JHN 17
17
महायाजक पद्धतीता प्रार्थना — 17:1-26
येशुनदी प्रार्थना
1“येशुड इ माटलु शिष्यला जताक माटलाडीनेंका स्वर्ग तीकुड सुशी प्रार्थना शेशा, हे यब्बा, वेळ वच्चीनाद; कोडकु नीद गौरव शेयाला आंका नु नी कोडकुद गौरव शेय. 2यवानकी नु वारनी इच्चीनाव वार आंदारकी वाड सार्वकालिक जीवन इयाला, आंका नु वानकी आंता मंदी मिंदा अधिकार इच्चीनाव. 3सार्वकालिक जीवन इद्दे उंडाद की, वार नु यवाड वक्काडे, खरेम परमेश्वर निन्नु इंगा यवारनी नु आंपीनाव आ येशु ख्रिस्तन गुरतु फट्टाला. 4याद फनी नु नाक पुर्ण शेशेदेंक इच्चीनाव आदी पुर्ण शेशी निन पृथ्वी मिंदा नीद गौरव शेशीनान. 5इंगा इप्पुड, हे यब्बा, नु नाद गौरव आ गौरवता शेय याद दुन्याम बनाया काना मुंची, नाद नी जताक उंड्या.
वान शिष्यला इचांग येशुनदी प्रार्थना
6येशुड इदी पण प्रार्थना शेशा, हे यब्बा या मंदी नु नाक दुन्याम लोन्केल इस्ती वारकी निन नीद फेर प्रकट शेस्तीन. वार नी मंदी उंडीर इंगा वारनी नु नाक इस्ती इंगा वार नीद वचन पाळाशीनार. 7इप्पुड वारकी तेल्चीनाद की, नु याय माटलु नाक इस्ती आय आन्नी नी तीकेल उंडाय. 8येनटीक की नु नाक याय वचनलु इस्ती आय निन वारकी इच्चीनान; आय वार स्वीकार शेशीर, निन नी तीकेल वच्चीनान इदी वार खरेम गुरतु फट्टीनार इंगा नु नन्नु आंपीनाव. इल्ला वार विश्वास फेट्टीर. 9वार इचांग निन विनंती शेस्तान, निन दुन्यामलोन मंदी इचांग विनंती शेयान, तर यवारनी नु नाक इच्चीनाव वार इचांग निन विनंती शेस्तान, येनटीक की वार नी वोर उंडार. 10येम नाद आदी आंता नीद उंडाद इंगा येम नीद आदी आंता नाद उंडाद इंगा वार तीकेल नाद गौरव आयनाद. 11इंगा इप्पुड, दिन मुंदारकी निन दुन्यामला लेन; पण वार दुन्यामला उंडार इंगा निन नी तीकुड वस्तुनान. हे पवित्र यब्बा, नु नाक इच्चीने नी फेरला वारदी रक्षा शेय दिनिचांग की, यल्ला मनाम वगाट उंडाम आल्ला वार पण वगाट कावाला. 12याड नंताक निन वार जताक उंटीन आड नंताक नु नाक इच्चीने नी फेरला निन वारदी रक्षा शेस्तीन; निन वारनी सांभाळीस्तीन इंगा विनाश कोडकुन इडशी वार दिंटल्योन्केल यवारदीच नाश कालेद. इदी पवित्र शास्त्रद वचन पुर्ण कावाला आंका इल्ला आय्या. 13पण इप्पुड निन नी तीकुड वस्तुनान इंगा नाद आनंद वार लोना पुर्ण कावाला आंका निन दुन्यामला इ माटलु माटलाडतान. 14निन वारकी नी वचनलु इच्चीनान, दुन्यामलोन मंदी वारदी कोफाम शेशीनार; येनटीक की यल्ला निन दुन्याम लोन्टोड लेन आल्ला वार पण दुन्याम लोन्टोर लेर. 15नु वारनी दुन्याम लोन्केल तिशी तिस्को इल्ला निन विनंती शेयान, तर नु वारदी शैतान तीकेल रक्षा शेय्याला इल्ला निन विनंती शेस्तान. 16यला निन दुन्यामटोड लेन, आल्ला वार पण दुन्यामटोर लेर. 17नु वारनी सत्यला पवित्र शेय. नीद वचन इद्दे सत्य उंडाद. 18यला नु नन्नु दुन्यामलोंग आंपती आल्ला निन पण वारनी दुन्यामलोंग आंपीनान. 19इंगा वार पण सत्यला पवित्र कावाला आंका निन वार इचांग स्वतान पवित्र शेस्तान.
विश्वासी मंदी इचांग येशुनदी प्रार्थना
20येशुड इदी पण प्रार्थना शेशा, हे यब्बा निन फक्त इ शिष्यला इचांगे लेद, तर वार शिक्षण मिंदकेल यवार ना मिंदा विश्वास फेटतार वार इचांग पण विनंती शेस्तान 21की, वार आंदार वगाट कावाला; हे ना यब्बा, यला नु ना लोना उंडाव इंगा निन नी लोना उंडान आल्ला वार पण मना लोना वगाट कावाला, येनटीक की नु नन्नु आंपीनाव इल्ला दुन्यामलोन मंदी विश्वास फेट्टाला. 22नु याद गौरव नाक इच्चीनाव, आदी निन वारकी इच्चीनान, दिनिचांग की, यल्ला मनाम वगाट उंडाम आल्ले वार वगाट कावाला; 23आंटे निन वार लोना इंगा नु ना लोना; दिनिचांग की, वार पुर्णपणे वगाट कावाला इंगा, दिन मिंदकेल दुन्यामलोन मंदीक तेल्वाला की, नु नन्नु आंपीनाव इंगा यला नु ना मिंदा प्रेम शेस्ती आल्ले वार मिंदा पण प्रेम शेस्ती.#१करिंथ 6:17; गलती 2:20.
24 हे ना यब्बा, नाद इल्ला इच्छा उंडाद की, नु येम नाक इच्चीनाव वार पण यंदु निन उंड्यान आंदु ना देगार उंडाला, दिनिचांग की, याद नाद गौरव नु नाक इच्चीनाव आदी वार सुडाला; येनटीक की दुन्याम बनाया काना मुंची नु ना मिंदा प्रेम शेस्ती.#योहान 14:3. 25हे न्याय संपन्न यब्बा, दुन्यामलोन मंदी निन्नु गुरतु फट्टालेद, निन निन्नु गुरतु फट्टीनान इंगा नु नन्नु आंपीनाव इल्ला शिष्यल गुरतु फट्टीनार. 26निन नीद फेर वारकी शप्पीनान इंगा निन शपतान, दिनिचांग की, याद प्रेम नु ना मिंदा शेस्ती आदी वार लोना उंडाला इंगा निन वार लोना उंडाला.”#17:26 आदी वार लोना उंडाला इंगा निन वार लोना उंडाला ना शिक्षणदी प्रभाव
Currently Selected:
JHN 17: WNT
Highlight
Share
Compare
Copy
Want to have your highlights saved across all your devices? Sign up or sign in
