संत.लुकास 1
1
1ए थियुफिलुस,
ढेरकु आबु ताला रे परमेसर जे कामी तदाय, होना के इतिहास लिखा रे मेहनाईत तदाकु। 2जाईसन हुंकू पहिल तरअः गी नोःआँ बात के नेनेल कु तेकर वचन रिनकु से-सेवाई ताहिनाकु, हुंकू आबु जगुत सोदोर लअकु। 3हिना लःअय, ए थियोफिलुस ईङ के होः नोःआँ उचित अदा नेना, ची आम लःअय होना जामा बात रेनअः पुरा हाल पता सुरू तरअः ठीक-ठीक जचाँव केते होना के आम लःअय मि सुरू तरअः लिखायीङ। 4आम नोःआँ पाड़ी मे ची होना बात, जे आम सिकछा नाम तदाम होना सही एदनाअ।
जोहन आला जनामोअ रआ आगमजानी
5 #
1 इति 24:10
जाहुदिया राईज रिनी राजा हेरोद बेरा, अबियाह नुमू रिनी पुरोहितकु आला खुड़हा रे मियांड जकरियस नुमू रिनी पुरोहित ताहिनाय, तेकर हुनी आली गोमकाईनते पुरोहित हारुन घराईता रिनी ताहिनाय; हुनी आला नुमू इलिसबा ताहिनेना। 6हुंकिन बनाहोंड़ परमेसर आला नेनेल रे धरमी ताही नेनाकिन तेकर परभु आला जामा हुकूम हेतरअ कनहुन रे बेकासुर चलाः खाता ताही नेनाकिन। 7हुंकिन आलकिन मियांड-मिन चेंगा काकु ताहिनेना, एता लःअय ची इलिसबा बाँझी ताही नेनाय, तेकर हुंकिन बनाहोंड़ सेंयाड़-सिंयाड़ी ताही नेनाकिन।
8जे बेरा जकरियस अपन खुड़हा रेनअः, पारी रे परमेसर मड़ांग पुरोहित आला काम कामी केनाय। 9दो पुरोहितकु आला नेग मोताबिक, हुनी आला नुमू रे परभु आला बड़े बिनती ओड़ाअ रे सेन केते, धुप-धुवान लःअय चिठी उडुंग नेना। 10धुप-धुवान बेरा मंडली रिनकु जामा होड़ बाहरी रे बिनती केनाकु 11हिमीन रे परभु आली मियांड सिरमादूत धुप-धुवान बिदी तरअः, जोम पखा तिंगु उनी हुनी के नेल नेनाय। 12जकरियस नेल केते घबरावनाय, तेकर हुनी के बोर भिनाव ना। 13बकिर सिरमादूत हुनी के, “ए जकरियस आलुम बोर एता लःअय ची आम आला बिनती के परमेसर आयुम केदाय, तेकर आम आली ओड़ाअ तेहोड़ ताम इलिसबा तरअः मियांड चेंगा हुयाव कोआय। तेकर आम हुनी आला नुमू जोहन दोहोयमे। 14आम अलाय रिझ कोआम, तेकर हुनी आला जनम रआ चलते ढेर होड़कु रिझ कोआकु! 15#गन 6:3हुनी परभु आला मड़ांग रे महान कोआय। तेकर अंगुर रस हेतरअ बुलोअ खाता जिनीस ओका हिला होः एरे नुयाँ। तेकर आयाते आला ओदोर तरअः गी पबितर आतमा रे पेरेःग कोआय, 16तेकर हुनी इसराइलीकु रे ढेर होड़कु के अपन परभु परमेसर पखा फिराव किकुआय। 17#मला 4:5,6इलियस लकान आतमा, हेतरअ सवांग रे पेरेःग केते परभु आला मड़ांग-मड़ांग सेन कोआय, तेकर परभु हिजोअ लःअय होड़कु के तेतेयार लःअय, हुनी आपा आला मन के होपोन पखा रूवाड़ केआय हेतरअ परमेसर के काकु मनाअ वाला कु के धरमीकु आला समझ रे आगु किकुआय।” 