LUK 19
19
जक्कय
1येशुड यरीहोला प्रवेश शेशा इंगा आंदुकेल वाड मुंदारकी फोतुन्या. 2आप्पुड सुडना, जक्कय फेरोड वगा मनशी उंड्या, वाड मुख्य जकातदार उंडी शेंगेम श्रीमंत उंड्या.
3येशुड यवाड उंडाड इदी सुशेद वाड प्रयत्न शेयदु पण गर्दी इचांग वानकी येशुन सुडा दाकुंदु, येनटीक की वाड बुट्टा उंड्या. 4आप्पुड वाड मुंदारकी फारका फोई येशुन सुशेदेंक वगा फत्ती शट्टु मिंदीक यक्या; येनटीक की येशुड आ दावाता फोयेतोड उंड्या. 5मंग येशुड आ जागालोंग वच्चीन नग्रेम फैनिक सुशी वान आन्या, “जक्कय, लग्गान किंदीक दिग, येनटीक की इबद नाक नी इंटल्या निलचेद उंडाद.” 6आप्पुड वाड लगेच किंदीक दिगी आनंदता वानदी स्वागत शेशा. 7इदी सुशीगास आंता मंदी कुरकुर शेशी आनेदेंक आंटीर की, “पापी मनशी इंटल्योंग वाड निलचेदेंक फोयनाड.” 8आप्पुड जक्कय नीला फडी प्रभुन आन्या, “प्रभुजी, सुड, निन नाद निम्मा संपत्ती गरीबोरकी इस्तान इंगा निन जर यवारनी आना फसायमती वार तीकेल येमाना तिस्कुंनीन्टे तर निन वानकी चारपट वापस इस्तान.”#निर्गम 22:1. 9येशुड वान आन्या, “इबद इ इल्लुक तारण प्राप्त आयनेद उंडाद येनटीक की इ मनशी पण अब्राहाम कोडकु उंडाड. 10येनटीक की मनशी कोडकु यवार फाम फोयनार वारनी फुडकेदेंक इंगा वारदी तारण शेशेदेंक वच्चीनाड.”
कलदारलाद दृष्टांत
मत्तय 25:14-30
11मंदी इ माटल इंटुनीर आप्पुड येशुड वारकी वगा दाखला शप्या. येनटीक की वाड यरुशलेम शहर देगार उंड्या इंगा परमेश्वरदी राज्य इप्पुडे प्रगट आय्येद उंडाद, इल्ला मंदीक वाटास्तुन्या. 12वाड आन्या, “वगा श्रीमंत मनशी, मनाम राजपद मिळाय मती वापस दावाला इ उद्देशता धुराम देशामकी फोयेदेंक यल्या. 13फोवा काना मुंची वाड वान फदी नोकरलान फिलच्या इंगा वारकी वगा-वगाट इल्ला फदी कलदारलु इच्ची शप्या, ‘निन वच्ची नंताक दिन मिंदा व्यापार शेयना.’ 14वान नगरलोन मंदी वानदी कोफाम शेस्तुनीर आंका वार वान यंका-यंका वकीलनी आंपी शप्पीर, ‘इड मा मिंदा राज्य शेयाला इल्ला माद इच्छा लेद.’ 15मंग इल्ला आय्या की, वाड राजपद मिळाय मती वापस वच्ची नेंका या नोकरलाक वाड व्यापार शेशेदेंक दुडलु इच्चीन्या, आटला मिंदा वार यंता नफा आयनाद इदी सुडाला आंका वाड वारनी वान तीकुड फिल्चेदेंक शप्या. 16मंग पहिला नोकर वान मुंदार वच्ची आन्या, ‘मालक, नु इच्चीने कलदार मिंदा निन इंगा फदी कलदारलु कमास्तीन’ 17आप्पुड वाड वान आन्या, ‘हे शिंगार नोकर, बागा शेस्ती, नु रव्वा दिंटल्या इमानदार निलस्ती, आंका नु दहा नगरला मिंदा अधिकारी आय्याव.’ 18मंग इंगोगोड वच्ची आन्या, ‘मालक, नु इच्चीने कलदार मिंदा निन इंगा आय्यीद कलदारलु कमास्तीन.’ 19वान पण वाड आन्या, ‘निक पण निन आय्यीद नगरला मिंदा अधिकार इच्यान.’ 20मंग इंगा वगाड वच्ची आन्या, ‘मालक, इदी सुड नीद कलदार. इदी निन दस्तीला कट्टी फेट्टीन्टीन. 21नु कठोर उंडाव आंका नाक नीद यरपु आयताद. याद नु फेट्टालेद, आदी तिस्कुंटाव इंगा याद नु पेरायालेद, आदी सोंगास्ताव.’ 22वाड वान आन्या, ‘हे दुष्ट नोकर, नी नोरताने निन नीद न्याय शेस्तान, निक यरका उंड्या की निन कठोर मनशी उंडान, निन याद लेद फेट्टालेद, आदी तिस्कुंटान इंगा याद निन पेरायालेद, आदी सोंगास्तान, 23तर नु नाय दुडलु सावकार देगार येनटीक फेट्टालेद? फेट्टीन्टे तर निन वापस वच्ची नेंका नाक दानदी व्याज शिकतुन्या.’ 24मंग वाड वान देगार नीला फडीने मंदीन आन्या, वान तीकेल आदी कलदार तिस्केन यवार देगार फदी कलदारलु उंडाय वानकी इंडा. 25वार वान आनीर, ‘मालक, वान देगार तर पहिलाने फदी कलदारलु उंडाय.’ 26मालकुड उत्तर इच्या, ‘निन मिक शपतान, यवार देगार उंडाद, वानकी इंगा इच्चेदेंक वच्ची इंगा यवार देगार लेद, वान देगार येम उंडाद आदी पण तिस्कुनेदेंक वच्ची. 27पण निन राज्य शेयाराद इल्ला इच्छा शेशेतोर ना शत्रुलान इक्काडा येकेन दांडा इंगा ना मुंदार मतेसकाडना.’”
