लुका 8

ईसु सेवा-सुसार अवला लंञीकु

1निआँ तयोम ईसु सहार-सहार जोटोः डीही-डीही परमेसर राइज रआ बढ़ियाँ दुखमा होड़कु परचारवकु तआ दड़ाँ लेनय। जोटोः बरहो चेला ईसु तुली दोहोलेनाकु, 2#मती 27:55,56; मर 15:40,41; लुका 23:49जोटोः हुँकू सुधा थोड़ेः एकेन लंञीकुहोंकु दोहोलेना जे मुंवाँ आतमा जोटोः जंडिरा एतेनकु नपाय दोहोना, जोटोः हुँकू नीकु हके मगदाला रेनि मरियम, जे एतेन सात गोट मुवाँ आतमा उडुङ दोहोना; 3जोटोः हेरोद रेनि भंडारी खोजा रेनि लंञीते जोअना, जोटोः सुसना, जोटोः ढेरे एटाः लंञीकु नीकु अकु रआ टका ते ईसु जोटोः चेलाकु रआ सेवा-सुसार यान दोहोनाकु।

बिहन बेरो-ई रआ हुडिञ गाम

(मती 13:1–9; मरकुस 4:1–9)

4हेनते अगम बगरा होड़कु सहार-सहार एतेनकु जुटावना जोटोः ईसु एडेकु वेजोःयान दोहोना, दो हुँनि मियड् हुडिञ गाम कथालअय,

5“मियड् बेरो-ई बिहन बेर उडुङनय। बेरे बेरा थोड़ेः एकेन होरा डुरी रे ञुरना, होना जँगाते तीकायना जोटोः आकास रेनकु ओड़ेकु हलङ जोम केदाकु। 6थोड़ेः एकेन बिहन रेगड़ेज् ओत रे ञुरलेना, जोटोः उमुन लेना बकिन हल का ञमलेना दो होना रोहोड़यना। 7थोड़ेः एकेन बिहन जनुम झुँड़ रे ञुरलेना, जनुम हों संघे सेंड़ा कोते होनाय दबाव केदा। 8थोड़ेः एकेन बिहन बढ़ियाँ ओत रे ञुरलेना, होना उमुन कोते साव गुना पयदा होयावना।”

नोंका कथाकेते हुँनि जोड़ते कथालअय, “जेकर एडे आ-अयुम तआ लुतुर इदानआँ हुँकू अयुमेपे।”

ईसु चितानतआ हुडिञ गाम रे बतलाव लअय

(मती 13:10–17; मरकुस 4:10–12)

9चेलाकु ईसु सोधाव लिदियाकु चि नोआँ हुडिञ गाम रआ माने चिताना हके? 10#जसा 6:9ईसु कथालअय, “आपे तआ परमेसर रआ राइज रआ भेद समझावओ तआ ओवा तड्पेआ, बकिन एटाःकु तआ दो नोआँ भेद हुडिञ गाम रे अयुम वकुआ, हिना तआ चि

“हुँकू ञेल केते हों ककु ञेल बेजाया,

जोटोः अयुम केते हों ककु अयुम समझावओ।”

बिहन बेबेरी रआ हुडिञ गाम रआ माने

(मती 13:18–23; मरकुस 4:13–29)

11“हुडिञ गाम रआ माने बिहन परमेसर रआ बचन हके। 12होरा डुरी रे ञुरना बिहन हीकु होड़ हके जे बचन अयुम लआकु; हेनते सयतान वेज् कोते हुँकू रआ मन एतेन बचन अलगाव इदीयाअय, कहीं नोंका अलो होयावकोः चि हुँकू सारी कोते पाप एतेन बंचावोः 13रेगड़ेज् ओत रे ञुरना बिहन हुँकू होड़ हके, जब बचन अयुमेंअकु, दो खुस ते बचन दोकु अँगावेए बकिन हुँकू रे रेहेड् का दोहोन चलते थोड़े दिन हमिज् सारीयोओकु हेनते परखाव वेजोः बेरा बहकाव एंडायोओकु। 14जनुम झुँड़ रे ञुरना बिहन हुँकू होड़ हके जे बचन अयुमेंएकु, बकिन मड़ाङ सेन कोते चिनता जोटोः धान जोटोः जीवन रआ सुखविलास रेकु फसाव एंडायोओ तब होना का जोओ योओ। 15जोटोः बढ़ियाँ ओत रे ञुरलेना बिहन हुँकू होड़ हके जे बचन बढ़ियाँ जोटोः सफ मन ते अयुम केते जोटोः हिरदय रे दोहो केते धीरज ते कमायनी अगुयाकु।”

