ACT 13
13
पवित्र आत्मा तीकेल प्रेषितलु दुन्यामलोन कोपर्याल नंताक शेशीनेद सेवाकार्य — 13:1—28:31
बर्णबान इंगा शौलनी आंपेद
1अंत्युखिया इंदुड ख्रिस्ती मंडळीला काही संदेष्ट्याल इंगा शिक्षकलु उंडीर; आंटे बर्णबा, शिमोन निग्र, लुक्य कुरेनेकर, मनाएन (यवाड हेरोद जताक शिन्नावोडकेल फेद्दावोड आयन्या) इंगा शौल. 2इर आंदार परमेश्वरदी उपवास शेस्का आराधना शेशेताप्पुड, पवित्र आत्मा वारनी आन्या, “बर्णबान इंगा शौलनी या फनी इचांग निन फिल्चीनान दानिचांग वारनी ना इचांग अलग शेयना.” 3दिनिचांग मंडळी उपवास इंगा प्रार्थना शेशा, मंग वार बर्णबान इंगा शौल नत्ती मिंदा शेय फेट्टी प्रार्थना शेशीर, मंग वारनी आंपकाडीर.
शौलदी पहिला प्रवास
4पवित्र आत्मा तीकेल बर्णबान इंगा शौलनी सलुकीयाक आंपेदेंक वच्या, मंग आंदुकेल वार समुद्री दावाता कुप्र बेट मिंदीक फोईर. 5वार यप्पुड सलमी शहरकी वच्चीर, आप्पुड वार परमेश्वरदी वचन यहुदी मंदी सभास्थानला शप्पीर मार्क आनीनोड योहान इड पण वार मदत इचांग उंड्या. 6वार आंता बेट दाटीगास पफे शहरलोंग फोईर, बर्येशु फेरोड वगाड यहुदी जादुगर उंड्या इंगा वाड खोटा संदेष्टा उंड्या. 7बर्येशुड नेहमी सिर्ग्य पौल जताक निलदु यवाड राज्यपाल उंड्या इंगा बुद्धिमान उंड्या, वाड बर्णबान इंगा शौलनी वान तीकुड फिलच्या, वानकी वार तीकेल परमेश्वरदी वचन इनेद उंड्या. 8पण अलीम “जादुगर”#13:8 अलीम “जादुगर” बर्येशु (वान फेरुद अर्थ ग्रीकला इद्दे उंडाद) इड बर्णबान इंगा शौल विरुद्ध उंड्या, राज्यपाल विश्वास फेट्टाराद आंका अलीम वानदी मन तीप्पेद प्रयत्न शेशा. 9पण शौल, यवान पौल पण आंटार, वाड पवित्र आत्माता निंडीनोड उंड्या, पौल वान तीकुड उर्मी सुशा इंगा आन्या. 10“हे शैतान कोडकु नु दुष्टताता इंगा लबाडीता निंडीनोड उंडाव, नु प्रत्येक शिंगार माटाक शत्रु उंडाव, नु प्रभुनी सरळ दावाल उलटा शेशेद इडवाव येम?#नीतिसुत्र. 11तर इप्पुड सुड, प्रभुनदी शेय नी मिंदा उंडाद, नु गुड्योड आय्याव इंगा काही वेळ नंताक निक सुर्य कमसाक फोई,” मंग लगेच अलीम कंडला मुंदार मोब्बु फड्या इंगा वाड वान यवार तरी शेय फट्टी नडपियाला आंका इक्काड-आक्काड तिरगुका मंदीन फुडकेदेंक आंट्या. 12आप्पुड जे आय्या आदी सुशी राज्यपाल विश्वास फेट्या, प्रभुन शिक्षनता वाड चकीत आय फोया.
