जोहन 11

लाजर रआ गोजोः

1 # लुका 10:38,39 मरियम जोटोः हुँनि रेनि कुड़ी बोकोते मरथा रआ डीही, बयतनियाह रेनि लाजर ञुमुन मियड् होड़ जंडिरा दोहोलेनय। 2#जोह 12:3नुई हेनेनी मरियम दोहोलेना जे परभु एडे सोहों सुनुम ओजाः केते हुँनि रआ जँगा अनेज् रआ उब् ते जोड् दोहोलअय, नीकिन रेनि कोड़ा बोयहा लाजर जंडिरा दोहोलेनय। 3तब हुँनि रेनकिन दाइते तकीन ईसु एडे खभाइर बिदा लअकिन, “ओय परभु, जेकर सुधा अमः दुलारेएम, हुँनि जंडिरा तनय।” 4नोआँ अयुम केते ईसु कथालअय, “नोआँ जंडिरा गोजोः तआ कोवन; बदे परमेसर रआ महिमा तआ इदानियाँ, चि हुँनि दोवसते परमेसर रेनि होपोन तआ बड़ाइ होयावोः।”

5ईसु मरथा जोटोः हुँनि रेनि कुड़ी बोकोते, मरियम जोटोः लाजर सुधा दुलार यते दोहोनय। 6सेकरो रे जब ईसु अयुम लअय चि हुँनि जंडिरा तनय, दो जे एडे दोहोलेनय, होंडे बारसिञ जोटोः दोहोयनाय। 7नोआँ तयोम हुँनि चेलाकु एडे कथालअय, “एला, अबुन फिन जहुदिया सेनाबुन।” 8चेलाकु हुँनि एडे कथा लअकु, “ओय गुरु, नहाः जहुदीकु अमः ढेचोम तआकु अराव दोहोना, जोटोः तना अमः फिन हेनेन रे सेनोगोनम?” 9ईसु कथालअय, “तना मुसिञ रे बराह घंटा का होयावओ? अगर ओके होड़ सीञ सेनेअय दो काय तोहोड् दोओ, चितानतआचि नोआँ दुनियाँ रआ मरसाल ञेलेअय। 10बदे अगर ओकेकुन ञीन्द सेनेअय दो हुँनि तोहोड् दोओय, चितानतआचि हुँनि रे मरसाल कोनाआँ।” 11हुँनि नोआँ दुखमा कथा केते जोटोः नोआँ तयोम हुँनि एडे कथालअय, “अबुन रेनि गति लाजर ञीन्द यनाय, हिनाते इञः हुँनि फटिक सेनो गोनाइञ।” 12तब चेलाकु हुँनि कथावा लेदियाकु, “ओय परभु, अगर हुँनि ञीन्द यनय, दो नपाय एंडायोओय।” 13ईसु दो हुँनि गोजोः रआ बारे रे कथा दोहोलअय, बदे चेलाकु समझाव नाकु चि हुँनि ञीन्द लहा ते गितिजोः रआ बारे रे कथालअय। 14तब ईसु हुँकू एडे खुइल के कथा केदय, “लाजर गोज् यनय, 15जोटोः इञः आपे रआ चलते खुसी अइञ चि इञः होंडे कइञ दोहोलेना, जेकर से आपे सारीयोः अब एला, अबुन हुँनि एडे सेनाबुन।” 16तब थोमा जे दिदुमुस कहलावओय, अपन गति चेलाकु एडे कथालअय, “एला अबुन हों हुँनि सुधा गोजोः बुन सेना।”

