LUK 20
20
येशुन अधिकार बद्दल प्रश्न
मत्तय 21:23-27; मार्क 11:27-33
1वगा नाड येशुड परमेश्वर भवनला मंदीक नेरपेताप्पुड इंगा सुवार्ता शप्पेताप्पुड, मुख्य याजकलु, नियमशास्त्र शिक्षकलु इंगा आब्बागार वान तीकुड वच्ची वान आनीर. 2“या अधिकारता नु इ माटलु शेस्ताव इंगा निक इदी अधिकार यवार इच्चीर? इदी माक शप” 3आप्पुड वाड वारकी उत्तर इच्या, “निन पण मिमलान वगा प्रश्न आडगुतान. दानदी मीर नाक उत्तर इंडा. 4योहानदी बाप्तिस्मा स्वर्ग तीकेल उंड्या का मनशी तीकेल उंड्या?” 5वार वगामेगारला विचार शेशी आनीर, “जर मनाम स्वर्ग तीकेल आंटाम, तर वाड आनी, ‘मंग मीर वान मिंदा येनटीक विश्वास फेट्टालेद?’ 6जर मनाम मनशी तीकेल आनाला, तर आंता मंदी मनाक राळ मत्यार, येनटीक की वारदी खात्री उंडाद की योहान वगा संदेष्टा उंड्या.” 7दिनिचांग वार उत्तर इच्चीर, “आदी यवार तीकेल उंड्या इदी माक यरका लेद.” 8मंग येशुड वारनी आन्या, “तर या अधिकारता निन इ माटलु शेस्तान, इदी निन पण मिक शप्पान.”
अंगुर बगीच्याद दृष्टांत
मत्तय 21:23-27; मार्क 11:27-33
9येशुड मंदीक वगा दाखला शप्पेदेंक आंट्या, “वगा मनशी वगाट अंगुरलाद बगीच्या आंच्या इंगा आदी बटाइदारलाक इच्ची शेंगेम नाळा इचांग इंगोगो देशामकी यल्ली फोया.#मार्क 12:1-12; मत्तय 21:33-46. 10मंग अंगुरलु जमा शेशेद वेळ वच्या, आप्पुड वाड वान वगा नोकरनी वार देगार आंप्या की मनाद अंगुरलाद हिस्सा येकेन दा. पण बटाइदारलु आ नोकरनी मतीगास वान उत्ता शेतलाता वापस आंपकाडीर. 11मंग वाड इंगोगो नोकरनी आंप्या, पण वार वान पण मत्तीर इंगा वानदी अपमान शेशी वान उत्ता शेतलाता वापस आंपीर. 12आप्पुड बगीच्या मालकुड तिसरा नोकरनी आंप्या. बटाइदारलु वान पण मतीगास बैट्या येसकाडीर. 13आप्पुड बगीच्या मालकुड स्वता आन्या, ‘निन येम शेयदुन? निन ना प्रिय कोडकु आंपतान. कदाचित वार वानकी मान इच्यार.’ 14पण यप्पुड बटाइदारलु वान कोडकुन सुशीर, आप्पुड वार वगामेगारला चर्चा शेशीर इंगा आनीर, ‘इड तर वारस उंडाड, इन मनाम मतेस्काडदाम, आंटे बगीच्या मनाद आय्यी.’ 15वार वान बगीच्या बैटीक तिशीर इंगा मतेस्काडीर. तर मंग अंगुरला बगीच्या मालकुड वार जताक येम शेशी? 16वाड बटाइदारलाद नाश शेशी, बगीच्या इंगोगोर शेतल्या इच्ची.” इदी इनी मंदी आनीर, “इल्ला यप्पुडुच कावाराद.”
17येशुड वार तीकुड सुशा इंगा आन्या,
“याद राय कट्टेतोर नाकारीच्चीर आद्दे कोनशीला आय्या. #
स्तोत्रसंहिता 118:22-23.
18 यवाड पण इ राय मिंदा फडी, वानी तुकडाल-तुकडाल आय फोई पण यवार मिंदा आदी फडी वानदी आदी भुगाभुगा शेस्काडी.” #
दानिएल 2:34-35.
कर इच्चे बद्दल प्रश्न
19नियमशास्त्र शिक्षकलु इंगा मुख्य याजकलु इर आद्दे वेळला वान अटक शेशेद प्रयत्न शेशीर, येनटीक की वारकी इदी तेल्चीन्या की येशुड इदी दाखला वार बद्दल शप्पीनाड. पण वारकी मंदीद यरपु आयतुन्या. 20आप्पुड वार वान मिंदा नजर फेट्टीर इंगा वान माटलाला फट्टी राज्यपाल इंगा अधिकारी शेतल्या इयाला आंका इमानदार मनशीद ढोंग शेशे जासुसलान वान तीकुड आंपीर. 21वार येशुन प्रश्न आडगीर, “गुरुजी, माक यरका उंडाद की, नु खरेम माटलाडताव इंगा नेरपुताव इंगा यवारदीच पक्षपात शेयाव. तर सत्यता परमेश्वरदी मार्ग नेरपुताव. 22मिम कैसरकी कर इच्चेद इदी योग्य उंडाद का लेद?” 23वार वारदी कपट ओळखाशी वारनी आन्या, “नाक वगा कलदार सुपना. 24दिन मिंदा यवारदी चित्र इंगा लेख उंडाद?” वार आनीर, “कैसरदी.” 25आप्पुड वाड वारनी आन्या, “तर मंग येम कैसरदी उंडाद, आदी कैसरकी इंडा इंगा याद परमेश्वरदी उंडाद, आदी परमेश्वरकी इंडा.” 26वारकी वान मंदी मुंदार वान माटलाला फट्टा दाकुंदु. वान उत्तरता वार आश्चर्य चकीत आय्यी तेप्पांग आय फोईर.
