लुका 20

ईसु रआ अधिकार बारे सवाल

(मती 21:23–37; मरकुस 11:27–33)

1मुसिञ नोंका लेना चि सेंड़ा बिनती ओड़ाः रे ईसु होड़कु सिछा ओवा यतकु दोहोनय जोटोः बढ़ियाँ दुखमा सिखाव यतकु दोहोनय, दो मुध पुरोहितकु जोटोः धरम पोथी ठुवाय होड़कु ईसु रआ दुखमा धेयान तिकु अयुमवा यतकु दोहोना 2जोटोः कथा लआकु, “आले बतलाव वाले, अमः नोआँ काम चितान अधिकार तेम करावेए, जोटोः हुँनि ओके हके जे नोआँ हाक अमः ओवा तड्मिआँ?”

3ईसु हुँकूइ उतारावा लअय, “इञः हों मियड्-मियड् सवाल सोधव यतपेआ, इञः बतलाव वाइञपे, 4जोहन रआ बतिसमा सिरमा पड़ा एतेन दोहोलेना चि होड़कु पड़ा एतेन?”

5तब अकु-अकु कथा ओपड़ेञ नाकु, “अगर सिरमा पड़ा एतेन बुन मेनगी रेदो ईसु कथायय, ‘फिन आपे हुँनि एडे चितान तआ कपे सारीयोओ?’ 6अगर बुन कथाया, होड़कु पड़ा एतेन दो गोटे होड़ अबुन दीरी ते ढेचोम बुनाकु, चितानतआचि हुँकू सनारी ठुवा यतेआकु चि जोहन परमेसर पड़ा एतेन दुखमाय अवला होड़ दोहोलेना।” 7हिनाते हुँकू ईसु उतारावा लआकु, “आले कले ठुवावना चि जोहन ओके पड़ा एतेन बतिसमा एम तआ अधिकार ओवा तदिया।”

8ईसु हुँकूइ कथावा लआ, “तब इञः हों एरोइञ बतलाव लेए इञः ओका हाक ते नोआदार कराव यतेअइञ!”

दुस्ट गिरहात रआ हुडिञ गाम

(मती 21:33–46; मरकुस 12:1–12)

9 # जसा 5:1 हिना एतेन ईसु होड़कु एडे नोआँ हुडिञ गाम कथालअय, “मियड् होड़ बिठा रे अँगुर बीड् लअय जोटोः होना गिरहातकु ठीका ओवा केते अगम दिन तआ परदेस सेनोः यनय। 10जब जोओ गोड् बेरा होयावना दो गिरहातकु एडे मियड् बन्धुवा बिदालअय ताकि बिठा एतेन अपन रआ हिंसा अँगावे, बकिन हुँनि हुमाः केते एखेन अती रुवाड़ गोड् लिदियाकु। 11फिन हुँनि मियड् जोटोः बन्धुवा बिदा लिदियय, हुँकू हुँनि हों हुमाः केते जोटोः बेमाइन केते एखेन अती रुवाड़ गोड् लिदियाकु। 12फिन हुँनि तीसरा-ई बिदालअय, हुँकू हुँनि हों हुमाः घव केतेकु उडुङ गोड् लिदिया। 13हेनते अँगुर बिठा रेनि मुवार सोचाव लअय, ‘इञः चितानाइञ चिलकाआ? इञः अपन दुलार होपोनिञ बिदाया, साइत हिनि जुवाबियाकु।’ 14बकिन हुँकू गिरहातकु अकु-अकु दुखमा लेनाकु, ‘नुई दो मलीक रेनि हकदार हके, एला नुई गोजेयाबुन रेदो नुई रआ अबुन तआ योओ।’ 15हुँकू अँगुर बिठा एतेन बहरा उडुङ केते गोज् लिदियाकु।

“हिनाते अँगुर बिठा रेनि मुवार हुँकू सुधा चितानय चिलकाआ? नोंका कथा केते ईसु होंकुइ सोधाव लआ। 16इञः सनारिञ कथायतेआ जोटोः वेज् कोते हुँकू गिरहात कुइ नास कुआ, जोटोः अँगुर बिठा एटाःकुइ जिमावआ।”

