LUK 15
15
फाम फोयनेद मेंढऱ्या
मत्तय 18:10-14
1आंदार जकातदारलु इंगा पापी मंदी येशुनदी इनेदेंक वान देगार वस्तुनीर. 2आप्पुड परुशी इंगा नियमशास्त्र शिक्षकलु कुरकुर शेशेदेंक आंटीर. वार आनेदेंक आंटीर, “इड पापी मंदीन देगार शेशी वार जताक तिंटाड!”
3मंग येशुड वारकी इदी दाखला शप्या. 4“मी दिंटल्योन्केल यवाड इल्ला मनशी उंडाड की, वान देगार नुर मेंढऱ्याल उंडाय इंगा दांटल्योनदी वगाट फाम फोया, तर वाड नव्यान्नव मेंढऱ्यालनी शेल्ला इडशी फाम फोयने मेंढऱ्या शिक्की नंताक दान फुडकाड. #यहेज्केल 34:11-12; 16. 5इंगा यप्पुड आदी वानकी शिकताद आप्पुड वाड आनंदता दान गुजुम मिंदा तिस्कुंटाड. 6इंगा इल्लुक वच्ची वान मित्रलान इंगा शेजारोरनी वगातळा फिल्ची वारनी आंटाड, ना जताक आनंद शेयना येनटीक की नाद फाम फोयनेद मेंढऱ्या शिक्कीनाद. 7आल्ले यवारकी पश्चात्तापदी गरज लेद इल्ला नव्यान्नव नितीमान मंदी बद्दल आय्ये आनंद काना पश्चात्ताप शेशीने वगा पापी मनशी बद्दल स्वर्गला शेंगेम आनंद आय्यी, इदी निन मिक शपतान.
फाम फोयनेय कलदारलु
8 वगा आंडीदान देगार यंडीय फदी कलदारलु उंडाय इंगा जर दानदी वगा कलदार फाम फोयते तर आदी दिवा आंची इल्लु उडशी आदी शिक्की नंताक मन आंची फुडकाद येम? 9इंगा दानकी यप्पुड आदी कलदार शिकताद आप्पुड आदी मैत्रीनीलान इंगा शेजारीनीलान फिलस्ताद इंगा आंटाद, ना जताक आनंद शेयना, येनटीक की नाद फाम फोयनेद कलदार शिक्कीनाद. 10इल्ले पश्चात्ताप शेशेतोन वगा पापी मनशी बद्दल परमेश्वरी स्वर्गदुतला मुंदार आनंद आयताद, इदी निन मिक शपतान.”
उडाय मतेतोड कोडकु इंगा वान फेद्दा तम्मुड
11मंग येशुड आन्या, “वगा मनशीक इद्दार कोडकुल उंडीर. 12वार इद्दार लोन्केल शिन्ना कोडकु आब्बान आन्या, 'यब्बा, संपत्ती लोनदी नाद हिस्सा नाक इ.' आप्पुड वान आब्बाड वानदी संपत्ती इद्दार कोडकुलाक फंची इच्या. 13मंग काही नाळाक शिन्ना कोडकु आंता जमा शेशी धुराम देशामकी यल्ली फो; इंगा आंदु वाड वानदी आंता संपती कुकर्मला वानदी आंता संपत्ती यगरा मतकाड्या.#नीतिसुत्र 29:3. 14वाड आन्नी दुडलु खर्च शेस्काड्या; आप्पुड आ देशामला भयंकर दुष्काळ फड्या इंगा वाड कंगाल आय फोया. 15मंग वाड आ देशलोन वगा नागरीक देगार फोया इंगा वान देगार निलच्या. आ नागरिक वान शेल्लोंग फंदुलान मेपेदेंक वान आंप्या. 16आप्पुड यवाडुच वानकी तिनेदेंक येमीच इयालेद, दिनिचांग वाड फंदुल याय कायाल तिंटाय आय त तरी तिनीगास नाद कडपु निंचकुनाला इल्ला वानदी इच्छा आयदु. 