लुका 6

हपता हीला रेनि परभु

(मती 12:1–8; मरकुस 2:23–28)

1 # नियम 23:25 हपता रे रुड़ुयोः हिला ईसु जोटोः गोहोम ओत सोज परोमोन दोहोनय, हेनते हुँनि रेनकु चेलाकु गोहोम गेले होड्-होड् ते अती ते उरुड्-उरुड् तिकु जोम यड् दोहोना। 2तब थोड़ेः एकेन फरीसीकु कथा लआ, “आपे मोना कम चितान तआपे करावेए जे नियम रआ मोताबिक रुड़ुयोः हिला उचित इदानआँ?”

3ईसु हुँकूइ कथा रुवड़वा लआ, “तना आपे नोंका कपे पढ़ावतना चि दाऊद जब अनेज् जोटोः हुँनि रेनकु गतिकु रंगिज् दोहोलेनाकु दो चितानय चिलका लआ? 4#लेबी 24:9#1 समु 21:1–6हुँनि परमेसर रआ ओड़ाः रे सेनलेनय, जोटोः परमेसर तआ रकब् लआ रुटी जोम लअय सिरीप पुरोहितकु छोड़ाय ओके तआ हों उचित का दोहोलेना जोटोः अनेज् हो जोम लअय जोटोः गतिकु हों ओवा लिड्कुअय।”

5हेनते ईसु हुँकूइ कथावा लआ, “मनवाँ होपोन रुड़ुयोः हिला रेनि हों परभु हके।”

पयहा अती अवला होड़ नपाय लअय

6नोंका लेना चि रुड़ुयोः हिला बिनती ओड़ाः रे सेन कोते ईसु सि-सिखाव बुहड़ी केदय; होना एडे मियड् होड़ जोम अती पयहा अवला दोहोना। 7धरम पोथी ठुवाकु जोटोः फरीसीकु हुँनि तेङ रे दोस लगाव तआ मोका ञम रे दोहोलेनाकु चि हुँनि ञेले रुड़ुयोः हिला नपाय कियय चि कोवन। 8बकिन हुँनि हुँकू रआ बिचार ठुवायते दोहोनय; हिनाते हुँनि अती पयहा लेनी कथावा लअय, “बिरीड्मी तला रे तींगुनमी।” हुँनि तींगु बिरीड् यनाय। 9ईसु हुँकूइ कथावा लआ, “इञः आपेञ कथावायना चि रुड़ुयोः हिला रआ नियम चिताना चिलका करावे उचित कथायय? बढ़ियाँ कामे चहे बुरा कामे, जीवि बंचावे चहे नास एंडाय?” 10तब ईसु चावगिरदा रेनकु गोटे होड़ ञेल केते हुँनि होड़य कथावा लआ, “अमः रआ अतीतम सोजेमी” हुँनि हेंका लअय, जोटोः हुँनि रआ अती फिन नपाय यना।

11बकिन हुँकू नोआँ ञेल केते कयरव नाकु जोटोः अकु दुखमा नाकु अबुन ईसु बुन चिलकाया।

बिदा लिड्कु बराह चेला

(मती 10:1–4; मरकुस 3:13–19)

12होना जुवार हुँनि पहार तेङ रे बिनतीयोः तअय सेनलेना, जोटोः परमेसर एडे बिनतीयोः रे रात भर बिताव लअय। 13अँगालेना दो हुँनि अनेज् चेलाकु राअ् केते हुँकू मे से बराह झन रींबड़ केते हुँकू बिदा लिड्कु चेला ञुमुन एम लअय 14जोटोः हुँकू नीकु हके; सिमोन जे रआ ञुमुन ईसु पतरस दोहोलअय जोटोः हुँनि रेनि बोयहा अन्द्रियास, जाकुब, जोहन, फिलिपुस, जोटोः बरतुलमय, 15जोटोः मती, थोमा, जोटोः हलफाइ होपोन जाकुब, हेनते सिमोन जे धरम उत्साही कथायोओय, 16जोटोः जाकुब रेनि होपोन जहुदा हेनते जहुदा इस्करियोती जे ईसु एर सब् लिदियय।

सिछा एम जोटोः ना-नपाय

(मती 4:23–25)

