1CO 11
11
1निन यल्ला ख्रिस्तद अनुकरण शेस्तान आल्ले नाद अनुकरण शेशेतोर कांडा.
आराधना इंगा निर्देश — 11:2-34
नत्ती मुस्कुने संबंधला निर्देश
2निन मिद प्रशंसा शेस्तान येनटीक की मीर नाद नेहमी ध्यानाम तिस्तार इंगा निन मिक नेमाशी इच्चीने शिक्षान, मजबुतीता पाळास्तार. 3पण मिक इदी यरका कावाला इल्ला नाक वाटास्ताद की, ख्रिस्त इड प्रत्येक मनशी प्रमुख उंडाड इंगा प्रत्येक मनशी इड आंडीदान प्रमुख उंडाड इंगा परमेश्वर ख्रिस्तन प्रमुख उंडाड 4प्रत्येक मनशी यवार प्रार्थना शेशेताप्पुड इंगा संदेश इच्चेताप्पुड मनाद नत्ती मुस्कुंटाड वाड मना प्रमुखदी आंटे ख्रिस्तद अपमान शेस्ताड. 5पण प्रत्येक आंडीद याद मनाद नत्ती मुस्कुनांदे प्रार्थना शेस्ताद इंगा मंदीला परमेश्वरदी संदेश शपताद आदी मनशीद आंटे मोगुनदी अपमान शेस्ताद येनटीक की आदी आंडीद टकली शेस्कुन्ने आंडीदान लेकाने उंडाद. 6जर आंडीद मनाद नत्ती मुस्कुनाद तर आदी मना यंडकाल कोस्काडाला येनटीक की यंडकाल कोशेद लेकाते टकली शेस्कुनेद आंडीदानकी शिग्गुद माटा उंडाद. तर आदी दानदी नत्ती मुस्कुनाला. 7येनटीक की मनशी परमेश्वर स्वरुप इंगा गौरवदी चित्र उंडाड दिनिचांग मनशी नत्ती मुस्कुनेद शिंगार लेद. पण आंडीद मनशी गौरव उंडाद. 8येनटीक की मनशी आंडीदान तीकेल कालेद पण आंडीद मनशी तीकेल आयनाद. 9इंगा मनशी आंडीदान इचांग निर्माण कालेद, तर आंडीद मनशी इचांग निर्माण शेशेदेंक वच्चीनाद. 10येनटीक की स्वर्गदुतलु सुस्तुनार दिनिचांग वगा आंडीदानकी दान नत्ती मिंदा अधिकारदी चिन्ह धारण शेशेद इदी योग्य उंडाद. 11तरी पण प्रभुला आंडीद मनशी केल वेगळा लेद इंगा मनशी आंडीदान केल वेगळा लेड. 12येनटीक की आंडीद मनशी तीकेल उंडाद, आल्ले मनशीक पण आंडीदे जन्म इच्चीनाद. पण आन्नी माटलु परमेश्वर तीकेल उंडाय. 13इदी मीर स्वताने ठराय मतना की, नत्ती मुस्कुनान्दे आंडीद परमेश्वरदी प्रार्थना शेशेद इदी योग्य उंडाद येम? 14मनशी फेद्दा यंडकाल वाढाय मतते तर इदी वान इचांग शिग्गुद माटा उंडाद. इल्ला निसर्ग पण मिक नेरपाद येम? 15पण आंडीद फेद्दा यंडकाल फेटते इदी दानकी गौरव उंडाद येनटीक की दानकी दानी यंडकाल मुशेदेंक इच्चीनेय उंडाय. 16जर यवारकी आना वाद शेशेद उंटे तर वारकी इदी यरका बेक, माद इल्ला रित लेद इंगा परमेश्वर मंडळीलाद पण लेद.
