LUK 23
23
रोमी सुभेदार पिलात इर मुंदार येशु
मत्तय 27:1-2; मार्क 15:1-5; योहान 18:28-38
1मंग वारदी आंता समुदाय लेशा इंगा वार येशुन पिलात तीकुड येकेन फोईर. 2वार वान मिंदा आरोप आंचेदेंक आंटीर. वार आनीर, “मिम इ मनशीन मंदीन बहकाय मतेताप्पुड फटतीम. इड कैसरकी कर इच्चेदेंक विरोध शेस्ताड इंगा आंटाड की, इड स्वता ख्रिस्त राजा उंडाड.” 3मंग पिलात येशुन आडग्या, नु यहुदी मंदी राजा उंडाव येम? येशुड आन्या “नु आंटाम आल्ले.” 4मंग पिलात मुख्य याजकलान इंगा मंदीन आन्या, नाक इ मनशी लोना येमीच दोष कमसाद. 5पण वार जोर इच्ची आनेदेंक आंटीर, “इड यहुदीया प्रांतलेल सुरुवात शेशी इड नंताक वान नेरपुकामता मंदीन भडकाय मतनाड.”
हेरोद मुंदार येशुड
6पिलात इदी इन्या, आप्पुड वाड आडग्या की, “इड मनशी गालील प्रांत लोन्टोड उंडाड येम?” 7यप्पुड वानकी तेलच्या की येशुड हेरोद अधिकार किंदा वस्ताड, आप्पुड वाड वान हेरोद तीकुड आंप्या. वाड आ दिनमुलाला यरुशलेम शहरालाने निलदु. 8हेरोद येशुन सुशा आप्पुड वानकी शेंगेम आनंद आय्या, येनटीक की वाड वान बद्दल इनीन्या इंगा वानकी इल्ला वाटास्तुन्या की, वाड वगाटाना चमत्कार शेशी इंगा मनाक आदी सुशेदेंक शिक्की, इल्ला वानकी आशा उंड्या. 9वाड येशु शेंगेम प्रश्नल आडग्या, पण येशुड वानकी उत्तर इयाक फो. 10मुख्य याजक मंदी इंगा नियमशास्त्र शिक्षकलु आंदु नीला फडीगास वान विरोधला जोरदार आरोपलु आंचतुनीर. 11हेरोद वान सिपाहीला जताक येशुन जताक अपमानस्पद वागाशा, वानदी मजाक यगरा मतीर. वार वानकी वगाट तलमदी झगा फेट्टीर इंगा वान पिलात तीकुड वापस आंपीर. 12आबदे हेरोद इंगा पिलात इर वगामेगार मित्रल आय्यीर, दान काना मुंची वार वगामेगार शत्रुल उंडीर,.
पिलात, बरब्बाड इंगा येशुड
मत्तय 27:1-2; 27:11-14; मार्क 15:1-5; योहान 18:28-38
13पिलात महायाजक मंदीन, अधिकारीलान इंगा मंदीन वगातळा फिलच्या. 14“इ मनशी मंदीन बहकाय मतताड आंका इन मीर ना तीकुड यकोस्तीर; पण सुडना, या माटला बद्दल मीर इन मिंदा दोष आंचतुनार, आ माटला बद्दल निन मी मुंदार इनदी शेशीनेंका नाक इ मनशी लोना यादुच दोष शिक्काक फो. 15इंगा हेरोदकी पण यादुच दोष शिक्काक फो, येनटीक की वाड वान वापस ना तिकुड आंपीनाड. मीर पण सुशी शकास्तार की, मतेशेद शिक्षा इच्चे योग्य इल्ला इड येमीच शेयालेद. 16दिनिचांग निन इनकी देब्बाल मत्ती इडस्काडतान.” 17येनटीक की वानकी आ फंडगाला वगा कैदीन इडवा बेक आयदु.