ईसु फिन जी-जिवेड्-ई जोटोः का अन्तोः अवला जीवन एमी

17होंडे सोदोर कोते ईसु तआ नोआँ पता चलावना चि, लाजर मरघाट रे दोहो केते चार दिन यना। 18बयतनियाह जेरुसलेम एतेन लगे भगे मी कोस संगिञा, 19अगम जहुदीकु मरथा जोटोः मरियम एडे हुकिन रेनि बोयहा गोज्‌ना, करने डीड ओवाकिन तआ वेज् दोहोलेनाकु। 20जब मरथा ईसु वेजोः रआ खभाइर अयुम लअय दो हुँनि सुधा जुमावओ तआ वेज्‌लेनय, बदे मरियम ओड़ाः रे ही दुड़ूः एंडा लेनय। 21मरथा ईसु एडे कथालअय, “ओय परभु, अगर अमः नोंडेम दोहोलेन, दो इञः रेनि बोयहा एरोय गोज् लेनाअने। 22जोटोः नहाः हों इञः ठुवा वनाइञ चि जे चितानहों अमः परमेसर एतेन कोयेआम, परमेसर अमः होना ओवामिअय।” 23ईसु हुँनि एडे कथालअय, “अमः रेनि बोयहा जीवेड् बिरीदोओय।” 24मरथा हुँनि कथावा लअय, “इञः ठुवावनञ चि अखरी हिला फिन जीवेड् बिरीदोः बेरा हुँनि जीवेदोओय।” 25ईसु हुँनि एडे कथालअय, “फिन जीवेड् बिरीदोः जोटोः जीवन इञः ही हके; जे इञः एडे सारीयोओय हुँनि अगर गोज् एंडायोओय सेकरो रेहों जीवेड् दोओय। 26जोटोः जे ओके जीवेड्अय, जोटोः इञः एडे सारीयोओय हुँनि कहियो हों एरोय गोज् लेना। तना अमः नोआँ दुखमा रेम सारीयोः।” 27हुँनि ईसु एडे कथालअय, “आँ परभु, इञः सारीयोनाइञ चि परमेसर रेनि होपोन मसी जे दुनियाँ रे वेजोः अवला हके, हुँनि अमः ही हके।”

ईसु इयाम लअय

28निमेन कथा केते हुँनि होंडे एतेन सेनोः यनय, जोटोः अनेज् कुड़ी बोकोते मरियम राअ् केते सचमाच ते कथावा लिदियय, “गुरु नेनेनी हके, जोटोः अमः राअ् यतमिआँय।” 29नोआँ अयुमेते ही मरियम तुरात बिरीड् कोते हुँनि सुधा जुमावोः वेज्‌लेनय। 30ईसु नहाः हमाः डीही रे काय सोदोर दोहोलेना, बदे हेनेना ठँव रे दोहोलेनय जे एडे मरथा हुँनि सुधा जुटाव दोहोलेनय। 31जे जहुदी हुँनि सुधा ओड़ाः रेकु दोहोलेना जोटोः मरियम पोठ ओवायती दोहोलेनाकु, नोआँ ञेल केते चि मरियम झठहेले बिरीड् कोते बहरा सेनोः यनय। नोआकु समझावना चि हुँनि मरघाट रे इयामोः सेनतनय, दो हुँनि रआ तयोम सेन केदाकु। 32जब मरियम होंडे सोदोरलेनय जे एडे ईसु दोहोलेना, दो ईसु ञेल केते हुँनि रआ जँगा दुबा रे इकड़ुम लेनय जोटोः कथालअय, “ओय परभु अगर अमः नोंडेम दोहोलेन दो इञः रेनि बोयहा एरोय गोज् लेनाअने।” 33जब ईसु मरियम जोटोः हुँनि सुधा वेज लेनकु जहुदीकु, ई-इयाम ञेल लिड्कुअय, दो आतमा रे अगम हदियव लेनय, जोटोः माकुल यनय। 34जोटोः कथालअय, “आपे हुँनि ओकारे दोहो तदियापे?” हुँकू हुँनि एडे कथा लअकु, “ओय परभु, एला जोटोः ञेलेमी।” 35ईसु इयाम लअय। 36तब जहुदीकु कथा लआ, “ञेलेपे, ईसु लजार सुधा उकेन दुलार यतिदोहोनय।” 37बदे हुँकू मे से थोड़ेः एकेन कथा लआकु, “तना नुई जे अन्धरा नपाय दोहोलअय, दो नुई काय बंचाव बेजा लिदिया।”

लाजर रआ जिवेदी

38ईसु मन रे अगम उदास कोते मरघाट वेज्‌लेनय, होना मियड् लोपाः दोहोलेना, जोटोः दुवार रे टुकु ते सीञ दोहोलआ। 39ईसु कथालअय, “नोआँ टुकु ओचोगेपे।” मरलाहा रेनि कुड़ी बोकोते मरथा कथालअय, “ओय परभु, अब दो होंडे एतेन सोहों वेजो गोना तोरा, चितानतआचि हुँनि गोज् लेना चइर रोज बितावयना।” 40ईसु हुँनि एडे कथालअय, “तना इञः अमः एडे कइञ कथा लआ, चि अगर अमः सारीयोओम रेदो, परमेसर रआ बड़ाइ ञेलेअम।” 41तब हुँकू टुकु ओचोः लअकु, ईसु संगील केते कथालअय, “ओय बबा, इञः अमः रअइञ धनियाबादयना चि अमः इञः रआम अयुम केदा। 42इञः ठुवायते दोहोनइञ चि अमः हरघरी इञः रआम अयुमा, बदे जे होड़ अस पस तींगु तनाकु, हुँकू करने इञः नोआञ कथा लआ, जेकर से चि हुँकू सारीयोः चि अमः इञःअम बिदा तदिञा।” 43नोआँ कथा केड् तयोम हुँनि जोड़ते कथालअय, “ओय लाजर उडुङ वेजोःमी!” 44गोज् लेनी बहरा उडुङ लेनय, हुँनि रआ अती जोटोः जँगा कफन ते तोल बार दोहोलेनय। जोटोः हुँनि रआ अहा अँगोछा ते मेरहव दोहोलेना। ईसु होड़कु कथावा लअय, “नुई रआ तोल रड़ायपे जोटोः इकाएर सेनवाइपे।”

