जोहन 5

अड़तीस बरीस रेनि जंडिरा रआ नपायोः

1नोआँ दुखमा तयोम जहुदीकु रआ मियड् परब होयावना, जोटोः ईसु जेरुसलेम सेनलेनय। 2जेरुसलेम रे भीडी-दुवार ञुमुन ठँव रे मियड् पोखरा इदानआँ, जे इबरानी भाखा रे “बेतहसदा” कथायकु; जोटोः होना रआ पाँच गोट छपरी इदानआँ। 3नोंडे अगम जंडिरा लिनकु, अन्धराकु, लंगड़ाकु जोटोः लकवा लेनकु [दाअ् हिलहोय रआ असरा रे#5:3 थोड़ेः एकेन मारी पोथी रे नोआँ दुखमा ओल लआ कोनाआँ।] पड़ाल दोहोयोन दोहोनाकु। 4[चितानतआचि ठीक बेरा रे परमेसर रेनि सिरमा दुत पोखरा रे अड़गु कोते दाअ् हिलहोयन दोहोनय, जोटोः दाअ् हिलहोयोः ते ही जे पहिल रे अड़गुयोन दोहोनय, हुँनि नपायोन दोहोनय चहे हुँनि रआ ओका लेकन जंडिरा दोहोन#5:4 थोड़ेः एकेन पोथी रे नोआँ दुखमा ओल लआ कोनाआँ।।] 5होंडे मियड् होड़ दोहोलेनय, जे अड़तीस बरीस एतेन जंडिरा दोहोलेनय। 6ईसु होंडे गितिग् ञेल केते, जोटोः नोआँ ठुवा केते चि हुँनि अगम दिन एतेन जंडिरा तनय, दो ईसु हुँनि सोधाव लिदियाय, “तना अमः नपायोःमी चहावओ?” 7जंडिरा लेनी कथालअय, “ओय परभु, इञः तआ ओके हों कुनीकुआ चि जब दाअ् हिलहोय, दो इञः पोखरा रेकु अड़गुञ; बदे इञः सोदोरोः एतेन पहिल एटाः-ई अड़गु एंडायोओय।” 8ईसु हुँनि कथा रुवाड़ लअय, “बिरीड्मी अपन खटिया अलगावेमी, जोटोः सेन बेढ़ायमी।” 9हुँनि होड़ तुरात नपायनय, अपन खटिया अलगाव केते सेन बेढ़ा लअय, रुड़ुयोः रआ दिन दोहोलेना।

10 # नहे 13:19; जिर 17:21 हिनाते जहुदीकु हुँनि जे नपाय दोहोलेनय, कथावा लेदियाकु, “तीहिञ रुड़ुयोः रआ दिन हके, अमः खटिया बिरिदे उचित कोनाआँ।” 11हुँनि कथा रुवाड़ लअय, “जे इञः नपाय तदिञाय, हिनी इञः एडे कथालअय। अपन खटिया बिरिदे मी, जोटोः सेन बेढ़ायमी।” 12जहुदीकु हुँनि सोधव लेदियाकु, “हुँनि ओके होड़ हके जे अमः कथावा लअय, ‘अपन डीसना बिरिदे मी जोटोः सेन बेढ़ायमी?’” 13बदे जे नपाय लेनय हुँनि काय ठुवायते दोहोना चि हुँनि ओके हके, चितानतआचि होना ठँव रे अगम भीड़ चलते ईसु होंडे एतेन ओचोः दोहोनय। 14नोआँ दुखमा तयोम ईसु हुँनि तुली सेंड़ा बिनती ओड़ाः रे जुमाव लेनय। ईसु हुँनिए कथावा लआ, “ञेलेमी, अमः नपाय यनम फिन अलोम पाप के, अगर अमः पापेअम रेदो, नोंका अलो होयावकोः चि अमः तेङ रे भारी बिपाइत वेज्‌कोः।” 15हुँनि होड़ सेन कोते जहुदीकु एडे कथा केदय, जे इञः नपाय लअय हुँनि ईसु हके। 16हुँनि नोंकन काम रुड़ुयोः हिला कराव याते दोहोनय। हिना चलते जहुदीकु ईसु सताव यतिदोहोनकु। 17ईसु हुँकू कथावा लिड्कुआ, “इञः रेनि बबा नहाः हमाः काम यतेअय, जोटोः इञः हों काम यतेअइञ।” 18हिना चलते जहुदीकु जोटोः हों जदे हुँनि गोजे तआ अराव यनाकु, चितानतआचि हुँनि न सिरीप रुड़ुयोः हिला रआ बिधि तोड़ावेए, बदे परमेसर अपन बबा कथा केते अपन अप परमेसर रआ बराबरी कथायोओय।

