लुका 19

मलगुजारी अँगावी जकाइ

1ईसु जरीहो नगर रे बोलो कनते सेनो गोन दोहोनय। 2होंडे जकाइ ञुमुन मियड् होड़ दोहोलेना, जे मलगुजारी अँगावकु रेनि मुध सरदार दोहोनय जोटोः हुँनि मोंडोल दोहोनय। 3ईसु ञेल अराव दोहोनय चि हुँनि ओके हके? चितानतआचि हुँनि ठेपरा दोहोलेनय भीड़ चलते काय ञेल बोजा लिदिया। 4हेनते हुँनि ञेल तआ दोन मड़ाङ कनते लोवा काट रे देज् यनाय, चितानतआचि ईसु हेनेना होरा ते सेन अवला दोहोनय। 5हेनते ईसु होना ठँव रे सोदोरनय, दो अगास संगील केते हुँनि कथावा लअय, “ओय जकाइ झटहेले अड़गुनमी, चितानतआचि तीहिञ इञः अमः ओड़ाः रे दोहोनाइञ।”

6जकाइ तुरात अड़गु कोते खुस ते हुँनि अनेज् ओड़ाः इदीया लिदियय।

7नोंकन ञेल केते गोटे होड़कु कुरकुराव कोते कथा लआकु, “मुनी दो मियड् पापी होड़ रआ ओड़ाः रे उतराव तनय।”

8जकाइ तींगु कोते परभु एडे कथालअय, “ओय परभु ञेलेमी, इञः एडे जे तना धनखुरजी इदानआँ होना मे से अधा रंगिज् होड़कुञ ओवाआ, जोटोः अगर ओकेरआ हों बयमानी तेञ अँगाव तड्आ होले होना चइर गुना रुवाड़ेअइञ।”

9हेनते ईसु कथालअय, “तीहिञ नोआँ ओड़ाः रे पाप एतेन बंचावोः वेज्‌याना, चितानतआचि नुई हों अबराहम रेनि वंस हके। 10#मती 18:11चितानतआचि मनवाँ होपोन अड् लिनकु ञम जोटोः हुँकू पाप एतेन बंचाव तआ वेज् तनय।”

दस गोट सोना ठड़रा टका रआ हुडिञ गाम

(मती 25:14–30)

11होड़कु नोआँ दुखमा अयुम यते दोहोनाकु दो ईसु मियड् हुडिञ गाम कथालअय, चितानतआचि ईसु जेरुसलेम रआ ठँव रे दोहोनय, जोटोः हुँकू समझावओन दोहोनाकु चि परमेसर रआ राइज तुरात देखारोः अवला इदानआँ। 12हिनाते हुँनि कथालअय, “मियड् राजा संगीञ देस सेनोः लेनय ताकि राइज गदी ञम केते रुवाड़ वेजोअय। 13हुँनि अनेज् बन्धुवाकु मे से दस गोटङ राअ् केते हुँकू दसो गोटङ तआ मि-मियड् सोना रआ ठड़रा टका ओवा लिड्कुअय जोटोः होंकुइ कथावा लआ, ‘इञः रुवाड़ोः रे कर-बर इञोःपे।’ 14बकिन होना देस रे दोहोनकु ककु बेसवा यती दोहोना, जोटोः होना तयोम खभरिया दोवसते कथागोड् लआ, ‘आले कले चहावओ चि नुई आले तेङ रे राइजे।’”

