JHN 18
18
ख्रिस्तन क्रुस मिंदा यक्कामतेद इंगा पुनरुत्थान — 18:1—20:10
बगीच्याला येशुन फट्टी इच्चेद
मत्तय 26:47-56; मार्क 14:43-52; लूक 22:47-53
1इ आन्नी माटला इचांग प्रार्थना शेशीनेंका येशुड वान शिष्यल जताक किद्रोन वंका आतुक फोया. आंदु वगाट बगीच्या उंड्या; आंदुक वाड इंगा वान जताक शिष्यल फोईर. 2यहूदाड यवाड वान फट्टी इच्चेतोड उंड्या, वानकी इदी जागा यरका उंड्या येनटीक की येशुड शेंगेम तुकुल वान शिष्यला जताक आंदुक फोदु. 3आप्पुड रोमी सैनिकलाद वगा तुकडी इंगा मुख्य याजक इंगा परुशी मंदी आंपीने भवनलोन शिपाईल आंदुक वच्चीर, वार देगार दिव्वाल, मशाललु इंगा हत्यारलु उंड्या. 4येशुड वान जताक येम पण आय्येद उंडाद इदी आंता गुरतु फट्टी बैटीक वच्या इंगा वारनी आन्या, “मीर यवारनी फुडकुतुनार?” 5वार वानकी उत्तर इच्चीर, “येशु नासरेथकरनी.” वाड वारनी आन्या, “वाड निने उंडान.” इंगा या यहूदाड वान फट्टी इच्चीन्या वाड यहूदाड पण वार जताक नीला फडीन्या, 6“वाड निने उंडान,” इल्ला आनीन नग्रेम वार यंकाक सरकाशी भुमी मिंदा फडीर. 7मंग वाड वारनी वापस आडग्या, “मीर यवारनी फुडकुतुनार?” इंगा वार आनीर, “येशु नासरेथकरनी.” 8येशुड उत्तर इच्या, “वाड निने उंडान; इल्ला निन मिक शपतीन, मीर नन्नु फुडकुतुनार तर वारनी फोनिंडा.” 9“यवारनी नु नाक इच्चीनाव वार दिंटल्योन्केल निन यवारनीच फाम मतालेद,” इल्ला याद वचन वाड माटलाडीन्या आदी पुर्ण कावाला आंका इदी आय्या. 10आप्पुड शिमोन पेत्र याद तलवार वान देगार उंड्या आदी तिशा इंगा महायाजक सेवक मिंदा नडपीच्या इंगा वानदी मंची शेय तीकुडदी गुम्मा कोसकाड्या. आ दासुद फेर मल्ख उंड्या. 11आप्पुड येशुड पेत्रन आन्या, “नीद तलवार म्यानला फेटको. आब्बाड याद नाक दुखद प्याला इच्चीनाड आदी निन तागा वद्दो येम?”
येशुन महायाजक देगार येका फोयेद
मत्तय 26:57-58; मार्क 14:53-54; लूक 22:54
12मंग रोमी सैनिकलु इंगा भवनलोन शिपाईल येशुन फटकुनीर. 13इंगा वार पहिला वान हन्ना तीकुड येका फोईर, यवाड आ याडाद महायाजक उंडीने कैफान मामा उंड्या, 14मंदी इचांग वगा मनशी सय्याला इदी फायदाद उंडाद. इल्ला उपाय इडे कैफाड शप्पीन्या.#योहान 11:49-50.
पेत्र येशुन गुरतु फट्टेद नकार शेस्ताड
मत्तय 26:69-75; मार्क 14:66-72; लूक 22:54-62
15शिमोन पेत्र इंगा इंगोगो वगा शिष्य येशुन यंका-यंका फोईर; आ शिष्यन महायाजक गुरतु फटदु आंका येशुन जताक महायाजक वाडालोंग फोया. 16पण पेत्र बैट्या, कवाड देगार नीला फडीन्या, आंकेन यवाड इंगोगो शिष्य महायाजककी गुरतु उंड्या वाड बैटीक फोया इंगा द्वार पालीका दानकी शप्पी पेत्रन लोनीक येकेन फोया. 17दिन मिंदकेल आदी जवान द्वार पालीकाद उंड्या आदी पेत्रन आन्या, “नु पण इ मनशी शिष्यला लोन्केल उंडाव येम?” वाड आन्या, “निन लेन?” 18दासलु इंगा भवनलोन शिपाईल सली उंडाद बोग्गुलान कालची आग्गी कास्का नीला फडीनीर इंगा पेत्र पण वार जताक आग्गी कास्कुंदु.
