लुका 11

बिनतीयोः तआ चेलाकुइ सिखाव लआ

(मती 6:9–13)

1ईसु मी एडे बिनतीयोन दोहोनय। जब बिनती लेनय दो हुँनि रीनकु चेला मे से मिहोंड़ कथालअय, “ओय परभु जे लेका जोहन अनेज् चेलाकु बिनतीयोः तआ सिखाव कुआय हेंका आले हों सिखाव ले।”

2ईसु हुँनि कथावा लअय, “जब अमः बिनती दो कथायमी,

“‘ओय बबा,

अमः ञुमुन रआ महिमा होयावोः

अमः रआ राइज वेजोः।

3आले तआ दिन भाइर रआ जो-जोमा रोज हिला आले ओवा लेमी,

4जोटोः आले रआ गुनाह माफ लेमी,

चितानतआचि आले हों अपन गोटे गुनाहगारकु कुले माफ कुआ।

जोटोः आले परखाव रे अलोम एर पड़ाव केले।’”

5तब ईसु अनेज् चेलाकु कथावा लअय, “सोचावेपे चि आपे मे से ओके हके चि हुँनि रेनि मियड् गतिते इदानियाँ जोटोः ञीन्द सेन कोते हुँनि एडे कथायय, ‘ओय गति; इञःतआ पेया रुटी ओवाञमी। 6चितानतआचि मियड् गति इञः एडे वेज् तनय हुँनि खियाव तआ चितानहों कोनाआँ।’ 7तब हुँनि भीतरी एतेन उतारा लअय ‘इञः दुख होम ओवाञ; अब दो दुवार सीञ केदञ जोटोः बिल लआ रे होपोनीञ इञः तुलीया, हिनाते इञः बिरीड् कोते अमः एरोञ ओवा बोजा लेमा।’ 8इञः अमाःइञ कथावा याना, अगर हुँनि रेनि गति हके रे हों बिरीड् कोते अलोम ओवाय, घड़ी-घड़ी कोये करने हुँनि रआ जे तना दरकार दोहोना ओतना बिरीड् कोते एमेअय। 9इञः अमाःइञ कथावायना चि कोयेअम रेदो अमः तआ ओवा मिआँ ञम बेड़हायाम रेदो अमः तआ ञमोआँ, ठोक-ठोकावेएम रेदो अमः तआ जीज् वमा। 10चितानतआचि जे ओके हों कोयेअय, हुँनि तआ ओवायय जोटोः जे ढुंढावेए हुँनि तआ ञमोआँ जोटोः जे ठोक-ठोकावेए हुँनि तआ जीज् वाइया। 11अगर अमः रेनि होपोन रुटी कोये दो आपे मे से ओके अपाते इदानियाँ जे हुँनि तआ दीरी ओवायय? चहे हकु कोये दो हुँनि तआ बिञ ओवायय, बतलावेपे ओकेकुन एमेअकु? 12चहे मखान कोये दो कटकोम कीदीञ ओवाय? 13ञेलेपे, आपे बुराइ येएपे रे हों अपन सेगोःज् तआ बढ़ियाँ जीनिस ए-एम पे ठुवावना, दो सिरमा रेनि बबा अनेज् को-कोय अवलाकु तआ पबितर आतमा तना एरोय एम लेए।”

ईसु जोटोः मुवाँकु रेनि मुखिया बालजबूल

(मती 12:22–30; मरकुस 3:20–27)

14जोटोः मुसिञ ईसु मियड् होड़ एतेन मुवाँ आतमाय उडुङ लआ, जब मुवाँ आतमा उडुङ यनाय दो कोन्दा होड़ दुखमा लेनय; तब होड़कु तजूक यनाकु, 15#मती 9:34; 10:25हेनते हुँकू मे से अधा कथा लआकु, “नुई दो बालजबुल नेता मुवाँ आतमा रआ सहाड़ा ते मुवाँ आतमा उडुङ कुआय।”

