जोहन 1

बचन होड़ो पड़ीलेना

1पहिल रे बचन दोहोलेना, बचन परमेसर सुधा दोहोलेना, जोटोः बचन परमेसर दोहोलेना। 2होना पहिल रे परमेसर सुधा दोहोलेना। 3गोटा हिनी दोवसते सिरजाव लेना, जोटोः जे चिताना सिरजाव लेना, होना मे से ओका हों हिनी बिगर का बनावना। 4होना रे जीवन ञमोआँ, जोटोः होना जीवन होड़कु रआ मरसाल दोहोलेना। 5जोटोः मरसाल ञोता रे लवकावओ, जोटोः ञोता काय जिताव बेजाना।

6 # मती 3:1; मर 1:4; लुका 3:1,2 मियड् होड़ परमेसर पड़ा एतेन वेज्‌लेनय, हुँनि रआ ञुमुन जोहन दोहोलेना। 7हुँनि गोवाह रआ रुप रे वेज्‌लेनय, चि मरसाल रआ गोवाही एमे, ताकि गोटे हुँनि दोवसते सारीयोअकु। 8हुँनि खुद मरसाल काय दोहोलेना; बदे होना मरसाल रआ गोवाही एम तआ वेज् दोहोलेनय।

9सनारी मरसाल गोटे होड़कु मरसाल कुअय, जे दुनियाँ रे वेजो गोना। 10होना दुनियाँ रे दोहोलेना, जोटोः दुनियाँ हिना दोवसते सिरजाव लेना, जोटोः दुनियाँ होना काय चिनहा लआ। 11हुँनि अपन होड़कु एडे वेज्‌लेनय, बदे हुँनि अनेज् ही रेनकु ककु जुवाब लिदिया। 12बकिन जयझन हुँनि जुवाब लेदियाकु, जोटोः हुँनि रआ ञुमुन रे सारी लेनाकु, हुँकू गोटे परमेसर रेनकु होपोन पड़ीयोः रआ हाक ओवा लिड्कुआ, 13हुँकू न दो मयाम ते, न होड़ो रआ हिछा ते, न मनवाँ रआ हिछा ते, बदे परमेसर एतेन जनम तनाकु।

14जोटोः बचन गतार पड़ीलेना, जोटोः दया जोटोः सनारी ते भरपुर होयाव कोते अबुन रआ तला रे डेरा लेना, जोटोः अबुन हुँनि रआ नोंकन मरसाल ञेल लआबुन जे लेका बबा रेनि जेठा होपोन रआ लवकाव। 15जोहन हुँनि रआ बारे रे गोवाही एम लअय, जोटोः जोड़ते कथालअय, “नु-ई हेनेनी हके, जेकर बारे रे इञः कथा दोहो लाअइञ, ‘चि जे इञः तयोम वेजोः अवला इदानियाँ, हुँनि इञः एतेन बाइढ़के इदानियाँ, चितानतआचि हुँनि इञः एतेन पहिल दोहोलेनय।’” 16चितानतआचि हुँनि रआ भरपुरी ते अबुन गोटे दया तेङ रे दया ञम लआबुन। 17नियम दो मुसा दोवसते एमतड्आ, बदे दया जोटोः सनारी ते ईसु मसी दोवसते ञमलेना।

बतिसमा एम अवला जोहन रआ गोवाही

(मती 3:1–12; मरकुस 1:1–8; लुका 3:1–18)

18-19जोहन रआ नोआँ गोवाही हके। परमेसर ओके हो ओका हिला ककु ञेल तदिया, एसकारी होपोन जे बबा रआ कोञोङ रीया हिनी ही हुँनि दिसतार लिदियय। जब जहुदिकु जेरुसलेम एतेन पुरोहितकु, जोटोः लेवीकु जोहन सोधव तआ बिदा लिड्कुअय, “अमः ओके हके?”

20तब जोहन कथारुवड़े तआ काय कोवन लआ बदे मनव यनय, “इञः मसी न लगे।”

21 # मला 4:5; नियम 18:15,18 हेनते हुँकू जोहन सोधव लिदियाकु, “दो अमः ओके हके, तना अमः एलियाह हके?”

