लुका 16

चलँक भंडारी

1ईसु अनेज् चेलाकुइ कथावा लआ, “मियड् मोंडोल होड़ रेनि भंडारी दोहोलेना, हेनते होड़कु हुँनि ठँव रे भंडारी तेङ रे नोंका दोस लगाव लआकु, चि अनेज् मलीक रआ गोटा धनखुरजी छिटाव केदय। 2हिनाते हुँनि मोंडोल होड़ राअ् केते भंडारी कथावा लिदियय, ‘अमः रआ बारे इञः चिलका-चिलकाइञ अयुम यतेआ? अपन भंडारी काम रआ हिसाब कीताब एमेमी, चितानतआचि मड़ाङ भंडारी एरोम दोहो बेजाना।’ 3तब भंडारी सोचाव केदय, ‘अब इञः चितानाइञ चिलकाआ? चितानतआचि इञः रेनि मुवार नहाः दो भंडारी रआ काम इञः एतेन रेज् यतेआय, हास दो इञः सुधा एरो ला-लेना; जोटोः भीख कोय इञः तआ लाज ठुवायोओ। 4इञः ठुवा केदञ चि चितानाइञ चिलकाआ, इञः भंडारी काम एतेन एर बयोअइञ रेदो होड़कु इञः अपन ओड़ाः रेकु जुवाबिञा।’ 5तब हुँनि अपन मुवार तआ भ-भराइकु मिहोंड़-मिहोंड़ ते राअ् लिड्कुअय, हेनते पहिल रेनि सोधाव लअय, ‘अमः एडे इञः मुवार ओवा तआ उकेन एकेन रींड़ इदानआँ?’ 6हुँनि कथालअय, ‘मी साव टीञ सुनुम’ तब हुँनिए कथावा लआ, ‘अपन खाता बाही सबेमी हेनते झठहेले दुड़ूः कोते पचास टीञ ओलेमी।’ 7फिन एटाः-ई सोधाव लअय, ‘अमः एडे उकेन एकेन रींड़ इदानआँ?’ हुँनि कथालअय, ‘मी साव मन गोहोम,’ तब हुँनि होंय कथावा लिदिया, ‘अपन खाता बाही सब् केते आसी ओलेमी।’ 8मुवार हुँनि बेधरमी भंडारी बखनाव लअय चि हुँनि चलाँकी काम लअय। चितानतआचि नोआँ दुनियाँ रीनकु होड़ परमेसर रीनकु होड़ एतेन बगरा चतुराकु।”

9जोटोः आपेञ कथावायना चि बेधरमी रआ धान खुरजी अपन गति बनावेपे, चितानतआचि जब धान खुरजी चबा एंडायोओ दो परमेसर जोटोः सिरमा दुत होना का अन्तोः अवला ठाँव रे आपे पइरघाव पेआकु। 10जे कटीज् एकेन रेकु सारीयोः हुँकू बगरा रे होंकु सारीयोओ, जे कटीज् एकेन रेकु बयमनियाँ दो बगरा रे होंकु बयमनियाँ। 11हिनाते बेधरमी रआ धान खुरजी रे सारी कपे ठहरावओ, दो सचा धनखुरजी आपे तआ ओके एमेआ? 12जोटोः अगर आपे एटाःकु रआ धान खुरजी रे भरोसा लायक कपे ठहरावना दो जे आपे रआ हके, होना अपन रआ ओके ओवापेआ?

13 # मती 6:24 “ओके धँगड़ हों बरिया मुवार मिसत रे एरोय सेवा-सुसार बेजा लेकिना, चितानतआचि हुँनि मियड् तुली दुलारेए जोटोः एटाः-ई सुधा बइरीयय, चहे मिहोंड़ सुधा मिलाल दोहोनय जोटोः एटाः-ई सुधा घिनावीयय। आपे परमेसर जोटोः धनखुरजी बनार रआ एरोपे सेवा-सुसार बेजालिया।”

ईसु रआ एटाः-एटाः सिछा

(मती 11:12,13; 5:31–32; मरकुस 10:11,12)

14थोड़ेः एकेन फरीसीकु लोभी दोहोलेनाकु, नोआँ गोटा दुखमा अयुम केते ईसु ठठावा लिदियाकु। 15ईसु हुँकूइ कथावा लआ, “आपे दो होड़कु ठँव रे अपन अप धरमी पड़ीयोओपे, बकिन परमेसर आपे रआ मन ठुवा वनय। चितानतआचि जे जीनिस होड़ रआ ञे-ञेल रे महान समझावओकु होना परमेसर रआ नजाइर रे घीन इदानआँ।”

