ACT 14
14
इकुन्याला पौल इंगा बर्णबाड
1पौल इंगा बर्णबाड इकुन्या शहरलोंग फोईर, वार आंदुड यहुदी सभास्थानलोंग फोईर, आंदुड मंदी जताक वार माटलाडीर, पौल इंगा बर्णबा इल्ला माटलाडीर की, शेंगेम यहुदी मंदी इंगा यहुदी लेनोर मंदी वार येम पण शप्पीर दान मिंदा विश्वास फेट्टीर. 2पण काही यहुदी मंदी विश्वास फेट्टालेद, वार यहुदी लेनोर मंदीय मनलु भडकाय मतीर इंगा वारी मनलु वाईट शेशीर. 3दिनिचांग पौल इंगा बर्णबाड आंदु शेंगेम नाळ मुक्काम निलचीर इंगा परमेश्वर शक्तीता येशुन बद्दल हिम्मतता शपकेन निलचीर, पौल इंगा बर्णबाड परमेश्वर कृपा बद्दल साक्ष इच्चीर, इंगा परमेश्वर वारकी चमत्कार इंगा अद्भुत फनुल शेशेदेंक सामर्थ्य इच्ची वार येम पण शपदुर आदी खरेम ठरायमत्या. 4पण शहरलोन मंदीला फुट फड्या. काही मंदी यहुदी मंदी तीकेल इंगा काही मंदी प्रेषितला तीकेल आय फोईर. 5काही यहुदी लेनोर मंदी, काही यहुदी मंदी इंगा वार पुढारील कुडी पौल इंगा बर्णबानदी अपमान शेशेद इंगा राळाता मतेशेद प्रयत्न शेशीर. 6यप्पुड प्रेषितलाक दिन बद्दल यरका आय्या आप्पुड वार आदी शहर इडस्काडीर, इंगा वार लुकवनिया देशलोन लुस्र इंगा दर्बे इ नगरलोंग फोईर इंगा आ शहर आजुबाजुक उंडीने प्रदेशला लोंग फोईर. 7इंगा आंदु वार सुवार्ता शप्पीर.
लुस्रला वगा कुंट्योनदी बागा आय्येद
8लुस्र इंदु वगा मनशी उंड्या वाड कुंट्योड उंड्या वाड फुट्टीनकेले कुंट्योड फुट्टीन्या इंगा यप्पुडुच नडवा लेकुंड्या. 9पौल भाषण शेशेताप्पुड इ मनशी इनदु, पौल वान तीकुड टक सुशा इंगा निन बागा आय्यान इल्ला आ मनशीद विश्वास उंडाद इदी सुशी. 10वाड बेग्गे आन्या, “नी काळा मिंदा शिंगार नीला फड!” आप्पुड आ मनशी उडी मत्या इंगा नडशेदेंक आंट्या. 11यप्पुड मंदी सुशीर की पौल येम शेशा, आप्पुड वार लुकवनिया भाषाला याद वारदी भाषा उंड्या दांटल्या कीरलीर, वार आनीर “परमेश्वर मनशी रुपला मा नडमा दिगीनाड.” 12मंदी बर्णबान ज्युपिटर आनीर इंगा पौलनी मर्क्युरी आनीर, येनटीक की पौल मुख्य माटलाडेतोड उंड्या. 13ज्युपिटरदी भवन देगार उंड्या, इ भवनलोन पुजारी काही यद्दुल इंगा फुवुल येकेन वेदी देगार वच्या, पुजारीक इंगा मंदीक पौल इंगा बर्णबानदी उपासना शेशेदेंक वार मुंदार बली इच्चेद उंड्या. 14पण वार येम शेस्तुनार, इदी यप्पुड प्रेषित पौल इंगा बर्णबानकी तेलच्या आप्पुड वार स्वताय बट्टाल शिंचीर इंगा मंदी गर्दीला दुरीर इंगा बेग्गे आनीर. 15हे मंदीलाला, मीर इदी येम शेस्तुनार? मिम पण मी लेका मन्सुले उंडाम! मिक यल्ला भावनाल उंडाय, आल्ले माक पण उंडाय! मिम मिक सुवार्ता शप्पेदेंक वच्चीनाम, मिम मिक शपतुनाम की इ व्यर्थ माटलाकेल मीर मिद मन तीप्पना, इंगा खरेम जित्ता परमेश्वर तीकुड मिद मन आंचना, वाडे मोडाम, पृथ्वी, समुद्र इंगा दांटल्या येम पण उंडाद आदी आंताच बनायमत्या.