JHN 7
7
येशुन तम्मुळ्ळाद अविश्वास
1दान बाद येशुड गालील प्रांतलोन अलग-अलग ठिकाणलाला तिरगेदेंक आंट्या, येनटीक की यहुदी अधिकारील वान मतेशेदेंक सुदुर. आंका वानकी यहुदीया प्रांतला तिरगाबुदी कालेद. 2यहुदी मंदीद गुडशालदी फंडगा देगार वच्चीन्या.#लेवी 23:34. 3दिनिचांग वान तम्मुळ्ळु वान आनीर, “नु इंदुकेल यहुदीया प्रांतलोंग फो, आंटे नु शेस्ताव आय फनुल नी शिष्यल पण सुशार. 4यवाड पण प्रसिद्ध आयेदेंक सुस्ताड वाड दोंगातारला येमीच शेयाड. नु इ माटलु शेस्तुन्याव तर स्वताक दुन्यामलोन मंदीक प्रकट शेय.” 5येनटीक की वान तम्मुळ्ळु पण वान मिंदा विश्वास फेटा कुंदुर.
6दिन मिंदकेल येशुड वारनी आन्या, “फंडगाक फोयेद नाद वेळ इंगाना दालेद; मिद वेळ तर नेहमी बरोबर उंटाद. 7दुन्यामलोन मंदी मिद कोफाम शेशी शकायार; पण वार नाद कोफाम शेस्तार, येनटीक की निन दिन बद्दल साक्ष इस्तान की वारी फनुल वाईट उंडाय. 8मीर फंडगाक फोंडा, निन इप्पुडे इ फंडगाक दान येनटीक की नाद वेळ इंगाना दालेद.” 9इल्ला वारकी शप्पी वाड गालील प्रांतला निलच्या.
मंडप फंडगाला येशुड
10येशुन तम्मुळ्ळु फंडगाक फोयनेंका काही नाळा बाद वाड पण, यवारकी कमसान्दे दोंगातारला फंडगाक फोया. 11आप्पुड, यहुदी मंदी अधिकारील वान फंडगाला फुडकुदुर इंगा आंदुर, “वाड उंडाड तरी यंदु?” 12इंगा मंदीला पण वान बद्दल शेंगेम माटलु सुरु आय्या. इंगा यंता तरी मंदी आंदुर, “वाड शिंगार मनशी उंडाड:” इंगोगोर काही मंदी आंदुर, “लेद, वाड मंदीन फसाय मतताड.” 13तरी यहुदी मंदी अधिकारीला येरपु इचांग यवारुच वान बद्दल मोकळा माटलाडा कुंदुर.
फंडगाला येशुनदी शिक्षण
14मंग आर्दाम फंडगा आयनेंका येशुड फैनिक परमेश्वर भवनलोंग फोई नेरपेदेंक आंट्या. 15आप्पुड यहुदी मंदी अधिकारील आश्चर्य शेशी आनेदेंक आंटीर, “नेरवांदे इनकी ज्ञान यंदुकेल वच्या?” 16दिन मिंदकेल येशुड वारकी उत्तर इच्ची आन्या, “नाद नेरपुकाम नाद लेद तर यवाड नन्नु आंपीनाड वानदी उंडाद. 17यवाड पण वान इच्छा लेका शेशेद इच्छा फेट्टी वाड पण इदी नेरपुकाम परमेश्वर तीकेल उंडाद का निन ना मनता माटलाडतान इदी तेल्ची. 18यवाड स्वता मनता माटलाडताड, वाड स्वतादे गौरव शेस्ताड, पण मनालनी यवाड आंप्या वानदी गौरव यवाड सुस्ताड आ मनशी खरेम उंडाड इंगा वान लोना पाप लेद. 19मोशेड मिक नियमशास्त्र इच्या का लेद? तर पण मी दिंटल्योन्टोर यवारुच नियमशास्त्र पाळायार. मीर नन्नु जेमता मतेशेदेंक येनटीक सुस्तुनार?”
