LUK 22
22
यहूदाड शेशीनेद विश्वासघात
मत्तय 26:1-5; मार्क 14:1-2,10-11; योहान 11:45-53
1बेखमीर रोट्याद फंडगा यादान वल्हांडन आंटार, आदी देगार वच्चीन्या. 2मुख्य याजक मंदी इंगा नियमशास्त्र शिक्षकलु, येशुन यल्ला मतेयाला दिन बद्दल चर्चा शेस्तुनीर; येनटीक की वारकी मंदीद यरपु आयदु.
3आप्पुड बारा प्रेषितला लोन्केल वगाड यहूदाड यवान इस्कर्योत आंदुर, वान लोना शैतान दुऱ्या. 4यहूदाड मुख्य याजकलु इंगा परमेश्वर भवनलोन अधिकारीला तीकुड फो इंगा वार शेतल्या येशुन यल्ला फट्टी इयाला आंका दिन बद्दल माटलाड्या. 5आप्पुड वारकी शेंगेम आनंद आय्या इंगा वार वानकी दुडलु इच्चेद वचन इच्चीर. 6दिनिचांग वाड हुं अन्य इंगा येशुन गर्दी लेकुंडी आप्पुड वार शेतल्या फट्टी इच्चेद संधी सुशेदेंक आंट्या.
वल्हांडनदी तैयारी
मत्तय 26:17-19; मार्क 14:12-16
7आप्पुड बेखमीर रोट्याद फंडगा वच्या, यंदाटला वल्हांडन कोकरुद बली इच्चेद आवश्यक उंड्या.#निर्गम 12:3; 6; 8; 18. 8आप्पुड येशुड पेत्रक इंगा योहानकी शप्पी आंप्या की, “फोंडा मना इचांग तिनेदेंक वल्हांडन फंडगाद तैयारी शेयना.” 9पेत्र इंगा योहान येशुन आन्या, “मिम दानदी तैयारी यंदु शेयाला इल्ला नीद इच्छा उंडाद?” 10वाड वारनी आन्या, “सुडना, मीर नगरलोंग प्रवेश शेशीनेंका मिक नेळाद कुंडा येकेन फोयेतोड वगा मनशी भेटाशी. वाड या इंटल्योंग फोई आंदुक वान यंका फोंडा. 11इंगा आ इल्लु मालकुन आनना, ‘गुरुजी निन्नु आंटाड, नाक ना शिष्यला जताक वल्हांडन फंडगाद वंटा तिना वच्ची इल्ला सुट्टालदी खोली यंदु उंडाद?’ 12मंग आ मनशी मिक माडी मिंदुडदी सजाय मतनेद खोली सुपीच्ची आंदु तैयारी शेयना.” 13आप्पुड पेत्र इंगा योहान आंदुकेल यल्लीर. यल्ला येशुड शप्पीन्या आल्ले वारकी शिक्या; इंगा वार वल्हांडनदी तैयारी शेशीर.
