2CO 7
7
पौलदी प्रेम इंगा उत्तेजन
1ना प्रिय आक्का तम्मुळ्ळालाला, इ आन्नी अभिवचनलु मनाक शिक्कीनाय, तर मनाम स्वतान आ अशुद्ध माटलाकेल शुद्ध शेयदाम याद शरीरनी इंगा आत्मान शुद्ध शेस्ताद, इंगा मनाम परमेश्वर यरपुला निलची पुर्णपणे पवित्र शेयदाम.
2माक मी अंतकरणला जागा इंडा; मिम यवार मिंदाच अन्याय शेयालेद, यवारनीच बिघडाया मतालेद, यवारदीच फायदा यत्तालेद. 3दोषी ठराय मतदेंक निन इल्ला आंटुनान इल्ला लेद. निन पहिला पण शप्पीन्टीन की, मीर मा अंतकरणला इल्ला कुसनीनार की मिम मी इचांग सच्चेदेंक इंगा जगाशेदेंक तैयार उंडाम. 4नाक मी मिंदा शेंगेम विश्वास उंडाद इंगा नाक मी बद्दल शेंगेम घमंड उंडाद; नाद पुर्ण समाधान आयनाद इंगा ना आन्नी दुखला निन शेंगेम आनंदीत उंडान.
करिंथ लोन्टोर पश्चात्तापला आनंदीत आय्येद
5येनटीक की मिम मासेदोनिया प्रांतलोंग वच्ची नेंका मा फयीक आराम लेकुंड्या; माक आंदार तीकेल त्रास इच्चेदेंक वच्या, बैटीकेल जगडाल इंगा लोनीकेल यरपु. 6तरी पण, या परमेश्वर नम्र उंडीनोरकी शांती इस्ताड वाड माक तीत वच्चीन तीकेल शांती इच्या. 7इंगा वाड फक्त वच्या आंका लेद, तर आ शांतीता पण याद मी तीकेल वानकी शिक्कीन्या वाड माक मिद उत्सुकता, मिद दुख इंगा मिद ना बद्दलदी चिंता दिन बद्दल शप्या, आंका नाक शेंगेम आनंद आय्या.
8निन ना पहिला पत्रला मिक दुख इस्तीन दिन बद्दल नाक वाईट वाटायाद; नाक वाईट वाटाशीन्या यप्पुड निन सुस्तीन की आ पत्रता निन काही वेळ इचांग मिक दुख इस्तीन; 9इप्पुड निन आनंद शेस्तान, मिक दुख आय्या आंका लेद, तर आ दुख इचांग मिद मन बदलाशा आंका, येनटीक की मिद दुख परमेश्वर इच्छाता उंड्या, दिनिचांग की मा तीकेल मिद येमीच नुकसान कावाराद. 10येनटीक की याद दुख परमेश्वर तीकेल आयताद, दानता मन बदलास्ताद, याद तारण तीकुड येकेन फोयताद इंगा दिनिचांग येमीच वाईट वाटायाद. पण दुन्यामलोन दुख सावकी कारण आयताद. 11इदी दुख याद परमेश्वर इच्चीनाड, आदी मी दिंटल्या यंता उत्सुकता, स्वतान सिद्ध शेशेद यंता इच्छा, यंता कोफाम, यंता यरपु, मोमलान भेटाशेद यंता इच्छा, यंता हिम्मत, पाप बद्दल न्याय शेशेद बुद्धी जागृत शेशीनाद! मीर आन्नी माटलाला इदी सिद्ध शेशीनार की मीर इ माटलाला यंता निर्दोष उंडार. 12तरी पण निन मिक रास्तीन आदी यवार अन्याय शेशीर वान इचांग लेद लेकाते यवार मिंदा अन्याय आय्या वान इचांग लेद, तर, निन परमेश्वर मुंदार मिक इदी सुपीचेदेंक रास्तीन की खरेमे मीर मा इचांग यंता समर्पित उंडार.
13दिनिचांग माद उत्तेजन शिक्या इंगा माक उत्तेजन शिक्या इंते लेद, तर विशेष रुपता आनंदीत उंडाम की तीत शेंगेम आनंदीत उंड्या की यल्ला मीर आंदार वानदी स्वागत शेस्तीर इंगा वानदी मन समाधान आय्या. 14इंगा मी बद्दल जर निन वान मुंदार घमंड शेशीन्टे तर नाक येमीच शिग्गु वाटायाद. पण मिम यल्ला मी जताक आंताच खरेम माटलाडताम, आल्ले माद तीत मुंदार मी बद्दल घमंड शेशेद पण खरेम उंडाद. 15वानकी यप्पुड इदी ध्यानाम वस्ताद की, मीर आंदार यल्ला वानदी आज्ञापालन शेस्तीर इंगा यरस्केन थरथर नडगुका मीर यल्ला वानदी स्वीकार शेस्तीर तर मी इचांग वानदी प्रेम शेंगेम वाढास्ताद. 16निन इप्पुड शेंगेम आनंदीत उंडान येनटीक नाक मी मिंदा पुर्ण विश्वास उंडाद.
Currently Selected:
2CO 7: WNT
Highlight
Copy
Compare
Share
Want to have your highlights saved across all your devices? Sign up or sign in