LUK 5
5
पहिला शिष्यन फिल्चकाम
मत्तय 4:18-22; मार्क 1:16-20
1मंग वगा नाड, येशुड गनेसरेत सरोवर#5:1 गनेसरेत सरोवर गनेसरेत सरोवरदी इंगोगो फेर गालील सरोवर उंडाद कंटामकी नीला फडीन्या आप्पुड मंदी परमेश्वरदी वचन इनेदेंक येशुन भोवती गर्दी शेशेदेंक आंटीर, 2आप्पुड वाड सरोवरला रोंड जहाजलु सुशा, पण जहाज लोन्टोर मिल फट्टेतोर बैट्या उंडीर इंगा वारी जाळील कडगुदुर. 3दांटल्योन वगा जहाजलोंग येशुड फोया आदी शिमोनदी उंड्या, मंग वाड जहाज कंटाम मिंदकेल रवा लोनीक येका फोयेदेंक शप्या. मंग वाड जहाजला कुसन्या इंगा मंदीक नेरपेदेंक आंट्या. 4येशुनदी माटलाडेद आयनेंका येशुड शिमोननी आन्या, “जहाज लोत नेळालोंग तिस्को इंगा मिल फट्टेदेंक नीद जाळी किंदीक इडु.” 5शिमोन उत्तर इच्या, “गुरुजी, मोब्बुलाला मिम शेंगेम मेहनत शेस्तीम पण माक येमीच शिक्कालेद. तरी नु आंटाव आंका निन जाळी किंदीक इडस्तान.” 6मंग वार आल्ले शेशीनेंका वार जाळीला मिलाद फेद्दाद घोळका शिक्या इंगा वानदी जाळी शिंगेदेंक आंट्या 7आप्पुड वार इंगोगो जहाजलोन सहकर्मीलान मदत शेशेदेंक फिल्चीर. मंग वार वच्ची नेंका इल्ला आय्या की आय रोंडु जहाजलु मिलाता इंता निंड्या की, आय मुनगेदेंक आंट्या. 8आप्पुड इदी सुशी शिमोन पेत्र येशुनी काळ मोक्की आन्या, “ना देगाटेल धुराम यल्ली फो येनटीक की निन पापी मनशी उंडान.” 9येनटीक की वार फट्टीने मिलाद घोळका सुशी वाड इंगा वान जताक उंडीनोर आंदार आश्चर्य चकीत आयनीर. 10आप्पुडे शिमोन भागीदारलु जब्दीन कोडकु याकोब इंगा योहान इर पण वार लेका आश्चर्य चकीत आय्यीर. इंगा येशुड शिमोननी आन्या, “यरस्कुनाक, येनटीक की इंदुकेल मुंदारकी नु मनसुलान फट्टेतोड आय्याव.” 11मंग वार जहाजलु कंटामकी आंचीनेंका आंताच इडशीगास इंगा वान यंका फोईर.
कुष्ठरोगीन शिंगार शेशेद
मत्तय 8:1-4; मार्क 1:40-45
12मंग इल्ला आय्या की, येशुड यादो वगा उळ्या उंडीनाप्पुड आंदु कुष्ठरोगता निंडीनोड वगा मनशी उंड्या, यप्पुड वाड येशुन सुशा आप्पुड वाड बोरकाला फड्या इंगा वानकी विनंती शेशा, “प्रभु, जर नीद इच्छा उंटे तर नन्नु शुद्ध शेशेदेंक नु समर्थ उंडाव.” 13आप्पुड येशुड वानदी शेय मुंदारकी शेशी वान मुट्ट्या इंगा आन्या “नाद इच्छा उंडाद शुद्ध का!” इंगा लगेच वानदी कुष्ठरोग यल्ली फोया. 14मंग येशुड वानकी आदेश इच्ची शप्या की, “यवारकीच शप्पाक, पण फोईगास स्वतान याजककी सुपी इंगा वारकी साक्ष कावाला आंका मोशेड आज्ञा इच्चीने लेका शुद्धीकरण इचांग अर्पण शेय.” #लेवी 14:2-32. 15पण येशुन बद्दल शेंगेम मंदीक यरका आयकेन फोया इंगा शेंगेम मंदी वानदी इनेदेंक इंगा वार रोगलाकेल शिंगार आयेदेंक जमा आयेदेंक आंटीर. 16पण येशुड मरु भुमीला एकांतला फोई प्रार्थना शेयदु. 17इल्ला आय्या की, वगा नाड वाड नेरपेताप्पुड आंदुक परुशी मंदी इंगा नियमशास्त्र शिक्षकलु कुशीन्नीर वार गालील इंगा यहुदीया प्रांत इंगा यरुशलेम शहरलोन अलग-अलग जागाल लोन्केल वच्चीनीर. प्रभुनदी सामर्थ्य वान जताक उंड्या आंका वाड रोगलु बागा शेयदु. 