प्रभुनदी आखरीद तिनकाम
मत्तय 26:20-30; मार्क 14:17-26; योहान 13:21-30
14यप्पुड वेळ आय्या आप्पुड येशुड वान प्रेषितला जताक तिनेदेंक कुसन्या. 15वाड वारनी आन्या, “निन दुख भोगाया काना मुंची मी जताक वल्हांडन फंडगाद वंटा तिनाला इल्ला नाद शेंगेम इच्छा उंड्या. 16येनटीक की निन मिक शपतान की, परमेश्वर राज्यला इदी परिपुर्ण आय्यी नंताक निन यप्पुडुच तिनाक फोयान.” 17मंग येशुड प्याला तिस्केन इंगा धन्यवाद इच्या इंगा प्रेषितलान आन्या, “इदी तिस्कोंडा इंगा वगामेगार फंचकोंडा. 18येनटीक की निन मिक शपतान की, परमेश्वरदी राज्य वच्ची नंताक निन अंगुरदी रस तागाक फोयान.” 19मंग वाड रोट्या तिस्केन इंगा धन्यवाद इच्ची आदी इरगा मत्या इंगा वारकी इच्चीगास आन्या, “इदी नाद फय उंडाद आदी मी इचांग इच्चेदेंक वस्तुनाद. ना ध्यानाम इचांग इदी शेयना.” #निर्गम 24:8; १करिंथ 11:25; मत्तय 26:28. 20इल्ले वाड तिनेद रोट्या आयनेंका प्याला तिस्केन आन्या, “इदी प्याला ना रक्तामला कोत्ता करार उंडाद, याद मी इचांग सल्लेदेंक वस्तुनाद. 21पण सुडना! नाद विश्वासघात शेशेतोनदी शेय ना जताक मेज मिंदा उंडाद. #स्तोत्रसंहिता 41:9. 22मनशी कोडकु परमेश्वर ठरायमतीने लेका सच्ची तर खरेम; पण यवान शेयता वाड फट्टी इच्चेदेंक आ मनशीद यंता दुर्दशा आय्यी.” 23आप्पुड वार वगामेगारनी आडगेदेंक आंटीर, “मना दिंटल्योन्टोड यवाड उंडाड, यवाड इदी फनी शेशी?”
यवान फेद्दावोड समजाशार
24प्रेषितलाला इदी पण वादविवाद आय्या की, वार दिंटल्या आंदार काना फेद्दावोड यवाड उंडाड. 25आप्पुड येशुड वारनी आन्या, “यहुदी लेनोर राजाल वार मिंदा प्रभुत्व शेस्तार इंगा यवार वार मिंदा अधिकार गाजाय मततार वार स्वतान परोपकारी समजास्तार. 26पण मीर वार लेका लेवाराद. तर मी दिंटल्योन्केल यवाड फेद्दावोड उंडाड, वाड शिन्नावोन लेका इंगा यवाड अधिकारी उंडाड वाड सेवा शेशेतोन लेका कावाला. 27फेद्दावोड? यवाड मेज मिंदा तिनेदेंक कुसनीनाड वाड का सेवा शेशेतोड? मेज मिंदा कुसनेतोड काड येम? पण निन तर मी नडमा सेवा शेशेतोन लेका उंडान. 28पण ना परीक्षाला ना यंका नीला फडेतोर मिरे उंडार. 29यल्ला ना आब्बाड ना इचांग वगा राज्य नेमाशी इच्चीनाड आल्ला निन पण मी इचांग नेमास्तान. 30दिनिचांग की मीर ना राज्यला ना मेज मिंदा तिनाला इंगा तागाला, इंगा सिंहासन मिंदा कुसनी इस्राएल बारा वंशलाद न्याय शेयाला.”
पेत्र नाकारीच्ची इदी येशुड पहिलाने शप्पी फेटताड
मत्तय 26:31-35; मार्क 14:27-31; योहान 13:36-38
31मंग येशुड शिमोन पेत्रन आन्या, “शिमोन, शिमोन, सुड! मिमलान गोदमाल लेका चाळायाला आंका शैतान मिमलान आडगीनाड. 32पण शिमोन, नीद विश्वास कमी कावाराद आंका निन नी इचांग प्रार्थना शेशीनान; जर नु वापस ना तीकुड तिरगुती आंटे नी तम्मुळ्ळान मजबुत शेय.” 33पण शिमोन पेत्र वान आन्या, “प्रभु, निन नी जताक जेललोंग फोयेदेंक इंगा सच्चेदेंक तैयार उंडान.” 34पण येशुड आन्या, “पेत्रा, निन निक शपतान, नु नन्नु गुरतु फट्टान आंका मुड तुकुल नाकारीच्ची नंताक इबद फुंजु आरवाक फोई.”