18पण वार आंदार कीरलेदेंक आंटीर, “इ मनशीन मतेस्काड! इंगा मा इचांग बरब्बान इडु!” 19बरब्बाड यरुशलेम शहरला विद्रोह शेशीन्या इंगा वाड शेंगेम मंदीन मतेशीन्या आंका वान जेलला येशीनेद उंड्या 20मंग पिलात येशुन इडशेद इच्छा फेट्टी वापस वारकी समजायमत्या. 21पण वार कीरलुका निलचीर, “वान क्रुस खिळायना, वान क्रुस मिंदा खिळायना!” 22पिलात तिसरातुक वारनी आन्या, “येनटीक? इ मनशी इल्ला याद अपराध शेशीनाड? मतेशेद शिक्षा इच्चे योग्य इल्ला नाक इन विरुद्ध येमीच शिक्कालेद. दिनिचांग निन इनकी देब्बाल मती इडस्काडतान.” 23पण इन क्रुस मिंदाने खिळायना, आंका वार बेग्गे कीरलुका वान यंका बेनांटीनीर इंगा वार किरलुकामकी यश शिक्या. 24आप्पुड पिलात वार आडगीन लेका कावाला इल्ला ठरायमत्या. 25या मनशी विद्रोह इंगा खुनला इचांग जेलला उंड्या इंगा यवारदी वार मागणी शेशीनीर वान वाड इडस्काड्या. पिलात वार इच्छा लेका शेशेदेंक येशुन वार शेतल्या इच्या.#मत्तय 27:32-44; मार्क 15:21-32; योहान 19:17-27.
येशुन क्रुस मिंदा खिळास्तार
मत्तय 27:32-44; मार्क 15:21-32; योहान 19:17-24
26शिपाईल येशुन येका फोयेताप्पुड, कुरेनेकर शिमोन फेरोड वगा मनशी वान शेल्लोन्केल वस्तुन्या वार वान फट्टीर इंगा वाड येशुन यंका क्रुस यतकेन नडवाला आंका आदी वान मिंदा फेट्टीर. 27मंदीद इंगा आंड्योरदी फेद्दाद समुदाय वान यंका नडदुर इंगा आंड्योर वान इचांग यदाल कोटकेन शेंगेम येडस्तुनीर. 28येशुड वार तीकुड तिरगीगास आन्या, “यरुशलेमलोन आनबिळ्ळालाला, ना इचांग येडवाकुंडा, तर मी इचांग इंगा मी बिळ्ळा इचांग येडना. 29येनटीक की इल्ला दिनमुल वच्चेय उंडाय, यप्पुड मंदी आन्यार, धन्य उंडार आ आंड्योर यवार गोड्डु उंडार इंगा धन्य आदी गर्भाशय, याद जन्म इयालेद इंगा धन्य आय सनलु, याय यबदुच तापालेद. 30आप्पुड ‘वार पर्वतलान आन्यार, मा मिंदा फडना इंगा वार कोंडालनी आन्यार. मोमलान मुस्कोंडा’ 31येनटीक जर वार फच्ची शट्टु जताक इल्ला शेस्तार तर यंडीने शट्टु जताक येम शेशार?”
32इंगा इंगोगोर इद्दार मंदी अपराधी उंडीर, वारनी पण वार वान जताक मतेशेदेंक यकेन फोईर. 33मंग वार “कवटी” आनीने जागा मिंदीक वच्चीर, आंदु वार येशुन इंगा आ अपराधीलान, वगान वान मंची शेय तीकुड इंगा वगान रोड्डा शेय तिकुड इल्ला क्रुस मिंदा खिळाशीर. 34आप्पुड येशुड आन्या, “हे यब्बा, वारनी क्षमा शेय, येनटीक की वार येम शेस्तुनार इदी वारकी तेल्वाद.” मंग वार वानी बट्टाल फंचकुनेदेंक चिट्ट्याल येशीर#१पेत्र 3:9; यशया 53:12; स्तोत्रसंहिता 22:18.. 35मंदी सुस्केन नीला फडीनीर इंगा अधिकारील वानदी मजाक यगरा मतकेन आनीर, वाड इंगोगोरनी बतका मत्या, जर वाड ख्रिस्त, परमेश्वर निवडाशीनोड उंटे तर वाड स्वतान बतका मताला!#स्तोत्रसंहिता 22:7. 36शिपाईल पण वानदी मजाक यगरा मतीर इंगा वार वानकी विनेगर इच्चीर.#स्तोत्रसंहिता 69:21. 37इंगा वार आनीर, “जर नु यहुद्योर राजा उंडाव तर स्वतान बतका मत!”
38वान नत्ती फैना क्रुस मिंदा इल्ला राशीनेद पाटी उंड्या “इड यहुदी मंदी राजा उंडाड.”