18जकरियस सिरमादूत के, “नोःआँ ईङ एता लकान बिसवासे ईङ, ईङ दो सेंयाड़ नाईङ तेकर ईङ आली ओड़ाअ तेहोड़ तिंग होः सियांड़ीः नाय,” मेन केते बेता लियाय। 19#दानि 8:16; 9:21सिरमादूत हुनी के, “ईङ गाब्रिएल हेके,” जे परमेसर दुबाःड़े तिंगु ताहिनोईङ। तेकर “ईङ के आम लोः बाबात हेतरअ आम के नोःआँ बेस खभाईर सुसुनाव लःअय कुलगोःड तदिङाकु, मेन केते कंहड़ी रूवाड़ोः लियाय। 20नेलेमे जे हिला जगुत नोःआँ बात का पुरायोआ, होना हिला जगुत आम गुंगा ताही कोआम। हेतरअ एरोम कंहड़ी दड़ीआ; एता लःअय ची आम ईङ आला बात के जे अपन समय रे पुरा हुयाव कोआ के काम बिसवास लआ।”
21होड़कु जकरियस आला होरा नेल आसराय केनाकु तेकर हुनी के बड़े बिनती ओड़ाअ रे नुमिन दिरी एता लःअय हुयाअः ताना मेन केते चाकीतोः केनाकु 22जब हुनी बाहरी हीःग नेनाय, दो हुंकू लोः काय कंहड़ी दाड़ी लआ, दो हुंकू पाड़ी केदाकु ची बड़े बिनती ओड़ाअ रे हुनी लोः जहान दिसतार नेना। हुनी हुंकू लोः अड़िःग एकाय केनाय, हेतरअ गुंगा गी ताहिनाय।
23जब हुनी आला से-सेवा रअः दिन पुराव नेना, दो हुनी अपन ओड़ाअ सेनोः नाय। 24नोःआँ तरअः तयोम हुनी आली गोमकाईनते इलिसबा भारी गतार नेनाय, तेकर पाँच महिना जगुत अपन के नोःआँ कंहड़ी केते उकु ताहिनाय 25ची “होड़कु तलारे ईङ आला अपमान दुदुर लःअय,” परभु “नेदराम माया केते ईङ लःअय नोकान तदाय।”
ईसु आला जनामोअ रआ संदेस
26छाव महिना रे परमेसर पखा तरअः गाब्रिएल सिरमादूत के गलील रेनअः नासरत नुमू सहर रे मियांड कुंवारी दुबाःड़े कुलगोःड लियाय। 27#सं.मत्ती 1:18हुनी के जोसेफ नुमू दाऊद राजा आला घराना रिनी मियांड कोड़ा लःअय जोम नु थिलाआकु, हुनी डिंड़ा कुड़ी आला नुमू मरियम ताहिना। 28सिरमादूत हुनी दुबाःड़े भीतरी बोलो केते, “परभु आला बड़े दया आम तेङ रे हुयाव ताना! परभु आम लोः एदानिया!” मेन लःअय।
29मरियम होना कंहड़ी रे मुरुक घबराव नाय, हेतरअ नोःआँ कंहड़ी रेनअः एतान मतलब हेके, मेन केते उईहार दाय। 30सिरमादूत हुनी के बेता लियाय, “ए मरियम, आलुम बोर; एता लःअय ची परमेसर आला दया आम रे हुयाव ताना। 31#सं.मत्ती 1:21नेलेमे आम भारी होड़ो रे कोआम तेकर आम आली मियांड कोड़ा चेंगा हुयाव कोआय, आम हुनी आला नुमू ईसु दोहोयमे। 32#2 समु 7:12,13,16; जसा 9:7हुनी महान हुयाव कोआय, तेकर परम परधान आली होपोन कहलाव कोआय। तेकर परभु परमेसर हुनी के पुरखा रिनी दाऊद लकान हुनी के राईज गदी एमा कियाय, 33हुनी याकुब आलकु बंसवाईरकु तेङ रे जुग-जुग राईज केआय, हेतरअ हुनी आला राईज रआ अंत एरे हुयाअः!”