पिसिदियालोन अंत्युखियाला पौल यहुदी मंदी इच्चीनेद उपदेश
13पौल इंगा यवार वान मित्रल उंडीर वार पफे तीकेल समुद्री दावाता पंफुलियालोन पिर्गा उरुक वच्चीर, पण योहान (मार्क) वारनी इडशी वापस यरुशलेम शहरकी फोया. 14पौल इंगा वान मित्र बर्णबाड वारदी प्रवास मुंदारकी चालु फेट्टीर, पिर्गाकेल वार पिसिदियालोन अंत्युखियाक फोईर इंगा शब्बाथ दिनमुनाड सभास्थानलोंग फोई कुसनीर. 15आप्पुड नियमशास्त्र इंगा संदेष्ट्याल राशीने पुस्तकलेल वाचाशेद आयनेंका सभास्थान अधिकारील पौल इंगा बर्णबानकी निरोप आंपीर की, “हे तम्मुळ्ळालाला, इंदुड मंदीक येमाना मदत आय्यी इल्ला काही वचनलु शपना.” 16पौल नीला फड्या इंगा वानदी शेय फैनिक शेशी आन्या, “हे इस्राएल मंदीलाला इंगा परमेश्वरकी यरस्कुनेतोर यहुदी लेनोर मंदीलाला इनना. 17इ इस्राएल मंदी परमेश्वर, मना आब्बा तातागारनी निवडाशा इंगा वार यप्पुड मिसर देशामला परदेशी आंका निलदुर, आ काळला परमेश्वर वारनी बलवान शेशा इंगा वान महान शक्तीता वारनी आंदुकेल बैटीक तिशा.#निर्गम 12:51. 18इंगा परमेश्वर मरु भुमीला चाळीस यंडला नंताक वारनी सहन शेशा. 19परमेश्वर कनान प्रदेशलोन सात राष्ट्रलाद नाश शेशा, परमेश्वर वारदी भुमी इस्राएलकी साडे चारशे यंडला नंताक इच्या. 20दान नंतर परमेश्वर शमुवेल संदेष्ट्यान नंताक वान मंदीक न्यायाधीश निवडाशी इच्या. 21मंग वार वगा राजान आडगीर, परमेश्वर वारकी किश कोडकुन शौलनी इच्या, शौल इड बन्यामीन वंश लोन्टोड उंड्या, वाड चाळीस यंडला नंताक राजा उंड्या. 22मंग परमेश्वर शौलनी तिस्काडी, दाविदनी वार राजा बनायमत्या, दाविद बद्दल परमेश्वर इल्ला आन्या, इशायान कोडकु, दाविद नाक ना मन लेका शिक्कीनाड, वाड नाय आन्नी इच्छाल पुर्ण शेशी. 23इद्दे दाविद वंश लोन्केल परमेश्वर वान अभिवचन लेका इस्राएल मंदी इचांग ताराशेतोड आंटे येशुन यकोच्या.” 24येशुड दावा काना मुंची आंता इस्राएललोन मंदीक योहान प्रचार शेशा, की मी मनलु परमेश्वर तीकुड तीप्पना इंगा बाप्तिस्मा तिस्कोंडा. 25यप्पुड योहान वानदी फनी पुर्ण उंड्या, आप्पुड वाड आन्या, “निन यवाड उंडान इल्ला मिक वाटास्ताद? निन ख्रिस्त लेन, वाड ना यंकाटेल वच्चेतोड उंडाड, वान शप्पुलाद दाराम इडशे लायक पण निन लेन.”
26ना तम्मुळ्ळालाला, अब्राहाम परिवारलोन कोडकुलाला इंगा मीर यहुदी लेनोर मंदीलाला, मीर यवारकी परमेश्वरदी उंडाद, इनना! तारणदी इदी वचन मना इचांगे आंपेदेंक वच्चीनाद. 27यरुशलेम शहरला निलचेतोर यहुदी मंदी इंगा वार अधिकारील इर वान गुरतु फट्टालेद, येशुड इड ताराशेतोड उंड्या, येशुन बद्दल याय माटलु संदेष्ट्याल राशीनीर आय यहुदी मंदी इचांग प्रत्येक शब्बाथ दिनमुनाड वाचाशेदेंक वद्दु, आय पण वारकी तेल्वालेद, यहुदी मंदी येशुन दोषी ठराय मतनेंका वार आ संदेष्ट्याली शब्दल खरेम ठरायमतीर. 28येशुनकी सच्चेद शिक्षा इच्चे योग्य वान लोना यादुच दोष वारकी शिक्काक फो, तरी पण वार वान मतेस्काडाला आंका पिलातकी विनंती शेशीर. 29पवित्र शास्त्रला येशुन बद्दल याय माटलु राशीनेय उंड्या, आय आन्नी वार पुर्ण शेशीनेंका येशुन क्रुस मिंदकेल किंदीक दिंचीर इंगा वान कबरला फेट्टीर. 30पण परमेश्वर वान सच्चीनोर लोन्केल लेप्या. 31मंग शेंगेम नाळा नंताक यवार वान जताक उंडीर, वारकी गालील प्रांतकेल यरुशलेम शहर नंताक येशुड दर्शन इच्या, वार मंदी इप्पुड वान साक्षीदार आंका मंदी मुंदार उंडार. 32मिम मिक परमेश्वर याद अभिवचन मना आब्बा तातागारकी इच्चीन्या दान बद्दल सुवार्ता शपताम.
33मनाम वान बिळ्ळु (संतान) उंडाम इंगा परमेश्वर इदी अभिवचन मना बाबतीला खरेम शेशी सुप्या, परमेश्वर इदी येशुन सच्चीनोर लोन्केल लेपीन तीकेल शेशा, मनाम दीन बद्दल स्तोत्रसंहिताला पण वाचास्ताम: “नु ना कोडकु उंडाव, इबद निन निक जन्म इच्चीनान.”#स्तोत्रसंहिता 2:7.
34वाड शडी फोवाराद आंका परमेश्वर वान सच्चीनोर लोन्केल लेप्या, दीन बद्दल वाड इल्ला शप्पीनाड की, “दाविदकी इच्चेदेंक वच्चीनेद पवित्र इंगा पक्का आशिर्वाद निन मिक इच्यान.” 35दिनिचांग इंगा वगा स्तोत्रला वाड आंटाड: “नु नी पवित्र मनशीन कबरला शडानियाक फोयाव.”#स्तोत्रसंहिता.
