ACT 20
20
मासेदोनिया, हेल्लास प्रांतला इंगा त्रोवस इंदु पौल
1यप्पुड गोंधळ थांबाशा, आप्पुड पौल येशुन शिष्यलान भेटाशेदेंक फिलच्या इंगा वारकी उत्तेजन इच्चीनेंका वारदी निरोप तिस्कुन्या इंगा वाड मासेदोनियाक यल्या. 2मासेदोनियालेल फोयेताप्पुड अलग-अलग जागालला उंडीने येशुन शिष्यलाक वाड शेंगेम माटलु शप्पी वारकी उत्तेजन इच्या, मंग पौल ग्रीस प्रांतकी वच्या. 3आंदु वाड मुड नेलाल निलच्या, पौल सिरीया प्रांतकी समुद्री दावाता यल्लीनेंका, यहुदी मंदी वान विरुद्ध षडयंत्र रचाशीर, इदी सुशी वाड मासेदोनियाक वापस फोयेद ठरायमत्या. 4वान जताक काही मंदी उंडीर वार इल्ला: बिरुया नगरलोन पुर्रोन कोडकु सोपत्र, थेस्सलनी इंदुड अरीस्तार्ख इंगा सकुंद, दर्बा इंदुड गायस इंगा तीमथ्य, तुखिक इंगा त्रफिम इर आशिया प्रांत लोन्टोर उंडीर. 5इ मंदी मा मुंदारकी फोईर इंगा त्रोवस शहरला माद दावा सुशेदेंक आंटीर. 6बेखमीर रोट्याद यहुदी फंडगा आयनेंका मिम फिलिप्पै इंदुकेल समुद्री दावाता यलतीम इंगा आय्यीद नाळाक त्रोवसला वारकी फोई भेटास्तीम इंगा आंदु योड नाळ निलस्तीम.
त्रोवसला युतुख जित्ता शेशेद
7मंग हफ्ता पहिला दिनमुनाड मिम आंदार रोट्या तेम्पेदेंक वगातळा उंडीनाप्पुड#20:7 रोट्या तेम्पेदेंक वगातळा उंडीनाप्पुड प्रभुभोज , पौल वार जताक माटलाडेदेंक आंट्या येनटीक की इंगोगो नाळ यल्लेद वानदी योजना उंड्या, वाड निम्मा मोब्बु नंताक माटलाडका उंड्या. 8माडी मिंदुड या खोलीला मिम जमा आइंटीम आंदु शेंगेम दिव्वाल आंचीनेय उंड्या. 9युतुख फेरोड वगाड जवान मोगाबिडा खिडकिला कुसनीन्या, पौल माटलाडेताप्पुड वाड निद्दारला इंता गुंगाशीन्या की, वाड तिसरा मजली मिंदकेल किंदा फड्या, यप्पुड वान यत्तीर, आप्पुड वाड सच्ची फोयन्या. 10पौल किंदीक फोया इंगा वान दोक्काला तिस्कुन्या इंगा वान शेतल्या तिस्केन आन्या, “यरस्कुनाकुंडा! वान दिंटल्या इप्पुड पण जेम उंडाद.” 11मंग पौल मिंदीक फोया, रोट्या तेंप्या इंगा आदी तिन्या, फद्दु फुट्टी नंताक वार जताक माटलाड्या, मंग वाड फोया. 12आ मोगाबिडान वार जित्ता इल्ला इल्लुक येका फोईर, वार आंदार मनलाक शेंगेम शांती शिक्या.
त्रोवसकेल मिलेतदी प्रवास
13आंदुकेल मिम मुंदारकी यलतीम इंगा अस्सा इ नगरकी समुद्री दावाता यलतीम, आंदु मिम पौलनी तिस्कुंटुटीम, वाड इदी दिनिचांग ठराय मतीन्या, आदी आंटे वाड स्वता काळाता नडस्का फोयेतोड उंड्या. 14यप्पुड माक वाड अस्साला भेटाशा, आप्पुड मिम वान जहाजला तिस्कुंटीम इंगा मिम मितुलेने शहरकी फोयतीम. 15इंगोगो नाड मिम जहाजता मितुलेनेकेल यलतीम इंगा खियास बेट मिंदीक वस्तीम, मंग इंगोगो नाड सामा बेट दाटतीम इंगा वगा नाड आयनेंका मिलेत शहरकी वस्तीम. 16येनटीक की पौल ठराय मतीन्या की इफिसला थांबाशेद लेद, आशियाला वानकी जास्त वेळ थांबाशेद लेकुंड्या, वाड घाई शेयदु येनटीक की पन्नासावा दिनमु फंडगा इचांग वानकी यरुशलेम शहरला निलचेद उंड्या.
इफिसलोन आब्बा तातागारकी संदेश
17मिलेतकेल इफिस इंदु निरोप आंपी पौल आंदुड मंडळीलोन आब्बा तातागारनी फिल्चकुन्या.
