JHN 11
11
लाजरदी साव
1इप्पुड बेथानीलोन लाजर फेरोड वगा मनशी बिमार उंड्या. मरीयाद इंगा दान शेल्याल मार्थाद इर आद्दे उरोर उंडीर. 2याद अत्तर तिस्केन प्रभुनकी आंचीन्या इंगा दान यंडकालता येशुन काळलु कडगीन्या, इदी आद्दे मरीयाद उंड्या इंगा दान तम्मुड लाजर बिमार उंड्या. 3दिनिचांग वान शेल्यांलु येशुनकी निरोप आंपीर, “प्रभुजी, सुड, नु यवान मिंदा प्रेम शेस्ताव वाड बिमार उंडाड.” 4यप्पुड येशुड इदी इन्या, तर वाड आन्या, “इ बिमारीद परिणाम लाजरदी मृत्यु लेद; इदी बिमारी परमेश्वरदी महान शक्ती प्रगट आय्येदेंक आयनाद; इंगा दिन तीकेल परमेश्वर कोडकुक गौरव शिक्की.”
5येशुड मरीया इंगा दान शेल्याल मार्था इंगा लाजर मिंदा प्रेम शेयदु#11:5 प्रेम शेयदु ग्रीक भाषाला इ शब्द इचांग अगापे शब्दद उपयोग शेशीनार, याद परमेश्वर प्रेमनी सुपिस्ताद. योहान 3:16 वाचायना.. 6यप्पुड येशुड इन्या की, वाड बिमार उंडाड, तर वाड या जागाला उंड्या, आंदे इंगा रोंड नाळ निलच्या. 7मंग दान बाद, वाड शिष्यलान आन्या, “नंडा, मनाम वापस यहुदीया प्रांतलोंग फदाम.” 8शिष्यल वान आनीर, “रब्बी, यहुदी मंदी अधिकारील इप्पुडे मनालनी राळाता मतेदेंक सुदुर इंगा नु इंगा वापस आक्काडे फोयतुनाव येम?” 9येशुड उत्तर इच्या, “दिनमुला बारा घंटे उंडाय का लेद? फगुल जर यवाडाना नडस्ताड तर वानकी तटराय तगलाद, येनटीक की वाड इ दुन्यामदी यलगु सुस्ताड; 10पण जर यवाडाना मोब्बुला नडस्ताड तर वानकी तटराय तगुलताद येनटीक की वान देगार यलगु लेद.” 11येशुड इ माटलु माटलाडीनेंका, वारनी आन्या, “मना मित्र लाजर फंडकुंडाड, पण निन वान निद्दार लोन्केल लेपेदेंक फोयतुनान.” 12दिन मिंदकेल वान शिष्यल वान आनीर, “प्रभुजी, वाड फंडकुंनीन्टे तर वाड बागा आय्यी.” 13इप्पुड येशुड वान मृत्यु बद्दल माटलाडन्या. पण वारकी वाटाशा की वाड निद्दारता फंडकुने बद्दल माटलाड्या. 14मंग येशुड सरळ-सरळ शप्या, “लाजर सच्ची फोयनाड. 15इंगा निन आंदु लेकुंटीन आंका मी इचांग नाक आनंद वाटास्ताद, येनटीक की मिक ना मिंदा विश्वास फेट्टेदेंक इंगा वगाट संधी शिक्की. नंडा, मनाम वान सुशेदेंक फदाम.” 16आप्पुड यवारनी दिदुम आंदुर वाड थोमा मना सोबती शिष्यलान आन्या, “मनाम पण इन जताक सच्चेदेंक फदाम.”
