जोहन 10
10
गयार जोटोः हुँनि रेनकु भीडीकु
1“इञः आपे एडे सनारी कथा यतेअइञ, चि जे ओके दुवार एतेन भीडी ओड़ाः रे ककु बोलोयोओ, बदे जोटोः एटाः पड़ा एतेन बोलोयोओकु, हुँकू चोर जोटोः डकु हके। 2बदे जे दुवार एतेन भीतरी बोलोयोओय, हुँनि भीडी रेनि गयार हके। 3हुँनि तआ दरवान दुवार जीजेआय, जोटोः भीडीकु हुँनि रआ सबद अखियानेआँकु, जोटोः हुँनि अपन भीडीकु ञुमुन अँगाव केते राअ् कुअय जोटोः बहराय इदीयाकुआ। 4जोटोः जब हुँनि अनेज् रेनकु गोटा भीडीकु बहरा उडुङ कुआय, दो हुँकू रआ मड़ाङ-मड़ाङ सेनेआँय, जोटोः भीडीकु हुँनि रआ तयोम-तयोम सेनेअकु; चितानतआचि हुँकू हुँनि रआ दुखमा अरखावेअकु। 5हुँकू अनचिनहर तयोम ककु सेनेआँ, बदे हुँनि एतेन ञीरेअकु, चितानतआचि हुँनि अनचिनहर रआ सबद ककु लखावेए।” 6ईसु हुँकू एडे नोआँ हुडिञ गाम कथालअय, बदे हुँकू ककु समझावलेना चि नोआँ चितान मतलोब हके आले कले सहोबोना।
अछा गयार ईसु
7नोआँ रे ईसु हुँकू एडे फिन कथालअय, “इञः आपे एडे सनारी कथा यतेअइञ, चि भीडीकु रेनि दुवार इञः हके। 8जे इञः एतेन पहिल वेज्लेनाकु; हुँकू गोटे चोर जोटोः डकु हके, बदे भीडीकु हुँकू रआ ककु अयुम लआ। 9दुवार इञः हके अगर ओके इञः दोवसते बोलोयोअकु दो पाप एतेन बंचावओकु जोटोः भीतरी-बहरी उडुङ बोलोयोओकु जोटोः चरागंन ञमेअकु। 10चोर चितान काम तआ हों कोवन बदे सिरीप लो-लोकड़े, जोटोः गो-गोज् जोटोः नास करेक तआ वेजोअय, इञः हिना रअतेञ वेज्तना चि हुँकू जीवन ञमेअकु, जोटोः अगम जीवन ञमेअकु। 11बेस गयार इञः हके; बेस गयार भीडीकु तआ अपन जीवि एम एंडायय। 12बनहियार दो न गयार हके जोटोः न भीडीकु रेनि मुवार हके, हुन्डरा वेजोः ञेल केते, भीडीकु बय केते ञीर एंडायय, जोटोः हुंडरा हुँकू एडे झोतायोओय जोटोः छितीर-बितीर एंडा कुआय। 13हुँनि बनहियार हके हिनाते हुँनि ञीर एंडायय, जोटोः हुँनि तआ भीडीकु रआ चितान फिकीर कोनाआँ। 14-15#मती 11:27; लुका 10:22बेस गयार इञः हके; जे लेका बबा इञः ठुवा यतिञय, हेंका ही इञः बबा ठुवा यतियइञ, इञः अपन भीडीकु ठुवा वनाइञ हुँकू इञः ठुवाञाकु, जोटोः इञः अपन भीडीकु तआ अपन जीवि एमाइञ। 16इञः रेनकु जोटोः हों भीडी इदानकुआ, जे नोआँ गोहाड़ ओड़ाः रेनकु ना लगे; इञः हुँकू हों आ-अगु दरकार इदानआँ, हुँकू इञः रआ घोल अयुमेंएकु; तब मियड् ठउका खुड़हा जोटोः मियड् ठउका गयार होयावओय। 17बबा हिनाते इञः सुधा दुलारेए, चि इञः अपन जीवि एमाइञ, चि होना फिनञ अँगावे। 18इञः रआ जीवि इञः एतेन ओके एरोकु रेजलेए, बदे इञः अपन अप होनाञ एमेआ इञः होना एमे रआ हाक इदानआँ, जोटोः आ-अँगाव रआ हों हक इदानआँ, नोआँ हुकुम इञः रेनि बबा एतेन इञः तआ ञमतना।” 19नोआँ दुखमा चलते जहुदीकु रे फिन झमेला पड़ावयना। 20हुँकू मे से अगम कथा लआकु, “चि मुनी एडे मुवाँ आतमा समाव तना, जोटोः मुनी बयाव यनाय; हुँनि रआ चितान तआपे अयुमेंए” 21थोड़ेः एकेन कथा लआकु, “नोआँ दुखमा नोंकन होड़ रआ कोवन, जेकर एडे मुवाँ आतमा झपाव तनय, तना मुवाँ आतमा अन्धराकु रआ मेड् नपाय बेजाकेए?”