#निर्गम 20:11; स्तोत्रसंहिता 146:6. 16भुतकाळला, परमेश्वर आन्नी जातीलान वारकी यल्ला बेक आल्ला वागायानीच्या. 17पण परमेश्वर इल्ला माटलु शेशा, की आटला मिंदकेल वाड खरेम उंडाड इदी सिद्ध आयनाद, वाड मी इचांग शिंगार माटलु शेस्ताड, वाड मिक मोडाम लोन्केल वाना इस्ताड, योग्य वेळला वाड मिक शिंगार पिक इस्ताड, वाड मिक शेंगेम आन्नाम इस्ताड इंगा वाड मी मनलु आनंदता निंचताड. 18इ माटलाता प्रेषितलु गर्दीन थांबाय मतीर की वार प्रेषितला इचांग बली अर्पण शेयाराद.
19मंग अंत्युखिया इंगा इकुन्या इंदुड काही यहुदी मंदी आंदुक वच्चीर, इंगा वार आंदुड मंदी मनलु वार तीकुड तीप्पीर इंगा पौलकी राळ मतीर, इंगा पौल सच्ची फोया इल्ला समजाशी वार वान जग्गुका फोई नगर बैट्या येस्काडीर. 20पण शिष्यल पौल भोवती जमा आयनेंका पौल लेशी वापस शहरलोंग फोया इंगा इंगोगो नाळ बर्णबान जताक वाड दर्बे शहरलोंग फोया.
अंत्युखियाक वच्चेद
21इंगा आ नगरला वार सुवार्ता शप्पी शेंगेम मंदीन शिष्य बनाय मतीर, मंग वार लुस्र, इकुन्या इंगा अंत्युखियाक वापस वच्चीर. 22इंगा वार आंदुड शिष्यलाक येशुन मिंदुड विश्वासला मजबुत निलवाला, आंका उत्तेजन इच्चीर, वार आनीर, “शेंगेम दुखलाद सामना शेशी मनाक परमेश्वर राज्यला प्रवेश शेयाबेक.” 23पौल इंगा बर्णबाड प्रत्येक मंडळीला आब्बागारदी निवड शेशीर, वार इ आब्बागार इचांग उपवास इंगा प्रार्थना शेशीर, इंगा आंदार आब्बागारनी आ प्रभुन शेतल्या इच्चीर, यवान मिंदा वारदी विश्वास उंड्या. 24पौल इंगा बर्णबाड पिसिदिया प्रदेश लोन्केल फोईर मंग वार पंफुलियाक वच्चीर.
25वार पिर्गा शहरला परमेश्वरदी संदेश इच्चीर मंग वार अत्तलीया शहरलोंग फोईर. 26मंग आंदुकेल मुंदारकी पौल इंगा बर्णबाड सिरीया प्रांतलोन अंत्युखियाक समुद्री दावाता फोईर, याद फनी वार पुर्ण शेशीनीर दानदी सुरवात वार परमेश्वर कृपाता अंत्युखियाकेले शेशीनीर. 27वार यप्पुड आंदुक पोहचाशीर, आप्पुड वार मंडळीन वगातळा फिल्चीर इंगा परमेश्वर वार जताक उंडी याय-याय माटलु शेशा आय वार वारकी शप्पीर, आल्ले इंगोगो देशलोन यहुदी लेनोर मंदीला परमेश्वर विश्वासदी कवाड यल्ला तेरशा आदी पण शप्पीर. 28मंग वार विश्वासी मंदी जताक शेंगेम नाळ आंदु निलचीर.
Currently Selected:
ACT 14: WNT
Highlight
Share
Compare
Copy
Want to have your highlights saved across all your devices? Sign up or sign in