34मरियम सिरमादूत के, “नोःआँ एता लकान हुयाव कोआ?” ईङ दो कुंवारी ईङ, मेन केते बेता लियाय 35सिरमादूत, “आम रे पबितर आतमा अड़गु कोआ, तेकर परम परधान परमेसर आला समरथ आम तेङ रे हीःग कोआ, हिना लःअय जे सीरजाई एदानिया, हुनी पबितर हुयाव कोआय तेकर परमेसर आली होपोन कहलाव कोआय। 36नेलेमे! आम आली जाईत-गुतिया इलिसबा आली होः सियांड़ीयोः बेरा कोड़ा चेंगा जनमाई एदानिया। होना हुनी आला छाव महिना हुयाअः ताना, जे बाँझी कहलाअ केनाय। 37#एहेः 18:14एता लःअय ची परमेसर आला बचन जामा दाड़ी सकायाय मेन केते कंहड़ी रूवाड़ोः लियाय।” 38मरियम, “ईङ परभु आली धाँगड़ीन हेके,” “ईङ रे आम आला कंहड़ी लकान हुयाअः कंहड़ी लःअय।” तब सिरमादूत हुनी दुबाःड़े तरअः सेनोः नाय।
मरियम इलिसबा लोः भेंटो आय
39हिमीन बेरा मरियम तुरते बुरु राईज रे जहुदा रेनअः मियांड डिही रे सेन नेनाय। 40तेकर जकरियस आला ओड़ाअ रे सेन केते इलिसबा के जोहार लियाय। 41जाईसने इलिसबा मरियम आला जोहार के आयुम लःअय ताईसने, चेंगा हुनी आला लाहीःग रे ऊछलाव नेनाय, तेकर इलिसबा पबितर आतमा रे पेरेःग नाय। 42तेकर हुनी जोड़ से कंहड़ी बिरिःड लःअय, “आम आउराईतकु रे धनया एदान मेआ, तेकर आम आला लाहीःग रिनी जनमाई चेंगा होः धनया एदानिया! 43नोःआँ ईङ लःअय उकिन बड़े बात हेके, ची परभु तिंग आली एंगा ईङ दुबाःड़े हीःग नेनाय। 44नेलेमे, जाईसने आम आला जोहार कंहड़ी के आयुम लिईङ ताईसने लाहीःग भीतीर रे चेंगा तिंग रिझते ऊछलाव नेनाय। 45आम धनया एदान मेआँ, जे बिसवास लआम ची जे बात परभु पखी तरअः कंहड़ी लअः, होना पुरा हुयाव कोआ!”
मरियम आला सिरिंग
46तेकर मरियम कंहड़ी लःअय,
“जीव तिंग परभु आला बड़ाई दाय,
47तेकर आतमा तिंग आला उ-उधार अवला परमेसर तरअः रीझोः ताना,
48 #
1 समु 1:11
एतान लःअय ची हुनी दो आएंग आली नम्र धाँगड़ीन लकान बनाव लियाय, हिना लःअय नेलेमे नहाअः तरअः!
जामा परिया रिनकु होड़कु ईङ के धनया कंहड़ी केआकु,
49एतान लःअय ची सवांगिया परमेसर ईङ लःअय सेंड़ा-सेंड़ा कामी तदाय।
हुनी आला नुमू पबितारा,
50तेकर हुनी आला दया हुनी रे,
जे हुनी तरअः बोराकु पीढ़ी-पीढ़ी जगुत बनाव ताहिनोआँ।
51हुनी सवांगिया तीः ताय तरअः सेंड़ा-सेंड़ा काम कामी तदाय,
तेकर जे अपने के अपन मन रे बड़े समझाअ केनाकु हुंकू के छिती-छान किद कुआय।
52 #
अयु 5:11; 12:19 हुनी हाकिमकु के राईज गदी ताकु तरअः अड़गु किद कुआय,
तेकर रांगेःग तेताङकु के उंचाव लिकुआय।
53हुनी रांगेःगकु के बेस जिनीस तरअः बी लिकुआय,
तेकर गीरहतकु के एसेन तीः ते उडुंग किद कुआय।
54हुनी आएंग आलकु धाँगड़कु इसराइल के आएंग आला,
होना दया के उईहार यअते संभड़ाव लिकुआय।
55 #
एहेः 17:7
#
1 समु 2:1–10
जे अब्राहम तेकर हुनी आला बंसवाईर रे अपन दया जुग-जुग ताही कोआ,
जे लकान हुनी आबु आलकु आजा-बाबाकु तरअः कंहड़ी ताही लःअय!”
