JHN 15
15
येशुड खरेम अंगुरदी वेल
1येशुड मुंदारकी आन्या, “निने खरेम अंगुरदी वेल उंडान इंगा ना आब्बाड माळी उंडाड. 2ना दिंटल्योनदी, याद फांदी फळ इयाद, आदी प्रत्येक फांदी वाड तिशी फेकेस्काड इंगा याद फांदी फळलु इस्ताद आदी जास्त फळलु इयाला आंका वाड दान छाटास्ताड. 3याद वचन निन मिक शपतीन दानता, मीर इप्पुड शुद्ध आयनार. 4मीर ना लोना निलना इंगा निन मी लोना निलच्यान. यल्ला फांदी वेलला उंडीन शिवाय दानकी स्वता फळलु इया दाद, आल्ले ना लोना निलचीन शिवाय मिक पण इया दाक फोई. 5निन वेल उंडान, मीर फांदील उंडार; यवाड ना लोना निलस्ताड इंगा निन यवार लोना निलस्तान वाड शेंगेम फळलु इस्ताड, येनटीक की ना देगाटेल धुराम आय्यी मीर येमीच शेशी शकायार. 6जर यवाडाना ना लोना टीकाशी निलवाड, तर वान फांदी लेका बैटीक तिशी फेकेस्तार इंगा वाड यंडी फोयताड इंगा आल्लोन फांदीलान जमा शेशी आग्गीला येस्काडतार इंगा आय काली फोयताय. 7मीर ना लोना टीकाशी उंटे इंगा नाय वचनलु मी लोना निलस्ते तर येम पण मिक बेक आदी आडगुना आंटे आदी मिक शिक्की. 8मीर शेंगेम फळलु इस्तीर आंटे ना आब्बानदी गौरव आयताद; इंगा मीरे ना शिष्यल आय्यार.
ख्रिस्तन प्रेमला टीकाशी उंडेद
9येशुड मुंदारकी आन्या, यल्ला आब्बाड ना मिंदा प्रेम शेशा आल्ले निन पण मी मिंदा प्रेम शेशीनान; आल्ले मीर पण ना प्रेमला टीकाशी उंडा. 10यल्ला निन ना आब्बानदी आज्ञा पाळाशी वान प्रेमला टीकाशी उंटान, आल्ले मीर पण ना आज्ञा पाळाशार तर मीर पण ना प्रेमला टीकाशी उंड्यार. 11नाद आनंद मी लोना उंडाला इंगा मिद आनंद पुर्ण कावाला आंका निन इ माटलु मिक शपतीन.
12 यल्ला निन मी मिंदा प्रेम शेस्तीन आल्ले मीर पण वगामेगार मिंदा प्रेम शेय्याला इल्ला नाद आज्ञा उंडाद. 13मना मित्र इचांग मनाद जेम इयाला दिन काना फेद्दाद प्रेम यवारदीच लेद. 14निन मिक येम पण शपतान आदी जर मीर शेस्तीर तर मीर ना मित्र उंडार. 15निन मिमलान इप्पुडनोट नोकर आनान, येनटीक की माल्कुड येम शेस्ताड आदी नोकरकी यरका लेकुंटाद; पण निन मिमलान मित्र आनीनान, येनटीक की निन याय माटलु आब्बान तीकेल इनी तिस्कुंटीन आय आन्नी निन मिक शपकाडनान. 16मीर नन्नु निवडायालेद, तर निन मिमलान निवडाशीनान इंगा नेमाशीनान; दिनिचांग की, मीर फोई, फळलु इयाला, मी फळलु टिकायाला इंगा येम पण मीर ना फेरता आब्बान आडग्यार वाड मिक इयाला. 17मीर वगामेगार मिंदा प्रेम शेय्याला आंका निन मिक इदी आज्ञा इस्तान.
दुन्यामलोन मंदी तीकेल छळ
18येशुड मुंदारकी आन्या, दुन्यामलोन मंदी जर मिद कोफाम शेस्तार तर मिक यरका उंडाद की, मिद कोफाम शेयाकाना मुंची वार नाद पण शेशीनार. 19जर मीर दुन्यामलोन मंदी लेका उंटे तर दुन्यामलोन मंदी मी मिंदा प्रेम शेस्तुनीर. पण मीर दुन्यामलोन मंदी लेका लेर, निन मिमलान दुन्यामलोन मंदी लोन्केल निवडाशीनान, आंका दुन्यामलोन मंदी मिद कोफाम शेस्तार, 20‘नोकर वान मालकुन काना फेद्दावोड लेड’#योहान 13:16. इदी जे वचन निन मिक शप्पीन्टीन दान ध्यानाम शेयना. जर वार नाद छळ शेशीर तर मिद पण शेशार; जर वार नाय माटलु इंटे तर वार मी पण इन्यार. 21पण वार ना फेर इचांग इदी आंता मी जताक शेशार; येनटीक की यवाड नन्नु आंपीनाड वान वार गुरतु फट्टार. 22निन जर दालेकुंटे इंगा वार जताक माटलाडा लेकुंटे तर वार पापी ठराया कुंटुनीर, पण इप्पुड वारकी वार पापला इचांग येमीच कारण शप्पादाद. 23यवाड नाद कोफाम शेस्ताड वाड ना आब्बानदी पण कोफाम शेस्ताड. 24वार नडमा जर निन आय फनुल शेया लेकुंटे याय इंगोगोर यवारुच शेयालेद तर वार पापी ठराया कुंटुनीर, पण इप्पुड वार नन्नु इंगा ना आब्बान इद्दारनी सुशीनार इंगा माद कोफाम शेशीनार. 25तरी पण
‘वार उत्तेंगाने
नाद कोफाम शेशीर’#स्तोत्रसंहिता 35:19; 69:4. इदी वचन वार पवित्र शास्त्रला राशीनेद उंडाद आदी पुर्ण कावाला आंकेन इदी इल्ला आय्या.
26 पण यप्पुड वाड वकील वच्ची, यवान निन आब्बान तीकेल आंप्यान, आंटे सत्यद आत्मा याद आब्बान तीकेल वस्ताद, आदी ना बद्दल साक्ष इच्ची. 27इंगा मीर पण निन सेवा शेशेद चालु शेस्तीन आप्पुडनोट ना जताक उंडार आंकेन मीर पण ना साक्षी उंडार.”
Currently Selected:
JHN 15: WNT
Highlight
Share
Compare
Copy
Want to have your highlights saved across all your devices? Sign up or sign in
