जोहन 7

ईसु जोटोः हुँनि रेनकु बोकोड्तेकु

1नोआँ दुखमा तयोम ईसु गलील रे दड़ाँ इञोःनय, चितानतआचि जहुदीकु हुँनि गोजे तआ अरावओन दोहोनाकु, हिनाते हुँनि जहुदिया रे दँड़ायोः काय अरावओन दोहोना। 2#लेबी 23:34; नियम 16:13जहुदीकु रआ कुम्बा परब ठँव रे दोहोना। 3हिनाते ईसु रेनकु बोयहातेतिकु हुँनि कथावा लआकु, “नोंडे एतेन जहुदिया रे सेनोःमी, ताकि जे काम अमः करावेएम अमः रेनकु चेला ञेलेआ। 4चितानतआचि जे नामी होयावोःकु अरावओ हुँकू उकुकोते एरोकु काम लेए। अगर आपे नोआँ काम कराव यतेअपे दो, अपन अप दुनियाँ रे दिसतारोपे।” 5चितानतआचि हुँनि रेनकु बोयहातेतिकु हों हुँनि एडे ककु सारीयोन दोहोना। 6तब ईसु हुँकू एडे कथालअय, “इञः तआ नहाः हमाः बेरा का वेज्‌तना, बदे आपे तआ गोटा बेरा इदानआँ। 7दुनियाँ आपे सुधा एरोकु बिरोद बेजालेए, बदे इञः सुधाकु बिरोदेए, चितानतआचि इञः हुँकू रआ बिरोद रे गोवाहिञ एमेआ चि हुँकू रआ काम बुरा इदानआँ। 8आपे परब रे सेनपे; इञः नहाः नोआँ परब रे एरोञ सेनलेना, चितानतआचि इञः रआ बेरा नहाः का पुरावतना।” 9हुँनि नोआँ दुखमा कथा केते गलील रे दोहोयनाय।

कुम्बा परब रे ईसु

10बदे जब हुँनि रेनकु बोयहातेतिकु परब रे सेनोः लेनाकु दो ईसु हों सेनलेनय, दो देखार रे कोवन बदे उकुकोते सेनलेनय। 11जहुदी परब रे हुँनि नोआँ कथा केते ञम यति दोहोनाकु, “हुँनि होड़ ओकारिया?” 12होड़कु हुँनि रआ बारे रे जहड़-जहड़ ते अगम दुखमा लेनाकु थोड़ेः एकेन कथायते दोहोनाकु, “हुँनि बढ़ियाँ होड़ हके।” जोटोः थोड़ेः एकेन कथायते दोहोनाकु, “कोवन, हुँनि होड़कुइ भरमावाँ।” 13सेकरो रे जहुदी नेताकु रआ बोर ते ओके हों हुँनि रआ बारे रे खुइल के ककु दुखमायोन दोहोना।