सच्चीने लाजरनी जिवंत शेशेद
17मंग यप्पुड येशुड बेथानीया नगरकी वच्या आप्पुड वानकी तेलच्या की, वान कबरला फेट्टी नालुंग नाळ आयनाय. 18इप्पुड बेथानी नगर यरुशलेम शहरकेल तरी मुड किलोमीटर उंड्या. 19इंगा यहुदी मंदी लोन्केल शेंगेम मंदी मार्था इंगा मरीयादान तीकुड वार तम्मुन बद्दल वारदी सांत्वन शेशेदेंक वच्चीनीर. 20येशुड वस्तुनाड इदी इनी मार्थाद फोई वान भेटाशा, पण मरीयाद इंटल्याने कुसनी उंड्या. 21आप्पुड मार्थाद येशुन आन्या, “प्रभुजी, नु इंदु उंडीन्टे तर ना तम्मुड सय्या कुंटुन्या. 22तरी इप्पुड पण येम पण नु परमेश्वरनी आडग्याव आदी परमेश्वर निक इच्ची, इदी नाक यरका उंडाद.” 23येशुड दान आन्या, “नि तम्मुड वापस लेशी.” 24मार्थाद वान आन्या, “वाड आखरी दिनमुलाला पुनरुत्थान आप्पुड वापस लेशी इदी नाक यरका उंडाद.” 25येशुड दान आन्या, “पुनरुत्थान इंगा जीवन निने उंडान. यवाड ना मिंदा विश्वास फेटताड वाड सच्चीन्टे तरी बतकी. 26इंगा जित्ता उंडीनोड प्रत्येक मनशी यवाड ना मिंदा विश्वास फेटताड वाड यप्पुडुच सय्याक फोई, #11:26 यप्पुडुच सय्याक फोई इर आत्मिक रुपता सय्याक फोयार नु इल्ला विश्वास फेटताव येम?” 27आदी वान आन्या, “हुं, प्रभु, दुन्यामलोंग वच्चेतोड यवाड परमेश्वर कोडकु ख्रिस्त वाड नुये उंडाव इल्ला निन विश्वास फेटनान.”
28इंगा इंता माटलाडी आदी यल्ली फोया इंगा दान शेल्याल मरीयादान दोंगातारला फिल्ची आन्या, “प्रभुड वच्चीनाड इंगा निन्नु फिलस्तुनाड.” 29मरीयाद इदी इनीगास, आदी लगेच लेशी वान भेटाशेदेंक वान तीकुड फोया. 30इप्पुड, येशुड इंगाना उळ्योंग दालेकुंड्या, पण मार्थाद वानकी यंदु भेटाशीन्या आद्दे जागाला उंड्या. 31आप्पुड या यहुदी मंदी मरीयादान जताक इंटल्या उंडीर इंगा दानदी सांत्वन शेयदुर, वार मरीयादान घाई-घाईता लेशी बैटीक फोयेताप्पुड सुशीर, आदी कबर तीकुड येडशेदेंक फोयतुनाद इल्ला समजाशी वार दान यंका फोईर. 32मंग यंदु येशुड उंड्या आंदुक मरीयाद वच्ची नेंका वान सुशी आदी वानी काळलु मोक्या इंगा वान आन्या, “प्रभु, नु इंदु उंटे तर ना तम्मुड सय्या कुंटुन्या.” 33आप्पुड, येशुड दान इंगा दान जताक वच्चीने यहुदी मंदीन येडशेताप्पुड सुशी वाड आत्माला उदास इंगा अस्वस्थ आय्या; 34इंगा आन्या, “मीर वान यंदु कबरला फेट्टीनार?” वार वान आनीर, “प्रभु, वच्ची सुड.” 35आप्पुड येशुड येडशा. 36दिन मिंदकेल यहुदी मंदी आनीर, “सुडना, इनदी वान मिंदा यंतोट प्रेम उंड्या!” 37पण दांटल्योन्केल शेंगेम मंदी आनीर, “यवाड आ गुड्डयोनी कंडलु उघडाशा आ मनशीक, इड सय्याराद इल्ला पण शेया दाकुंटुन्या येम?” 38येशुड इंगा अंतकरणला उदास आय्यी कबर तीकुड वच्या. आदी वगा गुहा उंड्या इंगा दान मुती मिंदा राय फेट्टीनेद उंड्या. 39येशुड आन्या, “राय तिंडा.” आ सच्चीनोन शेल्याल मार्थाद वान आन्या, “प्रभु, इप्पुड वानदी घउल वस्तुन्याला; येनटीक की वानकी सच्ची नालुंग नाळ आयनाय.” 40येशुड दान आन्या, “नु विश्वास फेटती आंटे नु परमेश्वरदी महान शक्ती सुशाव इल्ला निन निक शप्पा लेकुंटीन येम?” 41आप्पुड वार राय तिशीर; इंगा येशुड स्वर्ग तीकुड कंडलु फैनिक यत्ती आन्या, “हे यब्बा, नु नाद इंटी आंका निन निक धन्यवाद इस्तान. 42नाक यरका उंडाद की, नु नाद नेहमी इंटाव, तरी या मंदी ना देगार नीला फडीनार वार इचांग निन माटलाडतुनान, दिनिचांग की, नु नन्नु आंपीनाव इल्ला वार विश्वास फेट्टाला.” 43इल्ला माटलाडी वाड बेग्गे आवाज इच्ची फिलच्या, “लाजर बैटीक दा.” 44आप्पुड यवाड सच्चीनोड उंड्या वाड बैटीक वच्या; वान फयीन बट्टालता कट्टीनेद उंड्या इंगा मुती दस्तीता गुंडाळीचीनेद उंड्या. येशुड वारनी आन्या, “इन मोकळा शेशी फोनिंडा.”