18यप्पुड वार वच्चीर, आप्पुड वाड वारनी आन्या, आशियालोंग वस्तीन आबदनोट निन मी जताक उंडीनाप्पुड निन यल्ला निलस्तीन इदी मिक यरका उंडाद. 19निन प्रभुनदी सेवा नम्रताता इंगा येडस्का शेस्तीन, यहुदी मंदी शेशीने षडयंत्र इचांग निर्माण आयने संकटलु सहन शेशी निन वानदी सेवा शेस्तीन. 20इंगा याय माटलु मी इचांग शिंगार उंडाय, आय शप्पेदेंक इंगा मंदीक मुंदार इंगा इल्लु इल्लुक फोई शप्पेदेंक निन यप्पुडुच यंकाक मुंदारकी सुडालेद. 21पश्चात्ताप शेशी परमेश्वर तीकुड तिरगे बद्दल इंगा मना प्रभु येशु ख्रिस्तन विश्वास बद्दल यहुदी इंगा यहुदी लेनोर मंदीक सारखाने साक्ष इस्तीन. 22इंगा इप्पुड पवित्र आत्मा आज्ञाता यरुशलेम शहरकी फोयतुनान इंगा आंदु ना जताक येम आय्यी इदी नाक यरका लेद. 23नाक फक्त वक्काटे माटा यरका उंडाद की प्रत्येक शहरला पवित्र आत्मा नन्नु सावध शेस्ताद, जेल इंगा संकटलु नाद दावा सुस्तुनाय इदी नाक शपताद. 24पण निन ना जेमदी काळजी शेयान, आंदार काना महत्वद माटा आंटे निन नाय फनुल पुर्ण शेयाला, प्रभु येशुड याद फनी नाक इच्चीनाड आदी नाक पुर्ण शेयाने बेक आदी फनी आंटे परमेश्वर कृपा बद्दल सुवार्ता मंदीक शप्पाबेक. 25परमेश्वर राज्यद घोषणा शेस्का या मंदीला निन तिरगुतीन, आ मी दिंटल्योन्केल यवारकीच निन वापस कमसाक फोयान इदी इप्पुड नाक यरका उंडाद. 26दिनिचांग निन मिक इबद साक्ष इच्ची शपतान की, आंदार रक्तामकेल निन निर्दोष उंडान. 27परमेश्वरदी पुर्ण इच्छा येम उंडाद इदी शप्पेदेंक निन यप्पुडुच यंकाक मुंदारकी सुडालेद. 28मिद इंगा परमेश्वर आंता मंदीद, यवारनी परमेश्वर मिक इच्चीनाड, वारदी काळजी तिस्कोंडा, परमेश्वर कळपदी काळजी तिस्कुनेद फनी पवित्र आत्मा मिक इच्चीनाद, मीर मंडळी इचांग पण मेंढऱ्याल साकेतोर लेका उंडाबेक, इदी मंडळी परमेश्वर स्वताद रक्ताम इच्ची कोन्केन तिस्कुंडाड. 29नाक यरका उंडाद की, निन फोयनेंका मी नडमा दुष्ट लांडगाल वच्ची, आय कळपनी इडवाक फोई. 30मी दिंटल्योन्केल पण मंदी लेशीगास शिष्यलाक, वाईट माटलु नेरपी वार यंका येका फोयार. 31दिनिचांग सावध उंडना, मी दिंटल्योन्केल प्रत्येक मनशीक मुड यंडलाकेल कंडलाला कन्नेळ यकोची सावध शेशेद निन यप्पुडुच थांबाय मतालेद इदी लक्षला फेटना. 32इंगा इप्पुड निन मिमलान परमेश्वर इंगा वान वचन कृपा अधिन शेस्तान, यवाड मिद वाढ शेशेदेंक समर्थ उंडाड इंगा आंता पवित्र मंदी जताक वतन इच्चेदेंक समर्थ उंडाड. 33निन यप्पुडुच यवार बंगारदी, यंडीद इंगा बट्टाद लोभ फट्टालेद.#1 शमुवेल. 34निन स्वताद इंगा ना जताक उंडेतोरी गरजलु ना शेयता पुर्ण शेस्तीन इदी मिक यरका उंडाद. 35निन मिक आंताच शेशी सुपतीन, की मेहनत शेशी मनाम यवार कमजोर उंडार वारकी मदत शेयाबेक, इंगा प्रभु येशुनी शब्दल लक्षला फेट्टाबेक, याय वाड स्वता आनीन्या, “तिस्कुने काना इच्चेद धन्य उंडाद.”
36इंगा इदी माटलाडीनेंका पौल आंदार जताक कुडी मोकाळ टेकाशा इंगा प्रार्थना शेशा. 37आप्पुड वार आंदार शेंगेम यडशीर, वार पौल गोंतुला फडीर इंगा वानी मुत्ताल तिस्कुनीर. 38वार वापस वान यप्पुडुच सुशी शकायार फोयार, इ माटाता वारकी शेंगेम दुख आय्या, मंग वार वान जहाज नंताक इडशेदेंक फोईर.
Currently Selected:
ACT 20: WNT
Highlight
Share
Compare
Copy
Want to have your highlights saved across all your devices? Sign up or sign in