16 # मती 12:38; 16:1; मर 8:11 थोड़ेः एकेन होड़ हुँनि परखावी तआ ईसु एतेन आकास रआ चिन कोय लआकु, हुँनि एतेन पता चलावना चि हुँनि परमेसर बिदा तदियय। 17दो ईसु हुँकू रआ मन रआ दुखमा ठुवा केते हुँकूइ कथावा लआ, “जे-जे राइज रे फुट होयावओ होना राइज उजाड़ एंडायोओ जोटोः जे ओड़ाः रेनकु होड़ रे फुट होयावओ होना ओड़ाः रेनकु होड़ छिटपुट एंडायोओकु। 18अगर सयतान अनेज् ही बिरोधियोः दो हुँनि रआ राइज चिलका बनाल दोहोकोओ? चितानतआचि आपे इञः रआ बारे दो कथायपे चि बालजबुल रआ सहाड़ा ते मुवाँ आतमाय उडुङा। 19अगर इञः बालजबुल रआ सहाड़ा ते मुवाँ आतमा कुञ उडुङा दो आपे रेनकु चेलाकु ओकेरआ सहाड़ा ते हुँकू उडुङ कुआकु? हिनाते हुँकू ही आपे रआ नेयय कराव वेआकु। 20बकिन अगर इञः परमेसर रआ सकती ते मुवाँ आतमा कुञ उडुङ रेदो परमेसर रआ राइज आपे रआ ठँव रे वेज् सोदोरतना।”

21जब सावाँगिया होड़ हथयार सब् केते अपन ओड़ाः ओगरायय दो हुँनि रआ धान खुरजी बंचाव एंडायोओ। 22बकिन हुँनि एतेन बाइढ़के ओके सावाँगिया हड़पाव केते जिताव एंडायय, दो हुँनि रआ होना हथयार जेकर रे हुँनि रआ भरोसा दोहोना, रेज् एंडायय हेनते हुँनि धान खुरजी रेज् केते हटिंञ एंडायय।

23 # मर 9:40 जे इञः तुली कुनीयाँ हुँनि इञः रआ बिरोद रिया, जोटोः जे इञः तुली काय समटावेए हुँनि छितरावेए।

दरपुरा सुधराव रे बिपाइत

(मती 12:43–45)

24“जब छुत आतमा होड़ एतेन उडुङ एंडायोओय दो झीत-झीताव ठँव रे सथावओ तआ ठाँव ञम बेढ़ायाय, बकिन हुँनि तआ ओकारे हों सथावोः तआ ठँव काय ञमोआँ दो तब हुँनि कथायय, ‘इञः हेनेना मारी ओड़ाः रे सेनाइञ, जे एडे एतेनाइञ उडुङ दोहोना रुवाड़ एंडायोओञ।’ 25जोटोः रुवाड़ कोते होना चिकन मकन हेनते सींगराव लआ ञमेअय। 26तब हुँनि सेन कोते अनेज् एतेन हों बगरा खपतान सात गोट बुरा मुवाँ आतमाकु गति अगुकेते वेजोअय जोटोः हुँकू हेनेन ओड़ाः रे बोलो कोते हेनेना रे दोहोनाकु, हेनते हुँनि होड़ रआ नहाः रआ दसा पहिल एतेन हों जोटोः बेहाल एंडायोओ।”

सनारी खुस

27हुँनि नोआँ कथा ही यते दोहोनय दो होड़कु मे से मियड् लंञी कथालअय, “जे लंञी अमः गतार एतेन जनम लिड् मीअँय जोटोः दुद पियाव लिड्मिअँय हुँनि धन्य इदानियाँ।”

28ईसु कथालअय, “आँ बकिन धन्य हुँनि हके जे परमेसर रआ बचन अयुमेंए हेनते मनावेए।”

सिरमा रआ चिनहा कोय

(मती 12:38–42)