35येशुड शिष्यलान आन्या, “यप्पुड निन मिमलान थैली, तित्ती इंगा शप्पुल लेन्दे आंपीन्टीन, आप्पुड मिक येमाना कडमा फडीन्या येम?” वार आनीर, “येमीच लेद.” 36वाड वारनी आन्या, “पण इप्पुड, यवान देगार थैली उंडाद वाड आदी तिस्कुनाला; आल्ले तित्ती पण तिस्कुनाला इंगा यवान देगार तलवार लेद वाड वानी आन्नी बट्टाल आम्माला इंगा आदी कोन्केन तिस्कुनाला. 37निन मिक शपतान, 'वानदी गणना पापी मंदी जताक शेशेदेंक वच्या,' इल्ला जे पवित्र शास्त्रला राशीनेद उंडाद, आदी ना लोना पुर्ण कावाबेक; येनटीक की ना बद्दली माटलु पुर्ण आयतुनाय.” #गलती 3:13; २करिंथ 5:21; यशया 53:12. 38वार आनीर, “प्रभु, सुड, इंदु रोंड तलवारलु उंडाय.” वाड वारनी आन्या, “शेंगेम उंडाय!”
गेथशेमाने बागला येशुड
मत्तय 26:31-35; मार्क 14:27-31; योहान 13:36-38
39मंग वाड आंदुकेल यल्ली वान रितीलेका जैतुन कोंडा मिंदीक फोया इंगा वान शिष्यल पण वान यंका-यंका फोईर. 40आप्पुड आ जागा मिंदीक वच्ची नेंका वाड वारनी आन्या, “मीर परीक्षाला फडाराद आंका प्रार्थना शेयना.” 41वाड वार देगाटेल वगा राय फेकेशे इंता धुराम फोया; इंगा वाड मोकाळ टेकाशी इल्ला प्रार्थना शेशा, 42“हे यब्बा, जर नीद इच्छा उंटे तर इदी प्याला ना तीकेल धुराम शेय. तरी ना इच्छा लेका लेद, पण नी इच्छा लेका कानी.” 43आप्पुड स्वर्गलेल वगा स्वर्गदुत वच्ची वानकी शक्ती इच्चेताप्पुड वाड सुशा. 44मंग शेंगेम व्याकुळ आय्यी येशुड कळकळीता प्रार्थना शेशा, आप्पुड रक्तामी फेद्दा फेद्दाय ठेंबलु फडाला इल्ला वानदी घम्माम भुमी मिंदा फडतुन्या. 45प्रार्थना शेशी लेशीनेंका वाड शिष्यला तीकुड वच्या, आप्पुड वार उदास आयने इचांग फंडकुनीनोर वानकी कमशीर. 46वाड वारनी आन्या, “मीर येनटीक फंडकुंडार? लेयना इंगा परीक्षाला फडाराद आंका प्रार्थना शेयना.”
येशुन फट्टेद
मत्तय 26:47-56; मार्क 14:43-52; योहान 18:1-11
47वाड माटलाडतुन्या आप्पुड मंदी जमाव वच्या इंगा बारा शिष्यला लोन्केल यहूदा इस्कर्योत आनीनोड वगाड वार मुंदार नडस्तुन्या. येशुनदी मुत्ता तिस्कुना वाड वान देगार वच्या. 48येशुड वान आन्या, “यहूदा, मुत्ता तिस्केन मनशी कोडकुद विश्वासघात शेस्ताव येम?” 49वान जताक यवार उंडीर वार इप्पुड येम आय्यी इदी गुरतु फट्टी येशुन आनीर, “प्रभु, मिम तलवार नडपिद्दुम येम?” 50इंगा वार दिंटल्योन्टोड वगाड महायाजक सेवक मिंदा तलवारता वार शेशा इंगा वान मंची शेय तीकुडदी गुम्मा कोसकाड्या. 51येशुड उत्तर इच्या, “बस, शेंगेम आय्या.” इंगा वाड वान गुम्मान मुट्ट्या इंगा वान बागा शेशा. 52मंग येशुड महायाजक मंदी, परमेश्वर भवनलोन अधिकारील इंगा आब्बागार यवान वान फट्टेदेंक वच्चीनीर, वारनी आन्या, “मीर नन्नु डाकु समजाशी तलवारलु इंगा कटलु येकेन वच्चीनार येम? 53निन धीन्नाम मी जताक परमेश्वर भवनला निलदुन, आप्पुड मीर ना मिंदा शेय येयालेद लेद. पण इदी मिद वेळ उंडाद इंगा अंधकारदी सत्ता उंडाद.”