ढीबरी रआ हुडिञ गाम

(मती 4:21–25)

16 # मती 5:15; लुका 11:33 “ओके हों ढीबरी जब केते बसन ते ककु डबनायाँ जोटोः न खटिया ओतेत रेकु दोहोया, बकिन देहड़ी रेकु दोहोया ताकि भीतार वेजोः अवलाकु इंजोतकु ञम।”

17 # मती 10:26; लुका 12:2 “जे उकु लआ इदानआँ होना गोटा दिसतारोओ जे डबना लआ इदानआँ होना मरसाल रे जीजेआ।

18 # मती 25:29; लुका 19:26 “हिनाते चँड़चित दोहोनपे चि आपे चिलकापे अयुमेंए? जेकर एडे इदानआँ हुँनि तआ जोटोः ओवाया, जोटोः जेकर एडे कोनाआँ हुँनि एतेन जे हुँनि एडे इदानआँ होना हों अँगाव एंडाया।”

ईसु रेनि एंगाते जोटोः बोकोतेकु

(मती 12:46–50; मरकुस 3:31–35)

19ईसु एंगाते जोटोः बोयहातेतिकु हुँनि एडे वेज्‌लेनाकु बकिन भीड़ चलते हुँनि सुधा ककु जुमाव बेजाना। 20थोड़ेः एकेन होड़ ईसु कथावा लेदियाकु, “अमः रेनकु एंगाम जोटोः बोयहाम तिकु बहरा रे तींगु कोते अमः सुधा जुटावओ तआ अराव तनाकु।”

21ईसु हुँकूइ कथा रुवड़वा लआ, “इञः रेनकु एंगाइञ जोटोः बोयहा नीकु हके जे परमेसर रआ बचन अयुमेंअकु जोटोः मनव ओकु।”

ईसु बारंडो दाअ् एर संत लअय

(मती 8:23–27; मरकुस 4:35–41)

22फिन मुसिञ ईसु मसी जोटोः चेलाकु डोंगा रे देज् कोते हुँकूइ कथावा लआ, “एला सेंड़ा डहा होनहोंर तेबुना।” हेनते चेलाकु डोंगा रड़ा केते चलाव लआकु। 23डोंगा चलावओन दोहोना दो, ईसु ञीदोःयान दोहोनय। जोटोः सेंड़ा डहा रे बारंडो दाअ् बिरीड् न, हेनते डोंगा रे हलफा दाअ् पेरेजोन दोहोना जोटोः हुँकू कसाट रेकु दोहोना। 24हेनते चेलाकु ठाँवरे वेज् कोते ईसु फटिक लिदियाकु, जोटोः कथा लआकु, “ओय मालिक! ओय मालिक! आले बुराः गोनाले।”

हेनते हुँनि बिरीड् कनते बरंडोय डपटाव केते कथावा लअय, हेनते होना हलकाव संत यना। 25हेनते ईसु हुँकूइ कथावा लआ, “आपे रआ सारी ओकारेए?”

बकिन हुँकू ईसु जोटोः हुँनि रआ सकती ते हुँकू मुरुक बोरो यनाकु, जोटोः छकरीत कोते अकु-अकु रे दुखमा लेनाकु, “मुनि चिलकानी होड़ हके, जे बारंडो दाअ् होंय हुकुम ओवाआ, जोटोः होना हों हुँनि रआ हुकुम मनावओय?”

