JHN 12
12
बेथानीला येशुनदी अभिषेक
मत्तय 26:6-13; मार्क 14:3-9
1मंग येशु वल्हांडन फंडगा काना आर नाळ मुंचार बेथानी नगरलोंग वच्या इंगा या लाजरनी येशुड सच्चीनोर लोन्केल लेपीन्या वाड पण आंदु उंड्या. 2दिनिचांग वार आंदु वान इचांग मोब्बुलोंदी वंटा शेशीर इंगा मार्थाद सदरुदू. पण वान जताक तिनेदेंक कुसनीनोरला लाजर उंड्या. 3आप्पुड मरीयाद शुद्ध जटामांसीद अर्धा लिटर, शेंगेम फिर्याम अत्तर तिस्केन येशुन काळलाक आंची दान यंडकालता वानी काळ तुडशा; इंगा अत्तर घउलता पुर्ण इल्लु निंडी फोया. 4आप्पुड, वान शिष्यल लोन्केल वगाड, यवाड वान फट्टी इच्चेतोड उंड्या वाड यहूदा इस्कर्योत आन्या, 5“इदी अत्तर मुड नुर यंडी कलदारलाक आम्मी आय गरीबोरकी येनटीक इयालेद?” 6वानकी गरीबोरदी काळजी उंड्या आंका वाड इल्ला आनालेद. वान देगार थैली उंड्या इंगा दांटल्या येम पण येयदुर आदी वाड दोंगा शेस्कुंदु, दानिचांग वाड इल्ला माटलाड्या. 7दिन मिंदकेल येशुड आन्या, “दानकी त्रास इयाकुंडा. नन्नु बुडशे दिनमु इचांग आदी इदी राखाशी फेट्टीनाद. 8येनटीक की गरीबोर नेहमी मी देगार उंडार, पण निन नेहमी मी देगार उंडाक फोयान.”
लाजरनी मतेशेद षडयंत्र
9आप्पुड येशुड आंदु उंडाड इल्ला यहुदी मंदीलोन शेंगेम मंदीक तेलच्या इंगा फक्त येशुन इचांग लेद, तर यवान वाड सच्चीनोर लोन्केल लेपीन्या आ लाजरनी पण मनाम सुडाला आंका वार वच्चीर. 10पण मुख्य याजकलु मनाम लाजरनी पण मतेस्काडाला इल्ला विचार शेशीर. 11येनटीक की लाजर इचांग शेंगेम यहुदी मंदी वार अधिकारीलान इडशी येशुन मिंदा विश्वास फेटदुर.
येशुनदी विजय यात्रा
12इंगोगो नाड फंडगाक वच्चीने शेंगेम मंदी येशुड यरुशलेम शहरकी वस्तुनाड इल्ला इनी, 13खजुरी डांकील तिस्केन वानदी भेट तिस्कुना बैटीक यल्लीर इंगा फेद्दा आवाजला आनेदेंक आंटीर,
“होसान्ना!
प्रभुन फेरता वच्चेतोड इस्राएलोड राजा
वाड धन्यवादीत उंडाला!”#स्तोत्रसंहिता 118:25-26.
14इंगा येशुनकी वगा गाडदी फिल्ला शिक्कीनेंका वाड दान मिंदा कुसन्या. यल्ला की पवित्र शास्त्रलेका उंडाद.
15“हे सियोन कुतुर,#12:15 हे सियोन कुतुर सियोन मंदी येरस्कुनाक,
सुड, नी राजा गाडदी फिल्ला मिंदा कुसनी वस्तुनाड.”#यशया 40:9; सफन्या 3:1; जखऱ्या 9:9.
