लुका 24

ईसु रआ जीवेड् बिरीदोः

(मती 28:1–10; मरकुस 16:1–8; जोहन 20:1–10)

1बकिन हपता रआ पहिल एतवार हिला अगम ञीन्दवा रे हुँकू होना सोहोंयोः अवला जीनिस जे हुँकू तेयार दोहोलआकु अगुकेते मरघाट रे वेज्‌लेनाकु। 2तब हुँकू मरघाट रआ दुवार एतेन टुकु गुटी ओचोः लेना ञेल लआकु, 3हुँकू भीतरी रेकु सेनलेना बकिन परभु ईसु रआ गोज् होड़ो ककु ञमलआ। 4हुँकू तींगु कोते सोचाव यते दोहोनाकु चि ईसु रआ मुरदा ओकारेए, हेनते हुँकू ठँव रे बरिया कोड़ाकीन झलझलाव गेंदराः होड़हड् उयू कोते हुँकू ठँव रे वेज् तींगु नकिन, नोंका होयावोः ञेल केते हुँकू भकुवव यानाकु। 5हुँकू बोरो यनाकु जोटोः ओत पड़ाते किंड़ु एंडा नाकु तब हुकिन हुँकू किन कथावा लआ, “आपे जीवेड् ई गोज् लेनी मेनकेते चितान तआपे ञ-ञम याना? 6#मती 16:21; 17:22,23; 20:18,19; मर 8:31; 9:31; 10:33,34; लुका 9:22; 18:31–33हुँनि नोंडे कुनीयाँ, बकिन जीवेड्-बिरीड् यनाय। पहामेपे चि हुँनि गलील रे दोहोलेन घनी आपे एडे कथा दोहोलअय, 7‘जरुरीआ चि मनवाँ होपोन पापीकु रआ अती रे एर सबोआय, जोटोः कुरुस रेकु रकाबिया, जोटोः पे रोज रे जीवेड् बिरीदोओय।’”

8तब हुँकू ईसु रआ दुखमा पहम लआकु, 9जोटोः मरघाट एतेन रुवाड़ कोते हुँकू गरहो झन जोटोः एटाःकु हों गोटे नोआँ गोटा दुखमा कथा अयुमवा लीड् कुआकू। 10बिदा लिड्कु चेला एडे जे नोआँ दुखमाकु कथा लआ हुँकू मगदाला रेनि मरियम जोटोः जोअना जोटोः जाकुब रेनि एंगाते मरियम जोटोः हुँनि सुधा एटाः लंञीकु हों दोहोलेनाकु। 11बकिन लंञीकु रआ दुखमा चेलाकु जोटोः एटाः होड़कु तआ बकवस लेका ठुवा लेना, जोटोः हुँकू लंञीकु रआ दुखमा ककु सारीना। 12बकिन पतरस बिरीड् कनते मरघाट रे दोन सेनलेनय, हेनते लबड् कोते ञेल लअय दो कफन गेंदराः छोड़ाय चितानहों काय ञेल लआ, जोटोः जे होयाव दोहोना होनाते छकरीत कनते अनेज् ओड़ाः सेनोःनय।

इमाउस होरा रे चेलाकु तुली

(मती 16:12,13)

13हेनेन हीला हुँकू मे से बरिया चेलाकिन इम्माऊस ञुमुन डीही पड़ाते सेनो गोन दोहोनाकिन जे जेरुसलेम एतेन चार कोस रआ संगीञ दोहोना, 14हुकिन नोआँ गोटा दुखमा जे होयाव दोहोना अकिन-अकिन दुखमा सेनो गोन दोहोलेनाकिन। 15जोटोः जब अकिन-अकिन रे दुखमा जोटोः सोधाव ओपड़ेञोओन दोहोनाकिन, ईसु ठँव रे वेज् कनते हुकिन सुधाय सेन केदा; 16बकिन हुकिन ञेल केते हों ककिन चिनहा बुजा लिदिया। 17ईसु हुकिनय सोधाव लआ, “नोआँ चितान दुखमा हके जे सेने तेङ ते दुखमा तनाबन?”

दो उदास कोते तींगु यनाकिन। 18तब हुकिन मे से मिहोड़ किलयोपास ञुमुन मिहोड़ कथालअय, “तना जेरुसलेम रे अमः एसकार परदेसी अमः जे कम ठुवावना चि तीहिञ-गपा चितान-चितान होयाव तना?”