18इंगा काही मंदी वगा लकवा आंटीने मनशीन मंचाम मिंदा आंदुक यकोचीर इंगा वार वान लोनीक येकेन फोयेद इंगा येशुन मुंदार फेट्टेद प्रयत्न शेशीर. 19पण गर्दी इचांग लोनीक येकेन फोयेद दावा वारकी शिक्काकुंदु, आंका वार इल्लु मिंदीक यक्की कौल्याल तिशी वान मंचाम जताक फैनेल येशुन मुंदार किंदीक इडशीर. 20वारदी विश्वास सुशी, येशुड आन्या, “कोडका नी पापलाद क्षमा आयनाद.” 21नियमशास्त्र शिक्षकलु इंगा परुशी मंदी स्वता विचार शेशेदेंक आंटीर “इड यवाड उंडाड, यवाड परमेश्वरदी निंदा शेस्तुनाड? परमेश्वरनी इडशी यवाड पापलाद क्षमा शेशी शकास्ताड?” 22इंगा येशुड वारी विचारलु गुरतु फट्टी वारकी उत्तर इच्ची आन्या, “मीर मी मनला इल्ला विचार येनटीक शेस्तार? 23नी पापलाद क्षमा आयनाद लेकाते लेय इंगा नडशेदेंक आंट दिंटल्योन्केल येम आनेद सोपा उंडाद? 24पण मिक इदी तेल्वाबेक की मनशी कोडकुक पृथ्वी मिंदा पापलु क्षमा शेशेद अधिकार उंडाद, आंका वाड लकवा आंटीने मनशीन आन्या, निन निक शपतान लेय, नीद मंचाम यतकेन नी इल्लुक फो.” 25आप्पुड वाड लगेच नीला फड्या इंगा या मंचाम मिंदा वाड फंडकुनीन्या आदी यतकेन परमेश्वरदी गौरव शेस्केन वान इल्लुक फोया. 26वार आंदार आश्चर्य चकीत आय्यीर इंगा परमेश्वरदी स्तुती शेशेदेंक आंटीर, वार शेंगेम यरस्कुनीर इंगा आनीर, मिम इबद शेंगेम अद्भुत माटलु सुस्तीम.
लेवीन फिल्चेद
मत्तय 9:9-13; मार्क 2:13-17
27'इ माटलु आयनेंका येशुड बैटीक फोया इंगा वाड लेवी फेरोन जकातदारनी जकात नाका मिंदा कुसनीनोन सुशा, येशुड वान आन्या, “ना यंका दा!” 28आप्पुड लेवीड आंताच आंदे इडशा इंगा वान यंका फोया.
29मंग लेवीड वान इंटल्या येशुन इचांग फेद्दाद वंटा इच्या इंगा जकातदारलु इंगा बाकी शेंगेम मंदीद जमाव वान जताक रोट्या तिनदु. 30पण परुशी मंदी इंगा नियमशास्त्र शिक्षकलु इर वान शिष्यल तीकुड तक्रार शेशीर, वार आनीर, मीर जकातदार इंगा पापी मंदी जताक येनटीक तिंटुनार? 31येशुड वारनी आन्या, “यवार बागा उंडार वारकी वैद्यद गरज लेद, पण यवार बिमार उंडार, वारकी वैद्यद गरज उंडाद. 32निन नितीमान मंदीन फिल्चेदेंक दालेद तर पापी मंदीन पश्चात्ताप इचांग फिल्चेदेंक वच्चीनान.”
उपवास बद्दल प्रश्नल
मत्तय 9:14-17; मार्क 2:18-22
33वार वान आनीर, योहान शिष्यल नेहमी उपवास इंगा प्रार्थना शेस्तार इंगा काही परुशी मंदी इंगा नियमशास्त्र गुरुल पण यवार वार समुहला उंडीर, वार पण आल्ले शेस्तार, पण नी शिष्यल तर तिनी तागी उंटार. 34येशु वारनी आन्या, “वर्हाड जताक फेंडली कोडकु उंडाड आड नंताक मीर वार तीकेल उपवास शेया मती शकास्तार येम? 35तरी इल्ला दिनमुल वच्ची की, फेंडली कोडकुन वार देगाटेल तिस्कुनेदेंक वच्ची इंगा आ दिनमुलाला वार उपवास शेशार.” 36वाड वारकी इंगा वगाट दाखला शप्या, “यवाडुच कोत्ता बट्टाद तुकडा शिंची फातादानकी आंचाड, जर वाड इल्ला शेस्ताड तर वाड कोत्ता बट्टान शिंचेस्ताड पण कोत्ता बट्टाद तुकडा फाता बट्टाक बागा कमसाक फोई. 37इंगा यवाडुच कोत्ता अंगुरदी रस फाता अंगुरला रसलोन तोल थैलीला फेट्टाड जर वाड इल्ला शेस्ताड तर कोत्ता अंगुरदी रस तोलुद थैली शिंचीगास बैट्या सल्ली फोई इंगा आदी थैली वाईट आय फोई. 38कोत्ताद अंगुरदी रस कोत्ता तोल थैलीलाने फेट्टाबेक. 39यवानकीच फाता अंगुरदी रस तागी नेंका कोत्ता अंगुरदी रस बेका लेकुंटाद येनटीक की वाड आंटाड, फाता अंगुरदी रसे बागा उंडाद.”
Currently Selected:
LUK 5: WNT
Highlight
Share
Compare
Copy
Want to have your highlights saved across all your devices? Sign up or sign in