16इ माटलु तर वान शिष्यलाक पहिला तेल्वा लेकुंड्या, पण येशुनदी गौरव आयनेंका, वारकी ध्यानाम वच्या की, वान बद्दल इ माटलु राशीनेय उंड्या इंगा मंदी वान इचांग इल्ला शेशीनीर. 17वाड लाजरनी सच्चीनोर लोन्केल लेप्या, आप्पुड या मंदी वान जताक उंडीर वार वान बद्दल साक्ष इच्चीर. 18वाड इदी आश्चर्य चिन्ह शेशीन्या इल्ला वार इनीर आंका मंदी वान भेटाशेदेंक फोईर. 19मंग परुशी मंदी वगा-मेगारनी आनीर, विचार शेयना, “मीर येमीच शेशी शकायाक वच्चीनार; सुडना, दुन्याम वान यंका नडस्तुनाद.”
काही ग्रीक मंदी येशुन फुडकीर
20फंडगाला उपासना शेशेदेंक वच्चीने मंदी लोन्केल या मंदी ग्रीक उंडीर. 21वार गालील प्रांतलोन बेथसैदा नगरलोन फिलिप्प देगार वच्ची विनंती शेशीर की, साहेब, “प्रभु, येशुन भेटायला इल्ला माद इच्छा उंडाद.” 22आप्पुड फिलिप्प वच्ची अंद्रियाक शप्या; अंद्रिया इंगा फिलिप्प वच्ची येशुनकी शप्पीर.
23येशुड वारनी आन्या, “मनशी कोडकुद गौरव आय्येद वेळ वच्चीनाद. 24निन मिक खरे-खरेम शपतान, याड नंताक गोदमाद दाना भुमीला फडी सय्याद, आड नंताक आदी वक्काटे उंटाद; इंगा यप्पुड सस्ताद आदी शेंगेम फंटा इस्ताद. 25यवाड स्वता मिंदा प्रेम शेस्ताड वाड दान गमायमती इंगा यवाड इ दुन्यामला स्वता जेमुद द्वेष शेस्ताड वाड दानदी सार्वकालिक जीवन इचांग रक्षा शेशी. 26जर यवाडाना नाद सेवा शेस्ताड तर वाड ना यंका नडवाला, आंटे यंदु निन उंडान आंदु ना सेवक पण उंडी. जर यवाडाना नाद सेवा शेशी तर आब्बाड वानदी सन्मान शेशी.
स्वता सच्चे बद्दल भविष्यवाणी
27 इप्पुड नाद जेम घाबरास्तुनाद इंगा निन येम आंदुन? हे यब्बा, नु इ संकटला नाद रक्षा शेय. पण निन इद्दे कारण इचांग इड नंताक वच्चीनान. 28हे यब्बा, नु यंता महान उंडाव इदी इप्पुड आंदारकी सुप”
आप्पुड मोडामलेल वाणी आय्या, “निन पहिला वानकी सुपीस्तीन इंगा वापस सुपीच्यान.” 29आप्पुड या नीला फडीनोर मंदी इदी इनीर वार आनीर, “मेघगर्जना आय्या.” इंगोगोर आनीर, “वान जताक स्वर्गदुत माटलाड्या.” 30आप्पुड येशुड वारकी उत्तर इच्ची आन्या, “इदी वाणी ना इचांग कालेद तर मी इचांग आयनाद. 31इप्पुड इ दुन्यामदी न्याय आयताद, इप्पुड इ दुन्याम शासकनी #12:31 दुन्याम शासकनी शैताननी बैटीक तिशेदेंक वच्ची. 32इंगा जर नन्नु पृथ्वीकेल फैनिक शेशीर #12:32 पृथ्वीकेल फैनिक शेशीर क्रुस मिंदा खिळाशीर तर निन आंदारनी ना तीकुड जग्यान.” 33दिन मिंदकेल येशुड इदी प्रगट शेशा की वानदी यल्ला आय्यी. 34मंदी वान आडगीर, ख्रिस्त नेहमी उंडी इल्ला मिम नियमशास्त्रकेल इनीनाम, तर “मनशी कोडकुन फैनिक शेयाबेक” इल्ला नु यल्ला आंटाव? इड मनशी कोडकु उंडाड तरी यवाड?#दानिएल 7:14. 35दिन मिंदकेल येशु वारनी आन्या, “इंगा रव्वा वेळ मी जताक यलगु उंडाद; मी देगार यलगु उंडाद आड नंताक नडना; दिनिचांग की मोब्बु गडदु मिमलान घेरायाराद येनटीक की यवाड मोब्बु गडदुला नडस्ताड वानकी वाड यंदुक फोयताड इदी तेल्वाद. 36मीर यलगु कोडकुल कावाला आंका मी देगार यलगु उंडाद आड नंताक यलगु मिंदा विश्वास फेटना.” येशुड इ माटलु माटलाड्या इंगा आंदुकेल यल्ली फोई वार देगाटेल दोक्केन निलच्या.
