जोहन 13

ईसु अपन चेलाकु रआ जँगा अबुङ

1पसका परब एतेन पहिल, ईसु ठुवा केदय, चि इञः रआ बेरा वेज् सोदोरयना चि दुनियाँ बाय केते बबा अडेञ सेन। अपन सुधा से-सेन अवला होड़कु जे दुनियाँ रे दोहोलेनाकु, जे लेका हुँनि दुलार यते दोहोनय, अखरी हमाः हेंका ही दुलार इञोःनय।

2ईसु जोटोः हुँनि रेनकु चेला बियाड़ी जोमोः बेरा सयतान सिमोन इस्करियोती रेनि होपोन जहुदा रआ मन रे ईसु एर सबी रआ बिचार ठनाव दोहोलअय। 3ईसु नोआँ ठुवा केते चि बबा गोटा इञः रआ अती रे ओवा तदिञाय, जोटोः इञः परमेसर पड़ा एतेनाइञ वेज्‌तना जोटोः परमेसर अडेञ सेनोगोना। 4जोमोः ठँव एतेन तींगुनय जोटोः तेङ रआ गेंदराः उडुङ लअय, हेनते अँगोछा ते अपन मयाङ रे तोल लेनय।#13:4 जहुदीकु रे धँगड़ चहे बंधुवा धँगड़ अपन गोतिया रआ जँगा अबुङ रआ रीवाज दोहोलेना 5तब बसन रे दाअ् पेरेज् केते चेलाकु जँगाय अबुङ लिड्कुआ, जोटोः जे अँगोछा मयाङ रे तोल दोहोलअय हेनेना ते जोड् लिड्कुअय। 6जब हुँनि सिमोन पतरस एडे वेज्‌लेनय तब पतरस हुँनि एडे कथालअय, “ओय परभु, तना अमः इञः रआ कटा अबुङ यनाम।” 7ईसु हुँनि कथा रुवड़वा लिदियय, “जे इञः कराव यतेअइञ अमः होना काम ठुवावना, बदे नोआँ तयोम तेम समझावओ” 8पतरस हुँनि कथावा लअय, “अमः इञः रआ जँगा कहियो हों अलोम धोववके!” नोआँ अयुम केते ईसु हुँनिए कथावा लआ, “अगर इञः कइञ अबुङमी रेदो इञः सुधा चितान रीसता कोनाआँ।” 9सिमोन पतरस हुँनि एडे कथालअय, “ओय परभु, दो इञः रआ जँगा ही कोवन, इञः रआ अती जोटोः बोहोः हों धोवावेमी।” 10ईसु हुँनि एडे कथालअय, “जे उम चुकाव तनय, हुँनि सुध इदानियाँ हुँनि, अपन जँगा अलावा जोटोः चितानहों अबुङोः रआ दरकार कोनाआँ, बदे पुरा सुध इदानियाँ; जोटोः गोटे के गोटे कुनीपेआ।” 11हुँनि दो अपन एर सबो-ई ठुवायती दोहोलेनय हिनाते हुँनि कथालअय, “आपे मे से गोटे के गोटे सुध कुनीपेआ।”

12 # लुका 22:27 जब हुँनि हुँकू रआ जँगा अबुङ केड् तयोम हुँनि चोगा रआ तेङ रे होड़हादोः अवला झुला होड़हड् लअय फिन दुड़ूः यनय, जोटोः हुँकूइ कथावा लअय, “तना आपे समझाव लेनापे चि इञः आपे सुधा चितानइञ चिलका तड्आ?” 13आपे इञः गुरु जोटोः परभु कथावइञापे, जोटोः ठीक कथायपे, चितानतआचि इञः हेनेनीञ हके। 14अगर इञः परभु जोटोः गुरु कोते हों जब आपे रआ जँगा अबुङ लाअइञ, दो आपे हों एटाःकु रआ जँगा अबुङे चही। 15चितानतआचि इञः आपे रआ ठँव रे नमुनाइञ एरञेल तड्आ, चि जे लेका इञः आपे सुधाञ कराव तड्आ, आपे हों हेंकायपे। 16#मती 10:24; लुका 6:40; जोह 15:20इञः आपे सुधा सनारी कथा यतेअइञ, बन्धुवा मुवार एतेन सेंड़ा कुनीकुआ, जोटोः न बिदा लिदि अपन बी-बिदा-ई एतेन सेंड़ाआँय। 17आपे नोआँ दुखमा ठुवा यतेअपे, अगर होना मोताबिक सेनेअपे दो परमेसर आपे आसीस ओवापेअय। 18#सिरिञ 41:9“इञः आपे गोटे रआ बारे कइञ कथा यतेआ; जेके इञः रींबड़ तदियाइञ, हुँनि इञः ठुवायतियञ; बदे नुई हिनाते इदानियाँ चि परमेसर रआ नोआँ बचन पुरायोः, ‘जे इञः रआ रुटी जोम तड्अय, हुँनि इञः रआ बिरोद रे यनय।’ 19अब इञः नोआँ दुखमा होयावओ एतेन पहिल अमः हिनातेञ बतलाववा यतमिआ चि जब नोआँ घटना होयावओ दो अमः सारीयोमी चि इञः हेनेनी हके। 20#मती 10:40; मर 9:37; लुका 9:48; 10:16इञः आपे एडे सनारी कथा यतेअइञ चि जे इञः बिदा लेदी परिघावियय हुँनि इञः परिघावय, जोटोः जे इञः परिघावय हुँनि इञः बी-बिदा-ई परिघावय।”

