LUK 14
14
शब्बाथनाड बागा शेशेद
1वगा शब्बाथ दिनमुनाड येशुड परुशी अधिकाऱ्याल लोन्केल वगान इल्लुक तिनेदेंक फोया, आप्पुड आंदु जमा आयनोर येशुन मिंदा कन्नु फेट्टीगास उंडीर. 2इंगा आंदु वान मुंदार जलोदर रोग आयनोड वगा मनशी उंड्या. 3येशुड नियमशास्त्र शिक्षकलान इंगा परुशी मंदीन आडग्या, “शब्बाथ दिनमुनाड बागा शेशेद बरोबर उंडाद का लेद?” 4पण वार शांत निलचीर. आप्पुड येशुड आ बिमार मनशीन बागा शेशा इंगा वान आंपकाड्या. 5मंग वाड वारनी आन्या, “मी दिंटल्योन्केल यवाराना मोगाबिडा लेकाते यद्दु जर बायला फड्या, तर वाड दान शब्बाथ दिनमुनाड लगेच बैटीक तीयाक फोई येम?” 6आप्पुड वारकी इ प्रश्न उत्तर इया दाक फो.
नम्रता इंगा सुट्टालदी सत्कार
7यप्पुड येशुड सुशा की आमंत्रित सुट्टाल स्वता इचांग मुख्य जागाल यल्ला निवडाशी तिस्कुंटुनार आप्पुड वाड वारकी वगाट दाखला शप्या, 8“यप्पुड यवाडाना निन्नु फेंडलीला तिनेदेंक आमंत्रित शेशी, आप्पुड नु मुख्य जागा मिंदा कुसनाक; येनटीक की आय्यी शकास्ताद की नी काना महत्वपुर्ण मनशीन वाड आमंत्रण इच्चीन्याला. 9मंग यवाड मी इद्दारनी आमंत्रित शेशीनाड वाड वच्ची निन्नु आनी, 'इनकी नीद जागा इ,' आप्पुड निक शिग्गुना फडी किंदा कुसना बेक आय्यी, 10पण यप्पुड निक आमंत्रण उंडी, आप्पुड नु फो इंगा आंदार काना किंदुड जागाला फोई कुसुन. दिनिचांग की, यप्पुड आमंत्रित शेशीनोड वच्ची, आप्पुड वाड निन्नु आनी, 'तम्मुडा, फैना आसन मिंदा कुसुन,' आप्पुड आंता सुट्टाल मुंदार नीद गौरव आय्यी.#स्तोत्रसंहिता 25:6-7. 11येनटीक की यवाड स्वतान फेद्दावोड शेस्ताड, वान शिन्नावोड शेशेदेंक वच्ची इंगा यवाड स्वतान शिन्नावोड शेशी वान फेद्दावोड शेशेदेंक वच्ची.”
12मंग यवाड येशुनकी आमंत्रण इच्चीन्या वान वाड आन्या, “यप्पुड नु मद्याना लेकाते फद्दु मुनगेताप्पुड मेजवानी इच्याव आप्पुड नु नी मित्रलान, तम्मुळ्ळान, नी गोनगोतलोन मंदीन इंगा श्रीमंत शेजाऱ्यालनी फीलवाक, येनटीक की आय्यी शकास्ताद की वार पण निक वापस आमंत्रण इच्यार इंगा इल्ला नी आमंत्रणदी परतफेड शेशार. 13पण यप्पुड नु मेजवानी इच्याव, आप्पुड गरीबोर, कुंट्योर, पांगळ्योर, गुड्ड्योर इरकी आमंत्रण इ. 14आंटे नु धन्य आय्याव, येनटीक की नीद परतफेड शेशेदेंक वार देगार येमीच लेद; पण नितीमान मंदीद पुनरुत्थान आय्यी आप्पुड निक दिनदी प्रतिफळ शिक्की.”
