JHN 8
8
व्यभिचारी आंडीद
1येशुड जैतुन कोंडा तीकुड फोया. 2मंग फद्दीना वाड वापस परमेश्वर भवनलोंग वच्या, आप्पुड आंता मंदी वान तीकुड वच्चीर इंगा वाड कुसनी वारकी नेरपेदेंक आंट्या. 3आप्पुड व्यभिचार शेशेताप्पुड फट्टीने वगा आंडीदान नियमशास्त्र शिक्षकलु इंगा परुशी मंदी वान तीकुड यकोचीर इंगा दान नडमा नीला फडामती वार वान आनीर, 4“गुरुजी, इ आंडीद व्यभिचार शेशेताप्पुड शिक्कीनाद. 5मोशेड नियमशास्त्रला माक इल्ला आज्ञा इच्चीनाड की, इल्लोन्टोरनी राळाता मतेस्काडाला, तर दिन बद्दल नीद येम मन्न उंडाद?”#लेवी 20:10; अनुवाद 22:22-24. 6वान मिंदा दोष आंचेदेंक वारकी येमाना शिक्काला आंका वार वानदी परीक्षा सुशेदेंक इल्ला आनीर, पण येशुड किंदा वंगी वान बोटता भुमी मिंदा राशेदेंक आंट्या. 7इंगा वार वान आडगुकाने उंडीर आप्पुड वाड लेशी वारनी आन्या, “मी नडमा यवाड निष्पाप उंडी वाड पहिला दानकी वगाट राय मताला.” 8मंग वाड वापस किंदा वंगी भुमी मिंदा राशेदेंक आंट्या. 9इदी माटा इनी फेद्दावोर केल शिन्नावोर नंताक आंदार वगार यंका वगार यल्ली फोईर, येशुड वक्काडे निलच्या इंगा आदी आंडीद नडमा नीला फडीनेद उंड्या. 10मंग येशुड लेशा इंगा आ आंडीदान इडशी आंदु यवारुच लेर इल्ला सुशी दान आन्या, “बिडा, निक दोष आंचेतोर यंदु उंडार? निक यवारुच दंड इयालेद येम?” 11आदी आन्या, “प्रभुजी, यवारुच लेद.” आप्पुड येशुड दान आन्या, “निन पण निक दोष आंचान; फो दिन मुंदारकी पाप शेय्याक.”
येशुड दुन्यामदी यलगु
12मुंदारकी येशुड वापस वारनी आन्या, “निने दुन्याम इचांग यलगु उंडान; यवाड ना यंका वच्ची वाड मोब्बुला नडवाक फोई, तर वान देगार जीवनदी यलगु उंडी.”#योहान 12:46.
13दिन मिंदा परुशी मंदी वान आनीर, “नु स्वता बद्दल साक्ष इस्ताव, नीद साक्ष खरेम लेद.” 14येशुड वारनी आन्या, “निन स्वता बद्दल साक्ष इस्तीन तरी नाद साक्ष खरेम उंडाद, येनटीक की निन यंदुकेल वस्तीन इंगा यंदुक फोयान इदी नाक यरका उंडाद; पण निन यंदुकेल वस्तीन इंगा यंदुक फोयान इदी मिक यरका लेद. 15मीर मनशी बुद्धीता न्याय शेस्तार; निन यवारदी न्याय शेयान. 16इंगा जरी निन यवारदी आना न्याय शेशीन्टे तर नाद न्याय खरेम उंडाद येनटीक की निन वक्काडे लेन पण निन उंडान इंगा यवाड नन्नु आंपीनाड वाड पण उंडाड. 17मी नियमशास्त्रला इल्ला राशीनेद उंडाद की, इद्दार मनसुलाद साक्ष खरेम उंडाद. 18निन स्वता बद्दल साक्ष इस्तान इंगा या आब्बाड नन्नु आंपीनाड वाड पण ना बद्दल साक्ष इस्ताड.”#अनुवाद 19:15. 19दिन मिंदकेल वार वान आनीर, “मी आब्बाड यंदु उंडाड?” येशुड उत्तर इच्या, “मीर नन्नु इंगा ना आब्बान गुरतु फट्टार मीर नन्नु गुरतु फट्टीन्टे तर ना आब्बान पण गुरतु फटतुंटीर.” 20वाड परमेश्वर भवनला नेरपेताप्पुड वचनलु भवन परिसरला माटलाड्या; पण यवारुच वान फट्टाक फोईर, येनटीक की वानदी वेळ इंगाना दालेकुंड्या.