हुँनि कथालअय, “इञः न लगे।”

“दो तना अमः हुँनि परमेसर पड़ा एतेन दुखमाय अवला होड़ हके?”

हुँनि कथा रुवाड़ लअय, “कोवन।”

22हेनते हुँकू हुँनि सोधाव लेदियाकु, “फिन अमः ओके हके? होले जे आले बिदा तड्लेअय हुँनि कथा रुवाड़ वइयाले, अमः अपन बारे चितानम मेन यतेआ?”

23 # जसा 40:3 जोहन कथा रुवाड़ लअय,

“इञः ‘टोंगरी रे हा-हकावी रेनिञ घोल हके,

जे घोलेअय चि परभु रआ होरा सोजेपे।’

नोआँ रआ बारे रे परमेसर पड़ा एतेन दुखमाय अवला जसायाह कथा तड्अय हिनी हके।”

24नोकू फरीसीकु पड़ा एतेन बिदा दोहोलिड्कुआ, 25जोहन एतेन हुँकू नोआँ सवाल सोधव लिदियाकु, “अगर अमः न दो मसी हके, न दो एलियाह हके, जोटोः न दो परमेसर पड़ा एतेन दुखमाय अवला-ई हके, दो होड़कु तन तआ बतिसमा ओवा कुअम?”

26जोहन हुँकूइ कथा रुवड़वा लआ, “इञः दो दाअ् ते बतिसमा एमाइञ, बदे आपे रआ तला रे मियड् होड़ तींगु तनय जे के आपे कपे ठुवायतिया। 27जे इञः तयोम वेजोः वलाया, जेकर खड़पा रआ तोनोल राड़ाय लाइक हों कुनीञा।”

28नोआँ दुखमा जरदन नाय रआ होन होर बयतनियाह सहार रे होयावलेना, जे एडे जोहन बतिसमा एमयाते दोहोनय।

परमेसर रेनि पठरु

29दुसरा हिला जोहन अनेज् पड़ाते ईसु वेजोः ञेल केते कथालअय, “ञेलेपे, नुई परमेसर रेनि भेडि छउवा#1:29 परमेसर रेनि भेडि छउवा पाप एतेन छमा ञम तआ भेडि छउवा ए-एम जहुदीकु रआ दसतुर दोहोलेना। गोटा एतेन बढ़ियाँ भेडि पुजा यति दोहोनकु। हके, जे दुनियाँ रेनकु होड़ रआ पाप अलगाव इदीयाअय! 30नु-ई हेनेनी हके जेकर बारे रे इञः कथा दोहो लाअइञ, ‘मियड् कोड़ा होड़ इञः तयोम वेजोः अवला इदानियाँ जे इञः एतेन बाइढ़के इदानियाँ, चितानतआचि हुँनि इञः एतेन पहिल रेनि हके’ 31इञः दो हुँनि कइञ चिनहा यतिदोहोना, बकिन हिनाते इञः दाअ् ते बतिसमा एम दराया लाअइञ चि हुँनि इस्राएल रेनकु एडे दिसतारोः।”

32जोटोः जोहन नोआँ गोवाही एम लअय, “इञः पेरवाँ लेका पबितर आतमा सिरमा एतेन अड़गुयोः ञेल लअय जोटोः हुँनि तेङरे अड़गुयोः ञेल लिदियाइञ, 33जोटोः इञः दो हुँनि कइञ ठुवायती दोहोना, बदे जे इञः दाअ् ते बतिसमा एम तअय बिदा लीदिञा, हिनी इञः एडे कथालअय, ‘अमः जेकर एडे आतमा अड़गुयोः जोटोः समावोः ञेले, हिनी पबितर आतमा ते बतिसमा एम अवला हके।’ 34इञः हुँनिञ ञेल लिदिया,” जोटोः गोवाहिञ एम लआ, “चि नुई परमेसर रेनि होपोन हके।”

ईसु रेनकिन पहिल चेला

35दोसरा हिला बतिसमा एम अवला जोहन, जोटोः हुँनि रेनकिन बरिया चेला मे से तींगु दोहोनकिन। 36जोटोः हुँनि ईसु सेनोः ञेल लिदियय, दो कथालअय, “ञेलेपे परमेसर रेनि भेडि छउवा।” 37तब हुकिन बनार चेला हुँनि रआ नोआँ दुखमा अयुम केते ईसु रआ तयोम किन सेनोःयना। 38ईसु तयोम पड़ा घुमराव कोते हुकिन ञेल लअय जोटोः हुकिनय सोधाव लआ, “अबन चितानबन ञमयना?”