ईसु गोज् रआ उपाय

(मती 26:1–5; मरकुस 14:1–2; लुका 22:1–2)

45तब जे जहुदी मरियम तुली वेज् दोहोलेनाकु जोटोः हुँनि रआ नोआँ काम ञेल दोहोलआकु, हुँकू मे से अगम ईसु एडे सारी लेनाकु। 46बदे हुँकू मे से थोड़ेः एकेन होड़ फरीसीकु एडे सेन कोते, ईसु रआ काम रआ खभाइर एम लअकु। 47नोआँ रे मुध पुरोहितकु जोटोः फरीसीकु सेंड़ा सभा रेनकु होड़कु राअ् केते कथा लअकु, “आले चितानले चिलकाआ? नुई होड़ दो अगम चमतकर काम एरञेलय। 48अगर आले हुँनि हेंका ले बाय यति, दो गोटे हुँनि एडे सारीयोओकु, जोटोः रोम रेनकु वेज् कोते अबुन रआ ठाँव जोटोः पुरा जाइत नास एंडायाकु।” 49तब हुँकू मे से कायफा ञुमुन मियड् होड़ जे होना बरीस रेनि मुध पुरोहित रेनकु रेनि सेंड़ा पुरोहित दोहोनय, हुँकू एडे कथालअय, “आपे चितानहों कपे ठुवावना; 50जोटोः न ही नोआँ समझाव ओपे चि आपे तआ नोआँ बढ़ियाआँ चि आले रेनकु होड़ तआ मियड् होड़ गोजोः, जोटोः गोटे जाइत अलोकु नासकोः।” 51नोआँ दुखमा हुँनि अपन पड़ा एतेन काय कथालआ, बदे होना बरीस रेनि मुध पुरोहित रेनकु रेनि सेंड़ा पुरोहित होते हुवे हुँनि अगामजानी लअय, चि ईसु जहुदी जाइतकु तआ गोजोअय, 52जोटोः न सिरीप जहुदी जाइत तआ बलकी हिनाते हों चि परमेसर रेनकु सेंगोज् जे छितीर-बितीर तनाकु, हुँकू जवारकु। 53हिनाते हेनेन हिला एतेन हुँकू ईसु गोज् तआ सलाह लेनाकु।

54हिनाते ईसु होना बेरा एतेन जहुदीकु रआ तला रे दिसतार कोते काय दड़ाँ लेना, बदे होंडे एतेन टोंगरी ठँव रआ संगीञ देस इफ्राईम ञुमुन मियड् नगर पड़ा सेनोःयनय; जोटोः अपन चेलाकु सुधा हेनेन रे दोहोयनाय।

55जहुदीकु रआ पसका परब ठँव रे दोहोलेना, जोटोः अगम होड़ पसका परब एतेन पहिल देहात एतेन पबितरोः तआ अपन रीति मोताबिक जेरुसलेम सेन लेनाकु।#11:55 परमेसर रआ नजाइर रे सुधोः तआ पसका परब मनावे तआ थोड़ेक दिन पहिल होड़कु जेरुसलेम सेंड़ा बिनती ओड़ाः रे सेनो गोन दोहोलेनाकु जोटोः अपन रीवाज मोताबिक सुधोः गोन दोहोलेनाकु। 56-57मुध पुरोहित जोटोः फरीसीकु नोआँ हुकुम एम अटु दोहोलआकु चि अगर ओके नोआँ ठुवाय चि ईसु ओकारिया दो खभाइर एमे, ताकि हुँनि सबी, हिनाते होड़कु ईसु ञम यति दोहोलेनाकु जोटोः सेंड़ा बिनती ओड़ाः रे तींगु कोते अकु-अकु रे कथा लआकु, “आपे चितानपे सोचाव यना, तना हुँनि परब रे एरोय वेज्‌ना?”

Currently Selected:

जोहन 11: BIX

Highlight

Copy

Compare