17तब ईसु बिदा लिड्कु चेलाकु सुधा पहार एतेन अड़गु कोते समथर देस रे अगम चेलाकु तुली वेज तींगु लेनय, जोटोः हुँनि रेनकु चेलाकु रआ अगम भीड़ जोटोः गोटा जहुदिया, जेरुसलेम जोटोः सुर हेनते सयदा रआ समुदार डुरी एतेन अगम होड़ जवारनकु; 18जे हुँनि रआ अयुमे तआ जोटोः अपन जंडिरा एतेन नपाययोः तआ हुँनि ठँव रेकु जवार लेना। जोटोः होंडे छुत आतमा ते सताव लिनकु होड़ हों अछा लिड्कुअय। 19गोटे ईसु छुवाँवकु अरावओन दोहोना चितानतआचि हुँनि एतेन सकती उडुङ कोते गोटे नपाय यतकु दोहोनय।

सुख जोटोः दुख बचन

(मती 5:1–12)

20तब हुँनि अपन चेलाकु पड़ा बोगाः केते कथालअय,

“धन्य आपे जे रंगिज्-तेताङ तेपेआ;

चितानतआचि परमेसर रआ राइज आपे तआ हके!”

21“धन्य आपे जे नहाः रंगिज् तेपेआ;

चितानतआचि बी कुअय!”

“धन्य आपे जे नहाः इयाम यतेअपे;

ने-तोरान लंदायापे!”

22 # 1 पत 4:14 “अमः धन्य इदानमिआँ जे मनवाँ होपोन रआ तयोम सेने चलते होड़कु अमः रआकु बिरोदा जोटोः घीनाव मिआकु जोटोः अमः रआ नींदायकु जोटोः अमः रआ ञुमुन बुरा ठुवाकेते कटाव एंडायकु! 23#2 इति 36:16; बि.काम 7:52दो होना दिन खुस दोहोनमी, जोटोः आनन्द मनावेमी, चितानतआचि ञेलेपे, सिरमा रे आपे तआ सेंड़ा इनाम इदानआँ हुँनि रेनकु बबा-तताकु परमेसर पड़ा एतेन दुखमाय अवला होड़कु सुधा हों नेंका यते दोहोनाकु।”

24“बकिन हय आपे जे धनितनापे,

चितानतआचि आपे अपन सुख-चैन रआ मजा ञम चुकाव तड्अपे!”

25“हय आपे जे नहाः बी तनापे;

चितानतआचि रंगिजोओपे!”

“हय जे अब पे लंदाया;

चितानतआचि खोभरावओपे जोटोः इयामेआपे!”

26“हय आपे जब गोटे होड़ आपे रआ बड़ाइयेअकु, चितानतआचि हुँकू रीनकु बबा-तता परमेसर पड़ा एतेन दुखमाय अवला कथा केते ठठक अवलाकु तुली हों नेंकाकु कराव यते दोहोना।”

दुसमनकु तुली दुलारे

(मती 5:38–48; 7:12)

27“बकिन इञः आपे आ-अयुम कुञ कथावायना चि अपन बयरीकु तुली दुलारेपे, जे आपे सुधा बिरोदेअकु हुँकू रआ भलाइयेपे, 28जे आपेकु सरपावा, हुँकू आसीस ओवाकुपे; जे आपे सुधाकु बुरा बेवहारेए, हुँकू तआ बिनतीपे। 29जे अमः रआ मियड् जोहा रेकु थपड़ावमी दो हुँनि पड़ा कोंजरा होर हों चुवेर गोदेमी, जोटोः जे अमः रआ चदार अँगावे दो हुँनि अमः रआ झुला हों इकाएर इदीवायमी। 30चिता नहों जे अमः एतेन कोयेअकु हुँकू ओवायमी, जोटोः जे अमः एतेन अमः रआ चीज रेजे होना अलोम कोये। 31#मती 7:12जे लेका एटाःकु आपे सुधा बेवहारे तआ चहाव वोओकु हेनेन लेका आपे हों एटाःकु सुधा हों बेवहारेपे।”

32“अगर अमः अपन दुलार करेक अवलाकु तुलीम दुलारे दो अमः रआ चितान दया? चितानतआचि पापी हों अपन दुलार करेक अवलाकु तुली नेंकायय! 33अगर अमः बढ़ियाँ काम करेक अवलाकु तुली ही बढ़ियाँ याम दो, अमः रआ नोआँ रे चितान दया? चितानतआचि पापी हों नेंका याकु! 34जेकर एतेन फिन ञमोः रआ असरा रेम दोहोना अगर अमः हिनी ही उधरा ओवायय, दो अमः रआ चितान दया? चितानतआचि पापी पापीकु उधरा ओवा कुआय चि हुँकू हेनेन इयान फिनय ञमें! 35बकिन अपन बयरीकु तुली दुलारेए, जोटोः हुँकू सुधा बढ़ियाँ कामेपे। जोटोः फिन ञमोः रआ असरा का दोहो केते उधरा एमे, तब अमः रआ प्रतिफल महान होयावओ, जोटोः अमः परम परधान परमेसर रेनि होपोन ठहरावओम। चितानतआचि हुँनि बुराइ करेक अवला जोटोः धनियाबाद का ए-एम अवलाकु तआ हों मया एरञेलय। 36जे लेका अमः रेनि सिरमा बबा मया रे पेरेज् इदानियाँ हेनका अमः हों मया योमी।”

