1CO 14
14
भविष्यवाणी इंगा अन्य भाषाद आत्मिक दान
1इंगोगोर मिंदा प्रेम शेस्केन मिद जीवन जगायना इंगा आत्मिक दानला इचांग उत्सुक उंडा इंगा विशेष शेशी भविष्यवाणी शेशेद इच्छा फेटना. 2यवारकी अन्य भाषा माटलाडेद दान उंडाद वाड खरेम सुस्ते मनशी जताक माटलाडाड तर परमेश्वर जताक माटलाडताड येनटीक की वाड येम माटलाडताड इदी यवारकीच तेल्वाद. पवित्र आत्मा तीकेल वाड रहस्य माटलु माटलाडताड. 3पण यवाड भविष्यवाणी शेस्ताड वाड मंदी जताक आत्मिक वाढ, प्रोत्साहन इंगा शांती माटलु माटलाडताड, 4यवान देगार अन्य भाषाला माटलाडेद दान उंडाद, वाड आत्मिक रुपता स्वताद वाढ शेस्कुंटाड, पण यवानकी भविष्यवाणी शेशेद दान उंडाद वाड पुर्ण मंडळीद वाढ शेस्ताड. 5मीर आंदार अन्य भाषाला माटलाडाला, पण विशेष शेशी मीर भविष्यवाणी शेयाला इल्ला नाद इच्छा उंडाद येनटीक की यवाड अन्य भाषाला माटलाडताड, वान काना यवाड भविष्यवाणी शेस्ताड वाड फेद्दावोड उंडाड. दिनिचांग की, मंडळीद वाढ कावाला. 6इप्पुड, हे ना आक्का तम्मुळ्ळालाला, जर निन मी तिकुड अन्य भाषाला माटलाडेदेंक वस्तीन तर मिक येम फायदा? मी फायदा इचांग निन मी तिकुड प्रकटीकरण, परमेश्वरदी ज्ञान, परमेश्वर तीकेल भविष्यवानी लेकाते शिक्षण येकेन दावा वद्दो येम? 7जर निर्जीव संगीत वाद्यल बासुरी, वीणा यल्ला स्वरलु तिस्ताय, जर आ वाद्यला लोन्केल यल्ले स्वरला फरक स्पष्ट कमसाक फो, तर बासुरी स्वर याद इंगा वीणाद स्वर याद इदी इनेतोरकी यल्ला तेल्ची? 8इंगा जर कर्णाद अस्पष्ट आवाज इना वस्ते तर लढाई इचांग यवाड तैयार आय्यी? 9आल्ले मीर पण इंगोगोर जताक साफ-साफ माटलाडा कुंटे तर मिद भाषा यवारकी आना यल्ला तेल्ची? येनटीक की मीर हव्वा जताक माटलाडेतोर ठराशार. 10निःसंशय, दुन्यामला शेंगेम प्रकारी भाषाल उंडाय इंगा यादुच बिना अर्थदी लेद. 11दिनिचांग जर नाक भाषाद अर्थ तेल्वाक फो तर वाड माटलाडेतोन इचांग निन विदेशी ठराशान इंगा यवाड माटलाडतुनाड वाड ना इचांग विदेशी ठराशी. 12बिलकुल इद्दे माटा मिक पण लागु आयताद जर मीर आध्यात्मिक दानला इचांग उत्सुक उंडार तर मंडळी उन्नती इचांग, मंडळीला आध्यात्मिक रुपता मजबुती वच्चे इचांग जोरदार प्रयत्न शेयना. 13दिनिचांग, यवाड अन्य भाषाला माटलाडताड वाड आदी जे माटलाडीनाड दानदी अर्थ शप्पा दावाला आंकेन प्रार्थना शेयाबेक. 14येनटीक की जर निन अन्य भाषाला प्रार्थना शेस्तान तर ना आत्मा पण प्रार्थना शेस्ताद पण नाद बुद्धी निष्फळ निलस्ताद. 15तर येम शेय्या बेक? निन ना आत्माता प्रार्थना शेशान पण आल्ले निन ना बुद्धीता पण प्रार्थना शेशान. 16येनटीक की जर नु नी आत्माता परमेश्वरदी धन्यवाद शेस्ताव तर यवाड इनेतोड सामान्य मनशी यवाड आंदु कुसनीनाड तर वाड नी उपकारस्तुती प्रार्थना मिंदा “आमेन” यल्ला आनी? येनटीक की नु येम आंटाव आदी वानकी तेल्वाद. 17येनटीक की नु उपकारस्तुती शिंगार शेस्ताव, खरेम इदी शिंगार उंडाद तरी दानता इंगोगोनदी उन्नती काद. 18निन परमेश्वरकी धन्यवाद इस्तान, येनटीक की निन मी आंदार काना जास्त अन्य भाषा माटलाडतान. 19पण निन मंडळीला अन्य भाषाला दहा हजार शब्दल माटलाडेकाना, इंगोगोरकी पण नेरपाला आंकेन, निन ना बुद्धीता आय्यीद शब्दल माटलाडेद इदी नाक शिंगार वाटास्ताद.