20मंदी वानकी उत्तर इच्ची आनीर, “नीक दैयाम फट्टीनाद. निन्नु जेमता मतेशेदेंक यवार सुस्तुनार?” 21येशुड वारकी उत्तर इच्ची आन्या, “निन वगा फनी शेस्तीन आंका मीर आंदार आश्चर्य शेस्तुनार. 22मोशेड मिक सुंताद नियम आंची इच्या (तरी आदी मोशेन तीकेल लेकुंड्या पण मी पुर्वजला तीकेल उंड्या.) इंगा मीर शब्बाथ दिनमुनाड मनसुलाद सुंता शेस्तार.#उत्पत्ती 17:10-13; लेवी 12:3. 23मोशेनदी नियमशास्त्र तेम्पाराद आंका मनशीद सुंता जर शब्बाथ दिनुमनाड आयताद तर, निन शब्बाथ दिनुमनाड वगा मनशीन बागा शेस्तीन दानिचांग मीर ना मिंदा शिट्टु फडतार येम? 24मुती सुशी न्याय शेयाकुंडा तर खरेम न्याय शेयना.”
येशुडे ख्रिस्त उंडाड येम
25दिन मिंदकेल यरुशलेम लोन्टोर यंता तरी मंदी आनेदेंक आंटीर, “यवान मा अधिकारील जेमता मतेशेदेंक सुस्तुनाम वाड इडे गरा? 26पण सुडना, वाड आंदार मुंदार माटलाडतुनाड इंगा यवारुच वान येमीच आनार. इडे ख्रिस्त उंडाड, इदी खरेम मा अधिकारीलाक तेल्चीनाद येम? 27तरी वाड यंदुटोड उंडाड इदी माक यरका उंडाद; पण ख्रिस्त वच्ची आप्पुड वाड यंदुटोड उंडाड इदी यवारकीच तेल्वाक फोई.”
28आप्पुड येशुड परमेश्वर भवन आंगळामला नेरपेताप्पुड बेग्गे आन्या, “मीर नन्नु गुरतु फटतार इंगा निन यंदुटोड उंडान इदी मिक यरका उंडाद; तरी निन स्वताहुन दालेद; यवाड नन्नु आंपीनाड वाड खरेम उंडाड, वान मीर गुरतु फट्टार. 29निन वान गुरतु फटतान, येनटीक की निन वान तीकेल उंडान इंगा वाड नन्नु आंपीनाड.”
30दिन मिंदकेल वार वान फट्टेदेंक सुशीर, तरी यवारुच वानकी धक्का आंची शकायाक फोईर, येनटीक की वानदी वेळ इंगाना दालेकुंड्या. 31आप्पुड मंदी समुदाय लोन्केल शेंगेम मंदी वान मिंदा विश्वास फेटीर इंगा वार आनेदेंक आंटीर, “ख्रिस्त वच्ची आप्पुड इड शेशीने चिन्हला काना जास्त वाड शेशेतोड उंडाड येम?”
येशुन फट्टेद प्रयत्न
32मंदी येशुन बद्दल इल्ला माटलाडतुनार इदी परुशी मंदी इनीर इंगा मुख्य याजक मंदी इंगा परुशी मंदी वान फट्टेदेंक भवनलोन शिपाईल आंपीर.
33दिन मिंदकेल येशुड वारनी आन्या, “निन इंगा काही वेळ मी जताक उंडान मंग यवाड नन्नु आंपीनाड वान तिकुड निन फोयेतोड उंडान. 34मीर नन्नु फुडक्यार तरी निन मिक शिक्काक फोयान इंगा यंदु निन उंड्यान आंदुक मीर वच्ची शकायाक फोयार.”
35दिन मिंदकेल यहुदी मंदी अधिकारील वगामेगारनी आनीर, “इड मनाक शिक्केतोड लेड इल्ला इड यंदुक फोयतुनाड? इड ग्रीकला फैलाशीने मना यहुदी मंदीक इंगा ग्रीक मंदीक फोई वारकी नेरपी येम? 36इड येम आंटुनाड की, ‘मीर नन्नु फुडक्यार पण निन मिक शिक्का फोयान इंगा निन उंड्यान आंदुक मीर वच्ची शकायाक फोयार,’ दिनदी अर्थ येम उंडाद?”