39आंदु खिळाशीने वगा अपराधी येशुनदी निंदा शेशा. वाड आन्या, नु ख्रिस्त उंडाव गरा? तर मंग स्वतान इंगा मोमलान पण बतका मत! 40पण इंगोगो अपराधी वान बेद्रीच्या इंगा आन्या, “नीक परमेश्वरदी यरपु लेद येम? निक पण आद्दे शिक्षा शिक्कीनाद. 41मना इचांग इद्दे बरोबर उंडाद, येनटीक की मनाम येम शेस्तीम दानदी योग्य फळ मनाक शिक्कीनाद. पण इ मनशी येमीच अपराध शेयालेद.” 42मंग वाड येशुन आन्या, “हे येशु, नु नी राज्यलोंग वच्याव आप्पुड नाद ध्यानाम फेट.” 43येशुड वान आन्या, “निन निक खरेम शपतान, इबद नु ना जताक स्वर्गलोकला #23:43 स्वर्गलोकला सुखलोकला उंड्याव.”
येशुनदी सचकाम
मत्तय 27:45-56; मार्क 15:33-41; योहान 19:25-30
44आ वेळला देगा देगार मद्यानी बारा वागीनेय उंड्या इंगा मुड वागीन नंताक आंता देशामला अंधकार पसराशा. 45सुर्यद यलगु निलवाक फो इंगा परमेश्वर भवन लोनदी पडदा नडमीकेल शिंग्या इंगा दानी रोंड भागलु आय्या.#आमोस 8:9; इब्री 10:19. 46येशुड बेग्गे कीरल्या, “हे यब्बा, निन नाद आत्मा नी शेतल्या सोपास्तान.” इल्ला माटलाडी वाड जेम इडस्काड्या. 47आप्पुड रोमी शताधीपती घडाशीनेद आंता सुशी परमेश्वरदी गौरव शेशा इंगा आन्या, “खरेखरेम इड नितीमान मनशी उंड्या.” 48इदी सुशेदेंक जमा आयने मंदी यप्पुड घडाशीनेय माटलु सुशीर, आप्पुड वार यदाल कोटकेन वापस फोईर. 49पण येशुन गुरतु फट्टेतोर आंदार इंगा या आंड्योर गालील प्रांतलेल वान यंका वच्चीनीर, वार धुराम नीला फडी इदी आंता सुदुर.
येशुनदी कबरला फेट्टेद
मत्तय 27:57-61; मार्क 15:42-47; योहान 19:38-42
50आंदु योसेफ फेरोड वगा मनशी उंड्या. वाड यहुदी सभास्तानलोन सभासद इंगा शिंगार इंगा नितीमान मनशी उंड्या. 51वाड बाकीचे धार्मिक पुढारीला निर्णयकी इंगा वार फनीक सहमती इया लेकुंड्या. वाड यहुदीया प्रांतलोन अरिमथाई नगर लोन्टोड उंड्या इंगा परमेश्वर राज्यद दावा सुस्तुन्या. 52इ मनशी पिलात तीकुड फोया इंगा वाड येशुनदी फिनग्या आडग्या. 53आदी वार क्रुस मिंदकेल किंदीक तिशीर इंगा ताग बट्टाला गुंडाळीचीर. मंग वार वान फिनग्यान खडकुला तव्वीने कबरला फेट्टीर. इदी कबर इल्ला उंड्या की, दान लोना इंगाना पण यवारनीच फेट्टीनेद लेकुंड्या. 54आदी तैयारीद दिनमु उंड्या इंगा शब्बाथ सुरु आय्येद उंड्या. 55गालील प्रांतलेल येशुन जताक वच्चीने आंड्योर योसेफ यंका फोईर. वार आदी कबर इंगा दांटल्या आदी फय यल्ला फेट्टीर इदी सुशीर. 56इंगा वार इल्लुक फोईर इंगा वार सुगंधीत मसालाल इंगा लेप तैयार शेशीर. शब्बाथ दिनमु वार आज्ञा लेका आराम शेशीर.#निर्गम 20:10; अनुवाद 5:14.
Currently Selected:
LUK 23: WNT
Highlight
Share
Compare
Copy
Want to have your highlights saved across all your devices? Sign up or sign in
