लुका 7

मी साव सिपाही रेनकु मालिक रआ सारी

(मती 8:5–13)

1ईसु जब गोटा उपनीत होड़कु अयुमवा पुरा केड् तयोम कफरनहूम रे सेनलेनय। 2होंडे मी साव सिपाही रेनकु मालिक रेनि मियड् दुलारा बन्धुवा दोहोलेना हुँनि जंडिरा ते गोजोः लेकाय दोहोलेना। 3सुबेदार ईसु रआ चरचा अयुम केते जहुदीकु रेनकु कइयेक मुध होड़कु ईसु एडे गोहरावओ तआ बिदा लिड्कुअय चि वेज् कोते, “इञः रेनि बन्धुवा नपाये।” 4हुँकू ईसु एडे वेज्‌नाकु जोटोः नोंका गोहराव कोते कथा लआकु, “सुबेदार नोआँ लायक इदानियाँ चि अमः हुँनि तआ दया योमी। 5चितानतआचि हुँनि अबुन रीनकु जाइत सुधा दुलारेए, जोटोः हुँनि ही अबुन रआ बिनती ओड़ाः बनाव तड्आ।”

6ईसु हुँकू सुधा सेननय। हुँकू ओड़ाः ठँव रे सोदोर ही नाकु चि दारोगा अनेज् गतिकु नोंका कथाय तआ बिदा लिड्कुअय, “ओय परभु अलोम परेसनोः, चितानतआचि इञः नोआँ लायक कुनीञा चि अमः इञः रआ ओड़ाः रेम वेजोः, 7हिना करने इञः हों नोआँ लायक कइञ ठुवालआ चि अमः एडेञ वेजोः, अमः मी कड़ी कथागोदे मी दो इञः रेनि धँगड़ नपाय योओय। 8ईञः हों मियड् हकिम रआ ओतेत रे कामे यतेअइञ। जोटोः इञः रआ ओतेत रे सिपाहीकु कामेअकु जब मिहोंड़ कथा वाइयाइञ, ‘जू!’ दो हुँनि सेनोः अय जोटोः एटाः-ई कथा वाइयाइञ ‘एला!’ दो हुँनि वेजोअय अपन बन्धुवा कथा वाइयाइञ ‘नोआँ कामेमी!’ दो हुँनि करावेअय।”

9ईसु नोआँ अयुम केते तजूक यानय, जोटोः हुँकू अनेज् तयोम वेजोः अवला भीड़ पड़ा किंदराव कोते कथालअय; “इञः आपेञ कथावायना चि इञः इस्राएल रे हों नोंका सारीयोः कइञ ञेल लआ!”

10जोटोः जे बिदा दोहोलिड्कुआ हुँकू ओड़ाः रुवाड़ कनते हुँनि बन्धुवा नपायकु ञेल लिदिया।

ईसु रंडियाही होपोन जीवेड् लअय

11मड़ाङ दिन ईसु नाईन नगर सेनलेनय। ईसु तुली हुँनि रेनकु चेला जोटोः अगम भीड़ हुँनि सुधाकु दोहोलेना। 12हुँकू जब नगर रआ फाटक ठँव रे सोदोरनकु, दो होड़कु मियड् मुरदा नगर एतेन बहरा तिकु इदीयाती दोहोलेना, हुँनि एंगाते रेनि एसकार होपोन ते दोहोना जोटोः हुँनि रंडियाही दोहोनय। नगर रेनकु अगम होड़ हुँनि सुधाकु दोहोना। 13रंडियाही ञेल केते परभु तआ अगम सोग वेज्‌ना, जोटोः हुँनि कथावा लअय, “अलोम इयामे।” 14ईसु ठँव रे वेज् कोते मुरदा छुवाँव लअय, दो गो-गोःकु तींगु यनाकु। तब ईसु कथालअय, “ओय जवान, इञः अमाःइञ कथावा यना, बिरीड्मी!” 15मुरदा बिरीड् दुड़ूःनय जोटोः दुखमा लेनय। तब ईसु हुँनि एंगाते जिमावा लअय।

16हिना चलते गोटे होड़कु बोरो यनाकु, जोटोः हुँकू नोंका कथा केते परमेसर रआकु बड़ाइ लआ, “अबुन तला रे मियड् परमेसर पड़ा एतेन दुखमाय अवला होड़ बिरीड् तनय जोटोः परमेसर अपन होड़कु पाप एतेन बंचावे वेज्‌तनाय।”

17ईसु रआ बारे नोआँ खभार गोटा जहुदिया जोटोः अस पस रआ गोटा राइज रे पेरेज्‌यना।

बतिसमा एमी जोहन रआ सवाल

(मती 11:2–19)

18जोहन तआ चेलाकुतय नोआँ गोटा दुखमा हुँनि बतलावा लआकु 19तब जोहन अनेज् रेनकिन बरिया चेला मे से राअ् केते परभु एडे नोआँ सोधव तआ बिदा लिड्किनय, “तना अमः हेनेनी छ-छडावी मसी हके जे वेजोः अवला दोहोनाम, चि आले एटाः-ई रआ असरा ञे-लाले?”