हुकिन कथा रुवाड़ लआकिन, “ओय रबी (माने गुरु) अमः ओका अडेम दोहोना?” 39ईसु हुकिनय कथा रुवड़वा लआ, “एला जोटोः ञेलेबन” तब हुकिन हुँनि सुधा सेन लेनाकिन जोटोः हुँनि दोहोना ठँव ञेल लआकिन। जोटोः होना हिला हुकिन हुँनि सुधा दोहो यनाकिन, अयुब् जुवार चार बजाव चुकाव दोहोना।

40बतिसमा एम अवला जोहन रआ दुखमा अयुम केते ईसु रआ तयोम सेन दोहोनकिन हुकिन मे से मिहोड़ सिमोन पतरस रेनि बोयहाते अन्द्रियास दोहोना। 41अन्द्रियास अपन बोयहा सिमोन सुधा जुटाव कनते कथालअय, “इञः तआ मसी (मनेकी परमेसर एतेन करार लआ पाप एतेन ब-बंचावी) ञम यनाय।” 42अन्द्रियास अपन बोकोते ईसु एडे अगु लिदियय।

ईसु हुँनि ञेल लिदियय जोटोः कथालअय, “अमः जोहन रेनि होपोन सिमोन हके, अमः कयफा मनेकी पतरस कहलावओम।”

फिलिपुस जोटोः नतनएल राअ् लिड्किनय

43दोसरा हिला ईसु गलील सेन तअय अरावना। जोटोः फिलिपुस सुधा जुटाव कोते हुँनिए कथावा लआ, “इञः तयोम एला।” 44फिलिपुस हो अन्द्रियास जोटोः पतरस रआ डीही मनेकी, बयतसयदा नगर रेनि बसिन्दा दोहोलेना। 45फिलिपुस नतनएल सुधा जुटावनय हुँनिए कथावा लअय, “आले तआ हेनेनी ञमयना जेकर बारे मुसा रआ नियम रे जोटोः परमेसर पड़ा एतेन दुखमाय अवला, पोथी रे ओल तड्आ। हुँनि हके जोसेफ रेनि होपोन, नासरत रेनि ईसु।”

46नतनएल हुँनिए सोधाव लअय, “तना नासरत एतेन हो चितान बढ़ियाँ जीनिस वेज् सकावओ?”

फिलिपुस कथारुवड़ लअय, “एला जोटोः ञेलेमी।”

47ईसु अनेज् पड़ाते नतनएल वेजोः ञेल केते हुँनि रआ बारे रे कथालअय, “नुई सनारी इस्राएली हके जेकर एडे चितान कपट कोनाआँ।”

48नतनएल हुँनिए सोधाव लआ, “अमः इञः चिलकारेम ठुवायतिञा?”

ईसु हुँनिए कथा रुवड़वा लआ, “फिलिपुस अमः राअ् दोहोलेड् मिआँ एतेन पहिल मनेकी अमः जब अंजीर काट दुबा रे दोहोलेनाम, तब अमः ञेल दोहो लेड्मीअइञ।” 49नतनएल कथा रुवाड़ लअय, “ओय गुरु अमः परमेसर रेनि होपोन हके, अमः इस्राएल रेनमी राजा हके।”

50ईसु हुँनिए कथा रुवाड़ लआ, “इञः जे अमः अडेञ कथा लआ चि इञः अमः अंजीर काट दुबा रेञ ञेल लेड् मिआँ। तना अमः हिनाते सारीयोनाम अमः नोआँ एतेन हो सेंड़ा काम मी ञेलेआ।” 51#अँगन 28:12ईसु हुँनि कथावा लअय, “इञः अमः सनारी कथावा यतमिअइञ आपे सिरमा जीज् लेना जोटोः परमेसर रेनकु दुतकु मनवाँ होपोन तेङ रे अड़गुयोः, जोटोः रकाबोः ञेल कुआपे।”

Currently Selected:

जोहन 1: BIX

Highlight

Copy

Compare