LUK 8
8
येशुनदी सेवा शेशेतोर आंड्योर
1काही वेळ आयनेंका येशुड उपदेश शेस्का इंगा परमेश्वर राज्य बद्दल सुवार्ता शपका नगर-नगर इंगा उळ-उळ तिरगुतुन्या इंगा वान बारा शिष्यल वान जताक उंडीर. 2दुष्टात्मालनोट इंगा बिमारीलानोट मुक्त आयनोर काही आंड्योर पण वान जताक उंडीर, आंटे मग्दालीया नगरदी मरीयाद यादान लोन्केल योड दैयाल यल्लीन्या, आदी, 3हेरोद राजान अधिकारी खुजाड इन वडती योहान्नाद इंगा सुसान्नाद इंगा शेंगेम आंड्योर पण उंडीर, इर स्वता संपत्तीता येशुनदी इंगा वान शिष्यलाद सेवा शेयदुर.
पेरणी शेशेतोनदी उदाहरण
मत्तय 13:1-9; मार्क 4:1-9
4यप्पुड फेद्दाद समुदाय वगातळा जमा आय्या इंगा उळा-उळानोट मंदी वान देगार वच्चेदेंक आंटीर, आप्पुड येशुड वारकी वगा उदाहरण इच्ची आन्या, 5“वगाड पेराशेतोड बी पेराशेदेंक यल्या, वाड पेराशेताप्पुड काही बी दावा मिंदा फड्या इंगा तोक्कुकामला वच्या इंगा मोडामलोनी गुवाल वच्ची आय तिनेशा. 6इंगा काही बी खडकुला भुमी मिंदा फड्या इंगा भुमी फच्चीद लेकुंड्या आंका उगाशीनेंका यंडी फोया. 7इंगा काही बी मुंडला झुडपुलाला फड्या इंगा आटला जताक वाढाशी आटलाद वाढ खुटाशा. 8इंगा काही बी मंची भुमी मिंदा फड्या इंगा उगाशी शंभरपट फंटा वच्या.” इल्ला आनी नेंका वाड बेग्गे कीरली आन्या, “यवारकी गुम्माल उंडाय वार इनाला.”
9आप्पुड वान शिष्यल वान आडगीर, इ उदाहरणदी अर्थ येम उंडाद? 10मंग येशुड आन्या, “परमेश्वर राज्यलोन रहस्यल तेल्चेद ज्ञान मिक इच्चीनेद उंडाद, पण बाकी मंदीक आदी उदाहरणला शप्पीनेद उंडाद, दिनिचांग की वारकी कमशीगास पण सुडाराद इंगा इनीगास पण तेल्वाराद.#मत्तय 4:11; यशया 6:9-10. 11आ उदाहरणदी अर्थ इल्ला उंडाद बी इदी परमेश्वरदी वचन उंडाद. 12इंगा दावा मिंदा फडीने बी आ मंदी उंडार, यवार वचन इंटार, पण वार विश्वास फेट्टी वारदी तारण कावाराद आंका शैतान वच्ची वार अंतकरण लोन्केल वचन तिस्कुंटाड. 13खडकुला मिंदा फडीने बी आ मंदी उंडार, यवार वचन इनीन नग्रेम दान आनंदता स्वीकार शेस्तार, पण वारकी मुळ्ळु लेकुंटाय; वार काही वेळ नंताक विश्वास फेटतार इंगा परीक्षा आय्येताप्पुड फडी फोयतार. 14इंगा मुंडला झुडपुलाला फडीने बी आ मंदी उंडार, यवार वचन इंटार, पण मुंदारकी फोई चिंता, धन इंगा जीवनलोन सुखुमला फसाशी फोयतार इंगा जास्त फळलु इयार. 15पण मंची भुमी मिंदा फडीने बी आ मंदी उंडार, यवार वचन इनी आदी शिंगार इंगा निष्कपट अंतकरणला घट्ट फट्टी फेटतार इंगा धीर्यामता फंटा इस्तार.
दिवा मिंदकेल धडा
मार्क 4:21-25
16 यवार पण दिव्वा आंची बतकुला किंदा मुशी फेट्टार लेकाते पलंग किंदा फेट्टार तर लोनीक वच्चेतोनकी यलगु कमसाला आंका आदी दिव्वा फेट्टे जागाला फेटतार. 17येनटीक की प्रगट काक फोई इल्ला येमीच मुशीनेद लेद इंगा यरका काक फोई लेकाते प्रगट काक फोई इल्ला येमीच दागीनेद लेद. 18दिनिचांग मीर यल्ला इंटार दिन बद्दल सावध उंडना, येनटीक की यवार देगार उंडाद वारकी इच्चेदेंक वच्ची इंगा यवार देगार लेद वान देगार येम उंडाद आंका वानकी वाटास्ताद आदी पण वान देगाटेल तिस्कुनेदेंक वच्ची.”
