LUK 24
24
प्रभु येशुनदी पुनरुत्थान
मत्तय 28:1-10; मार्क 16:1-8; योहान 20:1-10
1हफ्ताद पहिला दिनमुनाड#24:1 हफ्ताद पहिला दिनमुनाड आयतोर नाड यवार येशुन जताक गालील केल वच्चीनीर आ आंड्योर नस्कुलाने कबर देगार वच्चीर इंगा वार स्वता तैयार शेशीनेद सुगंधी मसालाल येकेन वच्चीर. 2वारकी राय कबर मिंदकेल दोब्बीनेद कमशा. 3वार लोनीक फोई सुशीर, पण वारकी प्रभु येशुनदी फिनग्या कमसा लेद. 4दिनिचांग वार विचारला फडी फोईर, आप्पुड अचानक लखलखीत चमकाशेय बट्टाल फेटकुनीनोर इद्दार मन्सुल वार बाजुक नीला फडीर. 5यप्पुड वार शेंगेम यरस्केन वारी मुतुल भुमी तीकुड किंदीक शेशीर, आप्पुड वार इद्दार मन्सुल आनीर, यवाड जित्ता उंडाड वान मीर सच्चीनोर दिंटल्या येनटीक फुडकुतुनार?#प्रकटीकरण 1:18; मार्क 16:5-6. 6वाड इंदु लेड; वाड लेशीनाड! वाड गालील प्रांतला उंड्या आप्पुड वाड मिक येम शप्पीन्या दानदी ध्यानाम शेयना. 7वाड आनीन्या की, “मनशी कोडकुन फट्टी पापी मंदी शेतल्या इच्चेदेंक वच्ची, वान क्रुस मिंदा खिळाशेदेंक वच्ची इंगा मुड नाळाक वाड वापस जित्ता आय्यी, दिनदी अगत्य उंडाद.” 8आप्पुड वारकी येशुन शब्दलाद ध्यानाम वच्या. 9वार कबर देगाटेल वापस वच्चीर इंगा वार आय आन्नी माटलु अकरा प्रेषितलाक इंगा आंदारकी शप्पीर. 10यवार प्रेषितलाक इ आन्नी माटलु शप्पीर, वार दिंटल्या मग्दालीया नगरदी मरीयाद, इंगा योहान्नाद इंगा याकोब आम्मा मरीयाद इंगा बाकी काही आंड्योर पण उंडीर. 11पण वार शप्पीने माटलु वारकी कथा लेका वाटाशा इंगा वार आंड्योर शप्पीने माटला मिंदा विश्वास फेट्टाक फोईर. 12आप्पुड पेत्र लेशा इंगा कबर तीकुड फाऱ्या फोया. वाड किंदीक वंगी सुशा पण वानकी फक्त बट्टाल कमशा. येम आयन्या दान बद्दल वाड आश्चर्य शेस्केन, वान इल्लुक यल्ली फोया.