15“हुँनि राइज गदी ञम केते रुवाड़नय, दो हुँनि अनेज् बन्धुवाकु जेके टका ओवा दोहोलिड्कुअय, अनेज् ठँव रे एर राअ् लिड्कुअय, ताकि ठुवाय चि हुँकू कर-बर कोते उकेड् कमी लआकु। 16हेनते सुरु रेनि वेज् कनते कथालअय, ‘ओय मुवार अमः रआ मियड् सोना रआ ठड़रा टका ते जोटोः दस गोट जोटोः कामी लाअइञ।’ 17तब मालिक हुँनि बन्धुवा कथावा लअय, ‘ओय बढ़ियाँ बन्धुवा! अमः अगम थोड़े एकेन रे भरोसा लायक उडुङनम, नहाः दो दस गोट सहर रे हाक मी दोहोया।’ 18जोटोः मिहोड़ वेज् कनते कथालअय, ‘ओय मुवार अमः रआ मियड् सोना रआ ठड़रा टका ते पाँच गोट जोटोः इञः कामी लाअइञ।’ 19मालिक हुँनि होंय कथावा लिदिया, ‘अमः हों पाँच सहार रेनि हकिम पड़ीयोओमी।’ 20तीसरा हों वेज् कनते कथालअय, ‘ओय मुवार नोआँ ने अमः रआ सोना रआ ठड़रा टका नोआँ हके, जे इञः अँगोछा रे तोल दोहो लाअइञ। 21चितानतआचि इञः अमः सुधा बोरोयोन दोहोनइञ, जे अमः कम बेर तड्आ होनाम इरेआ, अमः हुरमुट होड़ हके जे अमः रआ न लगे होनाहोम अँगावेए।’ 22मुवार हुँनिए कथावा लआ, ‘ओय दुस्ट बन्धुवा, इञः अमः ही रआ अहा ते दोसीञ ठहराव यतमिआँ। अमः इञः मी ठुवायतिञ दोहोना चि इञः कठोर मनवाँ हके, जोटोः जे एडे कइञ बिदेआ होंडे एतेन पयदा समटावेअइञ, जे एडे काइञ बेरेआ होंडे इरेअइञ। 23दो अमः इञः रआ टका महाजनकु एडे चितान तआ कम दोहोलआ चि इञः वेज् कोते भराइ सहीतञ अँगाव केदाअने।’ 24जोटोः जे होड़ ठँव रे तींगु दोहोलेनाकु हुँकू हुँनि कथावा लआकु, ‘होना चंदी रआ ठड़रा टका हुँनि एतेन अँगावेमी, हेनते जेकर एडे दस गोट सोना रआ ठड़रा टका इदानआँ हेनेनी ओवायमी।’ 25नोआँ अयुम केते हुँकू हुँनिकु कथावा लआ, ‘ओय मुवार हुँनि एडे दो दस गोटङ सोना रआ ठड़रा टका इदानआँ।’ 26#मती 13:12; मर 4:25; लुका 8:18मुवार कथालअय चि, ‘जेकर एडे इदानआँ हुँनि ओवाया; जोटोः जेकर एडे कोनाआँ, हुँनि एतेन होना हों जे हुँनि एडे इदानआँ अँगाव एंडाया। 27#मती 25:14–30बकिन इञः रेनकु हुँकू बयरीकु जे ककु चहावओन दोहोना चि इञः हुँकू एडेञ राइजे, हुँकू नोंडे अगुकेते इञः ठँव रे हुमाः गोज्‌कु।’”

जेरुसलेम रे जितावना रआ परोमोः

(मती 21:1–11; मरकुस 11:1–11; जोहन 12:12–19)

28नोआँ कथा केते ईसु जेरुसलेम पड़ाते हुँकू मड़ाङ-मड़ाङ सेनलअय। 29हुँनि जयतुन पहार पेंदरी बयतफगे जोटोः बयतनियाह ठँवरे सोदोरनय, दो हुँनि अनेज् चेलाकु मे से बारहोड़ नोंका कथा केते विदा लिड्किनय 30“ठँव रआ डीही रे सेनबन जोटोः सोदोरोअबन चि मियड् गधा छउवा तोल लेदी ञमोअय हुँनि तेङ रे ओका हिला हों ओके काय दुड़ूः तना, हुँनि रड़ा केते अगुइबन। 31अगर ओकेकुन अबनकु सोधव चि चितान तआ बन रड़ा यतिया, दो कथायबन चि परभु तआ नुई रआ दरकार इदानआँ।”

32जे किन एर बिदा दोहोना, हुकिन सेन कोते जे लेका हुँनि हुकिनय कथावा दोहोलआ, हेनका किन ञम लिदिया। 33जब हुकिन गधा छउवा राड़ायती दोहोनकिन दो हुँनि रेनकु मुवारकु हुकिन सोधाव लिड्किनाकु, “नुई गधा छउवा चितान तआ बन रड़ा यतिया?”

