JHN 1
1
येशुड जीवनकी तारणहार — 1:1-18
सुरवातकी शब्द उंड्या
1सुरवातकी शब्द#1:1 शब्द येशु ख्रिस्त उंड्या, शब्द परमेश्वर जताक उंड्या इंगा शब्द परमेश्वर उंड्या.#उत्पत्ती 1:1; स्तोत्रसंहिता 33:6-9. 2वाडे सुरुवातकी परमेश्वर जताक उंड्या. 3वान तीकेले परमेश्वर आंताच बनाय मतनाड. इंगा येम पण बनाशीनाद दांटल्योनदी यादुच माटा वान इडशी बनायालेद. 4वान लोना जीवन उंड्या; इंगा आदी जीवन मनुष्य जाती इचांग यलगु#1:4 यलगु येशु ख्रिस्त उंड्या. 5इंगा आदी यलगु मोब्बुला चमकास्ताद; इंगा मोब्बु दान यबदुच आरपी शकायाद.
6परमेश्वर तीकेल आंपीनोड वगा मनशी वच्या; वान फेर बाप्तिस्मा इच्चेतोड योहान. 7योहान आ यलगु बद्दल साक्ष इयाला आंका वच्या; दिनिचांग की आंता मंदी वान तीकेल विश्वास फेट्टाला. 8योहान स्वता आदी यलगु लेकुंड्या, पण आ यलगु बद्दल साक्ष इयाला आंका वच्या.
9याद खरेम यलगु प्रत्येक मनशीक यलगु इस्ताद वाड दुन्यामलोंग वच्चेतोड उंड्या. 10वाड दुन्यामला उंड्या इंगा दुन्याम वान शेयता बनाशा, तरी दुन्यामलोन मंदी वान गुरतु फट्टालेद. 11यवार वान देगाटोर वार तीकुड वाड वच्या, तरी वान देगाटोर मंदी वानदी स्वीकार शेयालेद. 12पण यंता मंदी वान स्वीकार शेशीर, आंटे वान फेर मिंदा विश्वास फेट्टीर, आंता मंदीक वाड परमेश्वर बिळ्ळु आय्येद अधिकार इच्या. 13वारदी जन्म रक्ताम लेकाते शारीरिक इच्छाता लेकाते मनशी इच्छाता कालेद, तर परमेश्वर तीकेल आयनाद.
14शब्द मनशी आय्या इंगा वाड मना नडमा निलचेदेंक आंट्या इंगा मिम वानदी गौरव सुस्तीम, आदी आब्बान तीकेल वच्चीने वक्का कोडकुद गौरव उंड्या याद कृपाता इंगा सत्यता परिपुर्ण उंड्या. 15योहान वान बद्दल साक्ष इस्ताड इंगा बेग्गे कीरली आंटाड, “यवान बद्दल निन शप्पीनान की, ना यंकाटेल यवाड वस्तुनाड वाड ना काना पण शेंगेम फेद्दावोड उंडाड, येनटीक की वाड ना काना पहिला उंड्या, वाड इडे उंडाड.” 16वान परिपुर्णता लोन्केल मना आंदारकी कृपा मिंदा कृपा शिक्कीनाद. 17येनटीक की नियमशास्त्र मोशेन तीकेल इच्चेदेंक वच्चीनाद; कृपा इंगा सत्य इदी येशु ख्रिस्तन तीकेल शिक्या. 18'परमेश्वरनी यवारुच यप्पुडुच सुडालेद, वक्काडे कोडकु यवाड आब्बान दोक्काला उंटाड, वाडे वान सुपीच्या.
पहिला शिष्यन फिल्चकाम — 1:19-51
योहान बाप्तिस्मा इच्चेतोनदी साक्ष
मत्तय 3:1-12; मार्क 1:1-8; लूक 3:1-20
19इंगा योहानदी साक्ष इदी उंडाद; यप्पुड यहुदी अधिकारील यरुशलेम शहरकेल याजक इंगा लेवी इरनी वान आडगेदेंक आंपीर की, “नु यवाड उंडाव?” 20योहान उत्तर इच्चेदेंक लेद आनालेद, तर वाड कबुल शेशी खरेम शप्या की “निन ख्रिस्त लेन,”. 21आप्पुड वार वान आडगीर, “तर मंग नु यवाड उंडाव? एलीया उंडाव येम?” वाड आन्या, “निन लेद.” “नु वाड संदेष्टा उंडाव येम?” वाड उत्तर इच्या, “निन लेन.” 22आप्पुड वार वान आनीर, “नु यवाड उंडाव? आंटे यवार मोमलान आंपीनार वारकी मिम उत्तर इच्याम. नीक नी बद्दल येम आनेद उंडाद?” 23वाड आन्या, “यशया संदेष्ट्याड शप्पीनेलेका
‘प्रभुनदी दावा सरळ शेयना,
इल्ला मरु भुमीला कीरलेतोनदी वाणी’ निन उंडान.”#यशया 40:3.
24इंगा आंपीने मंदीन परुशी मंदी आंपीनीर. 25वार योहाननी आडगीर, “जर नु ख्रिस्त लेव इंगा एलीया लेव इंगा आ संदेष्टाबी लेव, तर नु बाप्तिस्मा येनटीक शेस्ताव?” 26योहान वारकी उत्तर इच्या, “निन नेळाता बाप्तिस्मा शेस्तान, पण मीर यवान गुरतु फट्टार इल्ला वगाड मी नडमा नीला फडीनाड. 27वाड ना यंकाटेल वच्चेतोड उंडाड, वान बुटुद दाराम इडशे लायकीक पण निन लेन.” 28यार्देन वंका आतुक बेथानी नगरला यंदु योहान मंदीक बाप्तिस्मा इस्तुन्या आंदु इ माटलु घडाशा.