अम्माऊस उर दावा मिंदा येशुनदी इद्दार शिष्यलाक दर्शन
मार्क 16:12-13
13आबदे वार दिंटल्योन्टोर इद्दार शिष्यल यरुशलेम शहरकेल अकरा किलोमीटर अंतर मिंदा उंडीने अम्माऊस फेर उंडीने उरुक फोदुर. 14वार वगामेगार जताक घडाशीने आन्नी माटला बद्दल माटलाडदुर. 15वार इद्दार शिष्यल माटलाडेताप्पुड इंगा चर्चा शेशेताप्पुड अचानक येशुड वच्या इंगा वार जताक नडशेदेंक आंट्या. 16पण वारी कंडलु इल्ला बंद शेशेदेंक वच्चीन्या की वार वान गुरतु फट्टाराद. 17येशुड वारनी आन्या, “नडशेताप्पुड मीर वगामेगारनी माटलाडतुनार आय माटलु याय उंडाय?” वार शेंगेम दुखी आय्यी नडस्का-नडस्का वार थांबाशीर. 18वार दिंटल्योन्टोड वगाड यवान फेर क्लोपा उंड्या, वाड वानकी उत्तर इच्या, “इ दिनमुलाला घडाशीनेय माटलु यरका लेनोड इल्ला यरुशलेम शहरला निलचेतोड नु वक्काडे उंडाव येम?” 19येशुड वारनी आन्या, “याय माटलु?” वार वान आनीर, “नासरेथकर येशुन बद्दली आन्नी माटलु. इडे वाड मनशी यवाड वान फनुलाता इंगा शब्दलाता परमेश्वर मुंदार इंगा मनशी मुंदार वगाड महान संदेष्टा आय्या. 20इंगा मिम चर्चा शेयदुम की, यल्ला मा महायाजकलु इंगा अधिकारील वानकी मरण दंड शिक्काला आंका वान फट्टी इच्चीर इंगा वार वान क्रुस मिंदा खिळाशीर. 21माक इल्ला आशा उंड्या की, वाडे इस्राएलनी मुक्त शेशी. इ आन्नी माटलु इडशी इंगा वगा माटा उंडाद; इदी घटना घडाशी इबद मुड नाळ आय्या. 22इंगा मा दिंटल्योन्टोर काही आंड्योर मोमलान आश्चर्य चकीत शेस्काडनार. इबद नस्कुलाने वार कबर तीकुड फोईर, 23पण वारकी वानदी फिनग्या कमसा लेद. आप्पुड वार वच्ची माक शप्पीर की, वारकी स्वर्गदुतलाद दर्शन आय्या इंगा स्वर्गदुतलु वारकी शप्पीर की, वाड जित्ता उंडाड. 24आप्पुड मा दिंटल्योन्टोर काही मंदी कबर तीकुड फोईर इंगा यल्ला आंड्योर शप्पीनीर, आल्ले वारकी कमशा, पण वार येशुन सुडालेद.” 25आप्पुड येशुड वारनी आन्या, “मीर यंता मुर्ख उंडार इंगा संदेष्ट्याल शप्पीने आन्नी माटला मिंदा विश्वास फेट्टेदेंक मीर यंता मंद उंडार. 26ख्रिस्त इचांग इ आन्नी माटलु सहन शेशेद इंगा वान गौरवलोंग फोयेद आवश्यक लेकुंड्या येम?” 27आप्पुड वाड मोशेननोट सुरु शेशी इंगा आंता संदेष्ट्याल नंताक शप्पी, पवित्र शास्त्रला वान बद्दल येम राशीनेद उंडाद आदी आंता वाड वारकी स्पष्ट शेशी शप्या.#योहान 1:45; लूक 24:44; अनुवाद 18:15. 28या उर तीकुड वार फोदुर, दान देगार वार वच्चीर इंगा येशुड इल्ला बहाना शेशा की, वानकी मुंदारकी फोयेद उंडाद. 29पण वार वान शेंगेम आग्रह शेशी आनीर की, “मा जताक निलु; येनटीक की फद्दु मुनगीनाद इंगा मोब्बु आयतुनाद.” आप्पुड वाड वार जताक निलचेदेंक लोनीक फोया. 30यप्पुड वाड वार जताक रोट्या तिनेदेंक कुसन्या, मंग वाड रोट्या तिस्कुन्या इंगा धन्यवाद इच्या, इंगा आदी इरगा मती वारकी इच्चेदेंक आंट्या. 31आप्पुड वारी कंडलु उघडाशा इंगा वार वान गुरतु फट्टीर. पण वाड वार मुंदाटेल गायब आय फोया. 32मंग वार वगामेगारनी आनेदेंक आंटीर, “वाड दावा मिंदा मना जताक माटलाडेताप्पुड इंगा पवित्र शास्त्रलोन वचनलाद अर्थ शप्पेताप्पुड मना अंतकरणला लोनुड लोना आग्गी आंटा लेकुंड्या येम?” 33आप्पुड वार लगेच लेशीर इंगा यरुशलेम शहरकी वापस फोईर. आप्पुड वारकी अकरा प्रेषितलु इंगा वार जताक उंडीनोर बाकी शिष्यल वगातळा जमा आयनोर कमशीर. 34वार आंदुर की, “खरेखरेम प्रभुड जित्ता आयनाड! इंगा शिमोनकी कमशीनाड.” 35यंकसार आ इद्दार शिष्यल पण दावाला येम घडाशा आदी वारकी शप्पीर इंगा वाड रोट्या इरगा मतेताप्पुड वार वान यल्ला गुरतु फट्टीर आदी पण शप्पीर.
