1CO 15
15
पुनरुत्थान मिंदकेल शिकवण — 15:1—16:24
पौलदी शुभवर्तमान इंगा ख्रिस्तद पुनरुथान
1इप्पुड आक्का तम्मुळ्ळालाला निन मिक ध्यानाम शेशी इस्तान, की याद शुभवर्तमान निन मिक शपतीन इंगा याद मीर स्वीकार शेस्तीर इंगा दांटल्या मीर टीकाशी उंडार. 2यादान तीकेल मिक तारण शिक्कीनाद आद्दे शुभवर्तमान निन मिक शपतान. या वचनता मिक पण शुभवर्तमान शप्पींटीन आ वचन लेका आदी मीर मजबूत फट्टी उंडना दानताने मिद तारण आयताद; लेकुंटे मिद विश्वास व्यर्थ उंडाद. 3येनटीक की येम नाक पहिला शप्पेदेंक वच्या आदी निन मिक शपतीन, दांटल्या महत्वद इदी माटा उंडाद की, पवित्र शास्त्रला राशीनेलेका ख्रिस्त मना पापला इचांग सच्या. 4वान बुडशेदेंक वच्या इंगा पवित्र शास्त्रला राशीनेलेका मुड नाळाक वान सच्चीनोर लोन्केल इंगा लेपेदेंक वच्या. 5इंगा मंग वाड कैफानकी कमशा, यंकसार बारा प्रेषितलाक, 6मंग वाड पाचशे काना जास्त तम्मुळ्ळाक कमशा. वार दिंटल्योन्केल जास्त मंदी इंगाना जित्ता उंडार, तर काही मंदी सच्ची फोयनार. 7इंगा मंग वाड याकोबकी कमशा, इंगा मंग वाड आन्नी प्रेषितलाक कमशा. 8इंगा आंदार काना आखरीक नाक पण कमशा, वेळ कावा काना मुंची फुट्टीनगते.
9येनटीक की प्रेषितला निन शिन्नावोड उंडान, निन प्रेषित आने योग्य लेन, येनटीक परमेश्वर मंडळीद निन छळ शेशीन्टीन. 10पण परमेश्वर कृपाता निन येम पण उंडान आदी निन उंडान इंगा वानदी नामिदुंडदी कृपा व्यर्थ फोलेद, पण निन वार आंदार काना जास्त कष्ट शेस्तीन, इदी फनी निन शेयालेद, पण परमेश्वरदी कृपा याद ना जताक उंड्या, आदी शेस्तुन्या. 11दिनिचांग निन उंटे का वार उंटे मिम इद्दे घोषणा शेस्ताम इंगा मीर दिन मिंदाने विश्वास फेटतीर.
सच्चीनोरदी पुनरुत्थान
12इप्पुड जर मिम ख्रिस्त सच्चीनोर लोन्केल लेशीनाड इल्ला सुवार्ता शपताम, तर सच्चीनोरदी पुनरुत्थान लेद इल्ला मी लोन्केल काही मंदी आंटार इदी यल्ला? 13जर सच्चीनोरदी पुनरुत्थान लेद तर ख्रिस्त पण सच्चीनोर लोन्केल लेय्यालेद, 14इंगा जर ख्रिस्त सच्चीनोर लोन्केल लेय्यालेद तर माद संदेश व्यर्थ उंडाद इंगा मिद विश्वास पण व्यर्थ उंडाद. 15इंगा मिम परमेश्वर खोटा साक्षील ठरास्तीम येनटीक की परमेश्वर ख्रिस्तन सच्चीनोर लोन्केल लेप्या इल्ला मिम वान बद्दल साक्ष इस्तीम. जर इदी इल्ला उंटे की, सच्चीनोर लेपदेंक दार तर परमेश्वर पण ख्रिस्तन लेपा लेद. 16इंगा जर सच्चीनोरनी लेपा दाद, तर ख्रिस्तड पण सच्चीनोर लोन्केल लेय्यालेद. 17इंगा, जर ख्रिस्त लेय्यालेद, तर मिद विश्वास व्यर्थ उंडाद इंगा मीर इंगाना पापला फडी उंडार. 18हुं इंगा यवार ख्रिस्तला सच्ची फोयनार, वारदी पण नाश आय फोयनाद. 19जर ख्रिस्तन मिंदा उंडीनेद माद आशा, फक्त इद्दे जीवन इचांग उंटे, तर आन्नी मनसुलाला मिम दयनीय उंडाम.