होना अयुम केते हुँकू कथा लआ, “नोंका ओका हिला अलो होयावकोः।”

17 # सिरिञ 118:22 हुँनि हुँकू पड़ा बोगाः केते कथालअय,

“फिन नोआँ चिताना ओल तड्आ ‘जे दीरी राज मिसतिरिकु बेकमा मेनयते दोहोनाकु

हेनेना दीरी कोना रआ कोर पड़ीयना।’

18जे ओके होना चटाइन रे ञुरो अकु, हुँकू टुकरा-टुकरा योओकु जोटोः अगर नोआँ चटाइन ओके तेङ रे ञुरोआ दो हुँकू गेजेरोओकु।”

रोमी राजा तआ मलगुजारी ओवाय

(मती 22:15–22; मरकुस 12:13–17)

19हेनेन घनी धरम पोथी ठुवाकु जोटोः मुध पुरोहितकु ईसु सब् अरावओन दोहोनाकु चितानतआचि हुँकू ठुवा केदाकु चि हुँनि अबुन बारे नोआँ हुडिञ गाम कथालअय, बकिन होड़कु बोरोवा लआकु। 20हेनते हुँकू हुँनि रआ ताक रे दोहोलेनाकु जोटोः पता लगाव बिदा लिदियाकु चि धरमी रआ भेंस सब् केते ईसु रआ चितान न चितान दुखमा रे सबी, ताकि हुँनि रोमी राजपाल रआ अती रे जोटोः हाक चलावी एडे सोपावी। 21कुटनीकु ईसु एतेन नोआँ सोधाव लिदियाकु, “ओय गुरु, आले नोआँ ठुवा यतेअले चि अमः सनारीम दुखमाया जोटोः ओकेरआ हो कम पछपतेआ, बकिन परमेसर रआ होरा सचाई तेम बतलावेए। 22चिताना आले रआ नियम मोताबिक रोमी महाराजा कयसर तआ मलगुजारी एम उचित इदानआँ चि कोवन?”

23ईसु हुँकू रआ चलँक ठुवा केते हुँकूइ कथावा लआ, 24“मियड् ठड़रा टका बतलाव वाइञपे। नोआँ रे छापा जोटोः ञुमुन ओकेरआ इदानआँ?”

हुँकू कथा लआ, “रोमी महाराजा कयसर रआ।”

25ईसु हुँकूइ कथावा लआ, “दो जे रोमी महाराजा कयसर रआ हके होना रोमी राजा ओवायपे जोटोः जे परमेसर रआ हके होना परमेसर ओवायपे।”

26हुँकू होड़ ठँव रे नोआँ दुखमा रे ईसु ककु सब् बुजा लिदिया, बकिन हुँनि रआ उतारा ते चकित कोते मटियाव एंडा नाकु।

जीवेड् बिरीदोः

(मती 22:23–33; मरकुस 12:18–27)

27 # बि.काम 23:8 थोड़ेः एकेन सदुकीकु ईसु एडे वेज कनते कथायते दोहोनाकु चि गोज् कोते जिवेड् बिरीदोः ही कोनाआँ, 28#नियम 25:5हुँनि ईसु एडे कथालअय, “ओय गुरु, मुसा दो आले तआ नोंका नियम ओल तड्अय, ‘अगर ओके रेनि दादाते अपन लंञी दोहोन तेरे बेगर सेंगोज् होयावते गोजोअय रेदो हुँनि रेनि बोयहा हुँनि रेनि लंञीते सुधा बियाह होओय जोटोः अपन दादाते तआ सेंगोज् जनामियय।’ 29सात बोयहा दोहोलेनाकु, पहिल रेनि बियाह कनते बेगर सेंगोज् होयावते गोज् यनाय। 30फिन मंझिला बोकोते हेनेनी लंञी सुधा बियाह कोते हुँनि हों गोज् यनाय, 31जोटोः संझिला हों हुँनि लंञी सुधा बियाह लेनय जोटोः गोज् यनाय। हेंका सतो गोट बेगर सेंगोज् होयावते गोज्‌यनाकु। 32हेनाःतेर अखरी रे हुँनि लंञी हों गोज् यनाय। 33तब जिवेड् बिरीड् कोते हुँनि हुँकू मे से ओके रेनि लंञी पड़ीयोओय, चितानतआचि हुँनि सतो गोट रेनि लंञी पड़ी चुकाव दोहोनय।”