येशुनदी शिष्यलाक दर्शन
योहान 20:19-23; प्रेषित 1:3-5; १करिंथ 15:5
36वार इ माटलु शप्पेताप्पुड, येशुड वार नडमा नीला फड्या इंगा वारनी आन्या, “मिक शांती उंडाला.” 37वार दचकाशीर इंगा यरस्कुनीर. वारकी इल्ला वाटाशा की, वार दैयाम सुस्तुनार. 38पण येशुड वारनी आन्या, “मीर येनटीक यरस्कुंटुनार? मी मनला शक येनटीक शेस्तुनार? 39नाय शेईल इंगा काळ सुडना, निन कमस्तुनान वाडे उंडान. नन्नु फट्टी सुडना, येनटीक की नाक उंडाद इल्ला यमका कंडा दैयामकी लेकुंटाद.” 40इल्ला माटलाडी वाड वारकी वानी शेतुलकाळ सुप्या. 41यप्पुड आनंद इचांग वारकी विश्वास फेटांदे आश्चर्य चकीत आय्यीर आप्पुड येशुड वारनी आन्या, “इंदु मी देगार तिनेदेंक येम उंडाद?” 42वार वानकी येपीने मिनुद तुकडा इच्चीर. 43वाड आदी तिस्कुन्या इंगा वार मुंदार तिन्या.
44वाड वारनी आन्या, “इये आय माटलु याय निन मी जताक उंडीनाप्पुड शप्पीन्टीन की, मोशेनदी नियमशास्त्रला, संदेष्ट्याल पुस्तकलाला इंगा स्तोत्रसंहिताला ना बद्दल येम राशीनेद उंडाद, आदी आंता पुर्ण कावाने बेक.” 45आप्पुड वाड वारकी पवित्र शास्त्र तेल्वाबेक आंका वारी मनलु उघडाशा. 46मंग वाड वारनी आन्या, “पवित्र शास्त्रला इल्ला राशीनेद उंडाद की, ख्रिस्तड दुख भोगाशी इंगा मुड नाळाक सच्चीनोर लोन्केल लेशी, #यशया 53:5; लूक 24:7. 47इंगा यरुशलेम शहरकेल सुरु शेशी आन्नी राष्ट्रलाक वान फेरता पश्चात्ताप इंगा पापलाद क्षमा घोषित शेशेदेंक वच्ची. 48मीर इ माटलाक साक्षी उंडार. 49सुडना, ना आब्बाड इच्चीनेद देणगी निन मी तीकुड आंपतान; मीर स्वर्गीय सामर्थ्यता निंडी नंताक यरुशलेम शहरलाने निलना.”
येशुड स्वर्गलोंग फोयताड
मार्क 16:19-20; प्रेषित 1:9
50मंग वाड शिष्यलान बेथानी नगर नंताक बैटीक येकेन फोया इंगा वानी शेईल फैनिक शेशी वारकी आशिर्वाद इच्या. 51इंगा वाड वारकी आशिर्वाद इच्चेताप्पुड वार देगाटेल धुरा धुराम आयका फोई स्वर्गलोंग तिस्कुनेदेंक वच्या.#प्रेषित 1:9; स्तोत्रसंहिता 47:5. 52मंग शिष्यल वानकी नमन शेशीर इंगा वार फेद्दा आनंदता यरुशलेम शहरकी वापस फोईर. 53इंगा वार लगातार परमेश्वर भवनलोंग फोई परमेश्वरदी स्तुती शेयदुर.
Currently Selected:
LUK 24: WNT
Highlight
Share
Compare
Copy
Want to have your highlights saved across all your devices? Sign up or sign in