जित्ता नेळाय वंकाल
37मंग फंडगा आखरी दिनमुनाड आंटे फेद्दा दिनुमनाड, येशुड नीला फडी बेग्गे कीरली आन्या, “यवानकी आना दुपाक आइंटे तर वाड ना देगार दावाला इंगा तागाला.#यशया 55:1. 38यवाड ना मिंदा विश्वास फेटताड वान अंतकरण लोन्केल पवित्र शास्त्रला शप्पीनेलेका जित्ता नेळाय वंकाल वाहाशी.” 39या मंदी वान मिंदा विश्वास फेट्टीर वारकी जे पवित्र आत्मा शिक्केद उंड्या, दान बद्दल वाड इदी वचन आन्या. आड नंताक पवित्र आत्मा दालेकुंड्या, येनटीक की इंगाना येशुनदी गौरव कालेकुंड्या#7:39 येशुनदी गौरव कालेकुंड्या दिनदी अर्थ येशुनदी सच्चेद, पुनरुत्थान इंगा स्वर्गलोंग फोयेद इदी उंडाद .
येशुन बद्दल मंदीला वादविवाद
40येशुनदी इदी माटा इनी मंदी लोन्केल काही मंदी इल्ला आनेदेंक आंटीर, “खरेमे, इड संदेष्टा उंडाड.” 41काही मंदी आनीर, “इड ख्रिस्त उंडाड.” इंगोगोर काही मंदी आनीर, “ख्रिस्त गालील प्रांत लोन्केल वच्चेतोड उंडाड येम? 42दाविद राजा वंश लोन्केल इंगा या उळ्या दाविद राजा उंड्या आ बेथलहेम नगर लोन्केल ख्रिस्त वच्ची इल्ला पवित्र शास्त्रला राशीनेद लेद येम?”#यशया 11:1; मीखा 5:2. 43दिन मिंदकेल वान इचांग मंदीला फुट फड्या. 44वार दिंटल्योन्केल काही मंदी वान फट्टेदेंक सुदुर, तरी पण यवारुच वानकी धक्का आंचाक फोईर.
यहुदी मंदी अधिकारीलाद अविश्वास
45मंग भवनलोन शिपाईल मुख्य याजक इंगा परुशी मंदी तीकुड वच्चीर, आप्पुड वार शिपाईलान आनीर, “मीर वान येनटीक येकेन दालेद?” 46शिपाईल उत्तर इच्चीर, “यादुच मनशी वान लेका यप्पुडुच माटलाडा लेद.” 47आप्पुड परुशी मंदी वारकी उत्तर इच्चीर, “मीर पण फसाशीनार येम? 48यहुदी मंदी अधिकारीला लोन्केल इंगा परुशी मंदी लोन्केल यवाराना वान मिंदा विश्वास फेटनार येम? 49पण इ मंदी यवारकी मोशेनदी नियमशास्त्र यरका लेद वार शापित उंडार.” 50यवाड पहिला येशुन तीकुड वच्चीन्या इंगा वार दिंटल्योन्टोड वगाड उंडीन्या वाड निकदेम वारनी आन्या. 51मोशेनदी नियमशास्त्र येम वगा मनशीद पहिला इनी तिस्कुनांदे इंगा वाड येम शेस्तुनाड इदी यरका शेयांदे वानदी न्याय शेस्ताद येम? 52वार वानकी उत्तर इच्ची आनीर, “नु पण गालील प्रांत लोन्टोड उंडाव येम? पवित्र शास्त्रला फुडकु इंगा सुड, येनटीक की गालील प्रांत लोन्केल यवाडुच संदेष्टा प्रकट काड.” 53मंग वार आंदार मना-मना इल्लुक फोईर.
Currently Selected:
JHN 7: WNT
Highlight
Share
Compare
Copy
Want to have your highlights saved across all your devices? Sign up or sign in