16 # मती 11:12,13 “मुसा रआ नियम जोटोः परमेसर पड़ा एतेन दुखमाय अवला पबितर होड़कु पड़ा एतेन ओल लआ दुखमा बतिसमा ए-एमी जोहन रआ बेरा हमाः परचार एञोःना। बकिन जोहन रआ बेरा एतेन लीके परमेसर राइज रआ बढ़ियाँ दुखमा रआ बतलाव इञोगोना। जोटोः गोटे परमेसर रआ राइज रे अदेरकु तआ कठिन परयास यतेआ। 17#मती 5:18आकास जोटोः ओत टलाव एंडायोओ बकिन परमेसर रआ नियम मी कड़ी हों एरो टलावना।”

18 # मती 5:32; 1 कोरि 7:10,11 “जे ओके हों अपन लंञी बय केते एटाः-ई तुली बियाहोओय, हुँनि बे-लाजकामेअँय जोटोः जे ओकेकुन नोंकन लंञी तुली बियाहोओय हुँनि हों बे-लाज कामेअँय।”

मोंडोल होड़ जोटोः रंगिज् लाजर

19“मियड् मोंडोल होड़ दोहोना हुँनि कुद रंग गेंदराः होड़हादोन दोहोनय हेनते रोज हिला सुख-बिलास जोटोः ठट-बट ते दोहोयोन दोहोनय। 20हेनेन रे लाजर ञुमुन मियड् रंगिज् होड़ हुँनि मोंडोल होड़ रआ ओड़ाः हता दुवार ठँव रे अगु केतेकु बायअटु यतिदोहोना हुँनि होड़ो रे घव पेरेज् दोहोना, 21सेताकु हों वेज् कोते हुँनि रआ घव जाल यते दोहोलेनाकु जोटोः हुँनि मोंडोल होड़ जोम एडेल गिडी लआ जुठा ते अपन पोटा पेरेज् तअय तरसाव ओन दोहोना। 22नोंका लेना चि रंगिज् लाजर गोज् लेनय जोटोः सिरमा दुतकु हुँनि इदी केते अबराहम रआ कोञोङ रेकु सोदोर लिदिया। हुँनि मोंडोल होड़ हों गोज्‌नय दो हार लिदियाकु, 23हेनते पताल रे हुँनि दुख रे पड़ाव कोते संगील लअय, जोटोः संगीञ एतेन अबराहम रआ कोञोङ रे लाजर ञेल लअय। 24तब हुँनि हकाव केते कथालअय, ‘ओय बबा अबराहम, इञः एडे मया कोते, लाजर बिदायमी, ताकि हुँनि अँगरी ताय चुटित होर दाअ् रे तुपू केते इञः रआ जीब ठंढियय, चितानतआचि इञः नोआँ सेंगेल रेञ तड़पाव ओना।’ 25बकिन अबराहम कथालअय, ‘ओय बाबु, पहामेमी चि अमः अपन जिनगी रे बढ़ियाँ जीवनमी ञम चुकाव तड्आ, जोटोः हेनका होंडे लाजर हों बुरा जीनिस ञम लअय बकिन अब नुई नोंडे डीढ ञम यतेअय, जोटोः अमः तड़पाव ओनाम। 26नोआँ गोटा दुखमा बाय केते इञः जोटोः अमः रआ तला रे मियड् अगम डोडहा इदानआँ चि नोंडे एतेन होन होर अमः एडे सेन बुजाकोओ, हुँनि एरोय सेन बुजाना; जोटोः ना ओके मोंडे एतेन नोनहोर इञः एडेकु वेज् बुजाकोओ।’ 27हुँनि कथालअय, ‘दो ओय बबा, इञः अमः एडे गोहराव ओनाइञ चि लाजर इञः बबातीञ रआ ओड़ाः रे बिदायमी, 28चितानतआचि इञः रेनकु पाँच गोट बोयहा इदानकुआ, दो हुँनि हुँकू ठँव रे सेन कोते चेतावकु जेकर से हुँकू नोआँ दुख रआ ठँव रे वेजोः एतेनकु बंचावोः।’ 29अबराहम हुँनि कथावा लअय, ‘हुँकू एडे दो मुसा जोटोः परमेसर पड़ा एतेन दुखमाय अवला पबितर होड़ रआ बाही इदानआँ, हुँकू हुँनि रआ कु अयुमे जोटोः मनावओ चही।’ 30मोंडोल होड़ कथालअय, ‘कोवन ओय बबा अबराहम; अगर ओकेकुन गोज् लिनकु मे से हुँकू ठँव रेकु सेन रेदो हुँकू जरुड़ अपन पाप एतेन मन रुवाड़ेएकु।’ 31अबराहम हुँनिए कथावा लअय, ‘जब मुसा जोटोः परमेसर पड़ा एतेन दुखमाय अवला पबितर होड़कु रआ ककु अयुमेंए दो, अगर गोज् लेनि मे से ओके जिवेदोः रे हों हुँनि रआ एरोकु मनाव लेना।’”

Currently Selected:

लुका 16: BIX

Highlight

Copy

Compare