिना लःअय रोमी महाराजा दुबाःड़े सेन कोआम,” मेन केते कंहड़ी लःअय।
राजा अग्रिप्पा दुबाःड़े पौलुस
13थोड़ेक दिन तयोम राजा अग्रिप्पा तेकर बिरनीके कैसरिया रे हीःग केते फेस्तुस आला सो-सोवागत लःअय हीःग नेनाकिन। 14हुंकिन होनाःड़े ढेर दिन ताही नेनाकिन, हिमीन बेरा फेस्तुस, पौलुस रेनअः बारे राजा के उदूः लियाय, “नोआँड़े मियांड होड़ एदानिया जेके फेलिक्स जेहेल ओड़ाअ रे बाईःग-तु तदियाय। 15जब ईङ जिरोसलेम रे सेन निनिंग दो जाहुदीकु आलकु महापुरोहितकु तेकर अगुवाकु, हुनी तेङ दोस ठ-ठहराव लःअय तेकर हुनी के डांड़ एमोअ चाही मेन केते गोहराव नेनाकु। 16जब तक जाहें कसुरदार के दोस लगाव कु मड़ांग रे तिंगु केते, अपन बचाव रे क-कंहड़ी रूवाड़ लःअय मोका आलु भेटाअः जगुत, हुनी कसुरदार के डांड़ एमोअ लःअय सोंसोपाव रोमीकु आला दसतुर कनोआँ मेन केते, ईङ कंहड़ी रूवाड़ओ लिकुईंङ। 17हिना लःअय हुंकू नोआँड़े हीःग नेनाकु तेकर ईङ बेगार दिरीते दोसरा हिलागी नेयाय रअः गद्दी रे दुड़ूः केते, हुनी होड़ के रा-राअः आगु कुलगोःड लिकुईंङ 18बकिर मुदाई नोकान एतान होः हुनी बिरुध रे बुरा दोस काकु लगाव लआ, जे लकान ईङ सोंचाय केनिङ। 19बकिर हुंकू आला कंहड़ी उपड़ीङ हुनी लोः अपन धरम रे, थोड़ेक बात तेकर ईसु नुमू रिनी मियांड होड़ रअः बारे भाईर ताही नेना, ईसु जे गोएःग ताही नेनाय, बकिर पौलुस हुनी के जिवीःड उदूगे केनाय। 20ईङ नोःआँ बात आयुम केते दुबिधा रे ताही निनिंग, हिना लःअय ईङ पौलुस के, आम जिरोसलेम सेनोः लःअय तेयार एदान मेआ एतान? जेकर से ची होनाःड़े नोःआँ बात रेनअः बारे, आम आला फैसला यींग? मेन केते कुली लियीङ। 21बकिर पौलुस गोहराव नेनाय ची महाराजा कैसर आला फैसला हुयाअः जगुत हुनी के जेहेल ओड़ाअ रे ताहिः चाई, हिना लःअय जब तक ईङ हुनी के कैसर दुबाःड़े आलुईंग कुलगोःडि-जगुत जेहेल ओड़ाअ रे ताही नोआय मेन केते हुकूम एमा लिकुईंङ।”
22जब अग्रिप्पा फेस्तुस के बेता लियाय, “ईङ होः हुनी होड़ आला बात के आ-आयुम चहाअ तानिङ, हुनी आम गपा आयुमेमे,” मेन केते फेस्तुस बेता लियाय।
23दोसरा हिला अग्रिप्पा तेकर बिरनीके बड़ा गजमघोल से हीःग केते, तेकर पलटनकु आलकु सरदारकु तेकर सहर रिनकु नमी होड़ लोः सभा ओड़ाअ रे सोदोर नेनाकु, तब फेस्तुस पौलुस के आगुयपे मेन केते हुकूम एमा लिकुआय। 24फेस्तुस बेता लिकुआय, ए महाराजा अग्रिप्पा आउर ए नोआँड़े जवार उनकु जामे होड़कु, आपे नुई होड़ के नेल दियापे, जेकर बारे रे जिरोसलेम रिनकु जामा जाहुदी खुड़हा रिनकु ईङ लोः भेंटोः हीःग नेनाकु, तेकर नुई होड़ जिवीःड ताहीनोः लकान कनियाँ मेन केते जोर-जोर से गुल यआते गोहराअ केनाकु 25बकिर नुई रे गोगोएःग लकान एतान होः गुनाह काईङ नाम लआ, जब कि नुई आएंग गी महाराजा आला मड़ांग फ-फैसलाअः ची लःअय गोहराव नेनाय, दो ईङ हुनी के कु-कुलगोःड लःअय उपाई लाईङ। 26गोमके के नुई रअः बारे रे लि-लिखा लःअय ठेकाना जिनीस काईङ नाम लआ, हिना लःअय ईङ हुनी के आपे मड़ांग रे तेकर खास केते दो ए राजा अग्रिप्पा जचाँव तयोम ईङ के जहानअ लि-लिखा भेटाअः मेन केते आम मड़ांग रे आगु तदियीङ। 27एता लःअय ची मियांड कैदी के जहान दोस बेगार लगाव-ते कैसर दुबाःड़े भे-भेजाव बेस का आदा नेना।
Currently Selected:
प्रेरित.कामी 25: ASR
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