20हुकिन बरिया चेला ईसु एडे वेज् कनते कीन कथा लआ, “जोहन बतिसमा एमी अलिङ अमः एडे नोआँ सोधव तआ बिदा-तड्-लिंङय चि तना आले छडावी मसी अमः हके, चि आले एटाः-ई रआ होरा ले ञेला?”

21हेनेन घनी ईसु ढेर होड़ जंडिरा लेनकु नपाय लअय जोटोः पीड़ा लिनकु, जोटोः मुवाँ आतमा वलाकु छडाव लअय; जोटोः अगम होड़ जे अँधरा दोहोनाकु अछा लिड्कुअय। 22#जसा 35:5,6; जसा 61:1ईसु हुकिनय कथावा लआ, “जू सेनोःपे, आपे जे अयुम यतेअपे, जोटोः ञेल यतेअपे होना जोहन कथावाइपे, अँधराकु ञे-ञेल यनाकु, लंगड़ाकु से-सेन यनाकु, छेवड़ा रोग अवला सुध यतकुआ, बहिराकु अयुम यतेअकु, गोज्‌लेनकु जीवेड् यतकुआ रंगिज् लेनकु बढ़ियाँ दुखमा अयुमवा यतकुआ। 23धन्य इदानियाँ हुँनि, जे इञः बारे रे ठोकोर काय जोमेआ।”

24जोहन दोवसते खभाइर एम अवला होड़ सेनोः नकिन दो ईसु जोहन रआ बारे होड़कुकिन सोधव लआ, “जब आपे पहार रे जोहन ञेलपे सेन दोहोना दो चिताना ञेलपे अरावना? चिताना होय ते हिलहोलेना ढोड़ही झुँड़ चि? कोवन! 25दो फिन आपे चितान ञेल सेन दोहोलेनापे? तना हुँनि होड़ जे कीमती चोगा होड़हड् लेनी? कोवन, ञेलेपे जे कीमती गेंदराः होड़हादेअकु जोटोः सुख-चैन ते दोहोनाकु, हुँकू राजमहल रे दोहोनाकु! 26दो फिन अखीर चितान तआ सेन दोहोलेनापे? परमेसर पड़ा एतेन दुखमाय अवला होड़ ञेल तआ? आँ! इञः जरुड़ आपेञ कथावा यना, परमेसर पड़ा एतेन दुखमाय अवला होड़ एतेन हों मियड् सेंड़ा-ई होड़। 27#मला 3:1नुई हेनेनी हके, जेकर रआ बारे धरम पोथी रे ओल लआ इदानआँ ‘ञेलेपे! इञः रआ खभाइर एम अवला आपे रआ मड़ाङ रेञ बिदाया, हुँनि आपे रआ मड़ाङ रे आपे तआ होरा तेयारेअय।’ 28इञः आपे एडेञ कथा यतेआ, चि होड़कु रे जोहन बतिसमा एमी एतेन सेंड़ा ओके हों कोनीयाँ। बकिन जे परमेसर रआ राइज रे हुडिञ एतेन हों हुडिञ होड़, हुँनि जोहन एतेन सेंड़ाआय।”

29 # मती 21:32; लुका 3:12 हिनाते गोटे होड़ जोटोः नोआँ हमिज् मलगुजारी अँगावकु हों परमेसर रआ होरा सनारी मनाव नाकु, चितानतआचि हुँकू जोहन एतेन बतिसमा अँगाव लआकु। 30बकिन फरीसीकु जोटोः धरम पोथी सि-सिखावी जोहन एतेन बतिसमा का अँगाव केते परमेसर रआ जोजना टलाव केदाकु।

31ईसु फिन कथालअय, “इञः नोआँ पीढ़ी रेनकु होड़ ओके तुलीञ घुरी कुआ? हुँकू बाजार रे दुड़ूः लेनकु सेंगोज्‌कु लेका अकु, जे अपन गतिकु हकाव केते कथायाकु, ‘आले आपे तआ मुरली साडी लआले जोटोः आपे कपे रुचुः लेना, आले खोभराव लेनाले जोटोः आपे बोहोः हों कपे हबुड् जुड़ू लेना!’ 32हुँकू, हुँकू सेंगोज् लेका अकु जे बाजार रे दुड़ूः कोते एक दुसराकु एडे कथायकु, ‘अले अपे तआ मुरली सडी लआले जोटोः कपे रुचुः लेना, अले खोबराव सिरिञ लआले जोटोः कपे इयाम लआ!’ 33चितानतआचि जोहन बतिसमा एमी न रुटी जोम लअय, न अँगुर रास ञू लअय जोटोः आपे कथायपे चि, ‘मोनी एडे मुवाँ आतमा इदानआँ!’ 34मनवाँ होपोन वेज्‌लेनय, जे जोम ञू लेनय जोटोः हुँकू कथायाकु, ‘ञेलेपे! नुई होड़ पेटु जोटोः पियाङकड़ाय, मलगुजारी अँगावकु जोटोः पापीकु रेनि गति कथायपे!’ 35बकिन परमेसर रआ बुधि मोताबिक सेसेनकु परमेसर रआ बुधि सनारी सबित तड्आकु।”