प्रभु येशुनदी परिवार
मत्तय 12:46-50; मार्क 3:31-35
19आप्पुड येशुन आम्मा इंगा तम्मुळ्ळु वान देगार वच्चीर इंगा गर्दी इचांग वारकी वान देगार लोनीक फोवा दाकुंदु. 20आप्पुड यवार तरी वानकी शप्पीर, नी आम्मा इंगा नी तम्मुळ्ळु निन्नु भेटाशेदेंक बैट्या नीला फडनार. 21इंगा वाड वारकी उत्तर इच्ची आन्या, “परमेश्वर वचन इनेतोर इंगा पाळाशेतोर इरे ना आम्मा इंगा तम्मुळ्ळु.”
येशु सुटुर घालीन शांत शेस्ताड
22आ दिनमुलाला इल्ला आय्या की, येशुड वान शिष्यला जताक नावला कुसन्या इंगा “मनाम सरोवर आतुक फदाम” इल्ला वाड वारनी आन्या इंगा वार नाव तोल्का यल्लीर. 23मंग वार नाव तोलेतापुड येशुड फंडकुन्या. मंग सरोवरला फेद्दाद सुटुरघाली इड्या इंगा नाव नेळाता निंडेदेंक आंट्या इंगा वार संकटला फडीर. 24आप्पुड वार येशुन देगार वच्ची वान लेपी आनीर, गुरुजी, मिम मुनगुतुनाम. आप्पुड वाड निद्दारलेल लेशी घालीन इंगा नेळा लाटलान धमकाय मत्या; मंग आदी थांबाशी शांत आय फोया. 25आप्पुड वाड वारनी आन्या, “मिद विश्वास यंदु उंडाद?” इंगा वार यरस्केन चकीत आय फोईर इंगा वगामेगारनी आनीर, इड उंडाड तरी यवाड? घालीक इंगा नेळाक पण आज्ञा इस्ताड इंगा आय इनदी इंटाय.
गरसेकर प्रदेशलोन दैयाम फट्टीनोड
मत्तय 8:28; मार्क 5:1-20
26मंग येशुड इंगा वान शिष्यल नावला कुसनी गालील सरोवर मुंदारकी गरसेकर प्रदेशकी वच्चीर. 27इंगा आंदुक वच्चीनेंका येशुड नावलेल किंदीक दिग्या, आप्पुड उळ्योन्ट्योड वगा मनशी वानकी भेटाशा; वानकी शेंगेम दैयाल फट्टीन्या इंगा वाड शेंगेम यंडलाकेल बट्टाल फेटकुना लेकुंड्या इंगा वाड इंटल्या निलवाकुंदु तर वाड कबरला नीलस्तुन्या. 28आप्पुड वाड येशुन सुशी शेंगेम कीरल्या इंगा वान मुंदार फडी बेग्गे आन्या, हे येशु, परात्पर परमेश्वर कोडका, नाद नी जताक येम संबंध? निन नीक विनंती शेस्तान, नाक त्रास इयाक. 29येनटीक की वाड अशुद्ध आत्माक आ मनशीलेल यल्ली फोयेद आज्ञा इस्तुन्या; दिनिचांग की आदी वानकी शेंगेम तुकुल फट्टीन्या; इंगा मंदी आ मनशीन पहाराला फेट्टी साखळीलाता इंगा बेड्यालता कटतुनीर पण वाड आय बंधनलु तेंपकाडदु इंगा दैयाल वान मरु भुमीला फारामतदु. 30येशुड वान आडग्या, “नी फेर येम?” आप्पुड वाड आन्या, सैन्य, येनटीक की वान फयलोंग शेंगेम दैयाल दुरीन्या. 31नु माक अगाध कुपलोंग फोयेद आज्ञा इयाक, इल्ला आय दैयाल वानकी विनंती शेस्तुन्या. 32आप्पुड आंदु कोंडा मिंदा फंदुलाद फेद्दाद खांड मेस्तुन्या; इंगा आटला लोंग दुरदेंक नु माक परवानगी इ, इल्ला आय विनंती शेशा. मंग वाड आटलाक परवानगी इच्या. 33आप्पुड आय दैयाल आ मनशी लोन्केल यल्ली आ फंदुलालोंग दुऱ्या इंगा आदी खांड फारका फोई कंटाम मिंदकेल किंदा सरोवरला फड्या इंगा नेळाला मुनगी सच्ची फोया. 34मंग फंदुल मेपेतोर येम आय्या आदी सुशी फारीर इंगा वार आदी नगरलाला इंगा शेलाला फोई आंदारकी शप्पीर. 35आप्पुड येम आयन्या आदी सुशेदेंक आंदार येशुन देगार वच्चीर इंगा या मनशी लोन्केल दैयाल यल्लीन्या, आ मनशी बट्टाल फेटकुनीनोड इंगा शुद्धी मिंदीक वच्चीनोड इल्ला येशुन काळा देगार कुसनीनेद वारकी कमशा; इंगा वार यरस्कुनीर. 36इंगा यवार इदी सुशीनीर वार वाड दैयाम फट्टीनोड यल्ला बागा आय्या इदी वारकी शप्पीर. 37आप्पुड गरसेकर प्रदेशलोन इंगा दान आजुबाजुक निलचेतोर आंता मंदी वानकी विनंती शेशीर की नु मा देगाटेल यल्ली फो, येनटीक की वार शेंगेम यरस्कुन्नीर. मंग वाड वापस फोयेदेंक नावला कुसन्या. 38आप्पुड या मनशी लोन्केल दैयाल यल्लीन्या, वाड नन्नु नी जताक निलवानी आंका येशुनकी विनंती शेयदु पण वाड वान आन्या. 39“नु नी इल्लुक वापस फो इंगा परमेश्वर नी इचांग यंता फेद्दाद फनी शेशा आदी शप.” मंग वाड फोई येशुड वान इचांग यंता फेद्दाद फनी शेशीन्या दान बद्दल उळ्या आंदारकी शप्पेदेंक आंट्या.