20पण इप्पुड खरेमे ख्रिस्तड सावलेल लेशी जिवंत आयनाड. यवार सच्ची फोयतार आ मंदीला#15:20 यवार सच्ची फोयतार आ मंदीला यवार फंडकुंडार वार. फंडकुंडार इदी शब्द आ मंदीन सुपिस्ताद यवार सच्ची फोयनार. पौलकी इदी आनेद उंडाद की सच्ची फोयेद इदी फंडकुने लेका उंडाद यप्पुड परमेश्वर वच्ची आप्पुड आ मंदी यवार सच्ची फोयनार वार लेपे दिंटल्या वच्यार. वाड प्रथम फळ उंडाड. 21येनटीक की दिनदी अर्थ उंडाद यल्ला मनशी तीकेल साव वच्या आल्ले सच्चीनोरदी पुनरुत्थान पण मनशी तीकेल वच्या. 22येनटीक की यल्ला आदाम पाप शेशीने इचांग आंदार सस्तार आल्ले ख्रिस्त मिंदा विश्वास फेट्टीन इचांग आंदार जित्ता शेशेदेंक वच्यार. 23पण प्रत्येक मनशी वार क्रमानुसार, ख्रिस्त यवाड प्रथम फळ उंडाड इंगा मंग ख्रिस्तनदी वच्चेद आय्यी आप्पुड वान मंदीन पण जित्ता शेशेदेंक वच्ची. 24आप्पुड इ संसारदी शेवट आय्यी, प्रत्येक अधिपतीन, प्रत्येक सत्तान, प्रत्येक सामर्थ्यन यप्पुड ख्रिस्त नष्ट शेशी, आप्पुड ख्रिस्तड परमेश्वर आब्बानकी राज्य इचकाडी.#दानिएल 2:44. 25येनटीक की वाड आन्नी शत्रुलान वान काळा किंदा फेट्टी नंताक वानकी राज्य शेय्याने बेक.#स्तोत्रसंहिता 110:1. 26यवाड आखरी शत्रु साव वाड नष्ट शेशेदेंक वच्ची. 27पवित्र शास्त्र शपताद, “येनटीक की परमेश्वर, वान काळा किंदा आंताच येस्काडनाड.” पण यप्पुड वाड आंटाड की, “आंताच वान अधिन शेशेदेंक वच्चीनाद,” आप्पुड यवाड आंताच वान अधिन शेशा, वाड परमेश्वर स्वतः दांटल्या लेड.#स्तोत्रसंहिता 8:6. 28इंगा, यप्पुड परमेश्वर आंताच कोडकु शेतल्या इच्या तर कोडकु पण स्वतान परमेश्वर शेतल्या इच्या दिनिचांग की परमेश्वरे आन्नी माटला मिंदा राज्य शेशेतोड कावाला.
29लेकाते, यवार मंदी सच्चीनोर इचांग बाप्तिस्मा तिस्कुंटार वार येम शेशार? जर सच्चीनोर लेय्यारुच तर वार मंदी वार बद्दल बाप्तिस्मा येनटीक तिस्कुंटार? 30इंगा मिम पण प्रत्येक वेळला संकटला येनटीक फडताम? 31हे आक्का तम्मुळ्ळालाला ख्रिस्त येशु मना प्रभुला, निन मी बद्दल उंडीने घमंडदी वट्टु येस्केन इदी आंटान की, निन दिना-दिनाम सस्तान. 32मनशी स्वभाव लेका इफिसला निन रानटी प्राणीला जताक लढास्तीन, तर नाक येम फायदा आय्या? जर सच्चीनोर लेयाकुंटे तर फदांडा “मनाम तिनदाम-तागदाम, येनटीक रेफाक तर सच्चेदे उंडाद!” 33इंगा यवाडाना इल्ला माटलाडताड तर वान माटलु इनी फसाया कुंडा, येनटीक की “वाईट संगती मंची चरीत्रन वाईट शेस्ताद.” 34नितीमत्व इचांग जागृत कांडा इंगा पाप शेयाकुंडा येनटीक की मी दिंटल्योन्केल काही मंदी इल्ला उंडार यवार परमेश्वरनी गुरतु फट्टार. इदी निन मिमलान शिग्गुना केडपाला आंकेन आंटान.