20हे आक्का तम्मुळ्ळालाला, मीर विचारला बिळ्ळालेका काकुंडा. दानऐवजी दुष्टता बाबतीला शिन्ना बिडा लेका नीरागस पण मना विचारला परिपक्व कांडा. 21पवित्र शास्त्र आंटाद,
“इंगोगो भाषा माटलाडे तोरदी उपयोग शेशी इंगा अन्य भाषाता
निन इ मंदी जताक माटलाड्यान
तरी पण वार नाद इनेतोर लेर.” इल्ला प्रभुड आंटाड. #यशया 28:11-12.
22दिनिचांग अन्य भाषाला माटलाडेद दान इदी विश्वास फेट्टेतोर इचांग लेद अविश्वासी मंदी इचांग चिन्ह उंडाद पण भविष्यवाणी विश्वासी मंदी इचांग चिन्ह उंडाद अविश्वासी मंदी इचांग लेद. 23दिनिचांग जर आंता मंडळी वगातळा वस्ताद इंगा प्रत्येक मनशी अन्य भाषाला माटलाडतुनी इंगा जर बैटूटोड इंगा अविश्वासी लोनीक वच्या, तर मीर पागल उंडार इल्ला वार मिमलान आनाक फोयार येम? 24पण जर आंदार भविष्यवाणी शेयदेंक आंटीर इंगा जर अविश्वासी इंगा बैटूटोड लोनीक वच्या, तर आंदार येम माटलातुन्यार आदी इनेतोनकी वान पापदी जाणीव आय्यी वार आंदार वानदी न्याय शेस्तार; 25वान अंतकरणदी गुपित यरका आय्यी इंगा वाड बोरकाला फडी इंगा परमेश्वरदी आराधना शेशी इंगा आनी “खरेमे परमेश्वर मी नडमा उंडाड”.
उपासनाला सुव्यवस्था उंडेद आवश्यकता
26हे आक्का तम्मुळ्ळालाला, तर मंग येम शेयाबेक? मीर वगातळा वस्तार आप्पुड मी दिंटल्योन्केल प्रत्येक मनशी यवाडाना भजन फाडेदेंक, यवाडाना शिक्षण इच्चेदेंक, यवाडाना परमेश्वर इच्चीनेद प्रकटीकरण शप्पेदेंक, यवाडाना अन्य भाषाला माटलाडदेंक, तर यवाडाना अर्थ शप्पेदेंक तैयार उंटाड. आंताच मंडळी वाढ इचांग कावाला. 27जर यवाराना अन्य भाषाला माटलाडेतोड उंटे तर इद्दार इंगा जास्तीत जास्त मुग्गुरे माटलाडाला, वगा वेळला वक्काडे माटलाडाला इंगा वक्काडे इ माटाद अर्थ शप्पाला. 28जर मंडळीला अर्थ शप्पेतोड यवाडुच लेकुंटे तर अन्य भाषा माटालाडेतोड सभाला शांत उंडाला, स्वता जताक इंगा परमेश्वर जताक माटलाडाला. 29इद्दार लेकाते मुग्गुर भविष्यवाणी शेय्याला इंगा बाकीचे मंदी वार येम माटलाडतुनार दानदी परीक्षा शेय्याला. 30कुशीनोर लोन्केल वगा व्यक्तीक जर येमाना परमेश्वर सुपिस्ते तर पहिला संदेश इच्चेतोड गप्प कुसनाला. 31जर आंदार भविष्यवाणी शेशी शकास्तार, तर मीर वगान यंका वगाड भविष्यवाणी शेशी शकास्ताड, दिनिचांग की आंदार नेरवाला, इंगा आंदार प्रोत्साहित कावाला. 32इंगा संदेष्ट्याली आत्माल आ संदेष्ट्यान स्वाधीन उंटाय. 33येनटीक की परमेश्वर गडबडी शेशेतोड परमेश्वर लेड, शांती येकेन वच्चेतोड परमेश्वर उंडाड. यल्ला आन्नी परमेश्वर पवित्र मंदी मंडळीला शांती बनाशी उंटाद.
34आंड्योर मंडळीला शांत निलवाला, येनटीक की वारकी मंडळीला माटलाडेद परवानगी लेद, पण अधिन निलचेद आज्ञा उंडाद; येनटीक की नियमशास्त्र पण इल्ले आंटाद. 35वारकी जर येमाना नेरशेद उंटे तर वार स्वतः मोगुन इल्काडा आडगेद येनटीक की आंडीदानदी मंडळीला माटलाडेद इदी दानकी लज्जास्पद उंडाद. 36परमेश्वरदी वचन मी तीकेल यल्लीनाद येम? का आदी फक्त मी नंताके वच्चीनाद येम?
37वगाड जर स्वतान संदेष्टा समजास्ते इंगा जर वाड स्वतान आत्मिक मनशी समजास्ते तर वाड इदी यरका बेक की, याय माटलु निन मिक रास्तुनान आय परमेश्वर इच्चीनेय आज्ञाल उंडाय. 38पण जर यवाराना निन येम राशीनान आदी मानायाकुंटे, तर वानदी माटा पण मीर मानायाकुंडा.
39दिनिचांग हे ना आक्का तम्मुळ्ळालाला, भविष्यवाणी शेशेदेंक उत्सुक उंडना, अन्य भाषा माटलाडदेंक लेद आनाकुंडा. 40पण आन्नी माटलु योग्य रितीता इंगा व्यवस्थीत उंडाला.
Currently Selected:
1CO 14: WNT
Highlight
Share
Compare
Copy
Want to have your highlights saved across all your devices? Sign up or sign in