17आप्पुड वाड शुद्धी मिंदीक वच्या इंगा स्वतान आन्या, ना आब्बान इंटल्या यंता तरी कुल्योर तिनी मिगली इंतोट आन्नाम उंडाद, इंगा निन इंदु आकालता सस्तुनान! 18इप्पुड निन लेशी ना आब्बान तिकुड फोयतान इंगा वान आंटान, यब्बा, निन स्वर्ग विरुद्ध इंगा नी विरुद्ध पाप शेशीनान.#स्तोत्रसंहिता 51:4. 19नी कोडकु आंका आनी तिस्कुने योग्य निलवालेद. नन्नु नी वगा कुल्योन लेका फेटको. 20मंग वाड शिन्ना कोडकु लेशा इंगा वान आब्बान तिकुड फोया. वाड वान इल्लुकेल धुरामे उंड्या आप्पुड वान आब्बाड वान सुशा. वानकी वानदी दया वच्या इंगा वाड फारका फोई वान गोंतुला फड्या इंगा वानी शेंगेम मुत्ताल तिस्कुन्या. 21कोडकु वान आन्या, यब्बा, निन स्वर्ग विरुद्ध इंगा नी विरुद्ध पाप शेशीनान. इप्पुड नी कोडकु आंका आनी तिस्कुनेद नाक अधिकार लेद. 22पण आब्बाड वान कुल्योरनी आन्या, 'लग्गान फोंडा इंगा मंची बट्टाल यकोची इनकी फेटना. वान शेतल्या अंगठी इंगा काळाला, शप्पुल फेटना. 23इंगा फेद्दाद मेजवानी शेयना, मनाम तिनदाम इंगा आनंद शेयदाम! 24येनटीक की इड ना कोडकु सच्ची फोयन्या, पण वापस जित्ता आयनाड! वाड फाम फोयन्या, पण इप्पुड शिक्कीनाड.' इंगा वार आनंद शेशेदेंक आंटीर. 25पण वान फेद्दा कोडकु शेल्ला उंड्या. वाड इल्लु देगार वच्या आप्पुड वाड फदुलाद इंगा नाचाशेद आवाज इन्या. 26वाड वगा कुल्योन फिल्ची आडग्या, इदी येम नडशीनाद? 27वाड आन्या, नी तम्मुड वच्चीनाड. इंगा वाड मी आब्बानकी सुखरुप शिक्या आंका वाड फेद्दाद मेजवानी फेट्टीनाड. 28आप्पुड वानकी शिट्टु लेशा इंगा वाड लोनीक फोक फो. आप्पुड वान आब्बाड बैटीक वच्ची वानकी समजाय मतेदेंक आंट्या. 29पण वाड आब्बानकी उत्तर इच्या, सुड, इन्नोट यंडलु निन नीद सेवा शेस्तीन इंगा यप्पुडुच नीद आज्ञा तेंपालेद! तरी नु ना मित्रला जताक आनंद शेशेदेंक नाक यप्पुडुच साधा वगा म्याका पण इयालेद. 30इंगा यवाड नीद आंता संपत्ती वेश्याल मिंदा यगरा मत्या वाड नी कोडकु वापस वच्या, तर नु वान इचांग फेद्दाद मेजवानी फेटती. 31आप्पुड आब्बाड वान आन्या, आन्ना, नु तर नेहमी ना जताक उंटाव, इंगा नाद येम पण उंडाद आदी आंता नीदे उंडाद. 32पण इबद मनाम आनंद इंगा उत्सव शेयाबेक, येनटीक की नी तम्मुड सच्ची फोयन्या, वाड वापस जित्ता आयनाड. फाम फोयन्या, इप्पुड वाड शिक्कीनाड.”
Currently Selected:
LUK 15: WNT
Highlight
Share
Compare
Copy
Want to have your highlights saved across all your devices? Sign up or sign in