यरुशलेमला विजय प्रवेश, क्रुस मिंदा खिळाशेद इंगा पुनरुत्थान — 19:28—24:53
येशुनदी यरुशलेम शहरला विजय प्रवेश
मत्तय 21:1-11; मार्क 11:1-11; योहान 12:12-19
28येशुड इ माटलु शप्पीनेंका वाड यरुशलेम तीकुड फैनिक वान शिष्यला मुंदार नडस्तुन्या. 29मंग इल्ला आय्या की, यप्पुड वाड जैतुन कोंडा देगार उंडीने बेथफगे इंगा बेथानी उर देगार वच्या आप्पुड वाड वान इद्दार शिष्यलान फिल्चीगास वारकी इल्ला शप्पी आंप्या, 30“मीर मुंदार उळ्योंग फोंडा. मीर फोईन नग्रेम यादान मिंदा यवारुच यप्पुडुच कुसना लेद इल्ला वगा गाडदी फिल्ला मिक कट्टीनेद कमशी. आदी इडस्केन येकेन दांडा. 31जर मिमलान यवाराना आडगीर की, ‘मीर दान येनटीक इडस्तुनार? तर वारकी शपना की, प्रभुनकी दिनदी गरज उंडाद.’” 32यवारनी आंपीन्या, वार फोईर इंगा वाड शप्पीनेलेका वारकी कमशा. 33आदी गाडदी फिल्ला इडशेताप्पुड दान मालकुड वारनी आन्या, “मीर गाडदी फिल्लान येनटीक इडस्तुनार?” 34वार आनीर, “प्रभुनकी दिनदी गरज उंडाद.” 35वार दान येशुन तीकुड यकोचीर. वार स्वताय बट्टाल तिशी गाडदी फिल्ला मिंदा येशीर इंगा येशुन दान मिंदा कुसना मतीर. 36येशुड यल्ला-यल्ला मुंदारकी फोतुन्या आल्ला-आल्ला मंदी वारी बट्टाल दावा मिंदा फरस्तुनीर.#2 राजे 9:13. 37वाड यप्पुड जैतुन कोंडा उतार देगार वच्या आप्पुड आंदार शिष्यल इंगा मंदीद समुदाय, वार याय चमत्कारलु सुशीनीर, आटला इचांग शेंगेम आनंदता परमेश्वरदी स्तुती शेशेदेंक आंटीर.#जखऱ्या 9:9.
38“प्रभुन फेरता वच्चेतोड राजा धन्य उंडाड! स्वर्गला शांती इंगा मोडामला गौरव.” 39मंदी समुदाय लोन्केल काही परुशी मंदी येशुन आनीर, “गुरुजी, नी शिष्यलाक तेप्पांग कुसनेदेंक शप.” 40वाड उत्तर इच्या, “निन मिक शपतान, जर इर तेप्पांग कुसनीर तर राळ आरशेदेंक आंटी.”
यरुशलेम इचांग विलाप
41येशुड यप्पुड यरुशलेम शहर देगार वच्या आप्पुड वाड दान तीकुड सुशी येडशा इंगा आन्या, 42“जर नु इबद निक शांती इच्चेय माटलु यरका शेस्कुंनीन्टे तर यंता शिंगार आयतुन्या! पण इप्पुड आय नी कंडला तीकेल दाशी फेट्टेदेंक वच्चीनाय.#अनुवाद 32:29; यशया 6:9-10. 43नी मिंदा इल्ला दिनमुल वच्ची की, नी शत्रुल निन्नु नालुंग तीकेल घेराशी, नी मिंदा दबाव येशार. 44नीद इंगा नी बिळ्ळाद इद्दे घोडा किंदा नाश शेशार इंगा वार नीद राय मिंदा राय पण निलवा नियाक फोयार; येनटीक की यप्पुड परमेश्वर नी तीकुड वच्या, आदी वेळ नु गुरतु फट्टालेद.”
परमेश्वर भवनदी शुद्धीकरण
मत्तय 21:12-17; मार्क 11:15-19; योहान 2:12-25
45येशुड परमेश्वर भवनलोंग इंगा यवार आंदु आम्मुदुर वारनी बैटीक गेदमेदेंक आंट्या. 46वाड वारनी आन्या, “पवित्र शास्त्रला इल्ला राशीनेद उंडाद की, नाद इल्लु प्रार्थनाद भवन आय्यी, पण मीर दान लुटाशेतोरदी गुफा बनाय मतनार.”#यशया 56:7; यिर्मया 7:11.
47वाड धीन्नाम परमेश्वर भवनला नेरपुतुन्या. मुख्य याजकलु, नियमशास्त्र शिक्षकलु, मंदी अधिकारील वानदी जेम तिस्कुनेदेंक प्रयत्न शेयदुर. 48पण येम शेयाला, इदी वारकी तेल्वाकुंदु येनटीक की आंता मंदी वानदी मन आंची इनदुर.
Currently Selected:
LUK 19: WNT
Highlight
Share
Compare
Copy
Want to have your highlights saved across all your devices? Sign up or sign in