भविष्यवाणी पुर्ण आयताद
37येशुड मंदी मुंदार इन्नोट चिन्हल शेशी पण वार वान मिंदा विश्वास फेट्टालेद ; 38इदी दिनिचांग आय्या की, यशया संदेष्ट्याड याद वचन शप्पीन्या आदी पुर्ण कावाला, आदी इल्ला:
“प्रभु, मिम इनीने माटा मिंदा यवार विश्वास फेट्टीनार?
परमेश्वरदी शक्ती यवारकी प्रगट आयनाद?”#यशया 53:1.
39दिनिचांग वारकी विश्वास फेट्टा दालेद;
इ कारण इचांग यशयाड वापस आन्या,
40“वार कंडलाता सुडाराद,
वारकी मनता तेल्वाराद, तिरगाराद इंगा
निन वारनी बागा शेयाराद
आंका वाड वारी कंडलु गुड्डी शेशा इंगा वारी मनलु कठीण शेशीनाड.”#यशया 6:9-10.
41यशयाड वानदी गौरव सुशा आंका वाड इ माटलु शप्या इंगा वाड वान बद्दल माटलाड्या. 42तरी यहुदी अधिकारीला लोन्केल शेंगेम मंदी वान मिंदा विश्वास फेट्टीर, पण वारनी सभास्थान बैटीक तिस्काडाराद आंका परुशी मंदी यरपु इचांग वार इल्ला कबुल शेया कुंदुर. 43येनटीक की वारकी परमेश्वर गौरव काना मनसुलाद गौरव शेंगेम प्रिय वाटाशा.
येशुन मिंदा विश्वास फेट्टेद
44इंगा येशुड बेग्गे मंदीन आन्या, “यवाड ना मिंदा विश्वास फेटताड वाड ना मिंदा लेद, तर यवाड नन्नु आंपीनाड वान मिंदा विश्वास फेटताड. 45इंगा यवाड नन्नु सुस्ताड वाड यवाड नन्नु आंपीनाड वान सुस्ताड. 46यवाड पण ना मिंदा विश्वास फेटताड वाड मोब्बु गडदुला निलवाराद आंका निन दुन्यामलोंग यलगु आय्यी वचीनान. 47यवाडाना जर नाय वचनलु इंटाड पण आय पाळायाड, वानदी न्याय निन शेयान; येनटीक की निन दुन्यामलोन मंदीद न्याय शेशेदेंक दालेद, तर निन दुन्यामलोन मंदीद तारण शेशेदेंक वचीनान. 48यवाड नाद अपमान शेस्ताड इंगा नाद वचन स्वीकार शेयाड वानदी न्याय शेशेतोड यवाड तरी उंडाड. याद वचन निन शपतीन, आद्दे आखरी दिनमुनाड, वानदी न्याय शेशी. 49येनटीक की निन ना मनता येमीच माटलाडा लेद, तर निन येम शप्पाला इंगा येम माटलाडाला दिन बद्दल या आब्बाड नन्नु आंपीनाड वाडे नाक आज्ञा इच्चीनाड. 50वानदी आज्ञा सार्वकालिक जीवन उंडाद. इदी नाक यरका उंडाद. आंकेन येम पण निन माटलाडतान आदी आब्बाड नाक शप्पीनेलेका माटलाडताड.”
Currently Selected:
JHN 12: WNT
Highlight
Share
Compare
Copy
Want to have your highlights saved across all your devices? Sign up or sign in