पेत्रड येशुन नाकारीस्ताड
मत्तय 26:69-75; मार्क 14:66-72; योहान 18:13-18
54मंग वार येशुन फट्टीर इंगा वान महायाजक इल्लुक येकेन फोईर. पेत्र रव्वा धुराम केल वार यंका-यंका नडदु. 55सैनिकलु आंगळाम नडमा आग्गी वट्टी दान बाजुक कुसनीनीर, वार नडमा पेत्र पण फोई कुसन्या. 56आप्पुड वगा दासीद वान आग्गी यलगुला कुसनीनेद सुशी इंगा वान तीकुड टक सुशी आन्या, “इ मनशी पण वान जताक उंड्या.” 57पेत्रड नाकारीच्ची आन्या, “बाई निन वान गुरतु फट्टान.” 58काही वेळ आयनेंका इंगा वगा मनशी वान सुशा इंगा आन्या, “नु पण वार दिंटल्योन्टोड वगाड उंडाव!” पेत्र आन्या, “लेद आण्णा, निन लेन!” 59मंग वगा घंटा आयनेंका इंगा वगाड जोर इच्ची आन्या, “खरेमे इ मनशी पण वान जताक उंड्या, येनटीक की इड गालीली उंडाड.” 60पण पेत्र आन्या, “आण्णा, नु येम माटलाडतुनाव इदी नाक तेल्वाक वच्चीनाद!” वाड माटलाडेताप्पुडे फुंजु आरशा. 61आप्पुड प्रभुड तिरगी पेत्रन तीकुड सुशा, इंगा पेत्रक प्रभुड शप्पीने माटलाद ध्यानाम वच्या, “इबद फुंजु आरवाकाना मुंची नु नन्नु मुड तुकुल नाकारीच्याव.” 62इंगा वाड बैटीक यल्ली शेंगेम येडशा.
63यवार येशुन फट्टी फेटनीर वार वानदी मजाक यगरा मती वान मतेदेंक आंटीर. 64वार वानी कंडलु मुशीर इंगा वान आडगीर, “गुरतु फट! निन्नु यवार मत्तीर?” 65इंगा शेंगेम प्रकारी वाईट शब्दल माटलाडी वार वानदी निंदा शेशीर.
महायाजक मुंदार येशुड
मत्तय 26:57-68; मार्क 14:61-64; योहान 18:12-14; योहान 18:13-24
66फद्दु फुट्टीनेंका आब्बागार इंगा वार दिंटल्या महायाजकलु इंगा नियमशास्त्र शिक्षकलु वगातळा जमा आय्यीर; इंगा वार वान न्याय सभालोंग येकेन फोई आडगीर. 67“जर नु ख्रिस्त उंडाव, तर माक शपकाड!” येशुड वारनी आन्या, “निन मिक शपते तर मीर अजिबात ना मिंदा विश्वास फेट्टाक फोयार. 68इंगा जर निन मिमलान प्रश्न आडगुतीन तरी मीर नाक उत्तर इयाक फोयार. 69पण इप्पुडनोर मनशी कोडकु सर्वसमर्थ परमेश्वर मंची शेय तीकुड कुसनी उंडी.” #मार्क 14:62; स्तोत्रसंहिता 110:1. 70आप्पुड वार आंदार आनीर, तर नु परमेश्वर कोडकु उंडाव येम? वाड वारकी उत्तर इच्या, “मीर स्वताने आंटार, येनटीक की निन उंडान.” 71आप्पुड वार आनीर, “मनाक साक्षीलाद इंगा येम गरज उंडाद? मनाम स्वता वान नोरताने इंटीम.”
Currently Selected:
LUK 22: WNT
Highlight
Share
Compare
Copy
Want to have your highlights saved across all your devices? Sign up or sign in
