LUK 6
6
शब्बाथदी पालन
मत्तय 12:1-8; मार्क 2:23-28
1मंग इल्ला आय्या की, वगा शब्बाथ दिनमुनाड येशुड शेल्लोन्केल फोयतुन्या इंगा वान शिष्यल उंब्याल तेंपी शेतल्या चोळाशी तिनदुर.#अनुवाद 23:25. 2आप्पुड परुशी मंदी लोन्केल काही मंदी आनीर, “शब्बाथ दिनमुनाड येम शेयाराद, आद्दे मीर येनटीक शेस्तार?” 3येशुड वारनी आन्या, “यप्पुड दाविदकी इंगा वान जताक उंडीने मन्सुलाक आकाल आयन्या आप्पुड वार येम शेशीर इदी मीर पवित्र शास्त्रला यप्पुडुच वाचायालेद येम? 4वाड परमेश्वर भवनलोंग फोया इंगा समर्पित रोट्याल याजकलान इडशी इंगा यवारुच तिनेद योग्य लेकुंड्या वाड यल्ला तिन्या इंगा वान जताक उंडीनोरकी पण यल्ला इच्या.”#लेवी 24:5-9; 1 शमुवेल 21:6. 5इंगा येशुड वारनी आन्या, “मनशी कोडकु शब्बाथ दिनमुक पण प्रभुड उंडाड.” 6मंग इल्ला आय्या की, इंगोगो शब्बाथ दिनमुनाड येशुड यहुदी सभास्थानलोंग फोया इंगा नेरपेदेंक आंट्या. यवानदी मंची शेय यंडीनेद उंड्या इल्ला वगा मनशी आंदु उंड्या. 7येशुड शब्बाथ दिनमुनाड यवारनी आना बागा शेस्ताड की लेद इदी सुशेदेंक नियमशास्त्र शिक्षकलु इंगा परुशी मंदी वान मिंदा लक्ष फेट्टी उंडीर. दिनिचांग वारकी वान मिंदा आरोप आंचेदेंक येमाना कारण शिक्काला. 8पण वानकी वारी विचारलु यरका उंड्या आंका वाड यंडीने शेय मनशीन आन्या, “लेय इंगा आंदार मुंदार नीला फड,” इंगा आ मनशी लेशी आंदु नीला फड्या. 9येशुड वारनी आन्या, “निन मिमलान आडगुतान, शब्बाथ दिनमुनाड याय माटलु शेशेदेंक परवानगी उंडाद? बागा शेशेद की वाईट शेशेद? याय माटलु योग्य उंडाय, यवारदी आना जेम वाचाय मतेद की वान जेमुद नाश शेशेद?” 10मंग वाड सभाला आंदार तीकुड सुशा इंगा आन्या, “नु नीद शेय मुंदारकी सरळ शेय.” आप्पुड वाड आल्ले शेशा इंगा वानदी शेय बागा आय्या. 11मंग परुशी मंदीक इंगा नियमशास्त्र शिक्षकलाक शेंगेम कोफाम वच्या इंगा येशुनदी येम शेयाला आंका वगामेगार जताक चर्चा शेशेदेंक आंटीर.
बारा प्रेषितलु
मत्तय 10:1-4; मार्क 3:13-19
12आ दिनमुलाला इल्ला आय्या की, येशुड प्रार्थना शेशेदेंक कोंडा मिंदीक फोया. इंगा मोब्बुलाला परमेश्वरकी प्रार्थना शेशा. 13यप्पुड फद्दु फुट्या, आप्पुड वाड शिष्यलान वान देगार फिलच्या. मंग वार दिंटल्योन्केल बारा मंदीन निवडाशा इंगा वारकी 'प्रेषित' इल्ला फेर इच्या. 14शिमोन यवानकी वाड पेत्र इदी पण फेर इच्या, अंद्रिया (पेत्रन तम्मुड), याकोब इंगा योहान, फिलिप्प, बर्थलमय, 15मत्तय, थोमा, अल्फीन कोडकु याकोब, शिमोन यवान जिलोत पण आंटार, 16याकोब कोडकु यहूदा इंगा यहूदा इस्कर्योत, यवाड मुंदारकी विश्वासघात शेशेतोड यल्या.