मनाक यल्लोनदी फय शिक्की
35इप्पुड यवाराना इल्ला आन्यार? “सच्चीनोर यल्ला लेशार? वार यल्लोन फयला वच्चार?” 36नु इंता अज्ञानी उंडाव येम? नु येम पेरास्ताव आदी पहिला सच्चीन शिवाय जित्ता काक फोई. 37इंगा नु येम पेरास्ताव दानदी फंटा आय्येद फय पेरायाव, तर फक्त बी पेरास्ताव ; आदी गोदमाद लेकाते इंगोगो येनटीदाना उंडी. 38इंगा आंटे परमेश्वर निवडाशीन लेका वाड दानकी आकार इस्ताड. वाड प्रत्येक दानाक दानदी स्वताद “फय” इस्ताड. 39जित्ता उंडीने आन्नी प्राणीलाय फयील सारखा लेकुंटाय. दिन शिवाय मनसुलाय फयलु वगा प्रकारी उंटाय. प्राणीलाय फयील इंगोगो प्रकारी उंटाय, गुवाल इंगोगो प्रकारी उंटाय; इंगा मिल अलग-अलग प्रकारी उंटाय. 40आल्ले स्वर्गीय फयील उंडाय इंगा पृथ्वी मिंदुड फयील उंडाय, पण स्वर्गीय फयीद वैभव वगा प्रकारदी उंडाद, तर पृथ्वी मिंदुड फयीद इंगोगोट उंडाद. 41सुर्यद यलगु वगा प्रकारदी तर चंद्रद यलगु इंगोगो प्रकारदी उंटाद. सुक्काद यलगु इंगोगो प्रकारदी उंटाद इंगा तेज बाबतीला वगा सुक्का इंगोगो सुक्काकाना वेगळा उंटाद. 42आंकेन सच्चीनोर पुनरुत्थान जताक पण इल्ले आय्यी, फय याद भुमीला बुडशीनेद उंडाद आदी नाश आय्येद उंडाद, पण आदी फय यादान लेपेदेंक वस्ताद आदी अविनाशी उंडाद. 43याद अपमानता बुडशे दिंटल्या वस्ताद आदी गौरवाला लेपे दिंटल्या वस्ताद याद कमजोरीला बुडशे दिंटल्या वस्ताद आदी सामर्थ्यता लेस्ताद. 44याद भुमीला बुडशेदेंक वच्चीनाद आदी नैसर्गिक फय उंडाद याद पुनर्जीवित आयताद आदी आत्मिक फय उंडाद. जर नैसर्गिक फयील उंडाय तर आध्यात्मिक फयील सुद्धा उंडाद. 45इंगा पवित्र शास्त्र इद्दे शपताद, “पहिला मनशी, आदाम इड जित्ता प्राणी आय्या,” पण ख्रिस्त यवाड आखरी आदाम आय्या वाड जीवन इच्चेतोड आत्मा आय्या. 46याद फय मनाक पहिला इच्चीनार आदी सांसारिक उंडाद पण याद फय मनाक यंकसार इच्चे दिंटल्या वच्ची आदी आत्मिक उंडी. 47पहिला मनशी भुमीलोन मन्नुता बनाशीन्या, तर इंगोगो मनशी#15:47 इंगोगो मनशी आंटे प्रभु येशुड स्वर्ग लोन्केल वच्या. 48यल्ला आ पहिला मनशीद रचना मन्नुनोट बनाशीन्या, आल्ले मनाम आंदार पण मन्नुता बनाशीनाम इंगा यल्ला इंगोगो मनशीद फय स्वर्गीय उंडाद आल्ले मनाद फय पण स्वर्गीय आय्यी. 49इंगा यवाड मन्नुता बनाशीन्या वानदी रूप मनाम धारण शेस्तीम, आल्ले यवाड स्वर्गीय उंडाड वानदी रूप मनाम धारण शेशाम. #१योहान 3:2.
50इप्पुड आक्का तम्मुळ्ळालाला, निन इदी शपतान की, नंजुर इंगा रक्ताम परमेश्वर राज्यद अधिकारी आय्यी शकायाद इंगा नाशवान अविनाशीक अधिकारी आय्यी शकायाड. 51सुडना! निन मिक वगाट रहस्यमय सत्य शपतान. मनाम आंदार सच्चेतोर लेम. मनाम आंदार बदलाशी फोयाम. 52इंगा इदी लगेच आय्यी, कन्नुद रेप्पा आंटा काना मुंची, यप्पुड आखरी कर्णा वागी आप्पुड, येनटीक की कर्णा वागी तर यवार सच्चीनोर उंडार, वार नेहमी इचांग जिवंत आय्यार इंगा मनाम यवार जित्ता उंडार, मनाम पण बदलाशी फोयाम. 53येनटीक की इदी जे नाशवंत उंडाद आदी अविनाशीन धारण शेशी इंगा इदी याद सच्चेदेंक उंडाद आदी अमरत्व धारण शेशी इदी नक्की उंडाद. 54इदी नाशवंत यप्पुड अविनाशीन धारण शेशी इंगा इदी सच्चेद उंडाद आदी अमरत्व फेटकुनी, इल्ला यप्पुड आय्यी आप्पुड,
पवित्र शास्त्रला राशीनेलेका;
“विजय सावनी मिंगी तिस्कुंडाद.”
55“अरे साव नीद विजय यंदु उंडाद?
साव नीद नांगी यंदु उंडाद?”#यशया 25:8; होशेय 13:14.
56सावदी नांगी पाप उंडाद इंगा पापदी सामर्थ्य नियमशास्त्र तीकेल वस्ताद. 57पण परमेश्वरकी धन्यवाद, यवाड मना प्रभु येशु ख्रिस्त तीकेल मनाक पाप इंगा सावमिंदा विजय इस्ताड! 58दिनिचांग ना प्रिय आक्का तम्मुळ्ळालाला, प्रभुला स्थिर इंगा मजबूत निलना. नेहमी स्वतान प्रभुन फनी इचांग इचकाडना येनटीक की मिक यरका उंडाद की प्रभुला मिद कष्ट व्यर्थ लेद. #गलती 6:9.
Currently Selected:
1CO 15: WNT
Highlight
Copy
Compare
Share
Want to have your highlights saved across all your devices? Sign up or sign in