जोहन 9

जनम एतेन अन्धरा लेनी ञे-ञेलनय

1सेनोः घनी हुँनि मियड् होड़ ञेल लअय, जे जनम एतेन अन्धरा दोहोलेनय। 2हुँनि रेनकु चेला हुँनि सोधव लेदियाकु, “ओय गुरु, ओके पाप दोहोलआ चि अन्धराय जनम लेना, नुई होड़ चहे नुई रेनकिन अया-बबा ताय?”#9:2 नोआँ बचन रे कोनाआँ बकिन जहुदीकु रआ नोंका सरीयोन दोहोलेना 3ईसु कथारुवड़ लअय, “न दो नुई पाप दोहोलआ, जोटोः न नुई रेनकिन अया-बबा ताय; बदे नुई हिनाते अन्धराय जनम लेना ताकि परमेसर रआ काम हुँनि एडे दिसतारोः। 4जे इञः बिदा तदिञाय, अबुन हुँनि रआ काम सीञ ही सीञ रे करावे चही; ञीन्द वेजोः अवला इदानआँ जेकर रे ओके हों एरोकु काम बेजालेए। 5#मती 5:14; जोह 8:12जबरे इञः दुनियाँ रीञा, तब रे दुनियाँ रेनिञ मरसाल हके।” 6नोआँ कथा केते हुँनि ओत रे थूः लअय, जोटोः होना थूः ते हास सौंदाव लअय, जोटोः होना हास हुँनि अन्धरा रआ मेड् रे ओजाः केते। 7हुँनिए कथावा लिदियय, “जू, सीलोह रआ पोखरा रे अबोःमी” (सीलोह जेकर माने “बिदा लेदी”)। हुँनि अन्धरा सेन कोते मेड् अब् लेनय, जोटोः ञेञेलोःते रुवाड़ लेनय। 8तब हुँनि खुड़ी रेनकु जोटोः जे हुँनि भीख कोय ञेल दोहोलेदियाकु, कथा लआकु, “तना नुई हिनी नालगे, जे दुड़ूः कोते भीख कोययान दोहोनय?” 9थोड़ेः एकेन होड़ कथा लआकु, “नुई हेनेनी हके,” एटाःकु कथा लआ, “कोवन,” बदे हुँनि कथालअय, “इञः हेनेनीञ हके।” 10तब हुँकू हुँनि सोधाव लआकु, “अमः रआ मेड् चिलका जीज्‌यना?” 11अन्धरा कथारुवड़ लअय, “ईसु ञुमुन मियड् होड़ हास सौंदाव लअय, जोटोः इञः रआ मेड् रे ओजाः लअय जोटोः इञः कथावा लअय, ‘सीलोह रे सेन कोते अबोःमी,’ जोटोः इञः सेन कोते अब्-लेनइञ जोटोः ञे-ञेलनइञ।” 12होड़कु अन्धरा सोधाव लिदियाकु, “हुँनि ओकारिया?” हुँनि कथालअय, “इञः कइञ ठुवावना।”

फरीसिकु दोवसते नपाय रआ जाँच पड़ताल

13होड़कु जे पहिल अन्धरा दोहोनय, हुँनि फरीसीकु एडे इदी लिदियाकु। 14जे हिला ईसु हास सौंदाव केते हुँनि रआ मेड् नपाय दोहोलअय, होनाघनी रुड़ुयोः रआ दिन दोहोलेना। 15फिन फरीसीकु हुँनि सोधव लेदियाकु चि अमः रआ मेड् चिलका ते खुलाव यना, हुँनि हुँकूइ कथावा लआ, “हुँनि इञः रआ मेड् रे हास ओजाः लअय, फिन इञः अब्-लेनइञ, जोटोः अब इञः ञे-ञेल यनाइञ।” 16नोआँ रे थोड़ेः एकेन फरीसी कथा लआकु, “नुई होड़ परमेसर पड़ा एतेन नालगे, चितानतआचि हुँनि रुड़ुयोः हिला काय मनावेए।” जोटोः होड़कु कथा लआ, “पापी मनवाँ नोंका चिन चिलका एरञेल बेजाकेए?” हिनाते हुँकू रे झमेला होयव यना। 17हुँकू फिन हुँनि अन्धरा सोधव लेदियाकु, “हुँनि अमः रआ मेड् नपाय लअय, अमः हुँनि रआ बारे रे चितानम मेनगिआ?” तब हुँनि कथालअय, “हुँनि परमेसर पड़ा एतेन दुखमाय अवला होड़ हके।”