प्रभुभोजन बद्दल
17इप्पुड मुंदारदी आज्ञा इच्चेताप्पुड निन मिद प्रशंसा मंडळीला शेयाक वच्चीनान येनटीक की मिद वगातळा वस्ते फायदा लेद पण नुकसान आयताद. 18पहिला, निन इदी इंटान की, यप्पुड मीर मंडळीला वगातळा वस्तार, आप्पुड मी नडमा फुट उंटाद इंगा काही प्रमाणला दान मिंदा विश्वास फेटताम. 19दिनिचांग की, यवार मी नडमा खरेम उंडार वार प्रकट कावाला आंका मी नडमा फुट उंडाबेक. 20यप्पुड मीर वगातळा वस्तार आप्पुड मीर येम तिंटार आदी लेद. 21येनटीक की मीर भोजन शेस्तार आप्पुड मी दांटल्योन प्रत्येक मनशी मुंदारकी फोई स्वताने तिनका फडताड. वगाड आकालता आल्ले निलस्ताड तर इंगोगोड अतीतृप्त आय फोयताड. 22तिनेदेंक तागेदेंक मिक इल्लु लेद येम? का मीर परमेश्वर मंडळीन तुच्छ मानास्तार इंगा या गरीब आक्का तम्मुळ्ळा देगार येमीच लेद वारनी शिग्गुना केडपुतार? निन मिमलान येम आनाला? निन मिद प्रशंसा शेयदुन येम? इ बाबतीला निन मिद प्रशंसा शेयान.
प्रभुभोज
मत्तय 26:26-29; मार्क 14:22-25; लूक 22:14-23
23येनटीक की प्रभुन तीकेल याद शिकवण नाक शिक्या आद्दे निन मिक इस्तीन. प्रभु येशुन, या मोब्बुला विश्वासघात शेशी फट्टी इच्चेदेंक वच्या. वाड रोट्या तिस्कुन्या, 24इंगा धन्यवाद इच्ची आदी इरगा मत्या इंगा आन्या, “इदी नाद फय उंडाद, याद निन मी इचांग इस्तान. ना ध्यानाम इचांग इदी शेयना.” 25इल्ले वाड भोजन आयनेंका प्याला तिस्कुन्या इंगा आन्या, “इदी प्याला ना रक्तामता आयनेद कोत्ता करार उंडाद. यप्पुड मीर इदी ताग्यार आप्पुड ना ध्यानाम इचांग इदी शेयना.” 26येनटीक की यन्नी तुकुल मीर इदी रोट्या तिंटार इंगा इदी प्याला तागतार, आन्नी तुकुल मीर प्रभुन सावदी वाड वच्ची नंताक घोषणा शेस्तार. 27दिनिचांग यवाडाना अयोग्य रितीता प्रभुनदी रोट्या तिनी लेकाते प्याला तागी वाड प्रभुन फय इंगा रक्ताम बद्दल दोषी ठराशी. 28दिनिचांग मनशी स्वताद परीक्षा शेयाला इंगा आप्पुड इदी रोट्या तिनाला इंगा इ प्यालान तागाला. 29येनटीक की जर प्रभुन फयीद अर्थ तेल्चकुनांदे यवाडाना इ रोट्यान तिंटाड इंगा प्यालान तागताड तर वाड तिनीगास इंगा तागीगास स्वता मिंदा दंड जक्कुंटाड. 30इद्दे दिनिचांग मी दिंटल्योन शेंगेम मंदी कमजोर, बिमार उंडार इंगा काही मंदी सच्ची पण फोयनार. 31पण जर मनाम मनाद परीक्षण शेशाम तर मना मिंदा न्यायदी प्रसंग दाक फोई. 32पण प्रभुड मनाद न्याय शेशी आप्पुड मनाक शिस्त आंची, दिनिचांग की, दुन्यामलोन बाकी मंदी लेका मनाक पण दंड शिक्काराद. 33दिनिचांग हे ना आक्का तम्मुळ्ळालाला, यप्पुड मीर भोजन शेशेदेंक वगातळा वस्तार, आप्पुड वगामेगार इचांग थांबायना. 34जर यवारकी आना खरेमे आकाल आइंटे, तर वाड इंटल्या तिनाला दिनिचांग की मिद वगातळा वच्चेद दंडकी कारण ठरायाराद. निन वच्यान आप्पुड इंगोगो माटलान शिंगार शेशान.
Currently Selected:
1CO 11: WNT
Highlight
Share
Compare
Copy
Want to have your highlights saved across all your devices? Sign up or sign in