मियड् होड़ एतेन छुत आतमाकु उडुङना

(मती 8:28–34; मरकुस 5:1–20)

26फिन हुँकू गलील देस एतेन डोंगा रे देज् कनते होनहोंर गिरासिनियाँ देस ठँव रे सोदोरनाकु। 27हुँकू ओत डुरी रेकु अड़गुलेना दो होना नगर रेनि मियड् होड़ ञम लिदियाकु हुँनि एडे मुवाँ आतमा झपाव दोहोलेनाकु। हुँनि अगम हिला एतेन न झुला होड़हड् यते दोहोनय न ओड़ाः रे दोहोयोन दोहोनय, हुँनि मरघाट रे दोहोयोन दोहोनय। 28हुँनि ईसु ञेल केते हकाव लअय जोटोः अगम जोड़ते कथालअय, “ओय ईसु परम परधान परमेसर रेनि होपोन, इञः रआ अमः तुली चितान काम? इञः अमः एडेञ आरजी योना इञः दुख अलोम ओवाञ।” 29हिनाते चि ईसु छुत आतमा हुँनि होड़ एतेन उडुङोः तआ हुकुम एमयान दोहोनय। नुई मुवाँ आतमा हुँनि एडे घड़ी-घड़ी तेजाव ओन दोहोनय। हिनाते होड़कु हुँनि सिकड़ जोटोः बेरा तिकु तोल यतिदोहोना, सेकरो रे तोल लआ टोटाः एंडा यते दोहोनय, जोटोः मुवाँ आतमा हुँनि पहार रे इदी यतिदोहोनय।

30ईसु हुँनि सोधाव लिदियय, “अमः रआ चितान ञुमुन हके?”

हुँनि कथालअय, “पलटनकु,” चितानतआचि अगम मुवाँ आतमा हुँनि एडे समाव दोहोना। 31हुँकू ईसु एडे गोहराव लेनाकु चि, “आले अंथाह डोडहा रे सेन तआ हुकुम अलोम ओवाले।”

32होना एडे पहार रे सुकरीकु रआ मी गोहडा चरावओन दोहोलेनाकु, हिनाते हुँकू मुवाँ आतमा ईसु एडेकु गोहराव लेना चि आले हुँकू एडे इकाएर समाव वाले, तब ईसु हुँकू हुकुम ओवा लिड्कुअय, 33हेनते मुवाँ आतमा हुँनि होड़ एतेन उडुङ कोते सुकरीकु एडे सेन लेनाकु, तब हुँकू खुड़हा ढेरंगा एतेन दोन झपटाव कोते डहा रे डुबाः गोज्‌यनाकु।

34हुँकू ञेल केते सुकरी चरवाहाकु ञीर केदाकु तब हुँकू सहार जोटोः बस्ती रेकु खभार केदा। 35होड़कु होंडे जे चिताना होयाव दोहोना ञेल तआकु उडुङना। हुँकू ईसु रआ ठँव रे वेज्‌लेनाकु जोटोः हुँनि होड़ जेकर एतेन मुवाँ आतमा उडुङ दोहोना जोटोः झुला कोते ईसु ठँव रे अछाते दुड़ूः दोहोनय ञेल केते बोरो यनाकु। 36जे होड़ नोआँ गोटा अपन मेंड् तिकु ञेल लआ, हुँकू होड़कु-कू बतलाववा लआ चि चिलका मुवाँ आतमा एतेन नपाय यनाय। 37हेनते गिरासिनियाँ देस रेनकु गोटे होड़कु ईसु एडे गोहराव लेनाकु चि ईसु होंडे एतेन सेनोः, चितानतआचि हुँकू अगम बोरो दोहोनाकु, तब हुँनि डोंगा रे देज् कनते सेसेन बुहड़ी लअय। 38बकिन हुँनि होड़ जेकर एतेन मुवाँ आतमा उडुङ दोहोना ईसु एडे आरजी लेनय चि “इञः अमः सुधा इकाएर दोहोवाइञमी।”

बकिन ईसु नोंका कथा केते बिदा लिदियाय, 39“अपन ओड़ाः रुवाड़ जुनोःमी जोटोः होड़कु परचार वाकुमी चि परमेसर अमः तआ चितानय चिलका तड्आ।” हुँनि रुवाड़ कोते गोटा नगर रे परचार लअय चि ईसु इञः तआ चिलका सेंड़ा काम तड्अय।

गोज् लेनी कुड़ी जोटोः रोगी लेनी लंञी

(मती 9:18–26; मरकुस 5:21–43)

