ACT 19
19
योहान बाप्तिस्मा शेशेतोन शिष्यल
1आप्पुड इल्ला आय्या की, अपुल्लोड करिंथला उंडीनाप्पुड पौल अलग-अलग भागला लोन्केल प्रवास शेस्केन इफिसकी वच्या, आंदु वानकी काही शिष्यल कमशीर. 2पौल वारनी आडग्या, “यप्पुड मीर विश्वास फेटतीर, आप्पुड मिक पवित्र आत्मा शिक्या येम?” वार शिष्यल आनीर, “मिम तर पवित्र आत्मा बद्दल इना पण लेद.” 3वाड आन्या, “तर मंग मीर याद बाप्तिस्मा तिस्कुंडार?” वार आनीर, “योहानदी बाप्तिस्मा.” 4पौल आन्या, “योहानदी बाप्तिस्मा पश्चात्तापदी उंड्या, वाड मंदीक शप्या की, वान यंकाटेल यवाड वस्तुनाड, वान मिंदा मंदी विश्वास फेट्टाला, वाड वच्चेतोड आंटे येशुड उंडाड.” 5यप्पुड वार इदी इनीर, आप्पुड वार प्रभु येशुन फेरता बाप्तिस्मा तिस्कुनीर. 6इंगा यप्पुड पौल वानदी शेय वार मिंदा फेट्या आप्पुड पवित्र आत्मा वार मिंदा दिग्या इंगा वार अलग-अलग भाषाला माटलाडेदेंक आंटीर इंगा भविष्यवाणी शेशेदेंक आंटीर. 7इ गटला आंता मंदी कुडी बारा मन्सुल उंडीर.
इफिस इंदु पौल
8पौल यहुदी सभास्थानलोंग फोया इंगा मुड नेलाल मंदी जताक हिम्मतता माटलाड्या, वार जताक चर्चा शेशा इंगा परमेश्वर राज्य बद्दल वारकी समजाय मतेद प्रयत्न शेशा. 9पण वार दिंटल्योन्केल काही मंदी मनलु बिरसु आय फोयन्या आंका वार विश्वास फेट्टाक फोईर इंगा ख्रिस्तन दावा बद्दल वाईट माटलाडेदेंक आंटीर, मंग पौल सभास्थान लोन्केल यल्ली फोया इंगा शिष्यलान पण वान जताक येकेन फोया इंगा तुरन्ना शाळाला धीन्नाम वार जताक चर्चा शेयदु. 10इदी इल्ला रोंड यंडलु नडशा, दिनदी परिणाम इल्ला आय्या की, आशियाला निलचेतोर आंता यहुदी इंगा यहुदी लेने मंदी नंताक प्रभु येशुनदी वचन पोहचाशा.
इफिसला सामर्थी फनुल
11परमेश्वर पौल शेयता अद्भुत चमत्कारलु शेयदु. 12पौल फय मिंदुडदी दस्ती इंगा बट्टाल पण यकोची काही मंदी आय बिमार मंदी मिंदा फेटदुर, यप्पुड वार इल्ला शेयदुर आप्पुड बिमार मंदी बागा आयदुर इंगा दुष्टात्माल पण वारनी इडशी फोदु. 13काही यहुदी मंदी पण आन्नी तीकुड प्रवास शेस्का मंदी फय लोन्केल दुष्ट आत्मालनी तिदुर, वार दुष्टात्माल आंटीने मनशी फय लोन्केल प्रभु येशुन फेरता आय आत्माल तिदुर. 14वार आंदुर, “पौल या येशुन फेरता घोषणा शेस्ताड आ फेरता निन निक आज्ञा इस्तान,” स्कीवा फेरोड यहुदी मुख्य याजक उंड्या वान योड कोडकुल पण इल्ले शेयदुर. 15पण वगातुक वगा दुष्टात्मा वारनी आन्या, “निन येशुन ओळखास्तान, पौलनी पण गुरतु फटतान, पण मीर यवार उंडार?” 16मंग यवानकी दुष्टात्मा आंटीन्या आ मनशी वार मिंदा उडी मत्या, वाड वार मिंदा ताबा तिस्कुन्या इंगा वारनी हारायमत्या, आप्पुड वार बेत्तालगा इंगा जखमी आय्यी आ इंटल्योन्केल यल्ली फारी फोईर. 17इफिसला निलचेतोर आंता यहुदी मंदी इंगा यहुदी लेने मंदी यप्पुड इदी इनीर, आप्पुड आंदार शेंगेम यरस्कुनीर इंगा मंदी प्रभु येशुन फेरुद शेंगेम आदर शेशेदेंक आंटीर. 18शेंगेम विश्वास फेटेतोर मंदी पाप कबुल शेशेदेंक आंटीर इंगा याय वाईट माटलु वार शेशीनीर आय शप्पेदेंक आंटीर. 19काही विश्वास फेटेतोर जादुटोणा शेशेनीर वार आन्नी जादुय पुस्तकलु मंदी मुंदार यकोचीर इंगा कालचीर, आ पुस्तकलाद किंमत पन्नास हजार यंडी शिक्काल इंता निंड्या. 20इल्ला प्रभुनदी वचन धुरा धुराम नंताक पसरास्का फोया इंगा आदी शेंगेम प्रभावशाली आयका फोया.
पौलदी मुंदारदी योजना
21इ माटलु आयनेंका पौलकी पवित्र आत्मा ध्यानाम इच्या की, मासेदोनिया इंगा अखया प्रांत लोन्केल प्रवास शेस्केन मुंदारकी यरुशलेम शहरकी फोयेद उंडाद, वाड आन्या, “निन आंदुक फोईनेंका नाक रोम शहर पण सुशेदे उंडाद.” 22दिनिचांग वान इद्दार सहायकलान तीमथ्यन इंगा एरास्तनी वाड मासेदोनियाक आंप्या इंगा वाड काही नाळ आशियाला निलच्या.
