प्रेरित.कामी 26
26
अग्रिप्पा मड़ांग रे पौलुस आला भासन
1राजा अग्रिप्पा पौलुस के बेता लियाय, “आम के अपन रअः बारे क-कंहड़ी रेनअः हुकूम एदनाअ।” तब पौलुस तीः ताय के फैलाव केते कंहड़ी रूवाड़ओ दिकुआय,
2“ए राजा अग्रिप्पा, जेतना बात रेनअः जाहुदीकु ईङ तेङ रे दोस लगायाकु, तिसिंग आम मड़ांग रे होना रेनअः उतारा एमोअ रे, ईङ अपन के धनया समझअ तानिङ। 3खास कर निआँ लःअय ची, आम जाहुदीकु आला जामा दसतुर तेकर झगड़ा के बढ़ियाँ से पड़ीआम। ईङ आम तरअः धीरज ते ईङ आला बात के आयुमेमे नोःआँ बिनतीः दिंग।
4“जे लकान ईङ आला चाईल-चलन अपन जाईत रे आउर जिरोसलेम रे छोटे बेरा तरअः इदी केते, एता लकान ताहिना नोःआँ के जामा जाहुदीकु पाड़ीआकु। 5#प्रे.कामी 23:6; फिलि 3:5हुंकू ईङ के ढेर पहिल तरअः पाड़ीआकु तेकर जदि हुंकू चाहाआकु, दो गोवाही एम दड़ीआकु, ईङ फरीसी हुयाव केते अपन धरम रेनअः जामा तरअः खरा होरा मोताबिक जिनगी बिताव लिईङ। 6परमेसर जे आबु आलकु पुरखाकु लोः वादा तदाय, होना रे ईङ आला आसरा रअः चलते ईङ तेङ रे केंस-फाउदारी चलाअ ताना। 7हिना करार पुरा हुयाअः रअः आसरा लगाव-यअते, आबु आलकु बारहों गोतोर अपन गोटा मन तरअः, निदा-सिङ परमेसर आला सेवा आगु तदाकु। ए राजा निआँ आसरा रअः बारे रे जाहुदीकु ईङ तेङ रे दोस लगायाकु। 8जब ईङ जाहुदीकु के नोःआँ कुकुली चहाअ तानिङ, ची एता लःअय नोःआँ बात के बि-बिसवास जुकूर कापे समझाआ? ची परमेसर गोएःग उनकु के फिन जिवीःड-बिरिःड किकुआय।
9 #
प्रे.कामी 8:3; 22:4,5 “ईङ होः जामा लकान नासरत रिनी ईसु आला नुमू रअः बिरोध रे, ढेर ककामी एदनाअ मेन केते सोंचाव थिलिईङ। 10आउर ईङ जिरोसलेम रे हेंकान थिलिईङ, तेकर ईङ बड़े पुरोहितकु तरअः हक नाम केते, ढेर पबितर होड़कु के जेहेल आदेर लिकुईंङ, तेकर जब हुंकू के गोएःग कु केनाकु दो ईङ होः हुंकू बिरोध रे अपन सलाह एमा कु किनिङ। 11जामा बिनती ओड़ाअ रे सेन केते तेकर सताव केते ईसु आला निन्दाअ चिकु किनिङ तेकर ईङ आला खीस नुमिन जगुत रकाःब ना ची बाहरी सहर रे होः सेन केते सताव कु किनिङ।
पौलुस अपन मन रूरुवाड़ रअः बखान
(प्रेरित.कामी 9:1–19; 22:6–16)
12“निआँ धताम रे जब ईङ बड़े पुरोहितकु तरअः हक आउर हुकूम रेनअः चिठी ईदी केते दमिस्क सेनोः किनिङ। 13दो ए राजा होरा रे दुपहरा बेरा, सिरमा तरअः सिंङ बोंगा आला तरास तरअः होः, जादे तरास ईङ आला तेकर ईङ आलकु गातीकु चौगिरदा लवकाव नेना। 14आले जामा ओत रे नुर नले तेकर इब्रानी भाखा रे नोकान कंहड़ी यअते मियांड सबद आयुम नेना, ए साऊल, ए साऊल आम ईङ के एता लःअय सताईङाम? पायना रे लगाव लआ काँटी रे पापादा आम लःअय मसकिल एदनाआ। 15‘परभु आम ओके हेके’ मेन केते ईङ कंहड़ी लाईङ, ईङ ईसु हेके, जेके आम सताईङाम मेन केते परभु कंहड़ी रूवाड़ लःअय। 16बकिर आम बिरिःड में तेकर अपन पाँव रे तिंगुनमे, ईङ आम लोः निआँ लःअय देखार निनिंग ची आम के अपन गोवाह तेकर से-सेवाई ठहराव मेईङ। आम ईङ बारे जे नेल लआम आउर तयोम होः नेल केआम, होना रअः बारे गोवाह एम-केआम। 17तेकर ईङ आम आलकु होड़ तरअः तेकर एटाअ जाईतकु तरअः छोड़ाव एका मेईङ, जेकर दुबाःड़े ईङ नहाअः हिना लःअय आम के कुलगोःड दिमीईंङ। 18ईङ आम के हुंकू आला मेःड खो-खोलाव लःअय, हुंकू के अंधार तरअः मरसल पखा तेकर सैतान आला हक तरअः परमेसर पखा फिराआकु लःअय आम के हुंकू दुबाःड़े कुलगोःड दिमीईङ। जेकर से ची हुंकू ईङ तेङ रे बि-बिसवास रअः चलते, अपन पाप रअः छमा नामेकु तेकर पबितर लिदकु संत कु तलारे ठाँव नाम दाड़ीकु।