17येशुड वार जताक कोंडा मिंदकेल किंदीक दिग्या इंगा सपाट भुमी मिंदा नीला फड्या इंगा वान शिष्यलाद वगाट फेद्दाद समुदाय आंदुक वच्या इंगा यहुदीया प्रांत, यरुशलेम शहर, सोर इंगा सिदोन समुद्र कंटाम देगार निलचेतोर शेंगेम मंदी आंदुक वच्चीर. 18वार आंदार येशुनदी इनेदेंक इंगा बिमारीलाकेल बागा आयेदेंक आंदुक वच्चीनीर. अशुद्ध आत्माल आंटीने मंदी पण आंदुक वच्ची बागा आय्यीर. 19आंता मंदी वान मुट्टेदेंक सुदुर येनटीक वान दिंटल्योन्केल सामर्थ्य यल्दु इंगा आंदारनी बागा शेयदु.
धन्य वचन
मत्तय 5:1-12
20यंकसार येशुड शिष्यल तीकुड सुशा इंगा आन्या, “धन्य उंडार मीर यवार मनता गरीब उंडार, येनटीक की परमेश्वर राज्य मिद उंडाद.
21 धन्य उंडार मीर इप्पुड यवार उपाशी उंडार, येनटीक की मीर तृप्त आय्यार. धन्य उंडार मीर यवार इप्पुड येडस्तार, येनटीक की मीर नग्यार. #
मत्तय 5:4-5; स्तोत्रसंहिता 126:5-6.
22 यप्पुड मनशी कोडकु इचांग मंदी मिद कोफाम शेशार इंगा मिमलान वार समाज लोन्केल धुराम शेशार इंगा मिद निंदा शेशार इंगा मी फेरुन वार वाईट आन्यार इंगा मनशी कोडकु इचांग मिमलान नाकारीच्यार, आप्पुड मीर धन्य उंडार.
23 आ दिनमुला इल्ला आयते आनंद शेशी उड्याल मत्तना, येनटीक की खरेमे स्वर्गला मिद प्रतिफळ फेद्दाद उंडाद! येनटीक की वार पुर्वजलु पण संदेष्ट्याल जताक इल्ले शेशीनीर.
24 पण श्रीमंत मंदीलाला, मिक दुख आय्यी येनटीक की मिक पहिलाने आंताच सुख शिक्कीनाद.
25 मीर यवार इप्पुड तृप्त उंडार मिक दुख आय्यी, येनटीक की मीर उपाशी उंड्यार. मीर यवार इप्पुड नग्गुतार मिक दुख आय्यी इंगा मीर यदाल कोटकुन्यार इंगा येडशार.
26 यप्पुड आंदार मी बद्दल बागा आन्यार आप्पुड मिक दुख आय्यी येनटीक की वार आब्बागार पण खोटा संदेष्ट्याल जताक इल्ले शेशीनार.”
शत्रु मिंदा प्रेम शेयना
मत्तय 5:38-48
27 “पण मिक इनेतोरकी निन शपतान, मी शत्रु मिंदा प्रेम शेयना. यवार मिद कोफाम शेस्तार, वारदी शिंगार शेयना. 28यवार मिक श्राप इस्तार वारकी आशिर्वाद इंडा. यवार मिद अपमान शेस्तार वार इचांग प्रार्थना शेयना. 29जर यवाराना मी वगा शंपाक मततार तर वान मुंदार इंगोगो शंपा पण शेयना. जर यवाराना मिद चादर नांचकुंटार तर वान मिद आंगी पण तिस्कुना निंडा. 30यवार मिमलान आडगुतार वार आंदारकी इंडा इंगा यवार मी वस्तुल नांचकुंटार वार तीकेल आय वापस आडगाकुंडा. 31इंगा यल्ला मंदी मी जताक वागायाबेक आंका मिद इच्छा उंडाद आल्ले मीर पण वागायना.”
32 “यवार मी मिंदा प्रेम शेस्तार वार मिंदाने जर मीर प्रेम शेस्तार, तर दिंटल्या मिद येम फायदा? येनटीक की पापी मंदी पण वार मिंदा प्रेम शेशेतोर मिंदा प्रेम शेस्तार. 33मिद यवार शिंगार शेस्तार, वारदे जर मीर शिंगार शेस्तार तर मिक येम फायदा? पापी पण इल्ले शेस्ताड. 34यवार तीकेल मिक वापस शिक्की इल्ला आशा उंटाद, वारके जर मीर उसना इस्तार तर मिक येम फायदा? पापी मनशी पण वापस शिक्काबेक इ उद्देशता इंगोगो पापीक उसना इस्ताड. 35पण मीर मी शत्रु मिंदा प्रेम शेयना इंगा वारदी शिंगार शेयना इंगा निराश कावांदे उसना इंडा आंटे मिद प्रतिफळ फेद्दाद आय्यी इंगा मीर सर्वसमर्थ परमेश्वर बिळ्ळु आय्यार, येनटीक की वाड यवार धन्यवाद इयार वार मिंदा इंगा वाईट उंडार वार मिंदा पण दया शेस्ताड.#लेवी 25:35-36; मत्तय 5:44-45. 36यल्ला मी परमेश्वर आब्बाड दयाळु उंडाड आल्ले मीर पण दयाळु कांडा.”