36येनटीक की दाविद वान पिढीला परमेश्वर इच्छा लेका सेवा शेशी सच्ची फोया, मना आब्बा तातागार जताक कबरला वानदी शरीर शडी फोया. 37पण यवान परमेश्वर सच्चीनोर लोन्केल लेप्या, वानकी शडी फोयेद अनुभव दालेद. 38“हे तम्मुळ्ळालाला, मिम याद घोषणा शेस्तुनाम आदी मीर तेल्ची तिस्कुना बेक की, येशुन तीकेले मी पापलाद क्षमा मिक शिक्की शकास्ताद. 39इंगा या माटलाला मोशेनदी नियमशास्त्र मिमलान मी पापलाकेल मुक्त शेय्याद, आ माटलाला प्रत्येक मनशी यवाड वान मिंदा विश्वास फेटताड, वान तीकेल नितीमान ठरास्ताड. 40संदेष्ट्याल शप्पीनेय माटलु मी बाबतीला कावाराद आंका काळजी तिस्कोंडा. 41हे निंदा शेशेतोरलाला, सुडना, आश्चर्य शेयना इंगा सच्ची फोंडा, येनटीक की मी युगला निन वगाट फनी शेशान, यादान मिंदा मिद विश्वास कुसनाक फोई यवाराना आदी स्पष्ट शेशी शपते तरी मीर वान मिंदा विश्वास फेट्टाक फोयार.”
42यप्पुड पौल इंगा बर्णबाड फोयेदेंक आंटीर, आप्पुड मंदी आनीर की, मुंदार शब्बाथ दिनमुनाड वापस दांडा इंगा माक दीन बद्दल इंगा शपना. 43सभास्थान लोनदी बैठक संपाशीनेंका शेंगेम यहुदी मंदी इंगा यहुद्योरलेका नडशेतोर इंगोगो धार्मिक मंदी पौल इंगा बर्णबान यंका फोईर, पौल इंगा बर्णबाड आ मंदीक समजाय मतीर, की वार परमेश्वर कृपाला टीकाशी निलवाला.
प्रेषितलु इंगोगो यहुदी लेनोर तीकुड तिरगुतार
44मुंदार शब्बाथ दिनमुनाड शहरलोन आंता मंदी परमेश्वरदी वचन इनेदेंक वगातळा जमा आय्यीर. 45पण यप्पुड यहुदी मंदी वार आंदारनी आंदु सुशीर, आप्पुड वारकी शेंगेम कोफाम वच्या, इंगा वार निंदा शेस्केन पौल येम पण माटलाडीन्या, दान विरुद्धला माटलाडेदेंक आंटीर. 46पण पौल इंगा बर्णबाड शेंगेम हिम्मतता माटलाडीर, वार आनीर, “परमेश्वरदी वचन मी यहुद्योरकी पहिला मिम शप्पाने बेक, पण मीर इनेदेंक नाकारीस्तुनार, मीर मिद स्वतादे नुकसान शेस्कुंटुनार इंगा सार्वकालिक जीवन तिस्कुनेदेंक अपात्र ठरास्तुनार! दिनिचांग इप्पुड मिम इंगोगो देशलोन यहुदी लेनोर मंदी तीकुड फोयाम.” 47प्रभुड माक आज्ञा इच्चीनाड की, “यहुदी लेनोर इचांग निन मिमलान यलगु इल्ला शेस्तीन दिनिचांग की, मीर पृथ्वी मिंदुड आंता मंदीक तारणदी दावा सुपी शकाशार.”
48यप्पुड यहुदी लेनोर पौलनी इल्ला माटलाडेताप्पुड इनीर आप्पुड वार शेंगेम आनंदीत आय्यीर, परमेश्वर वचनकी वार गौरव इच्चीर इंगा वार दिंटल्योन्केल शेंगेम मंदी वचन मिंदा विश्वास फेट्टीर, येनटीक की वार सार्वकालिक जीवन इचांग निवडाशीनोर उंडीर. 49इंगा परमेश्वरदी संदेश पुर्ण देशला शप्पेदेंक वच्या. 50आप्पुड यहुदी मंदी शहरलोन काही धार्मिक आंड्योरनी इंगा पुढारीलान भडकाय मतीर, आ मंदी पौल इंगा बर्णबान बद्दल शेंगेम वाईट माटलु शेशीर इंगा वारनी शहर बैटीक तिस्काडीर. 51मंग पौल इंगा बर्णबाड वार काळाद मन्नु झाडशीर इंगा वार इकुन्या शहरलोंग फोईर.#मत्तय 10:14-16. 52इक्काड येशुन शिष्यल खुशीता इंगा पवित्र आत्माता पुर्ण आय्यीर.
Currently Selected:
ACT 13: WNT
Highlight
Share
Compare
Copy
Want to have your highlights saved across all your devices? Sign up or sign in