होपोन रआ हाक

19ईसु हुँकू कथावा लअय, “इञः आपे एडे सनारी कथायतेअइञ, होपोन अपन अप चितानहों एरोय कराव बेजालेए, हुँनि सिरीप हिनाय कराव बेजाया जे बबा करावे ञेलेयय। बदे जे चिताना बबा करावेए होना होपोन हों हेंका करावेए, 20चितानतआचि बबा होपोन ते सुधा दुलारेए, जोटोः जे-जे काम बबा करावेए, होना गोटा होपोन ते एर ञेलेयय। जोटोः होना एतेन हों सेंड़ा काम हुँनि एरञेलेअय, जोटोः होना ञेल केते आपे छकरीतोअपे। 21जे लेका बबा गोज् लिनकु जीवेड् केते जीवन ओवा कुअय, हेनका होपोन हों जेके चहावओय हिकु जीवेड्कुअय। 22जोटोः बबा ओकेरआ हों काय नेयायेए, बदे नेयय करेक रआ गोटा हक होपोन ते जिमावा तदियय। 23जेकर ते गोटे होड़ जे लेका बबा रआ इजातेएकु हेनका होपोन रआ हों इजाते, जे होपोन रआ ककु इजातेए, हुँकू बबा रआ हों ककु इजातेए जे हुँनि बिदा तदियय। 24इञः आपे एडे सनारी कथा यतेअइञ, जे इञः रआ बचन अयुम केते इञः बिदा-ई एडे सारीयोओकु, का अन्तोः अवला जीवन हीकु रआ हके; जोटोः हुँकू एडे नेयय रआ डन्ड एरो होयावना। बदे हुँकू गोजोः एतेन बंचाव कोते का अन्तोः अवला जीवन रे परोम चुकाव यनाकु। 25इञः अमः एडे सनारी कथा यतेअइञ होना बेरा वेजोः गोना, जोटोः अब इदानआँ, जेकर रे गोज् लेनी परमेसर रेनि होपोन रआ सबद अयुमेंए, जोटोः जे अयुमेंए हिनी जीवेड् दोओय। 26जे लेका बबा खुद जीवन रेनि पझरा हके, हेंका होपोन ते हों जीवन रेनि पझरा बनाव तदियय। 27जोटोः हुँनि नेयय करेक तआ हों हाक ओवा तदियय, चितानतआचि हुँनि मनवाँ होपोन हके। 28नोआँ ते अलोपे छकरीतोः, चितानतआचि होना बेरा वेजो गोना, जयझन मरघाट रे इदानकुआ, हुँनि रआ सबद अयुम केते उडुङोअकु 29#दानि 12:2जोटोः जे बढ़ियाँ काम तड्अकु, हुँकू जीवेड्-बिरीड् कोते फिन का अन्तोः अवला जीवन ञमेअकु, बदे जे बुराइ काम तड्अकु हुँकू फिन जीवेड् बिरीदोअकु दो डन्ड ञमेअकु।”