ईसु धोखा ते एर सबे

(मती 26:20–25; मरकुस 14:17–21; लुका 22:1–23)

21नोआँ कथा केते ईसु आतमा रे अगम माकुल यनय, जोटोः गोवाही एम लअय, “इञः सनारी कथावा यतपेअइञ चि आपे मे से मिहोड़ इञः एर सबेञय।” 22चेलाकु नोआँ भकसन केते, हुँकू नुकू बोगाः ओपड़ेञोन दोहोनाकु चि हुँनि ओकेरआ बारे कथायतेअय। 23ईसु रेनकु चेला मे से मिहोड़ जेके ईसु दुलारयती दोहोनय, हुँनि सुधा सटले दुड़ूः दोहोनय। 24सिमोन पतरस हुँनि पड़ा इसारा केते कथालअय, “सोधावेमी तो हुँनि ओकेरआ बारे रे कथा यतेअय?” 25हिना तआ हुँनि ईसु रआ कुड़म पड़ाते लिवेड् कोते हुँनिए सोधाव लिदियय, “ओय परभु, हुँनि ओके हके?” 26ईसु कथा रुवाड़ लअय, “जेके इञः नोआँ रुटी रआ टुकरा डुबाः केतेञ ओवाया हिनी हके।” जोटोः हुँनि टुकरा डुबाः केते सिमोन इस्करियोती रेनि होपोन जहुदा ओवा लअय। 27टुकरा अँगावेते ही सयतान हुँनि रआ मन रे बोलोयनाय, तब ईसु हुँनि कथावा लआय, “जे अमः मी करावेए, झटहेले करावेमी।” 28बदे बियाड़ी जोमोः दुड़ूः लेनकु मे से ओके ककु ठुवालआ चि नोआँ दुखमा हुँनि चितान तअय कथा लआ। 29जहुदा एडे ढिबवा दोहो अवला बटु दोहोलेना, हिनाते थोड़ेः एकेन होड़ समझाव लेनाकु चि ईसु हुँनिए कथावायना चि जे अबुन रआ परब तआ चितानकुन किरिञे चहे रंगिज्‌कु तआ ओवाकु मेनकेते कथालअय। 30रुटी रआ टुकरा अँगाव केते झटहेले बहरा उडुङ यनाय; जोटोः ञीन्द होयाव चुकाव दोहोलेना।

परभु रआ नवाँ हुकुम

31जब जहुदा बहरा सेनोःयनय दो ईसु कथालअय, “अब मनवाँ होपोन रआ महिमा होयावना, जोटोः परमेसर रआ महिमा हुँनि रे होयावना। 32अगर होना एतेन परमेसर रआ महिमा होयावना दो, परमेसर हों हुँनि अपन रे महिमायय जोटोः झटहेले हुँनि महिमायय। 33#जोह 7:34ओय सेंगोज्‌कु, इञः अब थोड़ेक डिरी जोटोः आपे सुधा इदानिञा। फिन आपे इञः ढुंढाविञापे, जोटोः जे लेका इञः जहुदीकु अडेञ कथा लआ, ‘जे एडे इञः सेनोगोनइञ होंडे आपे एरोपे वेज् बेजाना,’ हेनका अब इञः आपे अडेञ कथायतेआ। 34#जोह 15:12,17; 1 जोह 3:23; 2 जोह 1:5इञः आपे मियड् नवाँ हुकुम ओवा यतपेअइञ, चि आपे-आपे रे दुलारेपे, जे लेका इञः आपे सुधञ दुलार तड्आ हेनका आपे हों अपास रे दुलारेपे। 35अगर आपे-आपे रे दुलारेअपे, दो निआँ ते गोटे ठुवायकु चि आपे इञः रेनपे चेला हके।”

पतरस कोवाने रआ बारे ईसु रआ अगामजानी

(मती 26:31–35; मरकुस 14:27–31; लुका 22:31–34)

36सिमोन पतरस हुँनिए कथावा लआ, “ओय परभु, अमः ओकम सेनोगोना?” ईसु हुँनि कथा रुवड़वा लअय, “जे एडे इञः सेनो गोनाइञ होंडे नहाः एरोम वेज् बेजाना बदे इञः रआ तयोममी वेजोआ।” 37पतरस हुँनिए कथावा लआ, “ओय परभु, नहाः इञः अमः रआ तयोम तन तआ एरोञ वेज् बेजाना? इञः दो अमः तआ जीवि एम तआ हों तेयाराइञ।” 38ईसु कथारुवड़ लअय, “तना अमः इञः तआ अपन जीवि एमेअम? इञः अमः एडे सनारी कथा यतेअइञ चि मुरगा रागे एतेन पहिल ही अमः इञः पे इसा कोवन निञाम।”

Currently Selected:

जोहन 13: BIX

Highlight

Copy

Compare