18बदे जहुदीकु ककु सारी लेना चि हुँनि अन्धरा दोहोलेनय अब ञे-ञेलय, जबरे हुँकू जेकर रआ मेड् नपाय दोहोना, अया-बबा ताय एर राअ् लेड्-किनाय। 19हुँकू हुकिन सोधव लेड् किनाकु, “तना नुई अबन रेनि होपोन हके, जेकर बारे अबन कथावाइयाबन चि अन्धरा जनम दोहोलेनय? फिन अब हुँनि चिलकय ञेलोआ?” 20हुँनि रेनकिन अया-बबातय कथारुवड़ लआकिन, “अलिङ ठुवा वनालिङ चि नुई अलिङ रेनि होपोन हके, जोटोः अन्धरा जनम दोहोलेनय। 21बदे अलिङ नोआँ कलिङ ठुवावना चि, नुई अब चिलका रे ञेल यतेअय, जोटोः न ही अलिङ ठुवा वनालिङ चि, ओके हुँनि रआ मेड् नपाय लअय, हुँनि जवान यनाय हेनेनीपे सोधव; हुँनि अनेज् रआ बारे खुद कथायय।” 22नोआँ दुखमा हुँनि रेनकिन अया-बबा ताय हिनाते कथा लआकिन चितानतआचि हुकिन जहुदीकु एतेन बोरोयोन दोहोनाकिन चितानतआचि जहुदीकु एकमत होयाव चुकाव दोहोनाकु चि अगर ओके कथायकु चि हुँनि ईसु ही मसी हके, दो हुँनि बिनती ओड़ाः एतेन उडुङ एंडाया। 23हिना करने हुँनि रेनकिन अया-बबा ताय कथा दोहोलआकिन, “हुँनि जवान यनय, हेनेनीपे सोधाव।”

24तब हुँकू हुँनि होड़ जे अन्धरा दोहोनय, दोसरा खेप राअ् केते हुँनि एडे कथा लआकु, “परमेसर रआ बड़ाइयेमी चितानतआचि आले दो ठुवा वनाले चि हुँनि होड़ पापीअय।” 25हुँनि कथालअय, “इञः कइञ ठुवावना चि हुँनि पापीअय चहे कोवन, इञः दो बस निआँ ठुवावनञ चि इञः अन्धरा दोहो लेनाइञ जोटोः अब ञेल बेजा यतेअइञ।” 26हुँकू हुँनि एडे फिन कथा लआकु, “हुँनि अमः सुधा चितानय चिलका लआ? जोटोः चिलका अमः रआ मेड् नपाय लअय?” 27हुँनि हुँकूइ कथा रुवड़वा लआ, “इञः दो आपे अडेञ कथा केदा, जोटोः आपे कापे अयुम लआ; जोटोः फिन चितानतआ आ-अयुमपे अरावओ? तना आपे हों हुँनि रेनकु चेला पड़ीयोःपे अरावओ?” 28तब हुँकू हुँनि भला-बुरा कथा केते कथावा लिदियाकु, “अमः ही हुँनि रेनि चेला हके, आले दो मुसा रेनले चेला हके। 29आले ठुवा वनाले चि परमेसर मुसा सुधा दुखमा दोहोलअय; बदे नुई होड़ कले ठुवावना चि ओका रेनि हके।” 30हुँनि हुँकूइ कथा रुवड़वा लआ, “नोआँ दो छकरीत रआ दुखमा हके चि आपे कपे ठुवावना चि हुँनि ओका रेनि हके, सेकरो रे हुँनि इञः रआ मेड् नपाय केदय। 31अबुन ठुवा वनाबुन चि परमेसर पापीकु रआ काय अयुमेंए, बदे जे परमेसर रेनि धरमी होड़ हके जोटोः हुँनि रआ हिछा रे सेनेआँय, हुँनि दो हुँकू रअय अयुमा। 32नोआँ ओका हिला आ-अयुम रे का वेज्‌तना चि ओकेकुन जनम एतेन अन्धरा लेनी होड़ रआ मेड् नपाय तदियय। 33अगर नुई होड़ परमेसर पड़ा एतेन अलोय दोहोलेन, दो चितानहों एरोय कराव बेजा लेदाअने।” 34हुँकू हुँनिकु कथावा लिदिया, “अमः दो पाप रे जनम तनाम, अमः अलेम सिखाव याना?” जोटोः हुँकू हुँनि बहरातेकु उडुङ लिदिया।

आतमिक अन्धरा

35ईसु अयुम लअय चि जहुदीकु हुँनि बहरा रेकु उडुङ लिदिया, जोटोः जब हुँकू जुटाव लेनाकु दो कथा लअकु, “तना अमः परमेसर होपोन अडेम सारीयोओ?” 36हुँनि कथालअय, “ओय परभु, हुँनि ओके हके, जेकर एडे इञः सारीयोअइञ?” 37ईसु हुँनि एडे कथालअय, “अमः हुँनि ञेल तदियाम, जोटोः जे अमः सुधा दुखमा योनाय हुँनि हेनेनी हके।” 38हुँनि इकड़ुम कोते हुँनि कथावा लअय, “परभु! इञः सारीयोनाइञ।” 39तब ईसु कथालअय, “इञः नोआँ दुनियाँ रे नेयये तअइञ वेज्‌तना, जेकर ते जे ककु ञेञेला हुँकू ञेले, जोटोः जे ञेञेलाकु हुँकू अन्धरा एंडायोः।” 40जे फरीसी ईसु सुधा दोहोलेनाकु हुँकू नोआँ दुखमा अयुम केते हुँनि एडे कथा लआकु, “तना आले हों अन्धरा आले?” 41ईसु हुँकू एडे कथालअय, “अगर आपे अन्धरापे दोहोलेन दो पापी एरोपे ठहराव लेनाअने; बदे अब कथायपे चि आले ञे-ञेल यनाले, हिनाते आपे रआ पाप बनाल दोहोना।”

Currently Selected:

जोहन 9: BIX

Highlight

Copy

Compare