29 # मती 16:4; मर 8:12 जब अगम ढीरी सेनो गोन दोहोनाकु दो ईसु कथालअय, “नोआँ जुग रीनकु होड़ बुरा अकु; होंकु चिन ञमकु; परमेसर पड़ा एतेन दुखमायोः अवला पबितर होड़ जोना रआ चिन बाय केते जोटोः चितान चिन हों एरो एम लेए। 30#जोना 3:4जे लेका जोना नीनवे रेनकु होड़ तआ चिन ठहरावनय हेनका मनवाँ होपोन हों नोआँ जुग रीनकु होड़ सुधा बिरीड् कोते चिन ठहरावओय। 31#1 राजा 10:1–10; 2 इति 9:1–12नेयय रआ दिन दखिन रेनि सिबा रानी नोआँ बेरा रेनकु होड़ सुधा तींगु कोते नोआँ जुग रेनकु होड़ रे दोसी ठहरावियय, चितानतआचि सुलेमान रआ गेयान अयुमे तआ ओत रआ अखरी छोर एतेनय वेज्‌तना, जोटोः ञेलेपे नोंडे हुँनि हके जे सुलेमान एतेन हों सेंड़ा इदानियाँ। 32#जोना 3:5नीनवे रेनकु होड़ नेयय रआ दिन नोआँ बेरा रेनकु होड़ सुधा तींगु कोते, हुँकू दोसी ठहराव कुआय; चितानतआचि होंडे दो जोना रआ परचार अयुम केते मन रुवाड़ दोहोलआकु, जोटोः ञेलेपे, नोंडे हुँनि हके जे जोना एतेन हों सेंड़ाआय!”

होड़ो रआ ढीबरी

(मती 5:15; 6:22,23)

33 # मती 5:15; मर 4:21; लुका 8:16 “ओके होड़ ढीबरी जब् केते उकुयोः ठँव रे चहे मावनी भीतारे ककु दोहोया, बकिन देहड़ी रे दोहोयाकु चि भीतारे बोलोयोः अवलाकु मरसाल कु ञमें। 34अमः रआ मेड् अमः रआ ढीबरी हके, हिनाते अगर अमः रआ मेंड् सफाआ दो अमः रआ गोटा होड़ो मरसाला; बकिन जब अमः रआ मेड् बुराआ दो अमः रआ गतार हों अँधारा। 35हिनाते चँड़चित दोहोनपे चि जे मरसाल आपे एडे इदानआँ होना ञोता अलो होयावकोः। 36हिनाते अमः रआ गोटा होड़ो मरसालोओ जोटोः होना मी अँग हों ञोता अलो दोहोन, दो पुरा-पुरा नोंका मरसालोओ जे लेका होना बेरा जब ढीबरी अपन मरसाल ते अमाःअय मरसाला।”

धरम पोथी ठुवाकु जोटोः फरीसीकु एतेन सावधन

(मती 23:1–36; मरकुस 12:38–40)

37जब ईसु दुखमायोन दोहोनय दो ओके फरीसी दो हुँनि एडे गोहराव लेनय चि इञः एडेम जोमोः हुँनि भीतरी सेन कोते जोमोः तअय दुड़ूःना। 38बकिन जब ईसु फरीसीकु ञेल लअय चि जोमोः एतेन पहिल हुँनि ईसु जहुदीकु रआ रीति-रिवाज रआ मोताबिक काय उम लेना दो हुँनि ञेल केते अगम छकरीत लेनाकु। 39परभु हुँनि कथावा लअय, “ओय फरीसीकु आपे डुभा जोटोः थाड़ी तेङ-तेङ एतेन दो मंजावेआपे, बकिन आपे रआ मन रे ललच हेनते बुराइ पेरेज् तना। 40ओय निरबुधीकु, जे बहरी रआ हिसाय बनाव तड्आ, तना हुँनि भीतार रआ हिंसा काय बनाव तड्आ? 41बकिन आँ जे भीतार रेए होना दान एंडाय, दो ञेलेपे आपे तआ गोटा जीनिस सुध एंडायोओ।”