19ईसु हुकिनय सोधाव लआ, “नोंका चितान दुखमा।”

हुकिन ईसु कथा रुवड़वा लेदियाकिन, “नासरत रेनि ईसु बारे जे परमेसर जोटोः गोटे होड़कु ठँव रे काम जोटोः बचन ते सवाँगिया परमेसर पड़ा एतेन दुखमाय अवला होड़ दोहोनय। 20जोटोः अबुन रेनकु मुध पुरोहित जोटोः नेता हुँनि गोजे तआ एर सब् केते एमलिदिया जोटोः कुरुस रे एर रकब् केते गोजोः रआ हुकुम एमकेदा। 21आले दो असरा दोहोनले चि हेनेनि इस्राएल रआ छुटकरा ओवा कुआय। नोआँ दुखमा तीहिञ एतेन पे रोज पहिल रआ हके, घटना होयाव कोते पे रोज तना। 22जोटोः आले मे से कइक लंञीकु हों आले एर अचराज केड् लेआकु, जे ञीन्दवा रे मरघाट रे सेन दोहोलेनाकु, 23जोटोः हुँनि रआ गोज् होड़ो ककु ञमलआ दो नोंका कथा रुवाड़नाकु चि आले सिरमा दुतकु रआ दरसन ञेल लआले, हुँकू कथा लआकु चि हुँनि दो जीवेड्अय। 24हेनते आले रीनकु गतिकु मे से काइएक मरघाट रे सेनलेनाकु जोटोः जे लेका लंञीकु कथा दोहोलआकु हेनका ञमलआकु; बकिन ईसु ककु ञेल लिदिया।”

25ईसु हुकिनय कथावा लआ, “ओय सोरडोंडोकु, परमेसर पड़ा एतेन दुखमाय अवला होड़कु रआ गोटा दुखमा रे धीरे मन ते सारीयोःकु। 26तना दरकार का दोहोना चि मसी नोआँ दुख सहाव केते अपन बड़ाइ रे परोमोओय?” 27तब ईसु मुसा रआ बाही एतेन लेकर गोटे परमेसर पड़ा एतेन दुखमाय अवलाकु रआ धरम पोथी रे अनेज् बारे ओल लआ दुखमा केते हुकिन समझाव लअय।

28हिमेन रे हुँकू होना डीही ठँव रेकु सोदोरना, जे एडे हुँकू सेनो गोन दोहोनाकु, जोटोः हुँनि रआ रंग-ढंग ते इसन ठुवाना चि हुँनि मड़ाङ सेन चहावओनय; 29हेनते हुकिन नोंका कथा केते हुँनि कीन टेकाव लीदिया, “अलिङ सुधा दोहोनमी, चितानतआचि अयुब् यनाय जोटोः अब बोंगा हसुर यनाय।” तब हुकिन सुधा दोहोन तआ भीतरी रे सेनलेनय। 30तब हुकिन सुधा मंडी जोमोः तअय दुड़ूःना, दो हुँनि रुटी सब् केते धनियाबाद लअय जोटोः होना केचाः केते हुकिन ओवा लअय। 31तब हुकिन रआ मेड् नजाइर खुलाव यना तब हुकिन हुँनि किन चिनहा कीदिया, जोटोः हुँनि हुकिन रआ नजाइर एतेन दनाँग यनाय। 32हुकिन अकिन-अकिन कथा लआ, “हुँनि होरा रे अलङ तुली दुखमायोन दोहोनय जोटोः धरम पोथी रआ माने अलङय समझाव यान दोहोना, दो तना अलङ रआ मन रआ मेड् रआ खुसी का होयावओन दोहोना?”