स्वता बद्दल येशुनदी माटलाडकाम
21येशुड वापस वारनी आन्या, “निन यल्ली फोयतान इंगा मीर नन्नु फुडक्यार इंगा मीर मी पापलाला सच्यार, निन यंदुक फोयतान आंदुक मीर वच्ची शकायार.” 22दिन मिंदा यहुदी मंदी अधिकारील आनीर, “इड आत्महत्या शेस्कुंटाड येम? येनटीक की इड आंटाड की, निन फोयतान आंदुक मीर वच्ची शकायार.” 23वाड वारनी आन्या, “मीर किंदुटोर उंडार, निन मिंदुटोड उंडान; मीर इ दुन्यामटोर उंडार, निन इ दुन्यामटोड लेन. 24दिनिचांग निन मिक शपतीन की, मीर मी पापलाला सच्यार; येनटीक की निन वाड उंडान इल्ला मीर विश्वास फेट्टाकुंटे तर मीर मी पापलाला सच्यार.” 25दिन मिंदकेल वार वान आनीर, “नु यवाड उंडाव?” येशुड वारनी आन्या, “पहिलाकेल मिक येम शपका वस्तीन वाडे लेन येम? 26नाक मी बद्दल शेंगेम माटलाडेद उंडाद इंगा न्याय शेशेद उंडाद, पण यवाड नन्नु आंपीनाड वाड खरेम उंडाड इंगा याय माटलु निन वान तीकेल इंटीन आय निन दुन्यामकी शपतुनान.” 27वाड वारकी आब्बान बद्दल शपदु इदी वारकी तेल्वालेद. 28आप्पुड येशुड वारनी आन्या, “मीर यप्पुड मनशी कोडकुन फैनिक येत्यार आप्पुड मिक इदी तेल्ची की निन वाडे उंडान इंगा निन स्वता येमीच शेयालेद तर आब्बाड नाक येम शप्पीनाड आल्ले निन इदी शेस्तान. 29यवाड नन्नु आंपीनाड वाड ना जताक उंडाड; वाड नन्नु वक्काने इडवा लेड; येनटीक की निन नेहमी आद्दे फनी शेस्तान, याद वानकी आवडास्ताद.” 30येशुड इदी माटलाडेताप्पुड शेंगेम मंदी वान मिंदा विश्वास फेट्टीर.
सत्य मिमलान स्वतंत्र शेशी
31या यहुदी मंदी वान मिंदा विश्वास फेट्टीर वारनी येशुड आन्या, “मीर ना वचनला निलच्यार तर खरेमे मीर ना शिष्यल उंडार. 32मिक सत्य तेल्ची इंगा सत्य मिमलान बंधनमुक्त शेशी.” 33वार वानकी उत्तर इच्चीर, “मिम अब्राहाम वंशजलु उंडाम इंगा यप्पुडुच यवार गुलाम कालेद. नु मोमलान यल्ला आंटाव की, मीर स्वतंत्र आय्यार?”
34येशुड वारकी उत्तर इच्या, “निन मिक खरे-खरेम शपतान, यवाड पण पाप शेस्ताड वाड पाप गुलाम उंडाड.#गलती 4:30. 35गुलाम नेहमी इंटल्या निलवाड; कोडकु नेहमी इंटल्या निलस्ताड. 36दिनिचांग जर कोडकु मिमलान बंधनमुक्त शेस्ते तर मीर, खरेमे, स्वतंत्र आय्यार. 37नाक यरका उंडाद की, मीर अब्राहाम वंशजलु उंडार, तरी मी देगार ना वचनकी जागा लेद, दिनिचांग मीर नन्नु जेमता मतेशेदेंक सुस्तार. 38निन आब्बान देगार येम सुस्तीन, आद्दे माटलाडतान आल्ले मीर मी आब्बान तीकेल येम इंटार आद्दे शेस्तार.”