34ईसु हुँकूइ कथावा लआ, “नोआँ जुग रेनकु होड़कु रेदो बियाह होयावओ, 35वेजोः अवला जुग रे का अन्तोः जीवन ञम तआ जोटोः जिवेड् बिरीदोः लइक इदानकुआ हुँकू रआ होंडे बियाह एरो होयावलेना। 36हुँकू फिन एरोकु गोजोआ; चितानतआचि हुँकू दुत लेकाकु होयावओ, जोटोः जिवेड् बिरीदोः चलते परमेसर रेनकु सेंगोज् पड़ियोओकु। 37#उठलु 3:6बकिन नोआँ दुखमा चि गोज् लिनकु जीवेड् बिरीदोओ, ‘मुसा हों झुँड़ रआ गाम रे दिसतार तड्अय चि हुँनि परभु अबराहम रेनि परमेसर, जोटोः इसहाक रेनि परमेसर जोटोः जाकुब रेनि परमेसर’ कथायय। 38परमेसर दो गोज् लिनकु रेनि कोवन बकिन जिवेड्कु रेनि परमेसर हके चितानतआचि हुँनि ठँव रे गोटे जीवेड्अकु।”

39तब नोआँ अयुम केते धरम पोथी ठुवाकु मे से थोड़ेः एकेन नोंकाकु कथा लआ, “ओय गुरु, अमः अछाम कथा लआ।” 40हुँकू फिन हुँनि एतेन थोड़ेः एकेन जोटोः सोधावी तआ डीड का होयावना।

मसी ओके हके

(मती 22:41–46; मरकुस 12:35–37)

41ईसु फिन हुँकूइ सोधाव लआ, “नोंका चिलका होयाव बोजायोओ चि मसी दो दाऊद रेनि बंसज हके? 42#सिरिञ 110:1चितानतआचि भजन संहिता बाही रे दाऊद खुद नोंका कथायय,

“‘परभु परमेसर दो इञः रेनि परभु एडे कथायय,

इञः रआ जोम होरे दुड़ूःमी।

43जबरे इञः अमः रेनकु बयरी अमः रआ जँगा दुबा रे कइञ अगुकु।’

44नेंका दाऊद मसी दो ‘परभु’ कथावाइयय, दो फिन हुँनि चिलका दाऊद रेनि खनदान कथायोओय?”

धरम पोथी ठुवाकु एतेन चँड़चित दोहोनपे

(मती 22:1–36; मरकुस 12:38–40)

45जब गोटे होड़कु आ-अयुमयान दोहोनाकु दो ईसु अनेज् चेलाकुइ कथावा लआ, 46“धरम पोथी सि-सिखवकु एतेन चँड़चित दोहोनपे, जे जिलिङ-जिलिङ गेंदराः होड़हड् कोते दड़ाँन अछा सचाकुआ, जोटोः बाजार ते जोहार-जोहार अ-अयुम पसींदेएकु जोटोः बिनती ओड़ाः रे मुख-मुख ठँव रे दुड़ूः जोटोः समाजोः घनी हों मुख-मुख ठाँव चहावओकु; 47हुँकू रंडियाहीकु रआ ओड़ाः कबजा एंडायाकु जोटोः एरञेले तआ अगम जिलिङ बिनतीयाकु नीकु दो परमेसर एतेन अगम डन्ड ञमेअकु।”

Currently Selected:

लुका 20: BIX

Highlight

Copy

Compare