42-43 # लेबी 27:30 “बकिन ओय फरीसीकु, आपे तआ हाय! आपे फुदेना जोटोः करी सेकाम रआ गोटा लेकाना साग-पत रआ दसवाँ हिंसा एमेअपे, बकिन परमेसर रआ दुलार जोटोः नेयय दो टलाव एंडायापे, आपे नोआदार हों करावेते जोटोः होना हों करावे चही दोहोलेना। ओय फरीसुकु, आपे तआ हाय! आपे बिनती ओड़ाः रे मुख-मुख ठाँव हेनते बाजार ते जोहार पे चहावओ। 44हाय आपे एडे! चितानतआचि उकुलेना मरघाट लेका आपे, जेकर रे होड़ सेनेअकु बकिन ककु ठुवाया।”

45हेनते मियड् धरम पोथी सि-सिखावी हुँनिए कथा रुवड़वा लआ, “ओय गुरु निआँ दुखमा कथायते अमः आले रआ मी नींदाया।”

46ईसु कथालअय, “ओय धरम पोथी सि-सिखावकु, आपे एडे हों हाय! आपे नोंकन बोझ जे अलगावे तआ मसकिला, होड़कु एडे तेंगड़ायापे बकिन आपे होना हमाल दो अपन मियड् अँगरी तेहों कपे छुवाँवेए। 47आपे एडे हाय! आपे हुँकू परमेसर पड़ा एतेन दुखमाय अवला होड़कु रआ मरघाट बनावेएपे, जे के आपे रेनकु पुरखा गोज् दोहो लीदिया। 48हिनाते आपे गोवाह एम यतेअपे, जोटोः अपन पुरखाकु रआ कम रे सहमत तनापे; चितानतआचि हुँकू हुँनिकु गोज् लिदिया जोटोः आपे हुँकू रआ मारघाट बनावेअपे। 49हिनाते परमेसर रआ बुधि हों कथा तड्अय, ‘इञः हुँकू ठाँवरे परमेसर पड़ा एतेन दुखमाय अवला होड़कु जोटोः बिदा लिड्कु अगुवाकु बिदाकुअइञ हेनते होड़कु हुँकू मे से अधाकु गोज् कुआकु जोटोः अधाकु सताव कुआकु।’ 50ताकि दुनियाँ रआ सिरजाव लेना एतेन जयझन परमेसर पड़ा एतेन दुखमाय अवला होड़कु रआ मयाम तू लआ, गोटे रआ हिसाब नोआँ जुग रेनकु होड़ एतेन अँगावेए, 51#अँगन 4:8; 2 इति 24:20,21हबिल गोज् लआकु एतेन जकरयाह गोज् लआकु हमिज्। जे वेदी हेनते पबितर ठाँव रआ तला रेकु गोज् लिदिया। इञः आपे एडे सनारिञ कथा यतेआ चि नोआँ गोटा रआ हिसाब हेनेन बेरा रेनकु होड़ एतेन अँगावे!”

52“हाय आपे धरम पोथी सि-सिखावकु एतेन! आपे गेयान रआ चभी दो अँगाव तड्अपे, बकिन आपे हों कपे परोम बेजालेना, जोटोः परोमोःकु अराव दोहोना हुँकू हों बरजाव लिड्कुआपे।”

53जब ईसु होंडे एतेन उडुङनय, दो धरम पोथी सि-सिखावकु हेनते फरीसीकु हुँनिकु ओर बेड़हा लिदिया जोटोः अगम दुखमा तिकु सवाल लिदिया, 54जोटोः गोटे तक रेकु दोहोलेना चि हुँनि रआ दुखमा तिकु सबी।

Currently Selected:

लुका 11: BIX

Highlight

Copy

Compare