19“ए राजा अग्रिप्पा ईङ होना सिरमा रअः दर्सन रअः बात के काईङ टगाव दाड़ी लआ। 20#प्रे.कामी 9:20,28,29बकिर पहिल रे दमिस्क रे, तेकर जिरोसलेम रिनकु होड़ रे तेकर होना तयोम गोटा जाहुदिया पहटा तेकर एटाअ जाईत रे होः परचार लाईङ, ची मन रूवाड़ेपे तेकर परमेसर पखा रूवाड़ केते मन रूवाड़ लअः लकान बेस कामीपे। 21निआँ बात रेनअः चलते जाहुदीकु ईङ के बड़े बिनती ओड़ाअ रे सःब लिङाकु आउर गोगोएःग नाम केनाकु 22बकिर ईङ परमेसर आला सहाड़ा रे तिसिंग जगुत एदानिङा, तेकर छोटे-बड़े जामाकु मड़ांग रे गोवाही एमा कुईंग, तेकर जे आगमजानीकु तेकर मुसा होः कंहड़ी लःअय ची हुयाअः वाला एदनाअ होना बात के बाई केते एतान होः काईङ कंहड़ीया। 23#1 कुरि 15:20; जसा 42:6; 49:6ची ख्रीस्त के दुख उ-उठाव पड़ाव कोआ, तेकर हिनी जामा तरअः पहिल गोएःग उनकु रे जिवीःड-बिरिःड केते, आबु आलकु होड़ जाहुदीकु आउर एटाअ जाईतकु के मरसल रआ संदेस एमा किकुआय।”
24बकिर पौलुस नोःआँ लकान कंहड़ी रूवाड़ोः-कुकेनाय, दो फेस्तुस जोड़ से कंहड़ी लःअय, “ए पौलुस, आम बाऊड़ाहा हेके, ढेर पढ़ाई रआ चलते आम के बाऊड़ाव ची केदमेआय।”
25बकिर पौलुस कंहड़ी रूवाड़ोः लियाय, “ए महामहिम फेस्तुस, ईङ काईङ बाऊड़ाव ताना, बकिर सच तेकर बुधी रेनअः बात कंहड़ीः दिंग। 26राजा होः नोःआँ बात के पुरा पाड़ी तनाय, हिना लःअय ईङ हुनी मड़ांग रे बेगार बोर-भायते कंहड़ी तानिङ, ईङ के बिसवास एदनाअ ची नोःआँ रे हुनी तरअः मियांड-मिन बात उकु ओना कनोआँ, एता लःअय ची नोःआँ जामा घटना जहान अंधार कुड़िया रे का हुयाव ताना 27ए राजा अग्रिप्पा, आगमजानीकु रे बिसवासे-आम एतान? ईङ पाड़ीईङ ची आम बिसवासे-आम।”
28हिमीन रे अग्रिप्पा, पौलुस के बेता लियाय, “आम थोड़हे ससमझाव रेगी ईङ के ख्रीस्तीय बा-बनाव चहाअ तनाम?”
29पौलुस “परमेसर तरअः ईङ आला बिनती एदनाअ, ची थोड़हे ससमझाव रे, चाहे बगरा ससमझाव रे एतान, आम भाईर कोवान, बकिर जेतना होड़ तिसिंग ईङ आला कंहड़ी के आयुम दाकु, हुंकू जामा नोःआँ तोल के बाई केते, ईङ लकान बनाव जुनोअ-कु,” मेन केते कंहड़ी लःअय।
30तब राजा, राज्यपाल आउर बिरनीके तेकर हुंकू लोः दुड़ूः उनकु जामा होड़ बिरिःड केते तिंगुः नाकु। 31तेकर आलगे सेन केते आकु-आकु कंहड़ीः दाकु, “नुई होड़ दो गो-गोएःग लकान चाहे सिक्काड़ रे तोतोल लकान एतान होः काय गलती तदा।” 32अग्रिप्पा, फेस्तुस के बेता लियाय, “जदि नुई होड़ रोमी राजा कैसर तरअः एरे गोहराव तहिकोआ दो, बाईअ चिन ताहीकोआय।”
Currently Selected:
प्रेरित.कामी 26: ASR
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