परब रे ईसु रआ सिछा

14जब परब रआ बिच-बिचवा रे ईसु सेंड़ा बिनती ओड़ाः रे सेन कोते सिछा एम बुहड़ी लअय। 15तब जहुदीकु चकित कोते कथा लआकु, “नुई दो जहुदी पाठशाला रे काय पढ़ावतना दो नुई तआ सिछा ओका एतेन वेज्‌तना?” 16ईसु हुँकूइ कथा रुवड़वा लआ, “इञः रआ सिछा इञः रआ कोवन, बदे इञः बिदा तदिञाय हुँनि रआ हके। 17अगर ओके परमेसर रआ हिछा मोताबिक सेने अरावओय, दो हुँकू नोआँ सिछा रआ बारे ठुवा एंडायाकु चि नोआँ परमेसर पड़ा एतेन हके चहे इञः अपन पड़ा एतेनाइञ कथाया। 18जे अपन पड़ा एतेन कथाय, हुँनि अपन ही बड़ाइ चहावओय; बदे जे अपन बि-बिदा-ई रआ बड़ाइ चहावओय हिनी सनारीआ, जोटोः हुँनि रे उकेड् हों बेधरमी कोनाआँ। 19तना मुसा आपे तआ नियम काय ओवा तड्पेआ? सेकरो रे आपे मे से ओके नियम रे कपे सेनेआँ, आपे चितान तआ इञः गोजेञ तआपे अरावओ?” 20होड़कु कथारुवड़ लआकु, “अमः एडे मुवाँ आतमा समाव तना! ओके अमः गोज् तअय अरावओ।” 21ईसु हुँकूइ कथा रुवड़वा लआ, “इञः मियड् काम लाअइञ जोटोः आपे गोटे चकितोअपे। 22#लेबी 12:3; अँगन 17:10मुसा आपे तआ खतना रआ नियम ओवा तड्पेअय (नोआँ कोवन चि होना मुसा पड़ा एतेन इदानआँ बदे बबा-तताकु एतेन वेजो गोना), जोटोः आपे रुड़ुयोः हिला कोड़ाकु रआपे खतनाआँ। 23#जोह 5:9जब रुड़ुयोः दिन कोड़ाकु खतना कुआपे, जेकर ते मुसा रआ नियम अलो टोटाःकोः, दो आपे इञः एडे चितान तआपे कयरवओ, चि जब इञः रुड़ुयोः दिन मियड् होड़ अछातेञ नपाय लिदिया। 24मेड्-अहा ञेल केते अलोपे नेयये बदे सनारी नेययेपे।”

तना ईसु ही मसी हके

25तब जेरुसलेम सहर रेनकु मे से थोड़ेः एकेन कथा लआकु, “तना निई हिनी नालगे जेके नेताकु गोजे तआ अरावओकु? 26बदे ञेलेपे, हुँनि दो गोटे ठँव रे दुखमायोओय जोटोः ओके हुँनि सुधा चिताना ककु कथाया। तना सचमुच इदानआँ चि नेताकु ठुवा केदाकु; चि निई मसी हके। 27नुई दो आले ठुवा यतियाले चि नुई ओका रेनि हके; बदे जब मसी वेजोअय, दो ओके एरोकु ठुवा लिया चि हुँनि ओका रेनि हके” 28ईसु सेंड़ा बिनती ओड़ाः रे सिछा एमयाते दोहोनय दो जोड़ते हकाव केते कथालअय, “आपे इञः ठुवायतिञा जोटोः नोआँ हों पे ठुवावना चि इञः ओका रेनिञ हके। इञः दो अपन पड़ा एतेन कइञ वेज्‌तना, बदे जे इञः बिदा तदिञाय, हुँनि सचाअय, आपे हुँनि कपे ठुवावना, 29इञः हुँनि ठुवा यतियइञ चितानतआचि इञः हिनी पड़ा एतेनाइञ वेज तना जोटोः हिनी इञः बिदा तदिञाय।” 30नोआँ करने हुँकू हुँनि सबे तआकु अरावनाकु, सेकरो रे ओके हों हुँनि तेङ रे अती ककु लगाव लआ चितानतआचि हुँनि रआ बेरा नहाः हमाः का वेज् दोहोना। 31जोटोः होड़कु मे से अगम सारी लेनाकु, जोटोः कथा लआकु, “मसी जब वेजोअय दो तना नोआँ एतेन बगरा चमतकर एरञेलेअय?”

ईसु सबी तआ अरावओन दोहोनाकु

32फरीसीकु होड़कु नोआँ दुखमा जहड़-जहड़ ते अयुम लआकु, दो मुध पुरोहित जोटोः फरीसिकु हुँनि सबी तआ सिपाहीकु बिदालआकु। 33नोआँ रे ईसु कथालअय, “इञः थोड़ेक बेरा जोटोः आपे सुधा दोहोनइञ तब अपन बि-बिदा-ई अडेञ सेनोआँ 34आपे इञः ञमेञापे बदे एरोपे ञम लिञा; जोटोः जे एडे इञः इदानिञा, होंडे आपे एरोपे वेज् बेजाना” 35नोआँ रे जहुदीकु अकु-अकु कथा लआकु, “नुई ओकारे सेनय, जे अबुन नुई एरोबुन ञम बेजालिया? तना नुई जुनानीकु रआ तला रे डेरा लेनकु जहुदीकु एडे सेनय जोटोः जुनानीकु सिछा ओवा कुअय? 36नोआँ चितान दुखमा हके जे हुँनि कथालअय चि, ‘आपे इञः ञमेञापे, बदे एरोपे ञम लिञा’ जोटोः जे एडे इञः इदानिञा, होंडे आपे एरोपे वेज् बेजाना?”