महायाजक हन्नाड येशुनदी पुछताछ
19आप्पुड महायाजक येशुन वान शिष्यला बद्दल इंगा वान शिक्षन बद्दल प्रश्न आडग्या. 20येशुड वानकी उत्तर इच्या, “निन दुन्यामलोन मंदी जताक उघडपणे माटलाडतीन, सभास्थानला इंगा परमेश्वर भवनलोन आंगळामला, यंदु आंदार यहुदी मंदी जमा आयतार, आंदु निन नेहमी नेरपुतीन इंगा येमीच दाशी फेट्टालेद. 21नन्नु येनटीक दिन बद्दल आडगुतार? निन येम माटलाडतीन आदी यवार इनीनार वारनी आडगुना. सुडना, निन येम माटलाडतीन आदी वारकी यरका उंडाद.” 22आप्पुड भवनलोन शिपाईला लोन्केल वगाड यवाड येशुन देगार नीला फडीन्या, येशुन शम्पाक मती आन्या, “नु महायाजकी इल्ला उत्तर इस्ताव येम?”#लूक 22:63; मीखा 5:1. 23येशुड वानकी उत्तर इच्या, “निन वाईट माटलाडीन्टे तर यल्ला वाईट माटलाडतीन आदी सिद्ध शेय; बरोबर माटलाडीन्टे तर नन्नु येनटीक मतताव?” 24आप्पुड हन्नाड वान महायाजक कैफा इन तीकुड कट्टीगासे आंप्या.
पेत्र येशुन गुरतु फट्टेद इंगा नकार शेस्ताड
25शिमोन पेत्र आग्गी कास्का नीला फडीन्या; आप्पुड वार वान आनीर, “नु पण वान शिष्यल लोन्केल उंडाव येम?” वाड नकार इच्या इंगा आन्या, “निन लेन.” 26पेत्रड यवानदी गुम्मा कोशिन्या वान देग्गाटोड उंडीने, महायाजक दासला लोन्केल वगाड, वान आन्या, “निन निन्नु वान जताक बगीच्याला सुडालेद येम?” 27पेत्रड इंगा नकार इच्या, आप्पुड लगेच फुंजु आरशा.
पिलात मुंदार येशुड
मत्तय 27:1,2,11-14; मार्क 15:1-5; लूक 23:1-5
28आप्पुड वार येशुन कैफान देगाटेल किल्लालोंग येका फोईर आप्पुड फद्दु फुट्टीन्या इंगा मनाम अशुद्ध कावाराद, पण वल्हांडन फंडगाद वंटा तिना दावाला आंका वार स्वताने किल्लालोंग फोक फोईर. 29दिनिचांग पिलात वार तीकुड बैटीक वच्ची आन्या, “मीर इ मनशी मिंदा येम आरोप आंचतार?” 30वार वानकी उत्तर इच्चीर, “वाड अपराधी लेकुंटे तर मिम वान नी शेतल्या इयाक उंटीम.” 31पिलात वारनी आन्या, “मीरे मी नियमशास्त्र लेका वानदी न्याय शेयना.” यहुदी अधिकारील वान आनीर, “माक यवारदीच जेम तिस्कुनेद अधिकार लेद.” 32वाड यल्ला सच्ची इदी शप्पेताप्पुड येशुड जे वचन शप्पीन्या आदी पुर्ण कावाला आंका इल्ला आय्या.
33दिनिचांग पिलात वापस किल्लालोंग फोया; इंगा वाड येशुन फिल्ची आन्या, “नु यहुदी मंदी राजा उंडाव येम?” 34येशुड उत्तर इच्या, “नु इदी माटा नी मनता आडगुतुनाव का इंगोगोर निक ना बद्दल इल्ला शप्पीर?” 35पिलात उत्तर इच्या, “निन यहुदी उंडान येम? नी मंदी इंगा मुख्य याजकलु निन्नु ना शेतल्या इच्चीनार; शप येम शेशीनाव नु.” 36येशुड उत्तर इच्या, “नाद राज्य इ दुन्यामदी लेद. नाद राज्य इ दुन्यामदी उंटे तर यहुदी अधिकारीला शेतल्या नन्नु इयाराद आंका ना सेवकलु लढाई शेस्तुनीर; पण नाद राज्य इंदुडदी लेद.” 37दिनिचांग पिलात वान आन्या, “तर नु राजा उंडाव येम?” येशुड उत्तर इच्या, “निन राजा उंडान इल्ला नु आंटाव. निन दिनिचांग फुट्टीनान इंगा दुन्यामलोंग वच्चीनान. की निन सत्यद साक्ष इयाला. यवाड पण सत्य तीकेल उंडाड वाड नाद माटा इंटाड.”
येशुड का बरब्बाड
मत्तय 27:15-31; मार्क 15:6-20; लूक 23:13-25
38पिलात वान आन्या, “सत्य येम उंडाद?” इंगा इंता माटलाडी वाड इंगा यहुदी अधिकारीला तीकुड बैटीक फोया इंगा वारनी आन्या, “नाक तर वान लोना येमीच दोष कमसाद. 39पण मिद वगाट परंपरा उंडाद की वल्हांडन फंडगा आप्पुड निन मी इचांग वगा कैदीन इडवाला. तर मिद इच्छा उंडाद येम की निन मी इचांग यहुदी मंदी राजान इडवाला?” 40इ माटा मिंदा वार कीरली आनेदेंक आंटीर, “इन इडवा कुंडा, तर बरब्बान इडना” इंगा बरब्बाड वगा डाकु उंड्या.
Currently Selected:
JHN 18: WNT
Highlight
Share
Compare
Copy
Want to have your highlights saved across all your devices? Sign up or sign in