परमेश्वर कोकरु
29इंगोगो नाड येशुन मना तीकुड वच्चेताप्पुड सुशी योहान आन्या, “इड परमेश्वर कोकरु उंडाड, यवाड दुन्यामलोन आंता मंदी पापलु यतकेन फोयताड! 30यवान बद्दल निन शेपिंटीन की, 'ना यंकाटेल यवाड वस्तुनाड वाड ना काना पण शेंगेम फेद्दावोड उंडाड, येनटीक की वाड ना काना पहिला उंड्या, 'वाड इडे उंडाड. 31निन वान गुरतु फट्टा कुंदुन; तरी वाड इस्राएलला प्रकट कावाला आंका निन नेळाता बाप्तिस्मा शेस्का वच्चीनान.”
32योहान साक्ष इच्या की, “निन स्वता सुस्तीन पवित्र आत्मा कबुतर लेका मोडामलेल दिग्या इंगा वान मिंदा कुसन्या. 33निन तर वान गुरतु फट्टालेद, तरी निन नेळाता बाप्तिस्मा इयाला आंका यवाड नन्नु नेळाता बाप्तिस्मा इच्चेदेंक आंप्या वाड नाक शप्या की, ‘नु यवान मिंदा पवित्र आत्मा दिगेताप्पुड इंगा कुसनेताप्पुड सुशाव वाडे पवित्र आत्माता बाप्तिस्मा शेशेतोड उंडाड#1:33 वाडे पवित्र आत्माता बाप्तिस्मा शेशेतोड उंडाड यवारकी पवित्र आत्मा इच्चेदेंक वस्ताद वार मनलान परमेश्वर शुद्ध शेस्ताड .’ 34इंगा निन सुस्तीन इंगा साक्ष इस्तीन की, इड परमेश्वर कोडकु उंडाड.”
येशुन पहिला शिष्यल
35यंकसार इंगोगो नाड योहान वान इद्दार शिष्यल जताक इंगा आंदु नीला फडीन्या; 36योहान येशुन फोयेताप्पुड सुशा इंगा आन्या, “सुडना, परमेश्वर कोकरु!” 37वानदी इदी माटा आ इद्दार शिष्यल इनीर इंगा वार येशुन यंका यल्लीर. 38आप्पुड येशुड तिरगी वारनी मना यंका वच्चेताप्पुड सुशी आन्या, “मीर येम फुडकुतुनार?” वार वान आनीर, “रब्बी, (आंटे गुरुजी) नु यंदु निलस्ताव?” 39वाड वारनी आन्या, “दांडा इंगा सुडना.” मंग वार फोई वाड यंदु निलस्ताड आदी सुशीर इंगा वार आबद वान देगार निलचीर; आप्पुड तरी फद्दु मुनगेताप्पुड नालुंग वागीन्या. 40योहानी माटलु इनी वान यंका यवार इद्दार फोयनीर, वार दिंटल्या वगाड शिमोन पेत्र तम्मुड अंद्रियाड उंड्या. 41वाड पहिला वान तम्मुन शिमोननी भेटाशा इंगा वान आन्या, “माक मसीहा शिक्कीनाड.” (मसीहा आंटे ख्रिस्त) 42अंद्रियाड शिमोननी येशुन तीकुड यकोच्या; येशुड वान तीकुड सुशा इंगा आन्या, “नु योहान कोडकु शिमोन उंडाव. निन्नु कैफा (आंटे पेत्र इंगा खडक) आन्यार.”
फिलिप्पनी इंगा नथनेलनी फिल्चेद
43इंगोगो नाड येशुड गालील प्रांतकी फोयेद ठरायमत्या; इंगा आप्पुड फिलिप्प वान भेटाशा; येशुड वान आन्या, “ना यंका दा.” 44फिलिप्प बेथसैदाटोड उंड्या, आदी नगर यंदु अंद्रिया इंगा पेत्र निलदुर. 45फिलिप्प नथनेलनी भेटाशी वान आन्या, “यवान बद्दल मोशेड नियमशास्त्रला इंगा संदेष्ट्याल राशीनार, वाड माक शिक्कीनाड; वाड योसेफ कोडकु, येशु नासरेथकर उंडाड” 46नथनेल वान आन्या, “नासरेथलेल येमाना शिंगार यल्ली येम?” फिलिप्प वान आन्या, “वच्चीगास सुड.” 47येशुड नथनेलनी वान तीकुड वच्चेताप्पुड सुशी वान बद्दल आन्या, “सुडना, इड खरेमे इस्राएली उंडाड, वान लोना कपट लेद.” 48नथनेल वान आन्या, “नु नन्नु यल्ला गुरतु फटताव?” येशुड वानकी उत्तर इच्या, “निन्नु फिलिप्प फिलच्या दान काना पहिला यप्पुड नु अंजीर शट्टु किंदा उंटी आप्पुडे निन निन्नु सुस्तीन.” 49नथनेल उत्तर इच्या, “रब्बी, नु परमेश्वर कोडकु उंडाव. नु इस्राएल राजा उंडाव.” 50येशुड वान आन्या, “निन निन्नु अंजीर शट्टु किंदा सुस्तीन इल्ला निक शपतीन आंका नु विश्वास फेटताव येम? नु दिन काना फेद्दाय माटलु सुशाव.” 51इंगा वाड वान आन्या, “निन नीक खरे-खरेम शपतान, मीर मोडाम उघडाशीनेद इंगा स्वर्गदुतलान मनशी कोडकु मिंदा येक्केताप्पुड इंगा दिगेताप्पुड सुशार.”
Currently Selected:
JHN 1: WNT
Highlight
Share
Compare
Copy
Want to have your highlights saved across all your devices? Sign up or sign in