शैतान बिळ्ळु
39वार येशुनकी उत्तर इच्चीर, “अब्राहाम मा आब्बाड उंडाड.” येशुड वारनी आन्या, “मीर अब्राहाम बिळ्ळु उंडार तर अब्राहाम लेका फनुल शेशार. 40पण यवाड परमेश्वर तीकेल इनीनेद सत्य मिक शप्या आ मनशीन आंटे नन्नु मीर इप्पुड जेमता मतेशेदेंक सुस्तार. अब्राहाम इल्ला शेयालेद. 41मीर मी आब्बान लेका फनुल शेस्तार,” वार वान आनीर, “माद जन्म व्यभिचारता कालेद. माक वक्काडे आब्बाड आंटे परमेश्वर उंडाड.” 42येशुड वारनी आन्या, “परमेश्वर जर मी आब्बाड उंटे तर मीर ना मिंदा प्रेम शेस्तुंटीर; येनटीक की निन परमेश्वर तीकेल वच्चीनान, निन स्वताहुन दालेद, पण वाड नन्नु आंपीनाड. 43मिक नाद माटा येनटीक तेल्वाद? दिनदी कारण इद्दे उंडाद की, मीर नाद वचन इनी शकायार. 44मीर मी आब्बाड शैतान तीकेल आयनार इंगा मी आब्बान वासनाल लेका शेशेदेंक सुस्तार. वाड सुरुवातकेल मनशीद घात शेशेतोड उंड्या इंगा वाड सत्यला टिकायालेद, येनटीक की वान लोना सत्य लेद. वाड यप्पुड खोटा माटलाडताड आप्पुड वाड वानदे माटलाडताड, येनटीक की वाड लबाड इंगा लबाडोन आब्बाड उंडाड.#प्रेषित 13:10. 45निन तर मिक खरे-खरेम शपतान तरी पण मीर ना मिंदा विश्वास फेट्टार. 46मी दिंटल्योन्टोड यवाड नन्नु पापी ठराय मतताड? निन मिक खरेम शपते मीर ना मिंदा येनटीक विश्वास फेट्टार? 47यवार परमेश्वर तीकेल उंडार वार परमेश्वरी वचनलु इंटार. मीर परमेश्वर तीकेल लेर आंका मीर इनार.”
येशुड इंगा अब्राहाम
48यहुदी मंदी अधिकारील येशुन आनीर, “नु शोमरोनी उंडाव इंगा निक दैयाम फट्टीनाद. इदी जे मिम आंटाम आदी बरोबर उंडाद का लेद?” 49येशुड वारकी उत्तर इच्या, “नाक दैयाम फट्टालेद; तर निन ना आब्बानदी आदर शेस्तान इंगा मीर नाद अपमान शेस्तार. 50नाक स्वताद गौरव शेशेद लेद; इदी सुशेतोड इंगा न्याय शेशेतोड उंडाड. 51निन मिक खरे-खरेम शपतान, जर यवाडाना नाय वचनलु पाळाशी तर वानकी सच्चेद अनुभव यप्पुडुच दाक फोई.” 52यहुदी मंदी वान आनीर, “इप्पुड माक तेलच्या की, निक दैयाम फट्टीनाद. अब्राहाम सच्या इंगा संदेष्ट्यालबी सच्ची फोईर; इंगा नु आंटाव की, यवाड नाय वचनलु पाळाशी तर वाड यप्पुडुच सच्चेद अनुभव तिस्कुनाक फोई. 53मा पुर्वज अब्राहाम तर सच्ची फोया; नु वान काना फेद्दावोड उंडाव येम? इंगा संदेष्ट्यालबी सच्ची फोईर; नु स्वतान येम समजास्ताव?” 54येशुड उत्तर इच्या, “निन स्वतादे गौरव शेस्ते तर नाद गौरव येमीच लेद, नाद गौरव शेशेतोड ना स्वर्गीय आब्बाड उंडाड, वाड मा परमेश्वर उंडाड इल्ला मीर वान बद्दल आंटार. 55तरी मीर वान गुरतु फट्टार, निन वान गुरतु फटतान इंगा निन वान गुरतु फट्टान इल्ला जर निन आंटीन, तर निन मी लेका लबाड ठराशान. पण निन वान गुरतु फटतान इंगा वानी वचनलु पाळास्तान. 56नाद दिनमु सुशेदेंक मी पुर्वज अब्राहाम उत्सुक आयन्या; आदी वाड सुशा इंगा वानकी आनंद आय्या.” 57यहुदी मंदी अधिकारील वान आनीर, “नीद वय पन्नास वर्ष पण कालेद इंगा नु अब्राहामनी सुशीनाव येम?” 58येशुड वारनी आन्या, “निन मिक खरे-खरेम शपतान, अब्राहामदी जन्म आय्या दान काना पहिला निन उंडान.” 59इदी इनी वार वानकी मतेदेंक राळ यत्तीर, पण येशुड परमेश्वर भवनलेल दोंगातारला यल्ली फोया.
Currently Selected:
JHN 8: WNT
Highlight
Share
Compare
Copy
Want to have your highlights saved across all your devices? Sign up or sign in