ईसु रआ कोवाने
22जेरुसलेम रे असथापना परब मनावयते दोहोना; जोटोः रेवेड़ रआ दिन दोहोलेना। 23ईसु सेंड़ा बिनती ओड़ाः रआ सुलेमान ञुमुन ढबा रे दड़ाँ योन दोहोनय। 24तब जहुदीकु हुँनि घेराव केते सोधाव लेदियाकु, “अमः आले रआ मन ओकिड् हमाः दुविधा रेम दोहोया? अगर अमः मसी हके दो आले एडे सफा-सफा कथा एंडायमी।” 25ईसु हुँकूइ कथावा लआ, “इञः आपेञ कथावा केड्पेआ बकिन आपे कापे सारीयोओ, जे काम इञः अपन बबा रआ ञुमुन तेञ करावेए हिना ही इञः गोवाही हके। 26बदे आपे हिनाते कपे सारीयोओ चितानतआचि आपे इञः रेनपे भीडीकु नालगे। 27इञः रेनकु भीडीकु इञः रआ घोल अयुमेअकु, इञः हुँकूञ ठुवावना, जोटोः हुँकू इञः रआ तयोम-तयोम सेनेअकु; 28जोटोः इञः हुँकू का अन्तोः अवला जीवन ओवा कुअइञ, हुँकू कहियो एरोकु नास लेना, जोटोः ओके हुँकू इञः रआ अती एतेन एरोकु रेज् लेकुआ। 29इञः रेनि बबा, जे हुँकू इञः ओवा तदिञा, होना गोटा एतेन महान इदानआँ जोटोः ओके हुँकू बबा रआ अती एतेन एरोकु रेज् बेजालेए। 30इञः जोटोः बबा मियड् ठउका अलिङ।”
31जहुदीकु हुँनि ढेचोम तआ दीरी हलाङ लआकु। 32नोआँ रे ईसु हुँकू एडे कथालअय, “इञः अपन बबा पड़ा एतेन अगम बढ़ियाँ काम एरञेल तड्अइञ; होना मे से ओका काम तआ आपे इञः ढेचोमिञ तआपे अराव तना?” 33#लेबी 24:16जहुदीकु हुँनि कथावा लिदियाकु, “बेस काम तआ आले अमः कले ढेचोम यतमिआँ, बदे परमेसर रआ निंदाय करने जोटोः हिनाते चि अमः मनवाँ होइके अपन अप परमेसर मी पड़ीयोओ” 34#सिरिञ 82:6ईसु हुँकूइ कथा रुवड़वा लआ, “तना आपे रआ नियम रे का ओल तना चि, ‘इञः कथालाअञ आपे गोटे ईस्वर हके?’ 35नोंडे ईस्वर हुँकू होड़ तआ कथा दोहोलअय जेके परम बबा रआ संदेश ञमतना, जोटोः परमेसर रआ बचन एरो टलव सकावलेना। 36दो जेके बबा पबितर ठहराव केते दुनियाँ रे बिदा तदियय, हुँनि सुधा आपे चिलका कथा सकाव वइयापे, ‘अमः परमेसर निंदायम,’ चितानतआचि इञः कथा लाअइञ, ‘इञः परमेसर रेनि होपोन हके?’ 37अगर इञः अपन बबा रआ कइञ कामे, दो इञः रआ अलोपे सारीयोः। 38बदे अगर इञः करावेअइञ, दो चहे इञः एडे अलोपे सारीयोः, बदे इञः रआ होना काम रआ दो सारीयोपे, ताकि आपे ठुवाय जोटोः समझाव ओपे चि बबा इञः अडेया, जोटोः इञः बबा अडेञा।” 39तब जहुदीकु फिन हुँनि सबे तआ अरावनाकु, बदे हुँकू रआ अती एतेन बंचाव यनय।
40 #
जोह 1:28
फिन हुँनि जरदन नाय रआ होनहोंर सेनोः लेनय, जे एडे जोहन पहिल बतिसमा ओवा यतकु दोहोनय, जोटोः हेनेन रे दोहोयनाय। 41अगम होड़ हुँनि एडे वेज् कोते कथायते दोहोनाकु, “जोहन दो चितान चमतकर काम काय कराव लआ, बदे जे चितानहों जोहन नुई रआ बारे रे कथा दोहोलअय, होना गोटा सच दोहोलेना।” 42जोटोः होंडे अगम होड़ ईसु रे सारी लेनाकु।
Currently Selected:
जोहन 10: BIX
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