33हुँकू हेनेन घनी बिरीड् कोते जेरुसलेम रुवाड़ यानाकु जोटोः गरहो झन चेलाकु जोटोः हुँकू रीनकु गतिकु मी जठा ञम लिड्कुआकु 34हुँकू कथायते दोहोनाकु, “परभु सनारी जीवेड्-बिरीड् तनय, जोटोः सिमोन एडे एरञेल लेनय।”

35तब हुकिन होरा रआ दुखमा हुँकू किन बतलावा लआ जोटोः नोआँ हों चि हुकिन हुँनि रुटी केचाः बेरा चीलका किन चिनहा लिदिया।

चेलाकु ईसु ञेल लिदियाकु

(मती 26:16–20; मरकुस 16:14–18; जोहन 20:19–23; बिदा लिड्कु.काम 1:6–8)

36हुँकू नोआँ जे होयावना बारे दुखमा यते दोहोनाकु चि ईसु हुँकू रआ तला रे वेज् तींगुनय; जोटोः हुँकू कथावा लअय, “आपे तआ सांति ञमोः।” 37बकिन हुँकू घबराव यनाकु जोटोः बोरो यनाकु, जोटोः सोचाव लआकु चि आले मुवाँ आतमा ले ञेल यना। 38ईसु हुँकू कथावा लअय, “जोटोः आपे चितान तआ बोरो योनापे, आपे रआ मन रे चितान तआ संदेह वेजोआ? 39इञः रआ अती जोटोः जँगा ञेलेपे चि इञः हेनेनी हके। इञः छुवाँव केते ञेलेञ पे, इञः मुवाँ नालगे चितानतआचि मुवाँ आतमा रआ जङ जील का दोहोना जे लेका इञः एडेपे ञेल यतेआ।”

40नोआँ कथा केते हुँनि हुँकू अपन अती-जँगा बतलाववा लिड्कुअय। 41तब खुसी जोटोः अचराज रआ मरे हुँकू ककु सारीना, दो ईसु हुँकूइ सोधाव लआ, “तना आपे एडे थोड़ेः एकेन मंडी इदानआँ?” 42हुँकू ईसु तआ इसीन लेदी हकु टुकरा ओवालीदिया, 43हुँनि अँगाव केते हुँकू रआ ठँव रे जोम लअय।

44फिन ईसु हुँकूइ कथावा लआ, “नोआँ इञः रआ होना दुखमा हके जे इञः आपे सुधा दोहो कोते आपे एडेञ कथा दोहोलआ, जरुरीआ चि जे तना दुखमा मुसा रआ नियम बाही जोटोः परमेसर पड़ा एतेन दुखमाय अवलाकु रआ बाही जोटोः भजन रआ बाही रे जे ओल लआ इदानआँ, गोटा पुरा योओ।”

45हेनते ईसु धरम पोथी ठुवाय तआ हुँकू रआ समझ खुलाव केदय, 46जोटोः ईसु कथालअय, “नोआँ ओल लआ इदानआँ चि मसी दुख सहावेए, जोटोः पे रोज रे गोज् कोते जीवेड् बिरीदोओय, 47जेरुसलेम एतेन लिके दुनियाँ रेनकु गोटे जाइत रे इञः रआ ञुमुन ते नोआँ दुखमा परचारेए चि परमेसर आपे रआ पाप माफ तआ मन रुवाड़ेपे। 48आपे नोआँ गोटा दुखमा रेनपे गोवाह हके। 49#बि.काम 1:4इञः रेनि अपुञ पबितर आतमा आपे एडे बिदाय तआ वयदा तड्अय चि इञः हुँनिञ बिदाया हिनाते जबरे परमेसर आपे सिरमा एतेन सकती ते काय पेरेजेपे तबरे जेरुसलेम रआ सहार रे दोहोनपे।”

ईसु रआ सिरमा सेनोः

(मती 16:19,20; बिदा लिड्कु.काम 1:9–11)

50 # बि.काम 1:9–11 तब ईसु हुँकू बयतनियाह हमाः बहरा उडुङ लिड्कुअय, जोटोः अपन अती अलगाव केते हुँकू आसीस ओवा लिड्कुअय। 51जोटोः हुँनि आसीस एमे तेङ ते हुँकू एतेन छीनगाव यनय जोटोः सिरमा रे अलगाव इदीया लिदियाय। 52तब हुँकू ईसु जोहार केते अगम खुसी ते जेरुसलेम रुवाड़नाकु, 53हेनते हुँकू लगातार सेंड़ा बिनती ओड़ाः रे सेन कोते परमेसर रआ धनियाबाद करेक रे बेरा बिताव लआकु।

Currently Selected:

लुका 24: BIX

Highlight

Copy

Compare