इंगोगोरी दोषलु तिशे बद्दल
मत्तय 7:1-5
37 “इंगोगोरदी न्याय शेयाकुंडा, आंटे मिद पण न्याय काक फोई. इंगोगोरकी दोष आंचाकुंडा आंटे मिक पण दोष आंचेदेंक दाका फोई. इंगोगोरनी क्षमा शेयना आंटे मिक पण क्षमा शिक्की. 38इंडा आंटे मिक पण इच्चेदेंक वच्ची. शिंगार माप वत्ती, उपीगास निंडी सल्ली नंताक मी वटीला येशार, येनटीक की या मापता मीर कोल्ची इच्यार, आद्दे मापता मिक वापस शिक्की.”
39वाड वारकी वगा उदाहरण शप्या, “वगा गुड्योड इंगोगो गुड्ड्योनकी यल्ला दावा सुपी शकास्ताड? वार इद्दार पण गुंताला फडाक फोयार येम? 40यादुच शिष्य वान गुरुकाना फेद्दावोड लेड. पण यप्पुड शिष्य पुर्णपणे नेरस्ताड आप्पुड वाड गुरु लेकाने आयताड. 41नी कंडला लोनदी इंतोट कचरा सुडांदे, नी तम्मुन कंडला लोनदी इंतुस्के कचरा येनटीक सुस्ताव? 42लेकाते नु नी कंडला लोनदी इंतोट कचरा सुडांदे नी तम्मुन यल्ला आन्याव की, आन्ना, नन्नु नी कंडला लोनदी कचरा तीयानी? हे ढोंग्या, पहिला नी कंडला लोनदी इंतोट कचरा ती, मंग निक नी तम्मुन कंडला लोनदी कचरा तिशेताप्पुड शिंगार कमशी.”
43 यादुच शिंगार शट्टु लेद की, आदी वाईट फळलु इस्ताद लेकाते यादुच वाईट शट्टु लेद की, आदी शिंगार फळलु इस्ताद. 44येनटीक की प्रत्येक शट्टुन दान फळला मिंदकेल गुरतु फटतार. मंदी मुंडला शटला मिंदकेल अंजीरलु जमा शेयार आल्ले मुंडला शटला मिंदकेल अंगुरलु पण जमा शेयार. 45शिंगार मनशी वान मनला या शिंगार माटलु उंडाय आय्ये बैटीक तिस्ताड इंगा दुष्ट मनशी वान मनला याय वाईट उंडाय आय्ये बैटीक तिस्ताड येनटीक की मनला येम निंडीनाद आद्दे नोटल्योन्केल यलताद.
इनेद इंगा शेशेद
मत्तय 7:21-27
46 “मीर नन्नु ‘प्रभु, प्रभु,’ आंटार, पण निन येम शपतान आदी मीर येनटीक शेयार? #
मलाखी 1:6. 47प्रत्येक मनशी यवाड ना तीकुड वस्ताड इंगा ना वचनलान इनी आय पाळास्ताड वाड यल्ला उंडाड इदी निन मिक शपतान. 48वाड वगा इल्लु कट्टेतोन मनशीलेका उंडाड. वाड लोत तव्या इंगा राय मिंदा जोता कट्ट्या. मंग वंका वच्या इंगा नेळाद लोंढा आ इल्लु मिंदा आदळाशा, पण नेळाता आदी हालायालेद, येनटीक की आदी मजबुत कट्टीनेद उंड्या. 49पण यवाड नाय वचनलु इंटाड पण आय पाळायाड, वाड आ मनशीलेका उंडाड यवाड वानदी इल्लु जोता येयांदे भुमी मिंदा कट्टीनाड, आ इल्लु मिंदा नेळाद लोंढा आदळाशा इंगा आदी फडी फोई दानदी सत्यानाश आय फोया.”
Currently Selected:
LUK 6: WNT
Highlight
Share
Compare
Copy
Want to have your highlights saved across all your devices? Sign up or sign in