मसी रआ बारे रे गोवाही

30“इञः खुद अपन अप चितानहों एरोञ कराव बेजालेए; जे लेकाञ अयुमेंए हेनकाञ नेययेए; जोटोः इञः रआ नेयय सनारीआ, चितानतआचि इञः अपन हिछा कोवन बदे अपन बी-बिदा-ई रआ हिछा पुरा करेक चहावओञ। 31अगर इञः अपन गोवाही अपनेञ एमे, दो इञः रआ गोवाही सचा कोनाआँ। 32मियड् जोटोः इदानियाँ जे इञः रआ गोवाही एमेअय, जोटोः इञः ठुवावनञ चि जे इञः रआ गोवाही एमेअय, होना गोवाही सचा इदानआँ। 33#जोह 1:19–27; 3:27–30आपे जोहन एडे एर सोधाव लआपे जोटोः हुँनि सचाइ रआ गोवाही एम लअय। 34इञः ओके होड़ रआ गोवाही रआ दरकार कोनाआँ। बदे इञः नोआँ दुखमा हिनातेञ कथाया चि आपे तआ पाप एतेन बंचावोः। 35जोहन दो आपे तआ बरावोः जोटोः मरसालोः ढीबरी लेका दोहोलेनय, जोटोः आपे हुँनि रआ मरसाल रे थोड़ेक बेरा हमाः खुसी मनावे, आपे तआ अछा सचाना। 36बदे इञः एडे जे गोवाही इदानआँ होना जोहन रआ गोवाही एतेन सेंड़ाआँ; चितानतआचि जे काम इञः पुराय तआ बबा जिमावा तदिञाय जे काम इञः कराव यातेअइञ, हेनेना इञः रआ बारे रे गोवाह एमेअय चि इञः बबा बिदा तदिञाय। 37#मती 3:17; मर 1:11; लुका 3:22बबा जे इञः बिदा तदिञाय, हिनी खुद इञः रआ गोवाही एमतड्अय। आपे न हुँनि रआ सबद अयुम तड्अपे जोटोः न हुँनि रआ रुप ञेल तड्आपे। 38जोटोः हुँनि रआ सिछा मन रे थीर कपे दोहोया, चितानतआचि जेके हुँनि बिदा तदियय आपे हुँनि रआ कापे सारीयोओ। 39आपे परमेसर रआ बचन रे ञम बेढ़ायापे, चितानतआचि समझावओपे, होना रे का अन्तोः अवला जीवन, आपे तआ ञमोआँ; जोटोः नोआँ हेनेना बचन हके जे इञः रआ बारे गोवाही एमेअय। 40सेकरो रे आपे, का अन्तोः अवला जीवन ञमें तआ, इञः एडे कपे वेजोः अरावओ।

41“इञः होड़कु एतेन बड़ाइ कइञ चहावओ। 42इञः ठुवावनइञ चि आपे एडे परमेसर रआ दुलार कोनाआँ। 43इञः अपन बबा रआ ञुमुन तेञ वेज्‌तना, जोटोः आपे इञः कपे जुवाबिञा, अगर ओके अपन ही ञुमुन ते वेजो, दो आपे हुँनि जुवाबियापे 44आपे जे मियड् बरिया एतेन मरजाइत पे चहावओ जोटोः होना बड़ाइ जे सिरीप परमेसर पड़ा एतेन इदानआँ, कपे चहावओ, दो चिलका आपे सारी बेजायोओपे? 45नोंका अलोपे समझावओ चि इञः बबा रआ ठँव रे आपे रआञ दोसेआ; आपे एडे दोस करेक अवला दो मुसा हके, जेकर एडे आपे असरा दोहोयापे। 46अगर आपे मुसा रआ सारी लेनापे, दो इञः एडे हों सारी कनापेअने, चितानतआचि हुँनि इञः रआ बारे रे ओल तड्अय। 47बदे आपे हुँनि ओल लआ दुखमा रे कपे सारीयोओ, दो इञः रआ दुखमा रे चिलका सारियोअपे?”

Currently Selected:

जोहन 5: BIX

Highlight

Copy

Compare