इफिसला दंगल
23आ वेळला इ दावा बद्दल #19:23 दावा बद्दल येशुन मार्ग बद्दल फेद्दाद गोंधळ आय्या. 24देमेत्रीय फेरोड वगा मनशी उंड्या, वाड सोनार उंड्या, वाड अर्तमी द्यावारी भवनलु बनाय मतदु, यवार कारागीरलु उंडीर वारकी आटलाता शेंगेम दुडलु शिकदु. 25वार आंदारनी इंगा इ फनी जताक संबंध उंडीने आंता मंदीक वाड वगातळा जमा शेशा इंगा वाड आन्या, मंदीलाला, मिक यरका उंडाद की, इ धंदाता मनाक यंता दुड्डु शिकताद. 26पण सुडना वाड पौल फेरोड मनशी येम शेस्तुनाड वाड येम आंटुनाड आदी इनना! पौल शेंगेम मंदीन प्रभावित शेशीनाड इंगा बदलाय मतकाडनाड, वाड इदी इफिसला इंगा आंता आशियाला शेशीनाड, वाड आंटाड, मनशी शेयता बनाय मतीने द्यावारलु खरेम द्यावारलु लेव. 27दिनिचांग मना धंदाद बदनामी आय्येद धोका उंडाद; इंते लेद तर या महादेवी अर्तमीद पुजा आंता आशिया प्रांत इंगा दुन्याम पण शेस्ताद दानदी भवन निरुपयोगी ठराशेद इंगा दानदी महत्व पण नष्ट आय्येद धोका उंडाद.
28यप्पुड वार इदी इनीर आप्पुड वारकी शेंगेम कोफाम वच्या इंगा वार बेग्गे कीरली आनेदेंक आंटीर, “इफिसलोन मंदीद अर्तमीद महान उंडाद.” 29शहरलोन मंदीला गोंधळ आय्या इंगा मंदी गायस इंगा अरीस्तार्खनी यवार पौल जताक प्रवास शेयदुर इंगा मासेदोनियाला निलदुर वारनी फट्टी नाट्यगृहलोंग येका फोईर. 30पौलकी मंदी मुंदार फोयेद इच्छा उंड्या पण येशुन शिष्यल वान इल्ला शेयानियाक फोईर. 31पौलान काही मित्रल यवार प्रांत अधिकारी उंडीर, वार निरोप आंपी वाड नाट्यगृहलोंग फोवाराद आंका कळकळीद विनंती शेशीर. 32इक्काड वगातळा जमा आयने काही मंदी लोन्केल वगाट घोषणा शेशेदेंक आंटीर तर इंगोगो मंदी इंगोगोट घोषणा शेशेदेंक आंटीर, दिनिचांग आंता जमा आयनोर आंता मंदी गोंधळाशी फोयनीर इंगा वार दिंटल्योन्केल शेंगेम मंदीक यरकाने लेकुंड्या की, वार आ न्याय भवनला वगातळा येनटीक वच्चीनीर. 33यहुदी मंदी आलेक्सांद्र फेरोन वगा मनशीन दोबका येका फोई आंदार मुंदार नीला फडा मतीर, वाड वान शेतलाता इशारा शेशी वारकी समजाय मतेद प्रयत्न शेशेदेंक आंट्या. 34पण यप्पुड मंदीक तेलच्या की, वाड वगाड यहुदी उंडाड, आप्पुड देगा-देगार रोंड घंटाल नंताक वार वगा आवाजला कीरलुकेन उंडीर, “इफिसलोन मंदीद अर्तमीद महान उंडाद.” 35शहरलोन लेखनीक मंदीन शांत शेशी आन्या, “इफिसलोन मंदीलाला, महान अर्तमी द्यावारदी इंगा स्वर्गलेल फडीने पवित्र गुंडुद इफिस इदी रक्षणकर्ता उंडाद, इदी यवारकी यरका लेद इल्ला वगाड तरी मनशी दुन्यामला उंडाड येम? 36येनटीक की इ माटलु नाकारीच्ची शकायाम, दिनिचांग मीर शांत निलना, इंगा विचार शेयांदे येमीच शेयाकुंडा. 37मीर इरनी फटकेन इंदुक यकोचीनार, खरेम तर वार भवन लोन्केल येमीच दोंगा पण शेयालेद इंगा मना द्यावारदी निंदा पण शेयालेद. 38जर देमेत्रीय इंगा वान जताक उंडीने कारागीरलाय येमाना तक्रारील उंटे, तर न्यायलयलु उघडा उंडाय, आंदु वार वगामेगार मिंदा आरोपलु आंची शकास्तार. 39पण जर मिक यादाना माटाद चौकशी शेशेद उंटे तर नियमित सभाला दान संबंधला विचार शेशेदेंक वच्ची. 40इबद इंदु येम पण आयनाद, दान बद्दल योग्य कारण मनाक शप्पादाद, दिनिचांग मनामे इदी दंगल चालु शेस्तीम इल्ला आरोप मना मिंदा वच्चेद यरपु उंडाद.” 41इल्ला शप्पेद आयनेंका वाड जमा आयनोरकी फोयेदेंक शप्या.
Currently Selected:
ACT 19: WNT
Highlight
Share
Compare
Copy
Want to have your highlights saved across all your devices? Sign up or sign in