40ईसु गलील देस रे रुवाड़ लेनय दो होड़कु हुँनि सुधा खुस तिकु जुमाव लेना चितानतआचि गोटे हुँनि रआ असरा रेकु दोहोलेना। 41हीमेन रे याइर ञुमुन मियड् होड़ जे बिनती ओड़ाः रेनि नेता दोहोना वेज्‌नय हेनते ईसु रआ जँगा दुबा रे इकड़ुम कनते हुँनि एडे गोहराव लेनय चि, “इञः ओड़ाः दू।” 42चितानतआचि हुँनि रेनि बराह बरीस रेनि मियड् ठउका कुड़ी होपोन ते दोहोना गोजोः लेका दोहोनय।

ईसु हुँकू तुली सेनलेनय, होड़कु हुँनि एडेकु तुन्दरा योन दोहोना। 43थइयाकु मे से मियड् लंञी जे बराह बरीस एतेन मयाम तुयोः अवला रोग ते परेसान लेनी लंञी दोहोलेना जोटोः अनेज् एडे जे धान दोहोना होना गोटा दवहाकु ओवा चबा केदय सेकरो रे ओकेरआ अती एतेन हों काय नपाय लेना। 44हुँनि तयोम एतेन सेन कनते ईसु रआ गेंदराः रआ अँचड़ा छुवाँव लअय, हेनते झठहेले मयाम तुयोः मटकाव यना। 45ईसु कथालअय, “इञः ओके छुवाँव लीदिञा?”

हेनते गोटे कोवन मेनो अकु दो पतरस कथालअय, “ओय मालिक, अमः दो भीड़ एडेम एर धकायोना।”

46फिन ईसु कथालअय, “ओके दो इञः छुवाँव लआकु, चितानतआचि इञः महसुस लअञ चि इञः एतेन सकती उडुङना।” 47हेनते लंञी सचा केदय चि, इञः एरोञ उकु बेजाना, तब एकला वेज्‌नय हेनते ईसु रआ जँगा दुबा रे इकड़ुम कोते गोटे होड़ ठँव रे बतलाव लअय चि हुँनि चितान चलते ईसु छुवाँव लअय जोटोः चिलका झठहेले नपाय यनय। 48ईसु हुँनिए कथावा लआ, “मइयाँ अमः रआ सारीयोः ते अमः नपाय यनाम, अब सांति ते सेनोःमी।”

49ईसु कथा ही यते दोहोनय चि बिनती ओड़ाः रेनि अगुवा ओड़ाः एतेन मियड् होड़ वेज् कनते कथालअय, “अमः रेनि मइयाँ तम गोज् यनाय, अब जोटोः गुरु अलोम एर परेसानी।”

50ईसु नोआँ अयुम केते याइर कथावा लअय, “अलोम बोरोयोः सिरीप सारीयोमी, दो अमः रेनि मइयाँ नपाय योओय।”

51ओड़ाः रे वेज् कनते ईसु पतरस, जोहन, जाकुब जोटोः मइयाँ रेनि एंगात-अपात, बय केते एटाःकु ओके हों अनेज् सुधा भीतरी कायएर वेज्‌वा लिड्कुआ। 52गोटे हुँनि तआ खोभराव-खोभराव तिकु इयाम यते दोहोना, हेनते ईसु कथालअय, “अलोपे इयामे; मुनी काय गोज् तना ञीदोः यनाय।”

53जोटोः हुँकू नोआँ ठुवायते दोहोनाकु चि हुँनि गोज् यनाय ईसु रआ कु ठ-ठा यान दोहोना। 54बकिन ईसु हुँनि रआ अती सब् लअय हेनते जोड़ते कथालअय, “ओय मइयाँ बिरीड्मी!” 55तब हुँनि रआ जीवि रुवाड़यना जोटोः झठहेले बिरीड् दुड़ूः यनाय। फिन ईसु हुकुम एम लअय चि हुँनि तआ चितानकुन जो-जोम तआ ओवाय। 56हुँनि रेनकिन एंगात-अपात चकित यनाकिन हेनते ईसु हुकिन चेताव केते हुकुम ओवा लिड्किनय चि नोआँ जे होयाव तना ओके एडे हों अलोपे कथाके।

Currently Selected:

लुका 8: BIX

Highlight

Copy

Compare