EPH 5
5
येलगुला निलना
1दिनिचांग प्रिय बिळ्ळालेका परमेश्वरदी अनुकरण शेयना, 2इंगा ख्रिस्त मना मिंदा यल्ला प्रेम शेशा इंगा परमेश्वरनी खुश शेशेद सुवास शिक्काला आंका, मना इचांग स्वतान 'अर्पण इंगा बलिदान' शेशा, आल्ले मीर प्रेमता नडना.
3व्यभिचार, यादुच प्रकारदी अशुद्धता लेकाते लोभदी मी नडमा चर्चा कावाराद, इदी परमेश्वर मंदी इचांग शिंगार लेद. 4आल्ले याईच निर्लज्ज माटलु, मुर्खपनाद माटलाडकाम इंगा वाईट मजाक मस्ती मी नडमा कावाराद आदी मी इचांग शिंगार लेद. तर मीर परमेश्वरदी स्तुती शेयना. 5येनटीक की मिक इदी यरका उंडाद, यवाड पण मनशी जारकर्मी, अशुद्ध लेकाते लोभी आंटे मुर्तीपुजा शेशेतोर इरकी ख्रिस्त इंगा परमेश्वर राज्यला जागा लेद.
6व्यर्थ माटलाता यवारुच मिमलान फसाय मताराद येनटीक की इद्दे कारण इचांग आज्ञा तेम्पेतोर बिळ्ळा मिंदा परमेश्वरदी कोफाम वच्चेद उंडाद. 7दिनिचांग मीर वार जताक कुडा कुंडा. 8येनटीक की पहिला मीर पुर्ण अंधकारला उंटीर पण इप्पुड मीर प्रभुन यलगुला उंडार. तर इप्पुड यलगु बिळ्ळालेका जीवन जगायना. 9येनटीक की यलगुय फळलु शिंगार फनुलाला, नितीमत्वला इंगा सत्यला कमशी वस्ताय. 10परमेश्वरकी येम आवडास्ताद, दिनदी पारख शेयना. 11इंगा अंधकारलोन याय फळलु इयाव इल्लोन फनुल उंडाय आटलाक भागीदार काकुंडा. दान उलट, आटलान उघड शेयना. 12येनटीक की अविश्वासी मंदी गुप्तला येम शेस्तार, दान बद्दल माटलाडेद पण शिग्गुद माटा उंडाद. 13पण वारी आन्नी दोषलु यलगुला कमशी वस्ताय. 14येनटीक की वार आंदार मिंदा वाड यलगु चमका मतताड आंका मंदी इल्ला आंटार,
“हे फंडीनोडा लेय,
इंगा सच्चीनोर लोन्केल लेय,
इंगा ख्रिस्तद यलगु नी मिंदा चमकाशी.”
15दिनिचांग, मीर यल्ला जगास्तार, दान बद्दल काळजी तिस्कोंडा. मूर्ख मंदी लेका काकुंडा, तर शहाणा मंदी लेका कांडा. 16वेळदी शिंगार वापर शेयना येनटीक की या दिनमुलाला मीर निलस्तुनार आय वाईट उंडाय. 17दानिचांग मुर्खलेका काकुंडा, तर परमेश्वरदी इच्छा येम उंडाद इदी समजाशी तिस्कोंडा. 18इंगा सराय तागी नशाला निलवाकुंडा; दानता नाशतीकुड फोयतार, पण दान इडशी पवित्र आत्माता परिपुर्ण आयका फोंडा, 19वगामेगार जताक आन्नी प्रकारी भजनलु, स्तुती फदुल इंगा आत्मिक फदुलाता वानदी स्तुती शेयना. फदुल फाडना इंगा मना अंतकरणता परमेश्वरदी स्तुती शेयना. 20मना प्रभु येशु ख्रिस्त फेरता परमेश्वर यवाड मना आब्बाड उंडाड वानकी आन्नी माटला इचांग नेहमी धन्यवाद इंडा.
मोगुडाक इंगा वडतीलाक आज्ञा
21ख्रिस्तन बद्दल उंडीने आदर इचांग वगामेगार अधिन निलना. 22हे वडतुलाला, यल्ला मीर प्रभुन अधिन उंटीर, आल्ले मी मोगुन अधिन उंडना. 23येनटीक की ख्रिस्त यल्ला मंडळीक प्रमुख उंडाड, आल्ले मोगुड वडतीद प्रमुख उंडाड इंगा ख्रिस्त वान फयीन आंटे मंडळीन ताराशेतोड उंडाड. 24यल्ला मंडळी ख्रिस्तन अधिन उंडाद, आल्ले वडतुल पण प्रत्येक माटाला मना मोगुन अधिन उंडाला. 25हे मोगुडलाला, मी वडतुला मिंदा आल्ले नीस्वार्थ प्रेम शेयना. यल्ला ख्रिस्त मंडळी मिंदा प्रेम शेशी स्वतान दानिचांग इचकाड्या, 26दिनिचांग की, वाड दान परमेश्वर वचनरुपी नेळाता कडगी शुद्ध इंगा पवित्र शेय्याला. 27दिनिचांग की, वाड मंडळीन गौरवी फेंडली कुतुर रुपला सुपीच्ची, दानकी यादुच डाग लेका फोई इंगा सुरकुती इंगा यादुच प्रकारदी दोष लेवाराद तर आदी पवित्र इंगा निर्दोष उंडाला. 28आल्ले मोगुड पण मना वडती मिंदा प्रेम शेय्याला, यल्ला वाड स्वता फय मिंदा प्रेम शेस्ताड, यवाड पण मना वडती मिंदा प्रेम शेस्ताड, वाड स्वता मिंदा प्रेम शेस्ताड. 29येनटीक की इप्पुड नंताक यवाडुच स्वता फयीद कोफाम शेयालेद. उलटा वाड दान साकताड इंगा काळजी तिस्कुंटाड. यल्ला ख्रिस्त मंडळीन साकताड इंगा काळजी तिस्कुंटाड. 30येनटीक की मनाम ख्रिस्तन शरीर अवयवलु उंडाम. 31“यल्ला की पवित्र शास्त्र आंटाद,
दिनिचांग मनशी मना आब्बान इंगा आम्मान इडशी
इंगा वान वडती जताक जुळाशी उंडी इंगा वार इद्दार वगा शरीर आय्यार.”#उत्पत्ती 2:24; मत्तय 19:5; मार्क 10:7-8.
32इदी गुप्त रहस्य शेंगेम महत्वपुर्ण उंडाद इंगा निन इदी आंटान की इदी ख्रिस्तन इंगा मंडळीन सुपिस्ताद. 33तरी, पण मी दिंटल्योन प्रत्येक मनशी मना वडती मिंदा प्रेम शेय्याला इंगा वडती पण मना मोगुनदी मान फेट्टाला.
Currently Selected:
EPH 5: WNT
Highlight
Copy
Compare
Share
Want to have your highlights saved across all your devices? Sign up or sign in