JHN 10
10
मेंढपाळ इंगा मेंढऱ्यालदी दाखला
1येशुड आन्या “निन मिक खरे-खरेम शपतान, यवाड मेंढऱ्याल कोट्टामलोंग कवाड लोन्केल फोवांदे इंगोगो तीकेल यक्की फोयताड, वाड दोंगा लेकाते लुटारू उंडाड. 2यवाड कवाड लोन्केल लोनीक फोयताड वाड मेंढपाळ उंडाड. 3वान इचांग द्वारपाल कवाड तेरस्ताड इंगा मेंढऱ्याल वानदी माटा इंटाय. वाड वान मेंढऱ्यालनी आटला फेरता फिलस्ताड इंगा आटलान बैटीक येकेन फोयताड; 4इंगा वानी आन्नी मेंढऱ्याल बैटीक तिशीनेंका वाड आटला मुंदार नडस्ताड इंगा मेंढऱ्याल वान यंका नडस्ताय; येनटीक की आय वानदी आवाज गुरतु फटताय. 5पण आय इंगोगोर यंका यप्पुडुच फोव, तर आय वान देगाटेल धुराम फारी; येनटीक की आय इंगोगोरदी आवाज गुरतु फट्टाव.” 6येशुड वारकी इदी दाखला शप्या. तरी याय माटलु वाड वार जताक माटलाड्या आय येम उंडाय इदी वारकी तेल्वाक फो.
7दिनिचांग येशुड वारनी वापस आन्या, “निन मिक खरे-खरेम शपतान की, निन मेंढऱ्यालदी कवाड उंडान. 8यवार ना काना पहिला वच्चीर वार आंदार दोंगाल इंगा लुटारूल उंडार, वानदी मेंढऱ्याल इना लेद.
9 निन कवाड उंडान; यवाड ना तीकेल लोनीक फोयताड वानदी तारण आय्यी; वाड लोनीक वच्ची इंगा बैटीक फोई इंगा वानकी तिनेदेंक शिक्की. 10दोंगा तर, फक्त दोंगा, घात इंगा नाश शेशेदेंक वस्ताड. निन तर वारकी जीवन शिक्काला इंगा सार्वकालिक शिक्काला आंका वच्चीनान. 11निन शिंगार मेंढपाळ उंडान; शिंगार मेंढपाळ वान मेंढऱ्याल इचांग जेम इस्ताड. 12यवाड मेंढपाळ लेड तर कुल्योड उंडाड इंगा यवारी स्वताय मेंढऱ्याल लेव, वाड लांडगान वच्चेताप्पुड सुशी मेंढऱ्यालनी इडशी फारी फोयताड; इंगा लांडगा आटलान फटताद इंगा आटलाद दानादान शेस्ताद. 13कुल्योड फारी फोयताड येनटीक की वाड कुल्योड उंडाड इंगा वानकी मेंढऱ्यालदी काळजी लेद. 14-15निन उत्तम मेंढपाळ उंडान; इंगा यल्ला आब्बाड नन्नु गुरतु फटताड इंगा निन आब्बान गुरतु फटतान आल्ले ना मेंढऱ्यालनी निन गुरतु फटतान; इंगा निन ना मेंढऱ्याल इचांग नाद जेम इस्तान. 16इ कोट्टामलोनी लेव इल्लोनी नाय इंगोगोय मेंढऱ्याल उंडाय; आटलान पण नाक येकेन दावाबेक इंगा आय नाद आवाज इनी. मंग वगा कळप इंगा वगा मेंढपाळ इल्ला आय्यी. 17आब्बाड ना मिंदा दिनिचांग प्रेम शेस्ताड, की निन नाद जेम इस्तान, दिनिचांग की दान वापस तिस्कुनाला. 18यवाड आदी ना तीकेल तिस्कुनाड. तर निन स्वताहुन इस्तान. नाक आदी इच्चेद अधिकार उंडाद इंगा नाक आदी वापस तिस्कुनेद पण अधिकार उंडाद. इदी आज्ञा नाक ना आब्बान तीकेल शिक्कीनेद उंडाद.”
19दिनिचांग इ माटा मिंदकेल यहुदी मंदीन अधिकारीला नडमा वापस फुट फड्या. 20वार दिंटल्योन्टोर शेंगेम मंदी आनीर, “वानकी दैयाम फट्टीनाद इंगा वाड पागल उंडाड. मीर वानदी येनटीक इंटार?” 21इंगोगोर आनीर, “इ वचनलु दैयाम फट्टीने मनशी लेव. दैयामकी गुड्डयोनी कंडलु उघडाया वस्ताद येम?”