पुनरुत्थान बद्दल प्रश्न
मत्तय 22:23-33; मार्क 12:18-27
27पुनरुत्थान लेद इल्ला आनेतोर काही सदुकी मंदी वान तीकुड वच्ची वान प्रश्न आडगीर, 28“गुरुजी, मोशेड मा इचांग इल्ला राशी फेटनाड की, जर यवाराना तम्मुड वान वडती जित्ता उंडीनाप्पुड बिळ्ळु कावांदे सच्ची फोयते तर वान तम्मुड वान वडती जताक फेंडली शेस्केन वान तम्मुनदी वंश नडपीयाला.#उत्पत्ती 38:8; अनुवाद 25:5. 29योडगुर तम्मुळ्ळु उंडीर. पहिला तम्मुड फेंडली शेस्कुन्या इंगा वाड बिळ्ळु कावांदे सच्ची फोया 30मंग इंगोगो तम्मुड दान जताक फेंडली शेस्कुन्या इंगा वाड पण सच्ची फोया. 31मंग तिसरावोड पण दान जताक फेंडली शेस्कुन्या; इल्ला योडगुर पण तम्मुळ्ळु, यवारकीच बिळ्ळु कावांदे सच्ची फोईर. 32यंकसार आदी आंडीद पण सच्ची फोया. 33तर मंग पुनरुत्थान आय्यी आप्पुड आदी यवार वडती आय्यी? येनटीक की योडगुर पण तम्मुळ्ळु दान जताक फेंडली शेस्कुंडीर.” 34आप्पुड येशुड वारनी आन्या, “इ युगलोन मंदी फेंडली शेस्कुंटार इंगा फेंडली शेशी इस्तार. 35पण आदी युग इंगा सच्चीनोर लोन्केल पुनरुत्थान इदी प्राप्त शेस्कुना या मंदी योग्य ठराशार, वार फेंडली शेस्कुनाक फोयार इंगा फेंडली शेशीयाक पण फोयार 36इंगा वार मुंदारकी सय्याक पण फोयार, येनटीक की वार स्वर्गदुतला लेका आय्यार, इंगा पुनरुत्थान आयनोर उंडीने इचांग वार परमेश्वर बिळ्ळु आय्यार. 37मोशेड पण काले झुडपु कथाला, परमेश्वरनी ‘अब्राहाम परमेश्वर, इसहाक परमेश्वर इंगा याकोब परमेश्वर’ इल्ला आनीगास सच्चीनोर लेपेदेंक वस्तार इदी सुपीचीनाड.#निर्गम 3:2; 6. 38वाड सच्चीनोर परमेश्वर लेड पण जित्ता उंडीनोर परमेश्वर उंडाड. येनटीक आंता मंदी यवार वान मिंदा विश्वास फेटतार, वार जित्ता उंडार.” 39आप्पुड इदी नियमशास्त्र शिक्षकला लोन्केल यंता तरी मंदी आनीर “हे गुरुजी, नु खरेम माटलाडताव.” 40मंग वार वान इंगा प्रश्नल आडगेद हिम्मत शेयाक फोईर.
ख्रिस्त दाविद कोडकु उंडाड येम?
मत्तय 22:41-46; मार्क 12:35-37
41मंग येशुड वारनी आडग्या मंदी यल्ला शकास्तर की, “मंदी ख्रिस्त दाविद कोडकु उंडाड, इल्ला यल्ला आंटार? 42येनटीक की दाविद स्वता स्तोत्रसंहिता पुस्तकला आंटाड;
‘परमेश्वर ना प्रभुनकी शप्या,
43 निन नी शत्रुलान नी काळा किंदा येशी नंताक, #
स्तोत्रसंहिता 110:1.
नु ना मंची शेय तीकेल कुसुन.’
44 इ रितीता दाविद वान प्रभु आंटाड, तर मंग वाड वान कोडकु यल्ला?”
नियमशास्त्र शिक्षकला बद्दल इच्चीनेद इशारा
मत्तय 23:1-7; मार्क 12:38-40
45आंता मंदी इनेताप्पुड येशुड वान शिष्यलान आन्या, 46“नियमशास्त्र शिक्षकला बद्दल सावधान उंडना, वारकी जंपु-जंपु बट्टाल फेटकेन तिरगेदेंक, संताला दंडाम तिस्कुनेदेंक, सभास्थानला इंगा पंगतला तिनेताप्पुड मंची जागाला कुसनेदेंक आवडास्ताद. 47वार विधवा आंड्योरी इंडलु लुटाशी तिनेस्तार इंगा मंदीक सुपेदेंक फेद्दा-फेद्दाय प्रार्थनाल शेस्तार. इ मंदीक शेंगेम वाईट शिक्षा आय्यी.”
Currently Selected:
LUK 20: WNT
Highlight
Share
Compare
Copy
Want to have your highlights saved across all your devices? Sign up or sign in