जीवान दाअ् रआ झरिया

37 # लेबी 23:36 परब रआ अखरी हिला, जे खास हके, ईसु तींगु लेनय जोटोः जोड़ते कथालअय, “अगर ओकेकुन तेताङ तनापे दो इञः एडे एला जोटोः ञुवेपे। 38#हेज 47:1; जख 14:8जे इञः अडेकु सारीयोओ, जे लेका धरम पोथी रे वेज्‌तना, ‘हुँनि रआ हिरदय एतेन जीवन दाअ् रआ झरिया तू उडुङोओ।’” 39हुँनि नोआँ पबितर आतमा रआ बारे कथालअय, जे सारीयोःकु होना ञमें अवला दोहोलेनाकु; चितानतआचि आतमा नहाः हमाः का अड़गु दोहोलेना, चितानतआचि ईसु नहाः हमाः महिमामय काय होयव दोहोलेना।

ईसु रआ बारे होड़कु दुखमायोः

40तब होड़कु मे से थोड़ेः एकेन नोआँ दुखमा अयुम केते कथा लआकु, “नुई होड़ सनारी हेनेनी परमेसर पड़ा एतेन दुखमाय अवला होड़ हके।” 41एटाः होड़कु कथायते दोहोनाकु, “नेनेनी मसी हके।” बदे थोड़ेः एकेन होड़ जोटोः कथायते दोहोनाकु, “तना मसी गलील एतेन वेजोवलाया? 42#2 समु 7:12; मीका 5:2तना परमेसर रआ बचन रे का ओल तना चि मसी दाऊद रेनि वंस एतेन जोटोः बयतुलम एतेन वेजोअय, जे दाऊद रआ डीही दोहोलेना।” 43हिनाते ईसु रआ चलते होड़कु रे झमेला पड़ावयना। 44हुँकू मे से थोड़ेः एकेन हुँनि सबे तआ अरावओन दोहोनाकु, बदे ओके हों हुँनि ककु सब् लिदिया।

जहुदी अगुवाकु रआ का-सरियोः

45तब सिपाहीकु मुध पुरोहित जोटोः फरीसीकु एडे रुवाड़ वेज्‌लेनाकु, जोटोः हुँकू दरवानकु-कु सोधव लआ, “आपे हुँनि चितान तआ कपे अगु लिदिया?” 46सिपाहीकु कथा रुवाड़ लआकु, “ओके हों तीहिञ हमाः नोंकन ककु कथा लआ, जे लेका हुँनि कथायय।” 47फरीसीकु हुँकू-कू कथा रुवड़वा लआ, “तना आपे हों एर भरमाव तनापे? 48तना जहुदी नेता चहे फरीसीकु मे से ओकेकुन हुँनि अडेकु सारीतना? 49भीड़ परमेसर रआ नियम ककु ठुवावना, जोटोः हुँकू सरापित इदानकुआ।” 50#जोह 3:1,2नीकुदेमुस, जे पहिल ईसु एडे वेज् दोहोनय, जोटोः हुँकू मे से मिहोंड़ दोहोनय हुँनि एडे कथालअय, 51“अबुन रआ नियम ओके होड़ हों दोसी काय ठहराविया, जबरे हुँनि रआ काय अयुम मड़ाङे, जोटोः नोआँ काय ठुवा मड़ाङे चि, हुँनि चितानय चिलकाआ?” 52हुँकू हुँनिकु कथा रुवड़वा लिदिया, “तना अमः हों गलील रेनमी हके? ञम बेढ़ायमी जोटोः ञेलेमी चि गलील एतेन ओके परमेसर पड़ा एतेन दुखमाय अवला होड़ वेजोअय।”

53[तब गोटे अपन-अपन ओड़ाः सेनोःलेनाकु।]

Currently Selected:

जोहन 7: BIX

Highlight

Copy

Compare