यहुदी मंदीद अविश्वास
22आप्पुड यरुशलेम शहरला भवन पुनःस्थापनाद फंडगा उंडी सलीकालाम उंड्या. 23इंगा येशुड परमेश्वर भवनला शलमोन देवडीला तिरगुतुन्या. 24दिनिचांग यहुदी मंदी अधिकारील वानभोवती जमा आय्यीर इंगा वान आनीर, “नु यप्पुड नंताक माय मनलु शकला फेट्याव? नु ख्रिस्त उंडाव तर माक सरळ-सरळ शप.” 25येशुड वारकी उत्तर इच्या, “निन मिक शपतीन तरी मीर विश्वास फेट्टार. निन ना आब्बान फेरता याय फनुल शेस्तान आय ना बद्दल साक्ष इस्ताय. 26तरी मीर विश्वास फेट्टार, येनटीक की मीर ना मेंढऱ्याल लोन्केल लेर. 27ना मेंढऱ्याल नाद माटा इंटाय, निन आटलान गुरतु फटतान इंगा आय ना यंका वस्ताय. 28निन आटलाक सार्वकालिक जीवन इस्तान; आटलाद यप्पुडुच नाश काक फोई इंगा यवारुच आटलान ना शेतल्योन्केल नांसकेन तिस्कुनी शकायार. 29आब्बाड नाक येम इच्चीनाड आदी आंदार काना फेद्दाद उंडाद इंगा आब्बान शेतल्योन्केल आदी यवार नांसकेन तिस्कुनी शकायार. 30निन इंगा आब्बाड वगाट उंडाम.”
31आप्पुड यहुदी मंदी अधिकारील वानकी मतेदेंक वापस राळ यत्तीर. 32दिन मिंदकेल येशुड वारनी आन्या, “निन ना स्वर्गीय आब्बान तीकेल शेंगेम शिंगार फनुल मिक सुपीचीनान. आ फनुला लोन्केल या फनी इचांग मीर नाक राळ मततार?”
33यहुदी मंदी अधिकारील वानकी उत्तर इच्चीर, “मिम शिंगार फनुला इचांग निक राळ मत्ताम, पण निंदा इचांग मतताम; येनटीक की नु मनशी उंडी स्वतान परमेश्वर आंटाव.” 34येशुड वारनी आन्या, “नु परमेश्वर उंडाव, इल्ला निन आंटीन इदी मी शास्त्रला राशीनेद लेद येम?#स्तोत्रसंहिता 82:6. 35यवारकी परमेश्वरी वचनलु शिक्या वारनी जर वाड परमेश्वर आन्या (इंगा पवित्र शास्त्रद इदी माटा खोटा लेद), 36तर यवारनी आब्बाड पवित्र फनी इचांग निवडाशी दुन्यामलोंग आंप्या, वान मीर आंटार, नु परमेश्वरदी निंदा शेस्तुनाव.' येनटीक की निन आंटीन, 'निन परमेश्वर कोडकु उंडान'? 37निन जर ना आब्बानी फनुल शेयाकुंटे तर ना मिंदा विश्वास फेट्टाकुंडा. 38पण जर निन आय शेस्तान तर ना मिंदा विश्वास फेट्टाकुंटे. आ फनुला मिंदा विश्वास फेटना, दिनिचांग की, मिक यरका कावाला इंगा मिक तेल्वाला की आब्बाड ना लोना इंगा निन आब्बान लोना उंडान.”
39इंगा यहुदी अधिकारील वान वापस फट्टेदेंक सुशीर, पण वाड वार शेतल्योन्केल यल्ली फो. 40मंग वाड यार्देन आतुक फो, यंदु योहान पहिला बाप्तिस्मा शेयदु इंगा आंदे निलच्या. 41आप्पुड शेंगेम मंदी वच्चीर; वार आनीर, “योहान तर यादुच चिन्हल सुपीयालेद, पण योहान इन बद्दल येम पण शप्पीन्या आदी आंता खरेम उंडाद.” 42आप्पुड शेंगेम मंदी वान मिंदा विश्वास फेट्टीर.
Currently Selected:
JHN 10: WNT
Highlight
Share
Compare
Copy
Want to have your highlights saved across all your devices? Sign up or sign in
