JHN 21
21
तिबिर्या सरोवर देगार शिष्यलाक दर्शन
1इ माटलु आयनेंका येशुड स्वतान तिबिर्या सरोवर#21:1 तिबिर्या सरोवर इदी गालील सरोवरदी इंगोगोट वगाट फेर उंडाद देगार शिष्यलाक प्रकट शेशा; इंगा इल्ला प्रकट शेशा. 2शिमोन पेत्र इंगा यवान दिदुम आंटार वाड थोमा, गालील प्रांतलोन काना नगरलोन नथनेल इंगा जब्दीन कोडकु इंगा शिष्यला लोन्केल इंगोगो इद्दार वगातळा उंडीर. 3शिमोन पेत्र वारनी आन्या, “निन मिल फट्टेदेंक फोयतान.” वार वान आंटार, “मिम पण नी जताक वस्ताम.” आप्पुड वार यल्ली नावलोंग यक्कीर पण आ मोब्बुला वार येमीच फट्टालेद.
4पण फद्दु फुट्टेताप्पुड येशुड सरोवर कंटाम मिंदा नीला फडीन्या, पण वाड येशुड उंड्या इदी शिष्यलाक तेल्वालेद. 5आप्पुड येशुड वारनी आन्या, “हे बिळ्ळालाला, मी देगार तिनेदेंक येमाना उंडाद येम?” वार वान आनीर, “लेद.” 6इंगा वाड वारनी आन्या, “नाव मंची तीकुड जाळी येयना आंटे मिक शिक्की.” आंका वार येशीर इंगा मिल शेंगेम उंडीने इचांग आदी वारकी जग्गा दाकुंदु.
7आप्पुड या शिष्य मिंदा येशुनदी प्रेम उंड्या वाड पेत्रन आन्या, “इड प्रभुड उंडाड.” शिमोन पेत्र इन्या की, इड तर “प्रभुड उंडाड, प्रभुड उंडाड” आप्पुड वाड बऱ्या फयता उंड्या आंका (वाड बैटुड बट्टाल, आंगी, यस्कुना लेकुंड्या आंका) वाड नडमुलाक आंगी गुंडाळीच कुन्या इंगा सरोवरला उडी मत्या. 8पण बाकी शिष्यल नावता मिलाता निंडीनेद जाळी जग्गुका वच्चीर येनटीक की वार कंटाम मिंदकेल जास्त धुराम लेकुंडीर, तर शंभर मीटर मिंदा उंडीर.
9यप्पुड वार कंटाम मिंदीक वच्चीर आप्पुड वार बोग्गुल कालचीनेद आग्गी इंगा दान मिंदा फेटनेय मिल इंगा रोट्याल सुशा. 10येशुड वारनी आन्या, “मीर इप्पुड फट्टीने मिला लोन्केल काही मिल येतका दांडा.” 11आप्पुड शिमोन पेत्र नाव मिंदीक यक्की एकशे त्रेपन्न फेद्दा मिलाता निंडीनेद जाळी कंटाम मिंदीक जग्गुका वच्या. इंगा इन्नोट मिल उंडीगास पण जाळी शिंगालेद. 12येशुड वारनी आन्या, “दांडा, रोट्या तिनना.” येनटीक की वाड प्रभुड उंडाड इदी वार गुरतु फट्टीर आंका नु यवाड उंडाव इल्ला वान आडगेद शिष्यल लोन्केल यवारुच हिम्मत शेयालेद. 13आप्पुड येशुड वच्या वाड रोट्या तिस्कुन्या इंगा वारकी इच्या; आल्ले मिल इच्या 14इदी तिसरातुक उंड्या, की येशुड सच्चीनोर लोन्केल लेशीनेंका वान शिष्यलाक दर्शन इच्चीन्या.
पेत्रक येशुनदी आदेश
15मंग रोट्या तिनीनेंका येशुड पेत्रन आन्या, “योहान कोडकु शिमोना, इर काना जास्त नु ना मिंदा प्रेम शेस्ताव येम?” वाड वान आन्या, “हुं, प्रभु, निक यरका उंडाद की, निन नी मिंदा प्रेम शेस्तान.” वाड वान आन्या, “ना कोकरुल मेप.” 16वाड इंगा इंगोगो तुक वान आन्या, “योहान कोडकु, शिमोना, नु ना मिंदा प्रेम शेस्ताव येम?” वाड वान आन्या, “हुं, प्रभु, निक यरका उंडाद की, निन नी मिंदा प्रेम शेस्तान.” वाड वान आन्या, “ना मेंढऱ्याल साक.” 17येशुड तिसरातुक पेत्रन आन्या, “योहान कोडकु, शिमोना, नु ना मिंदा प्रेम शेस्ताव येम?” पेत्र दुखी आय्यी वान आन्या, “हे प्रभु, निक तर आंताच यरका उंडाद, निक इदी यरका उंडाद की, निन नी मिंदा प्रेम शेस्तान.” येशुड वान आन्या, “ना मेंढऱ्याल मेप.” 18“निन नीक खरे-खरेम शपतान, नु यप्पुड जवान उंटी आप्पुड नी नडमुल कट्टी नीद इच्छा आयदु आक्काड नु फोदु; पण नु मुसल्योड आय्याव आप्पुड शेतुल मुंदारकी शेशाव, आप्पुड इंगोगोर यवार तरी नी नडमुल कट्टी इंगा नीद इच्छा लेद आक्काड निन्नु जग्गुका येकेन फोई.” 19पेत्र यल्ला सच्ची परमेश्वरदी गौरव शेशी इदी प्रकट शेशेदेंक वाड इल्ला माटलाड्या इंगा इदी माटलाडीनेंका वाड वान आंटाड, “ना यंका दा.”
येशुड इंगा वान प्रिय शिष्य
20पेत्र यंकाक तिरग्या आप्पुड सुशा की, या शिष्य मिंदा येशुनदी प्रेम उंड्या, यवाड तिनेताप्पुड वान यदालकी नत्ती टेकाशी कुस्नीनाप्पुड 'प्रभु, निन्नु फट्टी इच्चेतोड यवाड उंडाड?' इल्ला येशुन आडगीन्या, आ शिष्यन वच्चेताप्पुड सुशा. 21दिनिचांग, वान सुशी, पेत्र येशुन आन्या, “प्रभु, इनदी येम आय्यी?” 22येशुड वान आन्या, “निन वच्ची नंताक वाड जित्ता निलवाला इल्ला जरी नाद इच्छा उंटे तरी दानदी नीक येम? नु ना यंका दा.” 23आप्पुड शिष्यलाला इदी माटा पसराशा की, वाड शिष्य सय्याक फोई. पण येशुड वान आना लेकुंड्या की, वाड सय्याक फोई, पण “निन वच्ची नंताक वाड जित्ता निलवाला इल्ला जरी नाद इच्छा उंटे तर नीक येम?”
शेवट
24इड वाडे शिष्य उंडाड, यवाड इ माटलाद साक्ष इस्ताड इंगा यवाड इ माटलु राशीनाड इंगा माक यरका उंडाद, की वानदी साक्ष खरेम उंडाद.
25इंगा पण शेंगेम फनुल उंडाय, याय येशुड शेशीनाड; जर आय वगोगोट राशीन्टे, तर नाक वाटास्ताद, की राशीनेय पुस्तकलु इ दुन्यामला पण फट्टा कुंटुन्या.
Currently Selected:
JHN 21: WNT
Highlight
Share
Compare
Copy
Want to have your highlights saved across all your devices? Sign up or sign in