फेद्दा मेजवानीद दाखला
मत्तय 22:1-14
15मंग येशुन जताक तिनेदेंक कुसनीनोर लोन्केल वगाड इ माटलु इनी वान आन्या, “यवाड परमेश्वर राज्यला रोट्या तिनी, वाड धन्य.” 16मंग येशुड वान आन्या, “वगा मनशी वगा फेद्दा मेजवानीद तैयारी शेस्तुन्या, आप्पुड वाड शेंगेम मंदीक आमंत्रण इच्या. 17इंगा कुल्योनकी शप्पी आंप्या की, यवारकी आमंत्रण इच्चीनेद उंडाद वारकी फोई शप की, ‘इप्पुड दांडा, आंता तैयारी आयनेद उंडाद.’ 18पण वार आंदार निमित शप्पेदेंक आंटीर. वगाड वान आन्या, ‘निन शेन कोन्केन तिस्कुंडान नाक आदी फोई सुशेद उंडाद. निन निक विनंती शेस्तान, नन्नु क्षमा शेय.’ 19इंगोगोड आन्या, ‘निन यद्दुलाय आय्यीद जोड्याल कोन्केन तिस्कुंडान इंगा आटलान तपसायदेंक निन फोयतुनान, निन विनंती शेस्तान, नन्नु क्षमा शेय.’ 20इंगा वगाड आन्या, ‘निन फेंडली शेस्कुंडान आंका निन वच्ची शकायान.’ 21वाड कुल्योड वापस वच्या इंगा वान मालकुनकी इ आन्नी माटलु शप्या. आप्पुड इल्लु मालकुनकी शिट्टु लेशा इंगा वाड कुल्योन आन्या, ‘नगरलोन संताललोंग इंगा गल्लीलालोंग लग्गान फो इंगा गरीब, अपंग, गुड्ड्योर इंगा लंगड्योरनी वारनी इंदुक येकेन दा!’ 22कुल्योड आन्या, ‘मालक, नु इच्चीने आज्ञा लेका शेस्तीन इंगा तरी पण जागा खाली उंडाद.’ 23मालकुड कुल्योन आन्या, ‘नाद इल्लु निंडी फोवाला आंका दावाल मिंदीक इंगा गल्लीलालोंग फो इंगा आंदुड मंदीक आग्रह शेशी वारनी येकेन दा’ 24येनटीक की निन मिक शपतान की, आमंत्रित शेशीने आ मंदी लोन्केल वागानकी पण ना मेजवानी मिंदुडदी येमीच तिनी सुशेदेंक शिक्काक फोई.”
खरेम शिष्यल यवार?
मत्तय 10:34-39
25यप्पुड येशुन फेद्दा समुदाय नडस्तुन्या, आप्पुड वाड वार तिकुड तिरगी आन्या, 26“जर यवाडाना ना तीकुड वस्ताड इंगा वान आब्बान, आम्माद, वडतीद, बिळ्ळाद, तम्मुनदी, शेल्यालदी इंते लेद, तर स्वता जेमुद पण कोफाम शेयाड, तर वाड ना शिष्य आय्यी शकायाड.#मत्तय 10:37; योहान 12:25; अनुवाद 33:9. 27यवाड पण स्वताद क्रुस यतकेन ना यंका दाड, वाड ना शिष्य आय्यी शकायाड. 28मी दिंटल्योन्टोड यवाड इल्ला उंडाड की वानकी बुरुज कट्टेद उंडाद इंगा वाड पहिला कुसनी यंता खर्च आंटी इदी सुडाड, की आदी कट्टेदेंक साली इन्नी दुडलु वान देगार उंडाय का लेद? 29इल्ला कावाराद की वाड जोता येशी नेंका जर वानकी आदी पुर्ण शेयादाक फो तर सुशेतोर आंता मंदी वानदी मजाक यगरा मत्यार, 30इड मनशी कट्टेदेंक सुरु शेशा पण पुर्ण शेशी शकायाक फो! 31लेकाते इल्ला यवाड राजा उंडाड की वाड इंगोगो राजान जताक लढाई शेशेदेंक यल्लेताप्पुड पहिला कुसनी विचार शेयाड की, यवाड विस हजार सैनिकलान येकेन ना जताक लढाई शेशेदेंक वस्तुनाड, वान जताक लढाई शेशेदेंक निन दहा हजार सैनिकलान येकेन फोयते वानदी सामना शेशी शकाशान येम? 32जर वाड वानदी सामना शेशी शकायाक उंटे, तर वान शत्रु धुराम अंतर मिंदा उंडीनाप्पुड मध्यस्थन आंपी शांतीद माटा सुरु शेशी. 33दिनिचांग आल्ले मी दिंटल्योन्केल यवाड पण वान सर्वस्वद त्याग शेयाड, वाड ना शिष्य आय्यी शकायाड.
34 उप्पु शिंगार उंडाद, पण उप्पुद चव फो, तर दान रोस येनटीता शेया वच्ची? 35आदी भुमी इचांग इंगा खत इचांग पण येमीच फनीक फडाक फोई इंगा मंदी आदी फेकेस काड्यार. यवारकी इनेदेंक गुम्माल उंडाय वार इनाला.”
Currently Selected:
LUK 14: WNT
Highlight
Share
Compare
Copy
Want to have your highlights saved across all your devices? Sign up or sign in