याईर कुतुर इंगा रक्तस्त्रावी आंडीद
40मंग येशुड वापस वच्ची नेंका मंदी वानदी आनंदता स्वागत शेशी, येनटीक की वार आंदार वानदी दावा सुदुर. 41आप्पुड सुडना, याईर फेरोड वगा मनशी वच्या; वाड यहुदी सभास्थानलोन अधिकारी उंड्या; इंगा वाड येशुन काळ मोक्की, नु ना इल्लुक दा, इल्ला वानकी विनंती शेशा.
42येनटीक की वानकी बारा यंडलाद वगा कुतुर उंड्या इंगा आदी सच्चेदेंक टेकाशीन्या. मंग वाड फोयेताप्पुड गर्दी इचांग मंदी वान मिंदा फडेदेंक आंटीर. 43मंग वगाट आंडीद यादानकी बारा यंडलाकेल रक्तस्त्राव आयदु, आदी दानदी आंता दुड्डु वैद्यला मिंदा खर्च शेशी पण यवार तीकेलुच बागा कालेकुंड्या, 44आदी येशुन यंकाटेल वच्ची वान बट्टान मुट्ट्या इंगा लगेच दानदी रक्तस्त्राव बंद आय फोया. 45मंग येशुड आन्या, “नन्नु यवार स्पर्श शेशीर?” आप्पुड आंदार आनीर मिम शेयालेद, मंग पेत्र इंगा बाकी शिष्यल वान आनीर, हे गुरुजी, आंता मंदी निन्नु घेराशी नी मिंदा फडतुनार. 46आप्पुड येशु आन्या, “यवार तरी नन्नु स्पर्श शेशीर, येनटीक की ना फय लोन्केल सामर्थ्य यल्या इदी नाक तेल्चीनाद.” 47यप्पुड आदी आंडीद सुशा की निन दागी शकायान, आप्पुड आदी, थरथर नडगुकेन येशुन देगार वच्या इंगा वान मुंदार बोरकाला फडी, आदी या कारण इचांग वान स्पर्श शेशा इंगा लगेच बागा आय्या, इदी आंता आदी आंता मंदी मुंदार शप्या. 48आप्पुड येशुड दान आन्या, “आनबिडा, नी विश्वासता नीद तारण आयनाद. शांतीता फो.”
49येशुड माटलाडेताप्पुड सभास्थानलोन अधिकारी इल्लुकेल यवाड तरी वच्या इंगा आन्या. नी कुतुर सच्ची फोयनाद; गुरुजीक त्रास इयाक. 50पण येशुड आदी इनी वानकी उत्तर इच्या, “यरस्कुनाक, फक्त विश्वास फेट, आंटे आदी बागा आय्यी.” 51मंग इंटल्योंग वच्ची नेंका पेत्र, योहान, याकोब इंगा आनबिडा आब्बान आम्मान इडशी इंगा यवारनीच येशुड वान जताक लोनीक दानीयालेद. 52इंगा आंदार दान इचांग येडशीगास शोक शेयदुर, पण वाड आन्या, “येडवाकुंडा, येनटीक की आदी सय्यालेद, तर फंडकुंडाद.” 53आदी सच्चीनेद उंडाद इदी सुशी आंदार वार नग्गेदेंक आंटीर. 54पण वाड दानदी शेय शेतल्या तिस्केन, दानकी आवाज इच्ची आन्या, “बाई, लेय.” 55आप्पुड दानदी आत्मा वापस वच्या इंगा आदी लगेच लेशा; मंग आबडाक तिनेदेंक इंडा आंका वाड वारकी आज्ञा इच्या. 56इंगा दान आब्बाड आम्मा आश्चर्य चकीत आय फोईर; पण वाड वारकी चेतावनी इच्या की इंदु येम आय्या आदी यवारकीच शप्पाकुंडा.
Currently Selected:
LUK 8: WNT
Highlight
Share
Compare
Copy
Want to have your highlights saved across all your devices? Sign up or sign in