लंञी रआ पाप मफी

36फिन मियड् फरीसी ईसु एतेन गोहराव लेनय चि हुँनि सुधा मंडी जोमोः, तब ईसु हुँनि फरीसी ओड़ाः रे सेन कोते मंडी जोमोः तअय दुड़ूःना। 37#मती 26:7; मर 14:3; जोह 12:3होना नगर रेनि मियड् पापी लंञी ठुवालअय चि ईसु फरीसी ओड़ाः रे मंडी जोमोः तअय दुड़ूः तना, दो पिलीब् दीरी रआ बोतोल रे सोहों सुनुम अगु लअय 38हुँनि ईसु रआ तयोम होर एतेन वेज् कनते ईसु रआ जँगा ठाँवरे इयाम वेज् कोते इकड़ुमनय, जोटोः हुँनि रआ जँगा रे मेंड् दाअ् ते भींजाव केते अनेज् रआ बोहोः रआ उब् ते जोड् लअय, जोटोः हुँनि रआ जँगा जिधा चोहना केते होंडे सोहों सुनुमय ओजाः लआ। 39तब सिमोन, जे फरीसी ईसु नेवता दोहोलअय हुँनि लंञी ञेल केते मने-मन कथालअय, “अगर नुई होड़ परमेसर पड़ा एतेन दुखमाय अवला दोहोलेन दो, जरुड़ ठुवाकेदाय अने चि जे लंञी नुई छुवाँव यतियाय ओके हके, जोटोः चिलका अय, चितानतआचि मुनी दो पापीअय।”

40ईसु हुँनि फरीसी एडे कथालअय, “ओय सिमोन, इञः अमः सुधा कटी एकेन कथाय इदानआँ।”

हुँनि कथालअय, “ओय गुरु, कथायमी।”

41“मियड् महाजन एतेन बरिया रींड़ अँगाव दोहोलआकिन, मियड् पाँच साव, जोटोः मियड् पचास चंदी ठड़रा टका। 42हुकिन एडे जब ए-एम तआ चितानहों का दोहोना, दो हुँनि बनार माफ किड्-किनय। दो हुकिन मे से ओके हुँनि सुधा बगरा कीन दुलारेए?”

43सिमोन उतारा एमलअय, “इञः रआ ठुवाय रे हिनी जेकर रआ बगरा करजा माफ लअय।”

ईसु हुँनि कथावा लअय “अमः ठीक मी फयसला लआ।” 44हेनते लंञी पड़ाते ईसु घुमराव कनते सिमोन कथावा लअय, “तना अमः नुई लंञी मी ञेल यतिया? इञः अमः ओड़ाः रेञ वेज्‌ना, बकिन अमः जँगा अबुङोः तआ दाअ् कम ओवा लीदिञा, बकिन नुई इञः रआ जँगा मेड् दाअ् ते भींजाव लअय जोटोः अनेज् उब् ते जोड् लअय। 45इञः सोवागतिंञ तआ अमः कम चोहना लिदिञा, बकिन जब सेञ वेज्‌तना तब एतेन नुई इञः रआ जँगाय चोहना यना। 46अमः इञः रआ बोहोः रे सुनुम कम ओजाः लआ, बकिन नुई इञः रआ जँगा रे सोहों सुनुम ओजाः लअय। 47हिनाते इञः अमः एडेञ कथायतेआ चि नुई रआ पाप जे अगम दोहोना, माफ यना, चितानतआचि नुई अगम दुलार लअय, बकिन जे रआ कटीज् एकेन माफ लेना हुँनि कटीज् एकेन दुलारेए।”

48जोटोः ईसु लंञी एडे कथालअय, “अमः रआ पाप माफ यना।”

49तब जे होड़ ईसु सुधा जोमोः तआकु दुड़ूः दोहोना, हुँकू अकु-अकु मन रेकु ओइहर लआ, “नुई ओके हके जे पाप होंय माफेआ?”

50हेनते हुँनि लंञी एडे कथालअय, “अमः रआ सारीयोः ते ही अमः पाप एतेन बंचाव यनाम, सांति ते सेनोःमी।”

Currently Selected:

लुका 7: BIX

Highlight

Copy

Compare