येशुन विरुद्ध षडयंत्र
मत्तय 26:1-5; मार्क 14:1-2; लूक 22:1-2
45आप्पुड मरीयादान तीकुड वच्चीने यहुदी मंदी वाड येम शेशा आदी सुशीर इंगा वार दिंटल्योन्केल शेंगेम मंदी वान मिंदा विश्वास फेट्टीर; 46पण यंता तरी मंदी परुशी मंदी तीकुड फोई येशुड शेशा आदी वारकी शप्पीर.
47मंग मुख्य याजकलु इंगा परुशील सभा निंपीगास आनीर, “मनाम येम शेस्तुनाम? येनटीक की आ मनशी शेंगेम चमत्कारलु शेस्तुनाड. 48मनाम जर वान इल्ले इडस्तीम तर आंता मंदी वान मिंदा विश्वास फेट्यार; इंगा रोमी मंदी वच्ची मनाद जागा इंगा राष्ट्रल पण नांचकुन्यार.” 49आप्पुड वार दिंटल्योन्टोड कैफा फेरोड वगा मनशी यवाड आ याडाद महायाजक उंड्या, वाड वारनी आन्या, “मिक येमीच तेल्वाद. 50मना मंदी इचांग वगा मनशी सय्याला इंगा आंता राष्ट्रद नाश कावाराद दिंटल्या मनाद फायदा उंडाद, इदी मिक तेल्वाक वच्चीनाद.” 51इंगा इदी वाड वान मनता माटलाडा लेद; तर आ याडाद वाड मुख्य याजक उंड्या आंकेन वाड संदेश इच्या की, येशुड आ राष्ट्र इचांग सच्चेतोड उंडाड. 52इंगा फक्त आ राष्ट्र इचांग लेद, तर दिनिचांग की वाड परमेश्वर बिळ्ळान यवार अलग-अलग आय फोयनार वारनी वगातळा शेशी वारनी वगाट शेयाला. 53आबदनोटे, वार वान जेमता मतेशेद वगामेगारला निश्चय शेशीर.
54दिनिचांग आप्पुडनोट येशुड यहुदी मंदीला उघडपणे तिरगा लेद; तर आंदुकेल जंगल देगार प्रांतलोन एफ्राईम फेर नगरकी फोया इंगा आंदु मना शिष्यला जताक निलच्या.
55इप्पुड यहुदी मंदीद वल्हांडन फंडगा देगार वच्चीन्या; इंगा शेंगेम मंदी वल्हांडनकाना मुंची, स्वतान शुद्ध शेशी तिस्कुना बैटुड उळाकेल फैनिक यरुशलेम शहरकी फोईर. 56वार येशुन फुडकुदुर इंगा परमेश्वर भवन परिसरला नीला फडी वार वगामेगारनी आडगुदुर, “मिक येम वाटास्ताद? वाड फंडगाक वच्ची का लेद?” 57इप्पुड मुख्य याजकलु इंगा परुशी मंदी तर वान फट्टे इच्छाता इल्ला आज्ञा शेशीनीर की, वाड यंदु उंडाड इल्ला जर यवारकी आना तेलस्ते तर वार शप्पाला.
Currently Selected:
JHN 11: WNT
Highlight
Share
Compare
Copy
Want to have your highlights saved across all your devices? Sign up or sign in