34हुकिन कथा लआ, “परभु तआ नुई रआ दरकार इदानआँ।” 35हुकिन हुँनि ईसु रआ ठँव रेकिन अगु लिदिया, हेनते अकिन रआ गमछा रड़ा केते गधा छउवा तेङरे गेंदराः डबना केते हुँनि तेङ रे ईसु दुड़ूः लिदियाकु। 36जब हुँनि सेनो गोन दोहोनय दो होड़कु परिघावी तआ अकु रआ गेंदराः होरा तिकु बिल यड् दोहोना।

37जोटोः जब हुँनि जयतुन पहार रआ ढेरंगा रे सोदोरनय, दो गोटा चेलाकु रआ गोटा मंडली होना गोटा सकती रआ काम चलते, जे हुँकू ञेल लआकु, खुस कोते अगम जोड़ सबद ते परमेसर रआ इसतुति लआकु।

38 # सिरिञ 118:26 “बढ़ियाँअय हुँनि राजा, जे परभु रआ ञुमुन ते वेजो गोनय!

सिरमा रे सांति जोटोः परमेसर रआ बड़ाइ होयावोः!”

39हिना एतेन भीड़ मे से थोड़ेः एकेन फरीसीकु हुँनि एतेनकु कथा लआ, “ओय गुरु, अपन चेलाकु मटियावोः तआ डपोट कुमी।”

40ईसु कथालअय, “इञः आपेञ कथावा यना, अगर नीकु मटियावोः रेदो दीरी हकाव बिरीदोओय।”

जेरुसलेम तआ इयामे

41ठँव रे वेज्‌नय दो जेरुसलेम ञेल केते हुँकू तअय इयाम लआ, 42“तीहिञ ही आपे ठुवा लेड् चि जोटोः कथालअय तना अछा होयाव कनाअने आपे ही नोआँ दिन रे सांति रआ दुखमा ठुवा केदापेअने, बकिन आपे होना नहाः कपे ठुवा यतेआ। 43चितानतआचि होना दिन आपे एडे मेजोआ चि आपे रेनकु बयरी आपे घेराव एंडा पेआकु, सेनोः वेजोःकु रोकाव पेआकु जोटोः चइरो पड़ा एतेन चढ़ायेएकु। 44अमः जोटोः आपे रेनकु सेंगोज् जे आपे एडेकुआ, हास रेकु मिलाव कुआ; जोटोः गोटा सहार तहास नहास एंडायोओ चितानतआचि अमः होना मोका कम ठुवालआ जब परमेसर अमः बंचाव तअय वेज् दोहोना।”

सेंड़ा बिनती ओड़ाः एतेन कर बारकु रआ उ-उडुङ

(मती 21:12–17; मरकुस 11:15–19; जोहन 2:13–22)

45ईसु सेंड़ा बिनती ओड़ाः रे सेन कोते लेन-देन करेक अवलाकु बहरा रे उडुङ लिड्कुअय, 46#जसा 56:7; जिर 7:11जोटोः हुँकूइ कथावा लआ, “ओल लआ इदानआँ, ‘इञः रआ ओड़ाः बिनती ओड़ाः होयावओ,’ बकिन आपे दो रे-रेज्‌कु रआ लोपाः बनाव केदापे।”

47 # लुका 21:37 ईसु सदा हीला सेंड़ा बिनती ओड़ाः रे सिछा एमयन दोहोलेनय; जोटोः मुध पुरोहित जोटोः धरम पोथी सि-सिखावकु जोटोः होड़कु रेनकु मुखिया हुँनि गोजे तआ मोका ञमयान दोहोनाकु, 48बकिन नोंकय तआ मोका का ञमलेना, चितानतआचि होड़कु ईसु रआ दुखमा धेयान तिकु अयुम यते दोहोना।

Currently Selected:

लुका 19: BIX

Highlight

Copy

Compare