56मरियम लगभग पे महिना इलिसबा लोः ताही केते ओड़ाअ रूवाड़ नेनाय।
जोहन बतिस्मा एमोई आला जनम
57होना तयोम इलिसबा के नावाँ जनामोअ रअः बेरा पुराव नेना, तेकर कोड़ा चेंगा के जनम एमा लियाय। 58तेकर परभु हुनी के मुरुक बड़े दया तदियाय के आयुम केते, खुड़-खिरकी तानकु तेकर कुटुमकु लोः खुसी मनाव लअकु।
59तेकर आठ रोज रे, हुंकू हुनी चेंगा के ख-खतना #1:59 ख-खतना नोःआँ दसतुर रे चेंगा परमेसर आली हेके मेन केते जाहुदीकु चेंगा आला होड़ो रे चिनहाय केनाकुहीःग नेनाकु, तेकर हुनी आला नुमू आपाते आला नुमू लकान जकरियस दोदोहो नाम केनाकु 60बकिर एंगाते, “कोवान! नुई आला नुमू जोहन दोहोयपे!” बेता लिकुआय।
61हुंकू, “आपे कुटुम रे नोकान नुमू ओके आला होः कनोआँ!” बेता लियाकु 62तेकर हुंकू, “हुनी आला एतान नुमू दोहो चहाअ तनाम,” मेन केते अड़िःग केते आपा तेके कुली लियाकु।
63हुनी लि-लिखा खाता पाटी कोय केते, “हुनी आला नुमू जोहन हेके।” मेन केते लिखा लःअय, तेकर जामाकु मोकाव नाकु! 64तेकर हिमीन रेगी जकरियस आला आहा हेतरअ आलांग ताय तुरते राड़ाःना, तेकर कंहड़ी तनाय हेतरअ परमेसर के धन्यवाद एमाअ दियाय। 65तेकर होना हेनाःड तिनकु जामा के बोर भिनाव ना, तेकर नोःआँ जामा कंहड़ी जाहुदिया परदेस रेनअः गोटा बुरु राईज रे छितयाव ना। 66तेकर जामा आ-आयुमकु “नुई चेंगा एतान लकान ताही कोआय?” मेन केते अपन-अपन मन रे दोहो लअकु, एता लःअय ची परभु हुनी लोः ताहिनाय।
जकरियस आला सिरिंग
67जोहन आली आपा जकरियस पबितर आतमा रे पेरेःग नाय, तेकर आगमजानीः दाय,
68“परभु इसराइल रिनी परमेसर आला स्तुति हुयाअः!
हुनी अपन होड़कु के ममदाईत लःअय हीःग नेनाय, तेकर हुंकू के अपन बैरीकु तरअः छुटकारा तडकुआय।
69तेकर आएंग आली धाँगड़ दाऊद आला घराना तरअः आबु के उ-उधार लःअय,
मियांड सवांगिया बाबनचावी तिंगु तदियाय।
70जाईसन ची हुनी जुग-जुग पहिल तरअः आगमजानीकु पबितर होड़कु आला आहा तरअः कंहड़ीः ची ताही लःअय ची,
71हुनी आबु आलकु जामा बैरीकु हेतरअ जे खिसओ-बुआकु,
हुंकू आला तीः तरअः उधार किबुआय।
72अपन पबितर करार हुनी उईहार लःअय,
तेकर आबु आलकु पुरखाकु के दया लिकुआय।
73तेकर होना कसम आबु आली बाबा अब्राहम तरअः किरया जोम ताही लःअय,
74-75ची परमेसर आबु के बैरीकु आला तीः तरअः छोड़ाव किबुआय,
तेकर हुनी आबु के बेगार बोरभाय रे हुनी आला सेवा सु-सुसार लकान बनाव किबुआय,
तेकर आबु जिनगी भाईर हुनी मड़ांग रे पबितर हेतरअ धरमी लकान सेवा-सुसार एका के आबु।
76 #
मला 3:1
“आम, हे ईङ आली कोड़ा चेंगा, परम परधान परमेसर आली आगमजानी कंहड़ी कोआम।
एता लःअय ची आम परभु मड़ांग-मड़ांग,
हुनी आला होरा बा-बनाव लःअय सेन कोआम,
77तेकर आम होड़ के जे पाप तरअः उधार भेटाअः तरअः,
हुंकू आला बंचाअ हुयाव कोआ के उदूः कि कुआम।
78नोःआँ आबु आली परमेसर आला बड़े दया तरअः, बंचाव रेनअः मरसल,
सिरमा तरअः आबु तेङ रे मियांड निदवा रेनअः तुरोअ मरसल लकान लवकाव कोआय,
79 #
जसा 9:2
नोःआँ मरसल अंधार तेकर गोजोः रेनअः उम्बुल रे दुड़ुगोः कु के मरसल कि कुआय,
तेकर आबु आला पाँव के सानती रेनअः होरा रे सोझ ईदी केआय।”
80तेकर हुनी कोड़ा चेंगा हरा सेन नेनाय। तेकर आतमा रे केटेःग सेन नेनाय आउर इसराइल रे आनावरी परचार रआ सेवा सु-सुरु जगुत बुरु रे ताहिनाय।
Currently Selected:
संत.लुकास 1: ASR
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