दोस अलोम लगावे

(मती 7:1–7)

37“ओकेरआ हों भला-बुरा कथा केते अलोम नेयय के दो परमेसर अमः रआ हों एरोय फयसला लेए। ओके तेंग रे हों दोस अलोम लगाव के जेकर से परमेसर हों अमः एरोय दोस लेमा। मफीयाम दो परमेसर अमः हों माफ मिआँय। 38एमेमी दो परमेसर अमः हों ओवा मिआँय। ओता-ओता केते जोटोः हिलहो-हिलहो केते जोटोः एंडायोः लेका परमेसर अमः रआ अँजली रे एमेअय, चितानतआचि जे पुरा नाप ते आपे नापेअपे हेनेना ते आपे तआ नाप वापेआ।”

39 # मती 15:14 फिन हुँनि हुँकू मियड् हुडिञ गाम कथावा लिड्कुअय, “तना मियड् अन्धरा एटाः अन्धराकु तआ होराय बतलाव केए; नोंका चिताना बनार डोडहा रे एरोकीन ञुरना? 40#मती 10:24,25; जोह 13:16; 15:20चेला अनेज् गुरु एतेन सेंड़ा कुनीकुआ, बकिन जे ओके हों पुरा सिछा ञम केते अपन गुरु रआ बराबाइरोअय।”

41“अमः अपन बोयहा रआ कटीज् गलती दो अगम झटहेले ञेलेअम, बकिन अपन रआ सेंड़ा गलती दो अनदेख एंडायाम? 42जब अमः खुद रआ गलती दो कम ञेलेआ जोटोः एटाःकु रआ गलती सुढरावे तआ चहवओम। ओय कपटी पहिल दो खुद अपन रआ सेंड़ा-सेंड़ा गलती सुढराव मड़ाङ कमी तब ओकारे हों सेन कोते होड़कु रआ कटिज्-कटिज् गलती चिनहयमी जोटोः सुढरावेमी रे एटाःकु मी सुढरावा दो फिन अमः चिलका कथायम एला बोयहा अमः रआ गलतीञ सुढरावेए।”

जे लेका काट हेनेन लेका जोओ

(मती 7:16–20; 12:33–35)

43“बढ़ियाँ काट बढ़ियाँ जोओ योओ जोटोः बुराइ काट बुराइ जोओ योओ, 44#मती 12:33हिनाते गोटा लेकन काट अपन जोओ ते चिनहा योओ; चितानतआचि होड़कु जनुम झुँड़ एतेन अंजीर ककु गोदेआ जोटोः न जनुम काट एतेन अँगुर 45#मती 12:34बढ़ियाँ होड़ अपन मन रआ बढ़ियाँ भन्डार एतेन बढ़ियाँ दुखमा उडुङेअय, जोटोः बुरा होड़ अपन बुरा भन्डार एतेन बुरा दुखमा उडुङेअय; चितानतआचि जे मन रे पेरेज् तना हेनेना उडुङ ङेअय।”

ओड़ाः बनाव कीन बरिया होड़

(मती 7:24–27)

46“जब अमः इञः रआ कथा कम अयुमेंए दो चितान तआ इञः ‘ओय परभु, ओय परभु’ मी मेनगिआ? 47जे ओके इञः एडेकु वेजोआ जोटोः इञः रआ दुखमा अयुम केते होनाकु मनावओ, इञः आपेइञ बतलाववायना चि हुँनि ओके लेकाआय। 48हुँनि होड़ लेकाअय जे ओड़ाः बनावे जुवार ओत गडा ला केते सेंरेङ रे नेव ला लअय। हेनते जब बडी वेज्‌ना दो तू लेना होना ओड़ाः रे बजड़ावना बकिन होना काय हिलहो बेजालआ; चितानतआचि होना मजगुत बनाव दोहोलेना। 49बकिन जे ओके हों इञः रआ दुखमा अयुमेअकु जोटोः होना रे ककु सेनेआ, हुँकू हुँनि सोरडोंडो मनवाँ लेकाअय जे अपन ओड़ाः बेगर नेव ला केते बितिल ओत तेङरे ओड़ाः बनाव लअय, जब बडी दाअ् वेज् न दो झटहेले ढोकलव ञुर केदय!”

Currently Selected:

लुका 6: BIX

Highlight

Copy

Compare